Ikyaior I Í Ne Yehova Msaanyol La

Akaangeren a ahar ne hemba veren ishigh sha ikyaior i í lu Mbashiada mba Yehova yô. Nahan, se mba taver ikyaior asema ser ve̱ hen akaangeren ne zulee shi i̱ saan ve iyol u nan ikyar sha mbampin shighe u a lu timen sha á ken iaven i Henen Iyoukura ken tiônnongo la kpaa.

“Wan wam, lu orfankwagh, na i saan mo iyol, sha er me gema me kaa imo a or u a laham yô.”—Anzaakaa 27:11.

1, 2. (a) Pase er i hii ve msar u akaa a tar ne a sar ú la tseegh tsô maa i lu ikyav i tesen ér ú yina u lun Orkristu je ve ga yô. (Mbaromanu 7:21) (b) Kanyi kwagh ú hen sha ikyav i tesen i Asav laa? (Nenge akwati u sha peeji 4 la.)

 TÔÔ wer ú za kasua wer ú za yam akondo. Ú gbe yengen ikyondo yô, ishe you za gber sha ikyondo i̱ i̱ ker ú sha mtema yô. Ikyondo la nger iyol sha mar wou vough kua gbenda u í kor i̱ la kpaa, shi ishe i í nger i var sha ikyondo shon la tese ér ikyondo ne i̱ doo ishe. Nahan kpa, ú kimbir nengen i̱ doo doo. Kwagh u kpiligh we iyol yô, ú kav er ikyondo la i̱ tse i̱ kungu shin akur a i̱, shi u koron kpa i kor i̱ sha inja ga yô. Mdoo yô ikyondo ne i̱ doo, kpa í gema í er i̱ sha inja ga. Ú vihi inyaregh you sha imba kwagh u i er sha inja ga laa?

² Tôô kwagh ne kar sha shighe u alaghga kwagh una kohol we er ú lu gum Orkristu ne. Aluer ú nenge tsembelee ga yô, alaghga akaa a tar ne aa a lu er ka ikyondo nahan la aa lu ú er a doo kpishi nahan. Ikyav i tesen yô, akar a ou a ken makeranta aa lu zan uiniongo mba gurgur shi aa lu man icimbiv shi man msôrom shi keren kasev, shin kasev kpa vea lu keren nomso, shi vea lu yaven a ior mba ve lu noov vev shin kasev vev ga la. Shighe ngu u imba uma la ngi i̱ sar ú shinii? Ka i sar ú pe we kpa ma ú shi lu a imba ian i ve lu a mi laa? Aluer ka nahan yô, de gbe kuren ikyaa tsô wer we ú wa ifer, ú kuma u lun Orkristu ga ze. Kera kpa, Bibilo kaa ér tar ua fatyô u meen se tsembelee je—or u nan soo u eren ishima i Aôndo je kpaa ua de nan ga.—2 Timoteu 4:10.

3. (a) Er nan ve mzende u zendan akaa a tar ne ityô la í lu gbilinkwagha? (b) Kwasekristu ugen pase gbilinkwagh u a lu ken mzende u zendan tar ityô la nena?

³ Shi kenger tar ne doo doo e̱r ka a̱ lu ikyondo i̱ ú soo u yamen kpa ú kenger i̱ nahan. Pine iyol you wer, ‘Kanyi imba tar nee?’ Bibilo kaa ér “tar yô, ngu karen kera.” (1 Yohane 2:17) Nyityô msaanyol u tar ua na se cii kpa a lu di hila tsô. Heela tseegh ga, mba ve lee mvende u vendan Aôndo la vea zua a kwagh u ve keren yô. Sha mimi yô, mtsera tsô kpa ngu sha kwagh ne ga. Kwasekristu ugen u gba u una wa ishima a kwagh u a yer wener ka “mbamnyoon mba ka ve va sha myar u yaren tom a iyev sha inja ga la,” kaa ér: “Alaghga tar ua  dooashe shi ua sar ú kpaa. Man ua soo ér we u̱ na jighjigh wer ú fatyô u zuan a hanma kwagh ken ú a mnyoon shio. Kpa kwagh ne cii ka aie ci ca. Tar ua ver ú jande i unden sha mi, ú unden cii tsô, ua tôô jande la kera.” * Ityôkyaa i saan iyev ou ishe sha gbilinkwagh yô kanyi?

Mkor u Kuran Ve sha “Ifer”

4, 5. (a) Zum u Yesu zulum ken ku la, yange er msen hen Yehova kaa ér nyi? (b) Er nan ve msen ne yange lu sha shighe voughlo?

⁴ Er agumaior a lun Mbashiada mba Yehova ka aa kaven er tar ne ú lu a kwagh u injaa u nan ve ga yô, ve nyôr palegh u yan ikyar a ú. (Yakobu 4:4) Ú ngu môm ken ikyaior i í lu a imba jighjigh u nan ne kpa? Aluer ka nahan yô, ú kuma iwuese. Sha mimi yô, u hendan a mkighir u mbakov shi tilen kera tseer tseer wer we ú kaha kposo a mbagen la ka kwagh u ican kpishi, kpa de cie ga, ú ngu a or u wasen we.

⁵ Shighe u Yesu zulum ken ku la, a er msen wener Yehova a̱ “kura” mbahenen nav “sha ifer.” (Yohane 17:15) Yesu sôn kwagh ne lu sha inja je. Yange fa er mtil u tilen sha mimi la una lu mbahenen nav kwagh u ican tsung, a̱ lu mba ve tse shin mba ve lu iyev je kpaa yô. Sha ci u nyi? Kwagh u ú fa yô, er Yesu lu kaa nahan, mbahenen nav vea tagher a orihyom u a lu a agee shi í nengen a na ga yô—ka un a lu ‘iferor’ Satan Diabolo ye. Bibilo kaa ér jijingi u ifer ne ngu “keren or u una ya yô.”—1 Peteru 5:8.

6. Ka sha nyi se fe ser Satan ngu a mhôônom ma zungwen agumaior ga?

⁶ Tsegh ku mbayiase jimin cii tese ér, ka i maa Satan iyol u nan uumace atsan a hemban vihin cii. Nenge ase atsan a vihin tsung a Satan yange va a mi sha Yobu man tsombor na la. (Yobu 1:13-19; 2:7) Alaghga ú fatyô u umbur abaver a akaa a á hila er sha ayange a ú lu uma ne, a á tese ikyav i jijingi u ipila i Satan la yô. Diabolo ngu tan kume ningir sha, ngu keren or u una ya yô, mhôônom tsô kôr un a mbayev ga cii. Ikyav i tesen yô, sha derianyom u hiihii S.W. ne, Herode er ayom ér i̱ wua mbayevnomso mba ve lu ken Betelehem la cii, hii sha mba ve lu anyom ahar kua mba ve yina nahan kpaa. (Mateu 2:16) A̱ shi nan kpa ka Satan yange mgbegha Herode ken ijime ye—kohol cii lu sha u keren gbenda u wuan ankyundan u yange sev a av ve una hingir Mesiya u Aôndo tôndo zwa sha kwagh na, shi lu u una va a ijir i Aôndo sha ityough ki Satan la! (Genese 3:15) Ikyav tese wang ér mhôônom ma ker Satan a agumaior ga. Awashima na jighilii yô, ka u timin uumace kpishi er un fetyô la cii. Kwagh ne hemba ngun mimi hegen cii, gadia i  daa Satan sha a va gba shin tar ne, man “ishima vihi un tsung gadia a fa er shighe na a kera vese ga yô.”—Mpase 12:9, 12.

7. (a) Mlu u Yehova kaha kposo a mlu u Satan nena? (b) Yehova nenge kwagh u we ember uma la nena?

⁷ Ieren i Yehova i̱ kaha kposo a i Satan u “ishima i vihi un tsung” la, gadia Yehova mgbough a “mhôônom ma zungwen tsung.” (Luka 1:78) Un ka dooshima jim. Sha kpôô yô, Orgbanakaa er ieren shon i̱ hemban ne, je yô Bibilo kaa ér: “Aôndo ka dooshima je.” (1 Yohane 4:8) Nenge imba mkposo u a lu hen atô u aôndo u tar ne man Aôndo u ú lu a ian i civirigh i civir un ne sha wono! Er Satan a shi sha u saan ior ishe nahan kpa, Yehova yô “sar Un u mbagenev ve̱ tim ga.” (2 Peteru 3:9) Uma u hanma orumace cii ngu un iniumbe ga—kua u wou kpaa. Shighe u Yehova a lu wan se kwagh ken Mkaanem nam ér se̱ de lu ior i tar ne ga yô, gema ngu yangen se a yange ér se̱ de u ember uma ga, shi ngu yangen a yange se u zenden kera gbar gbar kpaa ga. (Yohane 15:19) Kpa gema ngu kuran we a kura sha ci u iferor la. Ter ú u sha la soo ér u̱ zua a kwagh u a doo i hembe mdoom ma ayangem kpuaa ma ken tar ú ú lu karen kera ne ca yô. Sar un pe ma ú zough a uma u a lu “uma jim” la yô—ka uma u tsôron ken paradiso shin tar je la. (1 Timoteu 6:17-19) Yehova soo wener u̱ war, man ngu taver we ishima sha gbaa ne kpaa. (1 Timoteu 2:4) Heela tseegh ga, Yehova ngu lôhôn we kwagh u vesen je. Kanyi kwagha?

“Na I Saan Mo Iyol”

8, 9. (a) Ka nyi iyua ú fatyô u nan Yehovaa? (b) E̱r kwagh u Yobu la a tese ikyav nahan, Satan ngu nahan Yehova tar nena?

⁸ I lu nahan ú yam kwagh ú gema ú er huror wou u ishima ishima iyua a mi, ú hide ú tile ú kenger nan sha ishi ú nenge er nan lu kpilighyol shi wuese kwagh shon vee? Alaghga yange ú vande teman henen sha inja iyua i ú na nan ve, á lu sha inja yô. Nahan gbidye ase kwar sha mpin ne: Kanyi iyua nahan ú na Yehova Aôndo u a lu Orgban wou laa? Alaghga sha hiihii la mhen la una lu ú tumburuu. Uumace mba kaka ne nahan vea na Uhembansha nyi? Kanyi kwagh ú nenge wer vande ngun a mi ga ve, ú za na unuu? Bibilo na mlumun ken Anzaakaa 27:11, ér: “Wan wam, lu orfankwagh, na i saan mo iyol, sha er me gema me kaa imo a or u a laham yô.”

⁹ Er alaghga ú vande fan ken Bibilo you i henen la nahan, ka Satan Diabolo a lu nahan Yehova tar ye. Á kaa wener or môm nan ngu eren Aôndo tom sha ci u a doo nan ishima yum ga, kpa ka sha ci u akaa a nana zua a mi la. Satan senge wener a lu i de ior ve ya ican yô, vea undu mcivir u mimi je a ngôôr ga. Ikyav i tesen yô, nenge kwagh u Satan lu ôr a Yehova sha kwagh u orperapera Yobu la, wener: “U wa un igyar, U kase un a ya na kua akaa a a lu a mi cii gaa? U ver tom u ave na dedoo, uzendenya nav kpaa seer kpishi shin tar. Kpa naregh ase uwegh Ough, bende akaa a a lu a mi la cii, tsô una venda U sha ishigh Yough je!”—Yobu 1:10, 11.

10. (a) Se fa ser Satan huna jighjigh u nan u Yobu man u hanma or cii nena? (b) Ú ngu a ci ken kwagh u hementor ne nena?

¹⁰ Er i pase ken Bibilo nahan, ka jighjigh u nan u Yobu tseegh Satan a hon ga, kpa shi á huna ka jighjigh u nan u ior mba ve civir Aôndo cica cii. Satan yange ngur ôron kwagh u uumace jimin cii yô, a kaa a Yehova wener: “Kwavyolough sha kwavyolough; mimi je, hanma kwagh u or [kera lu Yobu tseegh ga, kpa hingir nyityô or cii] nan lu a mi cii, nana na sha ci u uma u nan.” (Yobu 2:4) Ú nenge tom u ú lu a mi u eren sha tamenkwagh ne kpa? Er i tese ken Anzaakaa 27:11 nahan, Yehova ngu kaan ér kwagh ngu u we ú na un yô—ú paase un gbenda u una na Satan u a lu kaan un imbwase la ikyar yô. Tôô ase wer Tor u Hembancii ngu yilan we ér u̱ na ikyar sha kwagh u vesen u hemban cii u a vande hiin ica i gbe yô. Nenge tom man ian i civirigh i ú lu a mi ne sha wono! Ú fatyô u eren kwagh u Yehova a kaa ér u̱ er ne kpa? Ngise Yobu er nahan. (Yobu 2:9, 10) Yesu kpa er nahan, shi ikpelaior kpishi er kwagh ne sha ayange a tsuaa la, kua ikyaior kpaa. (Mbafilipi 2:8; Mpase 6:9) We kpa ú fatyô ú eren nahan. Kwagh u ú fa sha kwagh ne yô, ian ngi i or nana tile sha kur sha kwagh ne ga. Ieren you ia tese  vegher u ú til yô, wea lu suen imbwase i Satan la gayô ú lu suen ikyar i Yehova a lu nan la. Ka hanma vegher ú tilee?

Kwagh Wou Gba Yehova Ishima!

11, 12. Aluer ú tsua wer ú civir Yehova shin ú civir un ga yô, icile ia tenger unuu? Na mpase.

¹¹ Kwagh gba Yehova sha vegher u ú tsough u tilen laa? Ior vande tilen sha jighjigh u nan ve, sha er una na Satan ikyar gaa? Ka mimi, Diabolo kaa wener ma or môm nan civir Yehova sha ci u á doo nan ishima yum ga, kpa i tese ér kwagh u a er la ka aie. Kpa, Yehova soo ér u̱ ta ikyaa á na sha kwagh u hementor ne, gadia kwagh wou gba un ishima. Yesu kaa wener: “[Ka] ishima i Ter wen u A lu Sha la, u mbakiriki mban, mô ve nana̱ saa ga.”—Mateu 18:14.

¹² Yehova soo u fan vegher u ú tsough u tilen la. Kwagh ngu hemba heela, kwagh u ú tsough la bende a na. Bibilo pase ken igbar ér aeren a bo shin a dedoo a uumace ve eren la nga a na ishima i vihi Yehova shin i̱ doo un ker. Ikyav i tesen yô, Mbaiserael lu “bam” Yehova zum u ve lu hendan a na ciligh ciligh la. (Pasalmi 78:40, 41) Cii man Mngerem ma Deemee ma sha ayange a Noa mara ma va, zum u “isholibo i or kehe sha won” la kpa, yange ‘ishima i vihi Yehova ker.’ (Genese 6:5, 6) Hen sha kwagh u kwagh ne á lu tesen la. Aluer ú tsua gbenda u shami ga yô, ú na vanger a nyoon Orgban wou la ker kpen kpen. Kpa ngun ka u kaan ér Aôndo wa telegh shin kwagh ze un a za iyol yum ga. Kpa ka sha er ú doo un ishima shi kwagh a gbe un sha mkpeyol wou yô. Heela tseegh ga, shighe u ú er kwagh u shami yô, ka i saan Yehova iyol. Ka i saan un iyol sha er ú ne un kwagh u una na Satan ikyar la tseegh ga, kpa shi ka i saan un iyol sha er hegen ú kom u zuan a injar hen a na yô. Man ka kwagh u á lu keren u eren je la. (Mbaheberu 11:6) Nenge er Yehova Aôndo a lu Ter u dooshima sha wono!

Averen Dumbur Hegen

13. Hegen je kpa mcivir u civir Yehova la ve a averen nena?

¹³ Ka ken hemen tseegh se va zua a averen sha ci u se mba civir Yehova ga. Hegen je ikyaior kpishi i i lu Mbashiada mba Yehova yô, ngi zuan a iember man mkom, man ka sha ityôkyaa i injaa kpaa. Orpasalmi nger wener: “Uinezwa mba TER ka mba vough je, mba ne iember ken ishima.” (Pasalmi 19:8) Yehova fa kwagh u á hembe doon sha ci wase la hemba nyityô or cii. Yehova kaa sha ikyev i profeti Yesaia wener: “TER Orpaan wou, Icighan u Iserael, ngu kaan nahan er: Mo M ngu TER Aôndo wou, M tese u kwagh u una lu u a inja yô, M hemen we sha gbenda u ú zenden sha mi la. Ma u  ver ato sha atindi Am, tsô bem wou ma a lu er ifi nahan, man shi perapera wou kpaa ma a lu er agôndo a zegemnger nahan.”—Yesaia 48:17, 18.

14. Atindiakaa a ken Bibilo aa wase ú u palegh injô i gban nena?

¹⁴ Mdondo u dondon atindiakaa a ken Bibilo la una wase ú u palegh atsan man ityough ki nanden. Ikyav i tesen yô, Bibilo kaa ér mba ve jir isharen i zuan a inyaregh la ken asema ve yô ka “ve kuma ayol a ve sha atsan atô kposo kposo.” (1 Timoteu 6:9, 10) Ma or ken mbakwav wou nan ya ican i ruamabera a ter nee? Agumaior man agumaukase agen mba a anzô iyol sha ci u ve hanger ér saa vea yam ikyondo i he man ikyáv mbi sha iwavaren mbi i sember duen a mi ken kasua la keng. U̱ gban injô i lun a mtser sha mi zegenan sha u ú yam kwagh u a gande ú tahav la, ka u wan a wa iyol you ken kpan!—Anzaakaa 22:7.

15. Ka sha nyi igbenda nahan atindiakaa a ken Bibilo a kuran we sha ikyev i mbamnyoon mba ijimba i eren i ve a mi laa?

¹⁵ Shi nenge sha kwagh u ijimba i eren la. Hanma inyom yô, mbayevkasev mba lun anyom pue kar a kar tar sha won cii mba ve lu a er nom ga yô ka ve wa iyav. Mbagenev ka ve mar wan u ve iyol ve vé soo ga, shi tahav mbu nengen sha nan kpa ve lu a mi ga yô. Mbagenev di ka ve vihi iyav mbu ve we la, nahan ve ya ican kpishi sha ci u ibo i imoshima ve í ne ve sha iyav mbu ve vihi la. Shi nomso man kasev mba, mba ve zou a angev mbu tsaren sha myav u yaven a or yô, imba er mbu i yer ér AIDS la nahan. Hen or u nan fe Yehova yô, kwagh u una hemba zan nan iyol je yô a lu mpav u paven ikyar i nan ye vea Yehova la. * (Mbagalatia 5:19-21) Bibilo kaa lu sha inja je, ér: “Yevese nen idya.”—1 Mbakorinte 6:18.

U Civir ‘Aôndo u Saan Saan’ La

16. (a) Ka sha nyi se fa ser Yehova soo ér u̱ ember iyev ouwe? (b) Er nan ve Yehova a we atindi ér u̱ dondo?

¹⁶ Bibilo kaa ér Yehova ka ‘Aôndo u saan saan.’ (1 Timoteu 1:11, NW ) A soo ér we kpaa u̱ lu saan saan. Jim yô, Mkaanem nam kaa kpôô nahan ér: “Ember, wanyekwaor, sha iyev ou, ishima kpaa i̱ lu u saan saan sha ayange a u lu iyev yô.” (Orpasenkwagh 11:9) Kpa Yehova ngu a tsenga fan kwagh ken hemen, shi una fatyô u fan mzeyol u ieren yase i dedoo shin i̱ bo ia va se  a mi la kpaa. Ka nahan ve a we ú kwagh ye, ér: “Umbur u A gbe u la sha ayange a iyev ou, er ayange a bo a lu a va ga, anyom kpaa a lu a kuma ga, a ú va kaa wer: Kera gbam ishima ga la.”—Orpasenkwagh 12:1.

17, 18. Wanye Kristu ugen pase msaanyol u un lu a mi u civir Yehova la nena, man ú er nan ve ú ember er un nahana?

¹⁷ Nyian ne kpa ikyaior kpishi ngi zuan a msaanyol u kpilighyol ne sha u civir Yehova. Ikyav i tesen yô, Lina u lu anyom 15 la kaa wener: “Me fatyô u tan uwegh vanger mer, m ngu uange ga sha ci u m palegh u man taav man icimbiv mbi gban man tsô ér ityough ki gar ker la. M ngu ken tiônnongo u a tesen mo akaa a injaa a aa wasem u hendan a mkighir u Satan u kpilighyol la yô. M ngu ishigh sha saan saan sha ci u mzough imôngo u maan a maa or, u a banen ken Iyou i Tartor ga la. Kpa u hemban cii je yô, m ngu a ishimaveren i hemban cii i va lun uma gbem sha won shin tar.”

¹⁸ Agumaior a ken Kristu kpishi nga nôngon ityav tsung sha kwagh u jighjigh ne, er Lina nahan, man kwagh ne ve vé a iember kpaa. Ve kav e̱r uma ve a lu a inja shi una va lu sha kwarkyaa ken hemen yô, shin er hegen ka a lu a mbamzeyol sha ashighe agen nahan kpaa. Sha nahan yô, we kpa za hemen u civir Aôndo u a ver mkpeyol wou ken hemen la. Na sha er a saan un iyol ken ishima, man una na ú iember hegen man gbem sha won yô!—Pasalmi 5:11.

[Footnotes]

Baver We Kpa?

• Ka kwaghbo u nyi ú tagher a mi sha ikyev i ‘iferor’ Satana?

• Ú fatyô u nan sha u i̱ saan Yehova iyol nena?

• Bibilo tese ér kwagh wou gba Yehova ishima nena?

• Ka averen agen a nyi ú zua a mi sha u civir Yehovaa?

[Study Questions]

[Box on page 4]

Orperapera War Nôngon Gbeev

Asav yange lu ityagheror Levi u kuhwan kwagh ken tempel u Yehova ken Iserael sha ayange a tsuaa la. Atsam je kpa yange á dugh, í waan á ken mcivir. E̱r Asav lu a ian i civirigh ingin nahan ne je kpa, sha shighe ugen la gba tômon aeren a mbakov na mba ve civir Aôndo ga, mba ve lu peren atindi a Aôndo kpa yemen iyol ishô la. Asav mase kaan wener: “Tsô angahar a am ma a kera lu ga, shi kpuaa tsô angahar a am ma a dolough kera. Gadia m lu tômon kwagh u mbaihaghev, zum u m nenge ikôr-laghen i mbaaferev la yô.”—Pasalmi 73:2, 3.

Ken masejime yô, Asav yem ken icighanjiir u Aôndo za er msen sha mzeyol na ne. E̱r hide zua a tahav mbu nengen kwagh sha mnenge u ken jijingi yô, a kav er Yehova a ker kwaghbo ihyom nahan, shi kav wener ken hemen yô, mbaaferev man mbaperapera cii vea sunda kwagh u ve lee la. (Pasalmi 73:17-20; Mbagalatia 6:7, 8) Mimi je, mbaaferev tile sha inya i lyemen. Vea va gba ken hemen zum u Yehova una tim tar ungun la.—Mpase 21:8.

[Pictures on page 6]

Yehova soo wener i̱ kpe ú iyol, kpa Satan ver ishima u timin we kera

[Picture on page 7]

Ikyaior kpishi ngi zuan a msaanyol sha u civir Yehova vea mba ve lu Mbakristu a ve imôngo la