Mbampin mba Mbaôron Takerada Ne Ve Pin La

Myen u iniunkwase Maria la yange bende a mjir u i jile Yesu la sha gbenda u vihin shinii?

Icighan ngeren ôr kwagh u “mmar u Yesu” la ér: “Zum u Yosev lu sôôr a sôôr ngô Na, Maria, man er ve lu a zua ga je tsô, i nenge un a iyav sha Icighan Jijingi.” (Mateu 1:18) Sha kpôô yô, yange icighan jijingi u Aôndo er zege tom sha iyav mbu Maria wa la.

Gema di sha kwagh u Maria yee? Yange aji na a jilen iyol la lu ave ken iyav nav mbu wan mbura je kpa? Sha kwagh u yange Aôndo tôndo zwa a Aberaham man Isaka man Yakob kua Tor Davidi—ve mba ve lu uter mba Maria la yô—lu u wan u a mar la una lu vor ve jim jim. (Genese 22:18; 26:24; 28:10-14; 49:10; 2 Samuel 7:16) I lu nahan ga yô, wan u yange ma i mar sha ikyev i Maria la yange ma lu or u yan dyako u uityendezwa mba Aôndo er laa? Nahan, gba u una lu wan na jim jim.—Luka 3:23-34.

Ortyom u Yehova ande hen iniunkwase Maria, kaa a na ér: “De cie ga, Maria, gadia u zua a mrumun u sha mhôôn her Aôndo. Nenge, ú va wa iyav, ú mar wan u nomso, ú ii Un iti wer Yesu.” (Luka 1:30, 31) Iji ka í vande jilen iyol kera ve kwase nan wa iyav ye. Alaghga Yehova Aôndo yange er iji i ken sagh u Maria jile iyol, sha u musan uma u Wan na u môm môm la ken mlu u jijingi van a mi shin tar ne.—Mbagalatia 4:4.

Wan u i lu̱ kwase u yinan wa iyav nav sha inja gbenda ngin ne nahan, una fatyô u lun vough, a isholibo shio ken mlu u sha iyol i inyam man awambe ne kpa? Zum u mlu u vough a zough vea myen yô, iertom i atindi a sha kwagh u mar la ka a lu nena? Umbur wer, ka icighan jijingi yange i yar tom a mi ve i musan tahav mbu uma u vough u Wan u Aôndo la, ve yange i jile iyav mbura ye. Kwagh ne yange hemba mlu u myen u ken aji a jilen iyol a Maria la, nahan mbu wa imaagh ki aveghemakaa a lun vough la sha mhii je.

Er i̱ lu cii kpa, se na jighjigh ser iertom i icighan jijingi u Aôndo hen shighe la yange wase sha u awashima u Aôndo a iv sha mi yô. Ortyom Gaberiel yange kaa a Maria ér: “Icighan Jijingi Una sen sha a we, man agee a Uhembansha la kpaa aa kase u; ka sha ci u nahan man Un u á mar Un la á yilan Un er Icighanwan u Aôndo ye.” (Luka 1:35) Een, icighan jijingi u Aôndo yange wase sha er ma myen shin ma kwagh u vihin una bende a wan u i jile un lu ken uya la ga.

Nahan tsume ga, Yesu yange fa ér ka Ter na u sha la á ne un uma na u sha inja i orumace u vough la ye, ka ma or ga. Yehova ‘sôr iyol’ sha ci na, man sha mimi yô—hii shighe u i jile Yesu la je—lu a ‘acôghor a wan iyol ga, shi lu paleghaa a mbaasorabo’ kpaa.—Mbaheberu 7:26; 10:5.

[Picture on page 9]

“Ú va wa iyav” ú mar wan u nomso”