Ka a Ka Di Gado Tsô Shin Ka Ingyatu?

Hingir gado u mbayevmakeranta mba ken yunivasiti mbagen ken tar u Poland u kohol inyaregh yamen uiyua za nan atica a ve, sha u i seer ve akundu a ikyarenegh yô. Kape i lu ve gumkwase Kristu u i yer un ér Katarzyna la yange tagher a mzeyol u taver ne je la. A hen ken ishima wener: “M na inyaregh shin m de ne ga?” Mba ve ze makeranta kwagh môm a na la kaa a na ér: “Ka kwagh u i eren keke yô. Kwagh môm tsô una saa ú ga, kpa ú zua a injar i vesen, nahan er nan ve ishima i te ú akperana?”

Katarzyna kaa wener: “Ken inyom i m hii makeranta la, m kohol inyaregh a mbayevmakeranta imôngo. Kpa m va mase kaven mer m ngu nan ingyatu ken myer, man Bibilo venda kwagh ne.” Yange umbur avur a ruamabera a á tese ér mayange je Yehova lumun ingyatu ga la. (Duteronomi 10:17; 16: 19; 2 Kroniku 19:7) Katarzyna kaa wener: “M kav er ka i taver ga u mkighir u mbakov hemban or agee nahan. Yange m hide m time sha kwagh ne nahan mayange je, m kera dondo ve sha ieren ve ne ga.” Ken anyom atar a a kar la mbayevmakeranta mbagen naha un tar, nahan kpa, á kôr cio u pasen ve wener una kera kohol “inyaregh ki yamen akundu” ki mbayevmakeranta ve kohol la ga sha ci u jighjigh u nan na u a har sha Bibilo la.

Mbayevmakeranta mbagen naha Katarzyna tar kaa a na ér, ngu wanyekwase u soon iyol na tseegh u a soo u keren mkpeyol u mbagenev ga yô. Á kaa wener: “Zan zan hegen je kpaa mbagenev mbá a imorshima a mo. Kpa saan mo iyol, sha ci u, mbagenev yô tese icivir sha mnenge u m lu a mi sha kwagh ne la.” Kwagh ne na yô, hingir u a fa Katarzyna ér ngu wanyekwase Shiada u Yehova u a kor atindi a Bibilo sha hanma iyange yô.