Mbampin mba Mbaôron Takerada Ne Ve Pin La

Ka kwaghbo u or wuan iwa shin kpatema u nan u a lu uange tsung shin a bee iyol yôô?

Ior kpishi nenge annyamev kposo kposo ér ka inyam i doon ve ishima shi nan ve msaanyol kpaa. Uzendenya mbagen anza er iwa shin kpatema nahan ka ve hingir akar a ior. Ikyav i tesen yô, i fa aniwaav ér mba ongo ior vev shi mba doon a ve kpen kpen kpaa. Ka nahan ve, ior ka ve hingir u lun kôôsôô a aniwa ve ye, hemban je yô, aniwa u ve lu a mi anyom imôngo yô.

Nahan kpa, uzendenya mban kpishi mba tse yum ga. Iwa shin kpatema tse ka kom anyom er 10 zan zan 15 nahan shin ka i hemba nahan je kpaa, kpa anyom ne cii har sha tsombor iwa shin kpatema shon. Uzendenya mban ka ve hingir u lun uange shighe u ve beeyol yô, shin ve gba iwan sha gbenda u nan a na ior mba ve lu a ve la zayol, nahan kwagh ne a na ve umbur shighe u uzendenya mban lu iyev shi lu tsor tsor la. A lu kwaghbo u se wuan ve kera sha er ve de ye ican ga yôô?

Orkristu nana soo u eren kwagh sha ishima i Aôndo sha kwagheren u nan a zendenya. Sha kpôô yô, u tswamen zendenya la ka u eren kwagh sha ishima i Aôndo ga, gadia Mkaanem nav kaa ér: “Orperapera we uma u zendenya na iko.” (Anzaakaa 12:10) Nahan kpa, kwagh ne tese ér mnenge u Aôndo a nengen uzendenya la ngu kwagh môm a gbenda u a nengen uumace la ga. Sha shighe u Aôndo er uumace la, á tese ér mkposo u vesen ngu hen atô ve a uzendenya. Ikyav i tesen yô, yange na uumace ishimaveren i lun uma gbem sha won, kpa mayange je á na uzendenya ishimaveren ne ga. (Mbaromanu 6:23; 2 Peteru 2:12) Er á lu Orgbanakaa yô, ngu a ian i tesen vough er uumace vea lu a annyamev yô.

Genese 1:28 ôr se mlu shon u a lu hen atô ve la. Aôndo kaa a uumace mba hiihii mbara ér: “Ishu i shin zegemnger man inyon i purugh sha kwavaôndo man hanma kwagh u uma u a zenden sha tar cii, ve̱ lu sha ikev yen.” Pasalmi 8:6-8 kpa ôr kwagh sha gbenda ne môm, ér: “U [Aôndo] wa nan [orumace] akaa cii sha ikev: iyôngo man abua cii, kua inyamtoho je kpaa, inyon i sha aôndo, man ishu i shin zegemnger.”

Aôndo tese wang wener orumace a̱ yar tom a inyam sha gbenda u vough shi a̱ wua i kpaa. Ikyav i tesen yô, a fatyô u eren akondo a akôv a inyam. Aôndo shi na uumace ian sha shighe u Mngerem ma Deemee ma sha ayange a Noa kar kera la ér ve yaan inyam, sha u seer sha akaayan agen a ve vanden yan la.—Genese 3:21; 4:4; 9:3.

Kpa kwagh ne gema na ior ian ér ve gbaa wuan inyam dang dang sha ci u doo ve wuan í yum ga. Bibilo pase kwagh u Nimrodi ken Genese 10:9 ér ka “ortato u ageegh.” Kpa ivur shon ne i môm kaa ér kwagh eren na ne yange na yô lu “or u hendan a Yehova” (NW ).

Nahan yô, er orumace a lu a tahav sha annyamev nahan kpa, ka u una yar tom a tahav mbun dang dang ga, kpa una yar tom a mbu er atindiakaa a ken Mkaanem ma Aôndo a tese nahan. Kwagh ne alaghga una kua u se gban den tsô ser iwa yase shin kpatema wase a ya ican kpii sha ci u iyolbeen shin ma aikyôr u vesen shin angev mbu vesen ga. Zum u kwagh a lu nahan yô, ka tom u Orkristu u a lu a zendenya ne u tsuan kwagh u nana er yô. Aluer nan nenge ér u wuan zendenya ne kera la hemba doon a u gban den tsô ér a zer yan ican a ma ishimaveren i injaa i una hide a lu gbang gbang ga yô, nana fatyô u eren nahan.