Erdoo Doo Un Ishima

MILTON G. HENSCHEL u lu môm ken Mbahemenev mba Shin Tine mba Mbashiada mba Yehova anyom imôngo la kure tom na u shin tar sha iyange i Sati, Maaci 22, 2003. A tsa kuma anyom 82.

Milton Henschel lu shin ijiirtamen i Mbashiada mba Yehova zum u a lu gumor la je, á er tom her sha jighjigh je hemba anyom 60. I fa un sha kwaghfan na man isharen i mimi i lu a mi sha tom u pasen kwagh u Tartor la je ngôôr ga. Ken inyom i 1939 la a hingir akawe u N. H. Knorr, u hen shighe la lu orvesen u ijiir i gberen ityakerada i Mbashiada mba Yehova i ken Brooklyn la. Zum u Anmgbian Knorr hii u hemen Mbashiada tar sha won cii ken inyom i 1942 la, a tsua Anmgbian Henschel ér a̱ lu orwasen un tom. Anmgbian Henschel vôso Lucille Bennett ken inyom i 1956 man ve cii ve za hemen u ember uma imôngo shi ve lu tagher a mbamtaver mba uma imôngo kpaa.

Anmgbian Henschel er tom ikyooso ikyooso vea Anmgbian Knorr zan zan Knorr kaa kpen ken inyom i 1977. Er yange Anmgbian Henschel luun vea Anmgbian Knorr hanma shighe cii yô, á zende sha ityar je hemba 150, ve lu taver Mbashiada mba Yehova tar sha won cii asema, hemban cii je yô lu mbamishen man mba ve eren tom shin afishi a branci kposo kposo la. Ashighe agen ijende la yange i taver kpishi, shi i cier iyol kpaa. Er ve za zende ken tar u Liberia ken inyom i 1963 yô, Anmgbian Henschel gba ken tôvacan u vihin tsung sha ci u á venda u eren iniongo i civir tar la a ve imôngo yum. * Anmgbian Henschel yina ishima ga cii, iwer ngi karen kpuaa yô, á hide á za ken Liberia sha u una za nenge a pesiden u tar la una sôn un a̱ na Mbashiada mba Yehova mba ken tar la ian i vea civir Aôndo gbar gbar yô.

I fa Anmgbian Henschel ér ka or u á sôron mbamzeyol sha gbenda u wasen mbagenev yô, shi keren ngegh ngegh ga shi lu a shinshima kpaa. Mba ve eren tom vea na imôngo la ve soo un kpishi, hemban cii je yô gbenda u yange eren kwagh sha inja sha inja kua iyol na i hiden a mi ijime man mlu na u luun zwa ahan-ahan la. Lu a mfe u kpilighyol, nahan ityar kposo kposo i yange zende la cii saan mbamishen iyol a na kpen kpen sha er yange á kôr ati a ve fese, shi ijiir i una za cii i taver un u yilan ishember i môm shin ahar nahan ken zwa u hen ijiir la ga, una yilan yô á tsar asenge sha mi shi á yila a ahan zwa kpaa.

Mika 6:8 umbur se̱ ér Yehova Aôndo soon ér se ‘soo u zungwen mhôônom, shin se̱ lu a erdoo.’ A umbur Milton Henschel sha er a ver ikyav sha gbenda ne yô. Shin er lu a tom u eren kpishi sha ikyev nahan je kpa á lu or u hanma or cii nana fatyô u van hen a na, á taver inja ga, shi lu ishima kundu kundu kpaa. Hanma shighe yô á zer kaan wener, “Aluer ishima ngi tan we akpelan yô, umbur wer kwagh u dedoo la ka un a lu u shami ye.” Er se lu vaan ku u anmgbian u doon se ishima ne nahan kpa, se mba a iember sha er a we ishima tsung zan zan i ar ken ku yô, nahan una zua a injar na, ka “tsar u uma” je la.—Mpase 2:10

[Footnote]

[Picture on page 17]

M. G. Henschel vea N. H. Knorr

[Picture on page 17]

Vea kwase na, Lucille