Dooshima u a Hembe Doon Cii La

IGEMA ishemberti i ken zwa Grika i í yer ér a·gaʹpe la ajiir kpishi kpishi ken Ruamabera u Mbakristu u ken Zwa Grika shin ken Ikyuryan i He la, ér “dooshima.”

Takerada u Insight on the Scriptures * pase inja i ishemberti ne ér: “[A·gaʹpe] ka dooshima u kpen ashe ikyôr a or shin gban lun a or ikyooso ikyooso er ashighe kpishi ior ka ve nenge dooshima nahan la ga, kpa ka dooshima u vough, shin u a tese mlu wase a ior mbagenev yô; ka dooshima u a har sha iniôngon yase i se nènge kpoghuloo a ishima yase ser se er kwagh u dedoo a ior mbagenev sha gbenda u vough, sha ci u se nenge ser ka sha tindi man ka tom wase shin ka shami u eren nahan la. A·gaʹpe (Dooshima) ngu a wase or nan hemba ihyom i i lu hen atô u nan a orgen yô, nahan i lu kwagh u mayange je nana gema atindiakaa a vough nana ta ken ijime, nana ker iyev i oron ga.”

A·gaʹpe kua msoo u soon mbagenev sha gbashima la kpa ker. Apostoli Peteru wa se kwagh wener: “Doo nen ayol a en [a·gaʹpe] sha gbashima je.” (Ka se se nger i yier ye; 1 Peteru 4:8) Nahan yô, se fatyô u kaan ser a·gaʹpe ka kwagh u ken mhen tseegh ga, kpa ka kwagh u a kou ishima i or kpaa yô. Er nan ú tim sha avur a ruamabera agen a a tese tahav man mze u dooshima u hemban doon cii ne a ze shimi la ú nenge ga? Alaghga avur agenegh a a dondon heen ne aa lu ú a iwasen: Mateu 5:43-47; Yohane 15:12, 13; Mbaromanu 13:8-10; Mbaefese 5:2, 25, 28; 1 Yohane 3:15-18; 4:16-21.

[Footnote]