‘M Zua a Akar, A Tesem Dooshima shi A Wam Ikyo Kpaa’

“KA SHA kwagh ne man ior cii vea kav er ne lu mbahenen Av ye, aluer ne doo ayol a en yô.” (Yohane 13:35) Er Yesu lu ôr nahan, yange i fa anmgbianev mba ken Kristu mba ken derianyom u hiihii la sha dooshima ve. Orgen u i yilan un ér Tertullian la, yange nger kwagh shighe u Kristu kpe anyom kar hemba deri môm nahan la, á ôr kwagh u ior mbagen ve nenge ve er yô, wener: ‘Nenge er ve doo ayol a ve shi ve we iyol ve keghen a kegh u kpen sha ci u or ve ugen sha wono.’

Ú fatyô u zuan a imba dooshima la ken tar nyian je kpa? Een, ú fatyô. Ikyav i tesen yô, nenge ase kwagh u washika ugen u afishi a gbaa tom a Mbashiada mba Yehova ken tar u Brazil yange ngohol la a er yô. Lu kwase ugen u i yer un ér Marília la nger washika ne ye, á kaa ker wener:

“Zum u se lu ken gar u Villa Mercedes ken tar u Argentina la, mama wam, un ka Orshiada u Yehova, gba angev mbu i yer ér osteoarthritis la, kwagh ne na yô á kpe shin iwenge zan zan due shin angahar. Ken iwer anigheni mbi angev mbun hii u zan un iyol la cii lu Mbashiada mba ken Villa Mercedes lu nengen sha na ye, ve er a na sha dooshima shi ve wa un ikyo kpaa. Ve lu nengen sha hanma kwagh cii, ve lu sôron un ya tsembelee shi ve lu yôron un iwer kpaa. Sha shighe u mama lu ken iyouci la cii, hanma shighe yô or lu a na ikyooso kyooso, atetan kpaa tugh kpaa.

“Mo man mama se hide se mba ken tar u Brazil hegen, man ngu zuan a guda her kure kure. Mbashiada mba ve lu ape se lu hegen ne kpa mba wasen mama sha afatyô ve cii sha u a zua a guda gough yô.”

Maríla mase kuren washika na la kaa wener: “Sha mimi yô, m ngu Orshiada ga, kpa m zua a akar ken Mbashiada, a tesem dooshima shi a wam ikyo kpaa.”

Sha kpôô yô, zan zan nyian kpaa ior mbá mba ve tesen dooshima u Mbakristu la sha mimi yô. Dooshima ve ne tese er atesen a Yesu a lu a tahav mbu mbua fatyô u benden a uuma asev yô.