Mbampin mba Mbaôron Takerada Ne Ve Pin La

Doo u se kure ken ishima sha kwagh u Mpase 20:8 a ôr la ser ingyegh ki ior mba Satan una va tsugh ve ken ikyaren i masetyô la kia ngee je a gande ôrono?

Mpase 20:8 pase numtan u masetyô u Satan una ta sha ior mba vea lu shin tar sha mkur u hemen u anyom dubu u Tartor u Mesiya la. Ivur la ôr kwagh u Satan nahan ér: “Una due sha u tsughun akuraior a ken a zongo a tar aa anyiin la, ka Gogi man Magogi je la, ka sha u una kohol ve sha ci utya. Ingeegh vegh kuma er waarawa u shin zegemnger nahan.”

Shin er mzehemen a lu sha m-ertom man ikyav mbi kwaghfan u sangen yeke nahan kpa, mba̱ á fatyô u fan ingyegh ki “waarawa u shin zegemnger” jighilii ga. Nahan se fatyô u kaan ser ishemberkwaghôron ne tile sha ityough ki ingyegh ki i fe ki ga shin í fetyô u fan ki jighilii ga yô. Kpa kwagh ne tese ér ingyegh kin ngee kpishi shi ki gande ôron man ka ingyegh ki or a cihi a fa sha won ga shinii, shin ka a ka di ingyegh ki i fe ki ga, ki kí lu akuma akuma shin ki or a fatyô u ôron yôô?

Í yar tom a ishemberkwaghôron i “er waarawa u shin zegemnger” la sha igbenda kpishi ken Bibilo. U tesen ikyav yô, i̱ ôr ken Genese 41:49 nahan ér: “Yosev koso samuyia er waarawa u zegemnger nahan, ngee je i de u ôron iyenge, gadia gande u ôron.” Heen ne, ka iyenge i i gande u ôron la i̱ lu ôron kwagh sha mi ye. Yehova kpa yange ôr kwagh nahan, á kaa wener: “Er á fatyô u ôron akum a Sha ga nahan, man waarawa u zegemnger kpaa á fatyô u karen u ga, kape Me seer ingeegh ki vor u Davidi wanakiriki Wam” je la. Er mimi je á fatyô u ôron asan a sha man waarawa u zegemnger ga nahan, mimi je kape Yehova una kure ityendezwa na a Davidi keng keng je la.—Yeremia 33:22.

Ikyav i ishemberkwaghôron i “waarawa u shin kpezegemnger” la ashighe kpishi ka i lu kwagh u a fatyô u ôron man kwagh u a ngee kpishi shin a kehe yô. Ishima yange i nyian Mbaiserael mba ve lu ken Gilgal la kpishi sha ci u ikyumutya i Mbafiliti i yange i kohol ken Mikemashi i yange i lu “er waarawa u shin kpezegemnger nahan” la. (1 Samuel 13:5, 6; Mbaajiriv 7:12) “Aôndo na Solomon kwaghfan man mkav kpishi je, kua ishima i bughun, ngee er waarawa u hen kpezegemnger yô.” (1 Utor 4:29) Shin er akaa a i ôr heen ne cii yange ngee nahan kpa a lu a ikighir.

Ishemberkwaghôron i “waarawa u shin zegemnger” la shi ia fatyô u tilen sha ityough ki ingyegh ki i fe ki ga, kpa ki ngee ga yô. Yehova yange kaa a Aberaham wener: “Me seer tsombor [vor] wou iyenge er asan a Sha man er waarawa u shin kpezegemnger nahan.” (Genese 22:17) Zum u Yehova lu kimbir ityendezwa ne a wan u wan u Aberaham, Yakob yô, á yar tom a ishemberkwaghôron i “vuulevu u hen inya,” la, man zum u Yakob va ôr kwagh sha kwagh ne yô, á yila ér “waarawa u zegemnger.” (Genese 28:14; 32:12) Er hanma kwagh yange va lu nahan, dugh Yesu kera je kpa, “vor” u Aberaham la ngu ingyegh 144,000, man Yesu yila ú ér “anikumuile u kpeghee.”—Luka 12:32; Mbagalatia 3:16, 29; Mpase 7:4; 14:1, 3.

Kanyi se hen sha akav a tesen nee? Se hen ser ikyav ishemberkwaghôron i “er waarawa u shin zegemnger” la ka ingyegh ki kí gande ôron, ki kí ngee kpishi je i lu kwagh u a tsa sha won a fa ga la ga; shi ka hanma shighe cii ka i yar tom a ishemberkwaghôron ne u pasen kwagh u a ngee shin a kehe kpishi ga. Ashighe kpishi ishember ne ka i tile sha ityough ki ingyegh ki i fe ga, kpa i lu ki a fatyô u ôron yô. Nahan yô, ka shami u se nan jighjigh ser ikpelaior i hembanato i ia sue Satan ken ijime ken numtan na u masetyô sha ior mba Aôndo la ia ngee je a gande u ôron ga, kpa ia ngee akuma akuma man ia kuma u van a zayol. Nahan kpa, ma or fa ingyegh ve hegen ne ga.