Ikyaior—Tom Wen Ua Hungur Yehova Ga!

“Aôndo ban a perapera ga. Tom wen ua hungur Un ga, shin dooshima u ne tese sha ci u iti Na kpaa ga er ne lu eren uicighanmbaiorov tom shi ne mba eren her kpaa.”—MBAHEBERU 6:10.

1. Takerada u ken Bibilo u Mbaheberu man Malaki la tese ér Yehova ngu a iwuese sha tom u se lu eren un la nena?

 I LU nahan ú er kwagh u dedoo a ma huror wou nahan nan sugh ú ga vee? Zum u ka wea er erdoo a or man nana̱ nenge a kwagh la ga, shin u masen gban kera je yô nana̱ hungur a hungur a kwagh la jimin cii nahan, ka i doo ken ishima ga cii. Nahan kpa, shighe u se lu eren Yehova tom a ishima yase i môm yô, kwagh ngu a lu nahan ga! Bibilo kaa ér: “Aôndo ban a perapera ga. Tom wen ua hungur Un ga, shin dooshima u ne tese sha ci u iti Na kpaa ga er ne lu eren uicighanmbaiorov tom shi ne mba eren her kpaa.” (Mbaheberu 6:10) Hen ase sha inja i kwagh ne yôô. Yehova una tôô ér un er kwagh u a lu shami ga yô, un er—isholibo jim—luun er ka u una hungur a tom u ú er shi ú lu eren un ayange ayange her la yô. Aôndo ne ka u lun a iwuese kpôô!—Malaki 3:10.

2. Kanyi i̱ ne ve tom u eren Yehova la i lu kwagh u vesene?

 ² Ú ngu a ian i civirigh shi ú ngu eren Aôndo u lun a iwuese kpishi ne tom. Aluer ú kar iorov mba nan jighjigh vea we imôngo mba ve kom er umiliôn ataratar tseegh la sha iorov ubiliôn ataratar mba ve lu shin tar la yô, ú nenge e̱r ú lu a ian i civirigh i í ze iban yum ne yô. Heela tseegh ga, m-ongo u ú lu ungwan loho u dedoo shi yaren tom sha ú la tseegh kpa tese ikyav ér kwagh wou gba Yehova ishima. Bee kera yô, Yesu kaa ér: “Ma or nana fatyô u gban van her a mo ga, saa Ter u A tindim la, Una urugh nan.” (Yohane 6:44) Een, Yehova ngu a wase ior ci ci ér ve̱ zua a mtsera sha naagh ku Kristu a ne la.

U Lun a Iwuese sha Ian i Vesen I Ú Lu a Mi La

3. Ônov mba Kora wuese ian i civirigh i ve lu a mi i eren Yehova tom la nena?

³ Er sé vande ôron ken ngeren u ken ijime la nahan, ú ngu sha ian injaa i ú na a saan Yehova iyol yô. (Anzaakaa 27:11) Kwagh ne ka kwagh u numben a mi mayange ga. Ken icighan Pasalmi ugen u ônov mba Kora nger la, ve wuese ian i civirigh i ve lu a mi i eren Yehova tom la. I kaa her ér: “Sev môm sha ityembe i sha ishigh ki iyou You yô, hemba dubu; hemba doon mo u ma m lu orkuranhunda ken iyou i Aôndo wam a u ma m lu ken utenti mba ifer la.”—Pasalmi 84:10.

4. (a) Kanyi alaghga ia na ve mbagen vea nenge ér mcivir u ve civir Yehova la a ngee a mbamyange yumu? (b) Ka sha nyi igbenda Yehova a tese ér un ngu nengen a ior mbacivir un shi una na ve injar kpaa?

⁴ Kape we kpa ka ú tôô wer ú ngu a ian i civirigh i eren Ter ú u sha tom laa? Mimi je, ashighe agen alaghga a lu se inja er mcivir u se civir Yehova la ngu yangen se u eren kwagh sha asema ase nahan. Sha mimi yô aluer ka u se dondo atindiakaa a Bibilo yô, a gba u se de ser akaa agen a̱ saa se. Nahan kpa, nyityô kwagh i Yehova a kaa ér u̱ er cii yô, á kaa ka sha ci u iwasen you. (Pasalmi 1:1-3) Heela tseegh ga, Yehova nenge a iniôngon you la shi á tese er un lu a iwuese sha jighjigh wou u nan yô. Ka mimi er yange Paulu nger nahan, wener Yehova “ne mba ve lu keren Un la injar.” (Mbaheberu 11:6) Yehova ngu keren ian i eren kwagh ne. Profeti u perapera ugen ken Iserael u sha ayange a tsuaa la kaa wener: “Ashe a TER nga jingen sha akaa a sha won cii, sha u Una pase agee Na hen mba asema a ve a lu jighelaa her a Na yô.”—2 Kroniku 16:9.

5. (a) Ka gbenda u hemban doon cii u nyi ú fatyô u tesen wer ishima you ngi vea Yehova? (b) Kanyi ia na ve á taver we u ôron ior mbagen kwagh u jighjigh u nan wouwe?

⁵ Gbenda u hemban doon u tesen wer ishima you ngi hen Yehova jighilaa yô ka u ôron ior mbagenev kwagh na. Í lu nahan ú zua a ian i ôron mbakov wou mba ken makeranta kwagh sha jighjigh wou u nan vee? Alaghga sha hiihii la, a lu ú kwagh u ican kpishi u eren kwagh ne, shi mhen la una ta ú mciem iyol. Alaghga ú pine ken ishima you wer, ‘tsô vea sem á se ye?’ ‘Vea nenge ér or fa kwaghaôndo wam la ga yum ye?’ Yesu kaa je wener ka  hanma or cii nana kegh ato a loho u Tartor ne ga. (Yohane 15:20) Nahan kpa ngun gema ka u kaan ér uma wou cii shi sha u á gban di heen we a hee kpii shi ior kpa zeren palegh we a palegh ga. Kwagh u a gem a lu yô, ior mba keghen ato a ikyaior i i lu Mbashiada kpishi, shi mbakov ve mba ne ve icivir sha mtil u ve til sha jighjigh u nan ve dông la kpaa.

“Yehova Una Wase U”

6, 7. (a) Gumkwase u lun anyom 17 yange er shiada hen mbakov na mba ken klase na nena? (b) Ú hen nyi sha kwagh u Jennifer laa?

⁶ Kpa ú er nan ve ú taver ishima ú ôr ior kwagh u jighjigh u nan wouwe? Shighe u ior ve pin ú kwagh sha kwaghaôndo wou yô, er nan ve ú tsough u ôron ve kwagh jighilii shi ôron ve sha mimi ga? Nenge ase kwagh u yange er Jennifer u a lu anyom 17 la. Á kaa wener: “M lu yan kwaghyan u atetan ken makeranta. Mbayevkasev mba ve tema sha tebul ape mo kpa m tema la ve lu lamen sha kwagh u kwaghaôndo, nahan wankwase ugen ken atô ve pinem kwaghaôndo u m lu ker yô.” Yange cier Jennifer iyol u nan ikyar sha mpin laa? A lumun wener: “Een, gadia m fa kwagh u vea er ga.” Nahan Jennifer maa er nena? Á za hemen wener: “Yange m kaa a mbayevkasev mban mer m ngu Orshiada u Yehova.” Kunda ve iyol sha hiihii la kpishi. Ikyav tese ér alaghga ve tôô ér Mbashiada mba Yehova ka ior mba i fe ve ga yô. Kwagh ne na yô ve gba pinen mo mbampin, maa m ta ve iwanger sha akaa a yange tsume ve la. Er iyange la i̱ kar kera je kpa, mbayevkasev mbagen zer van va pinen mo mbampin gbem.”

⁷ Jennifer yange vaa afanyô sha ian i un yar tom a mi u pasen ior akaa a un ne jighjigh a mi laa? Mayange ga cii! A kaa wener: “Yange saan mo iyol kpishi zum u ian i ahumbe la bee kera yô.” Hegen mbayevkasev mbara hemba fan kwagh u Mbashiada mba Yehova ve lu jighilii yô.” Kwaghwan u Jennifer a lu wan se hegen yô, wener: “Aluer ka taver we u eren shiada hen mbakov wou mba ken makeranta shin hen atica a ou yô, er msen fese. Yehova una wase ú. Á saan we iyol wer ú yar tom a ian ne sha u eren shiada.”—1 Peteru 3:15.

8. (a) Yange msen wase Nehemia shighe u tagher a mzeyol la nena? (b) Ka ashighe agen a nyi aa va ken makeranta a alaghga ú er msen kpase hen Yehova ving ni?

⁸ Ver ishima sha kwagh u Jennifer a kaa la, wener u̱ ‘er msen fese’ hen Yehova shighe u ian i dugh i pasen kwagh u ú ne jighjigh a mi yô. Ka kwagh u Nehemia, ortoonkwaghman u Tor Artashaseta u Pershia kpa yange er zum u á tagher a mzeyol je la. Ishima yange i̱ za Nehemia iyol je lu ilian ga, gadia a zua a loho ér kwagh tser Mbayuda shi í ôr un ér kpekpe u gar u Yerusalem yôhôr gba, ihinda i gar kpaa í hia ci ca cii. Tor nenge er Nehemia saan ishigh sha ga yô, nahan a pine Nehemia kwagh u a ze un iyol yô. Cii man Nehemia na mlumun sha mpin la yô, a er msen. Nahan á pine a vangertiôr wener ma i ne un ian i hiden zan ken Yerusalem za wasen u maan gar u a hingir ice la. Artashaseta venda kwagh u Nehemia sôn la ga. (Nehemia 2:1-8) Kwagh ne tese ú nyi? Aluer ian due i eren shiada sha jighjigh wou u nan man cier we iyol yum yô, de hungur ian i ú lu a mi i eren msen ving ving la ga. Peteru yange nger ér: “Gema nen ishima i nyian yen la cii, haa nen sha a Na, gadia ka Un A lu koson ne ye.”—1 Peteru 5:7; Pasalmi 55:22.

‘Waan Nen Ago sha u Né Na Imo Yô’

9. Leah u a lu anyom 13 la yange er nan ve na ior takerada u Young People Ask la je kuma ukôpi 23?

⁹ Shi nenge ase vande-eren ugen. Leah ngu anyom 13, lu ôron takerada u i yer ér Questions Young People Ask—Answers That Work * la sha ian i ahumbe a atetan ken makeranta. Á kaa wener: “Mbagen lu kenger mo, maa ica igbe ga yô ior kpishi gba va kasen mo ken ijime. Ve hii u pinen mo kwagh u takerada shon ú lu ôron yô.” Ken masejime yô, mbayevkasev unyiin kaa ér Leah a̱ va ve a kôpi u takerada u Young People Ask la. Ica i gbe ga yô, mbayevkasev mban gba samber a takerada la sha mbagenev, maa mbagen kpaa gba keren ér ma ve zough a kôpi ve. Usati mba karen kpuaa yô, Leah na mbayev mba ve ze makeranta a na imôngo la kua ahuraior a ve takerada u Young People Ask la kuma ukôpi 23. Yange taver Leah u lamen shighe u mbagenev va  pine un kwagh sha takerada u lu ôron la gaa? Yange taver un! Á kaa wener: “Sha hii la yange cier mo iyol sha hiihii la. Nahan kpa, m er msen, nahan m fa mer Yehova ngu a mo.”

10, 11. Yange hii nan ve, wankwase u ken Iserael lu wase kurutya u akumautya a ken Shiria la u fan Yehova, man hii sha shighe la je lu nyi i gema ken kurutya shono?

¹⁰ Kwagh u yange er Leah la alaghga una umbur we kwagh u yange tser wanyekwase ugen ken Iserael, u yange i kôr un kpan ken tar u Shiria la yô. Naaman, kurutya u akumautya a Shiria la lu orimande. Alaghga lu kwase na je hii iliam a wankwase u cuku la ve, va hingir u ôron un kwagh sha jighjigh u nan na ye. Yange wankwase la kaa wener: “Terem ma a lu ase hen profeti u ken Samaria la, nahan ma a bee un imande!”—2 Utor 5:1-3.

¹¹ Kwagh u wankwase u cuku ne yange ôr sha cieashe ga ne, na hingir u Naaman una va fa ér, “Aôndo ugen ngu sha won ga saa ken Iserael.” Je yô shi a bum ken ishima na wener “una kera naan mbaaôndo mbagenev nagh ku nanden shin ku sôngon ga, saa TER tsô.” (2 Utor 5:15, 17) Yehova ver ishimataver i wankwase u cuku ne doo doo. Hegen kpaa una fatyô u eren a mbayev mba kiriki nahan, shi kape una er a ve kpôô je la. Ka kwagh u yange er a Leah vough je la. Shighe ngur karen yô, mbakov na mba ken makeranta va hen a na va kaa a na ér takerada u  Young People Ask la ngu wasen ve u kôôm ieren ve. Leah kaa wener: “Saan mo iyol kpishi, gadia m fa er m lu wasen ior mbagenev u seer lun a mkav sha kwagh u Yehova shi m lu wasen ve u geman uuma vev kpaa yô.”

12. Ishima ia fatyô u taver we u pasen jighjigh u nan wou nena?

¹² We kpa akaa a fatyô u eren we vough er yange er a Jennifer man Leah nahan. Dondo kwaghwan u Peteru yange nger la, wener er se lu Mbakristu yô, doo u hanma shighe cii se ‘waan ago iyol se veren a ver sha u sé na imo sha mpin u hanma or u nana pine se ityôikaa i ishimaverenkeghen i i lu ken a vese la yô, kpa i̱ lu sha ishima i legh legh man sha mcie kpaa.’ (1 Peteru 3:15) Ú er nan ve ú er kwagh nee? Dondo ikyav i Mbakristu mba sha derianyom u hiihii mba yange ve sôn Yehova ér a̱ wase ve vea pase kwagh “vangertiôr” la. (Aerenakaa 4:29) Nahan taver ishima u ôron ior mbagenev kwagh sha jighjigh u nan wou la. Á kpiligh we iyol u nengen er kwagh ne una za a doo yô. Heela tseegh ga, ú na Yehova msaanyol ken ishima kpishi.

Icer i Vidio man Tom u ken Makeranta

13. Ka ian i nyi agumaior agenegh yange tôô sha u eren shiadaa? (Nenge ken mbaakwati mba sha peeji 11 man 12 la.)

¹³ Ikyaior kpishi ka i pase jighjigh ve u nan hen mbakov ve mba ken makeranta shin atica a ve sha u yaren tom a icer i vidio. Sha ashighe agen yô, ityom i i ne ve ken makeranta la shi ka i hingir ve ian i dedoo i wuese Yehova. Ikyav i tesen yô, mbayev nomso uhar mba lun anyom 15, mba ve cii ve lu Mbashiada mba Yehova yô, í na ve tom ken klase u lu gbar u kwaghhenen ve sha kwagh u tar u mbayiase la ér ve̱ tsua kwaghaôndo môm ken ukwaghaôndo mba sha tar cii ve̱ nger kwagh sha mi. Ve mbauhar mban cii tema ijiir i môm er mhen, nahan ve nger kwagh sha kwagh u Mbashiada mba Yehova, ve yar tom a takerada u i yer ér Jehovah’s Witnesses—Proclaimers of God’s Kingdom la. * Shi i na ve miniti utaan ér ve̱ pase kwagh u ve nger la sha  zwa a ungwa. Mba been kera yô, tica la kua mbayevmakeranta kpaa lu a mbampin kpishi mba pinen, mbampin mban na mbayev mban hide tile sha hemen u klase kuma miniti 20. Usati kar imôngo, kpa mbakov ve mba ken klase lu pinen ve mbampin sha kwagh u Mbashiada mba Yehova her tsô!

14, 15. (a) Er nan ve mcie u cian or la i lu kwaghhônono? (b) Er nan ve i gbe u ú lu a vangertiôr u ôron ior mbagenev kwagh sha akaa a ú ne jighjigh a mi laa?

¹⁴ Er uvande-eren mba i ne heen ne ve tese nahan, ú fatyô u zuan a averen kpishi sha u pasen mbagen jighjigh u nan wou er ú lu Orshiada u Yehova yô. De deen wer mcie u cian or a̱ yange ú ian i civirigh man iember i wasen mbagenev sha u ve̱ fa Yehova la ga. Bibilo kaa ér: “Mcie u cian or ka a va a kwaghhônon, kpa or u nan suur sha TER yô, nana tema doo doo.”—Anzaakaa 29:25.

¹⁵ Umbur wer, er ú lu gum Orkristu yô, ú ngu a kwagh u kwagh a gbe mbakov wou sha mi kpen kpen yô—uma u hemban doon hegen man ityendezwa i uma u tsôron gbem sha won ken hemen la. (1 Timoteu 4:8) Shi fa kpaa wer, ken tar u United States hen ape alaghga ú hen wer ior jimin cii tôô ishima kera sha kwagh u Aôndo, shin asema a ve cii har sha mfe u taregh la je kpa, mba keren fan mnenge u ior sha akaa pase wanger wanger ér ikyaior kpishi ngi eren kwaghaôndo a asenge shio, man ken atô u hanma iorov utar yô, or môm ken a ve kaa ér kwaghaôndo ka kwagh u “a hembe lun a iwasen” ken uma u nan yô. Alaghga ken avegher a tar agen kpishi kpa kwagh a lu nahan. Nahan we kpa a saan mbakov wou mba ken makeranta iyol u ungwan kwagh u ú lu a mi u ôron ve sha kwagh u Bibilo la.

Kporom hen Yehova Er Ú Lu Gumor Ne

16. Dugh u ôron ior mbagenev kwagh u Yehova sha yô, u eren ishima na la wa nyi man nyi kere?

¹⁶ Nahan kpa u̱ nan wer i̱ saan Yehova iyol la hemba u gban lamen di a lam a na tseegh la. Shi gba u ú dondon atindiakaa a na kpaa. Apostoli Yohane nger wener: “Ka dooshima u Aôndo ne, ka u se̱ kuran atindi a Na, man atindi a Na yô, a yuhwa ga.” (1 Yohane 5:3) Aluer ú kporom hen Yehova yô, ú fa er kwagh ne a lu mimi yô. Ú er nan ve ú fatyô u eren kwagh nee?

17. Ú fatyô u kporom hen Yehova nena?

¹⁷ Sôr ian ver tsembelee i ôron Bibilo man ngeren mba ve har sha Bibilo la. Er ú lu henen kwagh sha kwagh u Yehova seer la, á lu hemban heghem we u ungwan imo na shi ôron ior mbagen kwagh na kpaa. Yesu yange kaa wener: “Orinjaa ka nan due a kwagh u dedoo ken kwagh u ikoogh u ken ishima i nan je, . . . gadia ka sha m-iv u ken ishima man zwa u er kwagh ye.” (Luka 6:45) Nahan yô, iv ishima you a akaa a dedoo. Er nan ú ker gbenda u ú er kwagh ne ga? Alaghga ú hemba wan ago a zan mbamkombo ken sati u a ve ne. Awashima wou u dondon yô, i̱ lu u nan ikyar sha mpin tiônôô sha asember a a dugh ken ishima you yô. Nahan je kpa, ka a inja u shi eren sha akaa a ú lu henen la kpaa.—Mbafilipi 4:9.

18. Aluer ior mough a ahendan sha a we je kpa, kanyi ia na ve ú lu a vangertiôrô?

¹⁸ Averen a ú zua a mi sha tom u shiren Yehova la ka averen a tsan—een, ka a tsôron gbem sha won je. Sha mimi yô, alaghga ior vea hendan a we sha ashighe ashighe, shin vea laha ú ér ú ngu Orshiada u Yehova yum. Kpa hen ase sha kwagh u Mose la. Bibilo kaa ér: “A ver ashe sha injar.” (Mbaheberu 11:26) We kpa ú fatyô u lun a vangertiôr wer Yehova una na ú injar sha iniôngon you i ú lu nôngon u henen fan kwagh na, shi ôron ior mbagenev kpaa la. Sha mimi yô, mayange je una ‘hungur we ga, shin dooshima u ú tese sha ci u iti Na la kpaa ga.’—Mbaheberu 6:10.

[Footnotes]

Baver We Kpa?

• Er nan ve ú fe wer tom u ú eren la gba Yehova ishima?

• Ka igbenda i pasenkwagh ken makeranta i nyi nahan mbagenev ve nenge ér i doo?

• Ú zua a ishimataver i pasen mba ve tem ken klase a we imôngo la kwagh nena?

• Ú fatyô u kporom hen Yehova nena?

[Study Questions]

[Box/Pictures on page 11]

Mbayev Mba Kiriki Je Kpa Mba Wuese Yehova!

Mbayev mba kiriki je kpa kôr cio u eren shiada ken makeranta. Nenge ase akaa a a vande eren ne.

Amber lu anyom pue shi lu shin nongo utaan, gema lu ôron takerada sha kwagh u ipila i ior i Nazi ve er a Mbayuda zum u i lu nôngon Ityav mbi Tar cii Mbi sha II la yô. Amber za va tica na a tser u vidio u i yer ér Purple Triangles la. Lu kwagh u kpiligh tica na iyol kpishi u fan ér Mbashiada mba Yehova kpaa yange i tôv ve a ican sha shighe u Nazi la. Tica na la wa tser u vidio ne ér klase cii a̱ nenge.

Er Alexa lu anyom anigheni la je, a nger washika hen klase na u pasen ve er i hii ve una fatyô u ember iniongo i Kirimishi vea ve ga yô. Kwagh la doo tica na kpishi nahan á kaa wener Alexa a̱ ôr washika la genger genger mbayev mba hen klase na cii ve̱ ungwa shi a̱ ôr washika la ken klase mbagenev uhar kpaa! A kaa ken mkur u washika na shon wener: “I tesem u nan ior mbagenev mba jighjigh ve u nan a kaha a u wam la icivir, shi m sugh ne sha er né nem icivir sha kwagh u m tsough mer me ember Kirimishi a ven ga la kpaa.”

Eric hiin a hii nongo môm nahan maa za a takerada na u i yer ér Takerada Wam ú Akaaôron a Bibilo la za sôn ian ér una tese mbayev mba shin klase na. Tica na kaa wener: “M ngu a mhen u a hembe doon yô.” Er nan ve ú er kwaghôron môm wer klase a̱ ungwa ga?” Eric maa er nahan. Been yô, a pine wener hanma or u nan soo u zuan a kôpi u takerada shon yô nana̱ kende uwegh sha. Iorov pue kar anigheni kende ave sha kua tica na kpaa! Hegen Eric tôô wener un ngu a ijiir i eren shiada na.

Whitney u a lu anyom ataankaranyiin la ngu a iwuese kpishi sha antakerada u i yer ér Jehovah’s Witnesses and Education la *. Á kaa nahan wener: “Hanma inyom yô, ngôm ngu a na atica am antakerada ne, kpa inyom ne yô, m na ve iyol yam. M ngu a iwuese sha antakerada ne sha ci u ú na tica wam tsuam ér mo m ngu ‘wanyemakeranta u nan kom u ngohol iyua hen sati yô.’ ”

[Footnote]

[Box/Pictures on page 12]

Aan a Mbagen Ka Ve Yar Tom a Mi u Ôron Kwagh u Jighjigh u Nan Ve La

Mbagenev ka a̱ na ve tom ér ve̱ nger kwagh ken makeranta yô, ve tsua itinekwagh i ia na ve ian i eren shiada yô

Mbayevikyaior mbagen na tica ve tser u vidio shin ngeren u itinekwagh na i zough sha itinekwagh i i lu timen sha í ken klase la

Mbayevikyaior mbagen ka vea ôron Bibilo shin ngeren u a har sha Bibilo sha ian i ahumbe yô, ikyaior igen i va ve a mbampin ér ve̱ na ve mbamlumun sha mi

[Picture on page 9]

Mba ve tse ken tom ne vea fatyô u tesen agumaior gbenda u vea e̱r Yehova tom yô