Doo u Ú Tema ken mkpeyolo?

ALAGHGA ior kpishi vea hen ér ka kwagh u civirigh u mbagenev nengen or ér nan ngu or u nan tem ken mkpeyol, or u í nenge nan ér nan keren iyongo ga, u̱ nan lu inja hang ga, u̱ kwagh kpa a gbe nan ga la. Nahan kpa, kwagh ugen ngu sha gbar u or lun ken mkpeyol la. Bibilo kaa ér: “Mkpeyol u abumeaior kpaa una tim a kera.” (Anzaakaa 1:32) Ikyav i kwagh ne ér nyi?

Mbamgem mba Bibilo mbagenev nger asemberatii a á pase ishemberti i ken zwa Heberu ne jim jim yô, ér ka “u wan ikyo sha kwagh ga” (American Standard Version), “mba mlu ve a kom ve yô” (The New American Bible), man “mba ve gbe teman tsô” la. (The New English Bible) Sha gbar ne yô, í zua mkpeyol sha hwev man ikyo i wan sha kwagh ga jimin cii la, man kwagh ne gema zua sha lan shin ibumegh kpaa.

Yange kwagh gba Mbakristu mba ken tiônnongo u Laodishia mba sha derianyom u hiihii la sha mbamyen vev mba ken jijingi la ga, shin ve wa ikyo sha ve kpaa ga. Ve lu tan ave vanger sha mlan kaan ér “ma kwagh kera ban [se] ga.” Yesu Kristu kôôm ve, kaa a ve ér ve gema ishima ve tese gbashima u Orkristu la.—Mpase 3:14-19.

Ior mba sha ayange a Noa la kpaa, lu a ieren i teman ken mkpeyol hunden ishima kera la. Akaa a taregh a uma la iv ken a ve, “ve lu yan akaa, man akaa, eren kasev, nan kasev ken unoo . . . , ve fa ga zan zan mngerem ma deemee va, va kuwa a ve cii.” Yesu shi seer ôron wener: “Kape m-ande u Wan u or kpaa una lu la.”—Mateu 24:37-39.

Akaaôron a profeti a Bibilo a á kure shami ne tese ér se mba ken shighe u “m-ande u Wan u or,” ka Yesu Kristu je la. Mayange je se hingir nen mba kwagh a gbe ve ga, shi ve we ikyo sha kwagh kpaa ga, mba mlu ve a kom ve la ga—ka u teman ken mkpeyol sha gbenda u sha mi ga je la.—Luka 21:29-36.