Ibaver I Mba Yôôn Tartor

“Ú Gbidye Namba u̱ Sha Mi Ga”

KASEV mbagenev ken gar u Johannesburg, shin South Africa, Leslie man Caroline yange ve lu eren shiada sha waya u gbidyen hen ior mba ve mem tom u uke u eren ve tem twev hen gar u i we igyar, i sende ihinda na yô, ngura a er a gema a na ugen. Yange ve zua a ior kpuaa tseegh hen ya shi fa gban ior mba shon ishima a loho ve u Mbakristu la ga, nahan ishima taver Caroline zum u kwase ugen vengese yô.

Caroline pine ér: “Ka zan kwase u Via u Via laa?”

Imo i leghlegh due na mlumun nahan ér: “Ei, he, ka mo kwase u Via. Ú gbidye namba u̱ sha mi ga.”

Er Caroline yange ongo imo na i leghlegh la yô, a kaa wener: “Gba den kera tsô, de maa m pase ú kwagh u m soo u ôron kwase u Via u Via la.” Nahan maa za hemen u ôron kwagh u averen a Tartor u Aôndo u ú ve la. Er yange er mhen u va nan un antakerada u i yer ér Kanyi Aôndo a Soo her Avese? la been kera yô, Kwase u Via la kaa wener: “Kpa de m pine yôô, kanyi kwaghaôndo ú lu kere?”

Caroline gema na mlumun ér: “Se mba Mbashiada mba Yehova.”

“Ateti, ei, m soo kwaghaôndo u ngula ga! M soo u zuan ishigh a we ga.”

Caroline gema zamber wener: “Kpa kwase u Via, ken atô u miniti mba ve kar 20 la, m tema imôngo a we sha kwagh u ishimaveren i vesen i doon tsung shi m tese ú kwagh u ica a gba ga tsô Tartor u Aôndo ua er sha ci uumace la cii ken Bibilo. Akaa ne shen a doo ú ishima u ungwan je—i sagher we iyol—shi ú soo u ungwan seer kpaa. Kpa, sha mimi yô, ú fa kwagh u Mbashiada mba Yehova za kighir nena? Aluer ú gba angev yô, ka hen or u sôron akaahendan ú za yee? Er nan ú nem ian wer m pase ú kwagh u Mbashiada mba Yehova ve ne jighjigh a mi la ga?”

Tamber deghôô yô, ikyenge i ngula gema kaa ér: “Beem er ú kaa vough yô. Gba van van je. Kpa fa wer mayange je, ú fatyô u geman mo ga!”

Caroline gema kaa ér: “Kwase u Via, mea soo a soo u geman we je kpa mayange me fatyô ga.” Ka Yehova tseegh una fatyô u eren kwagh la ye.”

Vannya u yange za u za nan un antakerada la yange due doo kpishi, shi kwase u Via (Betty) yange lumun ér i hide shi i va un inya kwagen kpaa. Caroline za hidi va nyer yô, Betty kaa a na ér, un lôhô kasev mba ve ye kwagh imôngo la ér un ngu teman imôngo vea Mbashiada mba Yehova. Ve pine ér: “Á er nan ve ú er imbakwagh la nahana? Ior mba Yesu kpa ve ne un jighjigh ga la!” Ve lu ôron je haan ave sha lanshima.

Caroline maa kera ngôôr ga je maa umbur Betty jingirkwagh ken kwaghôron ve u masetyô u yange ve lam sha kwagh u Tartor u Aôndo la.

Caroline pine ér: “Ka ana nana lu Tor u ú?”

Betty gema na mlumun ér: “Á lu Yesu ga, a lu ana.”

Caroline gema kever wener: “Ú kaa kpoo.” Maa a za hemen u pasen ér Mbashiada mba Yehova na jighjigh ér Yesu ka Wan u Aôndo, kpa ngu ityough kwagh môm vea Aôndo er ka Mbautar nahan ga.—Marku 13:32; Luka 22:42; Yohane 14:28.

Er i seer za sôron Betty sha anshighe kpuaa yô, ikyav mase tesen wang ér shin er yange veren ishima shi luun saan saan nahan kpaa, kera gba lun dedoo ga. Yange lu a kyansa, nahan lu a mciem ér un ngu kpen. A kaa wener: “M tôm mer yange ma m ungwa akaa ne tsuaa anyom ma a kar hegen sha er ma m lu ken kwaghaôndo wou ne yô.” Caroline sur un ishima sha u tesen un avur a ruamabera a a er kwagh u kuugh inja er ka mnyam ma or ka nan yav kpum kpum ma or nana va fatyô u shi nderen shin ku yô. (Yohane 11:11, 25) Kwagh ne yange taver Betty ishima kpishi, hegen ne ngu a iember sha mtim u i lu timen ken Bibilo vea na kpoghuloo la. Ka mvihiyol na u a lu zan un iyol la tseegh a gur un inya a kera ker cio u zan mbamkombo ken Iyou i Tartor ga ye.

Caroline kaa wener: “Ikyav tesem wanger wanger ér mbatyomov mba hemen tom ne. ‘Namba u yange i gbidye waya u yilan’ Betty a mi la lu sha mlan, man gema nenge a se yô, ngu anyom 89!”—Mpase 14:6.