U Lun Wang Ka Kwagh u Injaa Nan Je?

IOR mba a mnenge kposo kposo sha kwagh u mlu u wang la. Ikyav i tesen yô, ngô ka nana kaa a wanye u cukuu ér nana̱ za ôr ave man ishigh yô, alaghga wanye la nana hen ér u za mirin ave shin mnger shi nulugh zwa la tseegh kpa kuma. Kpa Ngô ti fa er heela tseegh i kom ga yô. Una kôr wan la una hide a yem a na shin kwa una za kile un ave man ishigh, una wa icahur una elegh sha mnger—wan la nana̱ lu mlia zever zever je kpaa!

Kwagh u a lu yô, atindi a mlu u wang nga kwagh môm sha tar cii ga, shi ior ka ve vese a mbamhen vev sha kwagh u mlu u wang kposo kposo. Tsuaa la, ken ityar kpishi akôngo a imakeranta a lun wang la yange a wase mbayevmakeranta u henen u lun wang. Ityembe i imakeranta igenegh mgbough a ihôghonouv man abemberakaa ainge je hingir er ka ijiir i haan ihôghonouv her nahan, kera bee ajiir a numben shin leghem igbira iyolough her ga. Man gema ken ayou a nyôron makeranta di ye? Daren ka or u kuran kôleeji ken tar u Austria, a kaa ér: “Ken klase je kpa se mba nengen a hôngor hegen.” Ka a̱ kaa a mbayev makeranta mbagen ér: “Tôô kwagh la za ta kera” shin “Kile kwagh la sha” yô, ve tôô ér ka mtsaha je i lu nan ve ye. Mzeyol u a gem a lu yô, atica agenegh gema tembe esen hingir ve kwagh u nan mtsaha a mi.

Sha vegher ugenegh yô, mbaganden kpa mba fe lun ikyav i tesen i dedoo sha kwagh u mlu u wang ga, ka a̱ lu ken uma ve u ayange ayange shin ken kpenga u eren kpaa. Ikyav i tesen yô, ajiir kpishi a ior ve kohol her ka a lu côu côu, a doo ashe u kenger ga. Ikômpeni igen ka i vihi mlu u ikyasen la. Nahan kpa, ikômpeni man ikpenga ngi gbe karen tsô vihin mlu u wang la ga, ka ior ve eren kwagh la ye. Er hua a lu kwagh u vesen u a ne mvihi u mlu u wang sha tar cii shi a ve a mbamzeyol kpishi nahan kpa, aeren a hwangeregh a ior ve eren kpa nga ve a mzeyol. Orgen u ngise hemen tar u Commonwealth u Australia kpa yange lumun a kwagh u i kur heen ne, yange kaa ér: “Ka a̱ ôron kwagh u mkpeyol u ior cii yô, ka kwagh u mlu u wang u hanma or i lu ôron ye, nomsoor man kwase man wanye cii.”

Nahan je kpa, sha mnenge u mbagenev yô, u lun wang ka kwagh u hanma or ikyangegh, ka kwagh u orgen nana wa ave sha mi ga. Ka nahan mimi?

Mlu wang ngu a inja kpishi sha gbaa u kwaghyan wase la—a lu sea yam un ken kasua shin sea lu yan un ken ma hôtel shin a̱ lu hen ya u ma huror wase kpaa. I ver ishima ér ior mba yôron iwer shin mba tôôn í  duen a mi sha tembe mbara ve̱ lu wang, mshi a̱ de lu ken ave ga. Il i sha ave—a̱ lu sha ave ase shin a̱ ve kpaa—ia fatyô u nan iangev kpishi. Gema ken ayouacii di ye—ijiir i se hembe veren ishima ser i̱ hemba lun wang cii la di ye? Antakerada u nan abaver a tweregh u í yer ér The New England Journal of Medicine la pase ér alaghga a lu mbatwerev man mba wasen mbatwerev mbà eren twer a il sha ave ken ayouacii ve ne ve mba i ker ve gambe ken ayouacii la ka ve tôô iangev mbi tsaren mbi hanma inyom ka i vihi inyaregh ki kuman udola udubu udubu u sôron la ye. Sha nahan yô ka sha inja je se ver ishima ser ma or a̱ de anger mkpeyol wase sha hwanger u nan ga ye.

Shi ka kwagh u vihin tsung aluer or nan hôngor mngerem asev yô, nana̱ er sha apera shin a lu sha mlan je kpaa. Man a cier se iyol u zenden angahar gbilin sha waarawa hen kpe mnger hen ape alaghga or á nenge a ijôanulaa i mba kuman mcimbim sha inja ga kua mbagenev ve undu sha mi la gaa? Alaghga mpin u una hemba lun se a inja cii je yô ér: Mba henen u eren a uya asev wang kpa?

Suellen Hoy pine ken takerada na u a nger i yer ú ér Chasing Dirt la wener: “Shi se mba wang er ngise se lun la je kpa?” A na mlumun ér: “Se mba ga.” A kaa ér ityôkyaa i vesen yô ka mgem u se zeren geman aeren ase a mbagenev hen ityô la. Er ior ve kera fe lun a shighe u teman hen ya ga yô, ka ve kimbi orgen kposo inyaregh u eren ve tom u sôron ya la. Sha nahan yô, u sôron akôngo lun wang la kera ka ior kwagh u vesen ga. Orgen kaa ér: “Kwagh gbam u kiren kwa wam u ôôn iyol ga—ka iyol yam tseegh kwagh a gbem sha mi ye. Aluer ya wam ngu ker côu côu kpa, iyol yam di tsô yô ngi wang.”

Kpa mlu u wang hemba di u lun sha ashe tsembelee la. Ka kwagh u a we mkpeyol wase cii ker yô. Shi a wa mlu u mhen asev man mlu u ishima yase ú a kua aeren ase man mcivir asev cii ker la. De se nenge er kwagh ne a lu nahan la.