De Nengen Uma Wou Wer Ka Beerkwagh Ga
De Nengen Uma Wou Wer Ka Beerkwagh Ga
‘Awambe a Kristu aa wanger imo i ken asema a ase sha aeren a a lu kpenegh la, sha u eren Aôndo u uma tom.’—MBAHEBERU 9:14.
1. Ka ikyav i nyi i lu i tesen ér uma gba se kwagha?
ALUER i pine ú ér uma wou ngu ú a inja nena yô, ú na mlumun wer nyi? Uma wase man u mbagenev gba se kwagh kpen kpen je. Ka nahan ve, ka sea gba angev yô, se za nenge a ortwer shin se zaan iyouci sha ashighe ashighe sha u za karen akaa ye. Se soo ser se lu uma shi se lu gbang gbang kpaa. Mbabeenyol shin mbakpenalegh je kpa ku doo ve ishima ga; ve soo u lun uma.
2, 3. (a) Kanyi kwagh Anzaakaa 23:22 a tese ér gba kpee u se erene? (b) Kwagh u i ter ken Anzaakaa 23:22 la kua Aôndo ker nena?
2 Gbenda u ú nengen uma la ngu u bende a mlu wou vea ior mbagenev kpaa. U tesen ikyav yô, Mkaanem ma Aôndo wa kwagh ér: “Ver ato sha teru u a mar u yô, de lahan ngôu shighe u a bee iyol la ga.” (Anzaakaa 23:22) Inja i “ver ato” la hemba u ungwan di a ungwa mkaanem tsô la; inja i kwaghôron ne yô, ka u ungwan kwagh shi eren sha kwagh u ú ongo la. (Ekesodu 15:26; Duteronomi 7:12; 13:18; 15:5; Yosua 22:2; Pasalmi 81:13) Mkaanem ma Aôndo ma kaa ér u ver ato a teru man ngôu sha ci u nyi? Ka sha ci u teru man ngôu mba tamen a we shin mba a mfe hemba ú tseegh tsô ga. Ityôkyaa yô ér, ka ve ve “mar u” ye. Mbamgem mba Bibilo mbagen gema ivur ne ér: “Ver ato sha teru u a ne u uma la.” Sha nahan yô, aluer uma wou gba ú kwagh yô, ú kav er i gbe kpee u ú er ishima i mba ve mar u la yô.
3 Sha mimi yô, aluer ú ngu Orkristu u mimi yô, ú kav er i lu Yehova a lu Imbor i uma wou jim jim yô. Ka ken a na man ú “lu uma” shi ú “tenger” shi ú eren akaa er orumace u lun a mhen ye; shi ka ken a na ú “tem” shi ú henen sha kwagh shin ú we ago iyol sha ci u mlu u ken hemen kpaa ye. (Aerenakaa 17:28; Pasalmi 36:9; Orpasenkwagh 3:11) Ka a inja u dondon kwagh u Anzaakaa 23:22 a er la sha u “veren” ato a Aôndo, shi i lu isharen you i nôngon wer ú kav mnenge u Aôndo a nengen uma la shi eren sha mi kpaa a u dondon mhen u ior mbagen ve lu a mi sha kwagh u uma la.
Tese Ikyo i Wan sha Uma
4. Mwe u wan uma u or ikyo yange hingir ikyaa i vesen ngise ngise, shighe u tsombor u orumace hii ica lu a gba ga la nena?
4 Sha shighe u tsombor u orumace hii ica lu a gba ga la je, Yehova pase wang ér un na orumace ian sha uma (shin eren a uma dang) sha ma ityôkyaa ga. Ishimavihin man iyuhe yange i iv Kain ken ishima nahan á kar a uma u anngô na Abel kera. Ú hen wer Kain yange lu a tahav mbu karen a ishima eren kwagh u á soo a uma nahana? Aôndo yange hen nahan ga. Yange tsaha un sha kwagh u er la, Á kaa a na ér: “U er nana? Awambe a anngôu nga genger imo hen inya, yillan Mo.” (Genese 4:10) Fa wer, awambe a Abel a i haa inya la tile sha uma na u i vihi la, nahan a lu vaan yilan Aôndo ér a or iyev sha ci u á.—Mbaheberu 12:24.
5. (a) Ka tindi u nyi yange Aôndo wa sha ayange a Noa laa, man tindi la lu sha ci u unô? (b) Tindi la lu kwagh u injaa sha nyi gbenda?
5 Yange Mngerem ma Deemee ma karen kera yô, uumace shi hide gba ityô he, ve lu di iorov anigheni tseegh. Aôndo wa tindi u a lu uumace cii a inja yô, a seer pasen mnenge na sha kwagh u uma man awambe la. Á pase ér, uumace vea fatyô u yan inyam i zendenya, kpa a gema a wa tindi ér: “Hanma kwagh u tenger u a lu uma yô, una lu kwaghyan wen; M na ne ve cii, er lu M na ne akaamenden nahan. Saa di inyam kua uma u i tsô, ka awambe a i je la, de ye nen ga.” (Genese 9:3, 4) Mbayuda mbagenev yange ve hen ér kwagh u ivur ne lu ôron yô, lu u uumace vea ya inyam shin awambe a zendenya u a lu uma la, ga. Kpa ken hemen yô, ve va hingir u kaven ér kwagh u Aôndo venda yô lu u yan awambe sha u waren uma la. U seer yô, tindi u Aôndo yange wa sha ikyev i Noa la, lu kwagh u injaa je er sha u kuren awashima na u vesen sha kwagh u awambe la ye—ka awashima u una bugh gbenda sha ci u uumace ve zua a uma u tsôron yô.
6. Aôndo pase er uma a lu a inja sha ikyev i Noa var var nena?
6 Aôndo shi za hemen kaa wener: “Kpa awambe a en yô, Me or iyev i a kpee je, Me or i sha hanma inyam, sha or kpaa, orgen a orgen, Me or iyev i uma u or. Or u nan hee awambe a or inya yô, shi ka sha ikev i or á haa di awambe a nan inya ye; gadia ka sha mlu u Aôndo je, A er or ye.” (Genese 9:5, 6) Tindi u Aôndo wa tsombor u uumace cii ne tese ér á nenge awambe a or ér ka uma u nan jim jim je. Orgbanakaa na or uma, nahan or môm nana de vihin uma u awambe a til sha mi ne ga. Aluer or wua or er Kain nahan yô, Orgbanakaa ngu a ian i ‘oron iyev’ i uma u or u nan woo or la.
7. Er nan ve i doo u kwagh a gba se sha tindi u Aôndo wa Noa sha kwagh u awambe laa?
7 Aôndo wa uumace tindi ér ve de eren a awambe dang dang ga. Er i lu nahan ú hen er i hii ve Aôndo yange wa tindi ne kpa? Man hii nan ve Aôndo nenge awambe nahana? Jighilii yô, mlumun u sha mpin ne kua ityesen igen i ken Bibilo i i lu hange hange yô ker. Ityesen ne ka tamenkwagh u Mbakristu ve pasen kwagh sha mi yô, shin er ukwaghaôndo kpishi ve vende í nahan kpaa. Ityesen shon kanyi, man í bende a uma wou man akaa a u tsough u eren la man aeren a ou cii nena?
Se Er a Awambe sha Inja Nena?
8. Ken Atindi a Aôndo na la, á kaa ér i er a awambe nena?
8 Yehova shi seer nan akaawan sha kwagh u uma man awambe zum u a na Mbaiserael ngeren u Atindigh la. Er á er kwagh ne yô shi á seer eren kwagh ugen sha u kuren awashima na u vesen la. Alaghga ú fa er Tindi la yange kaa ér i naan Aôndo naagh sha ambaakaa er, naagh ku sha samuyia man ku sha mkure man ku sha wain nahan yô. (Levitiku 2:1–4; 23:13; Numeri 15:1–5) Shi i naan iniaav sha uzendenya kpaa. Aôndo kaa sha kwagh u iniaav mbin ér: “Uma u inyam yô, ka ken awambe a lu ye, Mo M na ne a sha atse a nanden nagh sha mi, sha u nan iwom a mi sha ci u uuma enev; gadia awambe nga ne iwom sha uma u a la. Ka nahan man M kaa Mbaiserael, Mer: ‘Ma or u ken ven nana̱ de ye awambe ga ye.’ ” Yehova shi seer kaan ér, aluer ortato shin orsule nan wua zendenya yô, nana haa awambe a i̱ la inya nana cir inya sha mi. Tar ka ijiir i Aôndo i pendan angahar sha mi, nahan aluer or haa awambe a zendenya hen inya yô, nan tese ér nan kav er uma la a hidi hen Aôndo u a Ne Uma la yô.—Levitiku 17:11–13; Yesaia 66:1.
9. Ka ityôkyaa i môm tseegh i nyi yange Tindi na ian ér i̱ yar tom a awambe, man awashima u kwagh ne yô lu nyi?
9 Tindi la yange lu kwagh u a gbaa di kuran a ityôkyaa shio tsô ga, shin lu kwagh u lun a inja hen avese ga ze ga. Ú fa er i hii ve yange lu u Mbaiserael vea yaan awambe ga kpa? Aôndo kaa ér: “Ka nahan man M kaa Mbaiserael, Mer: ‘Ma or u ken ven nana̱ de ye awambe ga ye.’ ” Ityôkyaa yô lu nyi? “Mo M na ne [awambe] sha atse a nanden naagh sha mi, sha u nan iwom a mi sha ci u uuma enev.” Ú nenge er kwagh ne a te iwanger sha er i hii ve Aôndo yange kaa a Noa ér uumace ve de ye awambe ga kpa? Orgbanakaa nenge awamber ér ka kwagh u a lu a inja kpishi yô, nahan a ver á sha ityôkyaa i môm i injaa i ia yima uuma kpishi yô. Lu u aa er tom u vesen u cirin asorabo, ka (iwom) je la. Nahan, gbenda môm tseegh u Aôndo na ian ér i yar tom a awamba yô, lu sha atse a nanden naagh sha u nan iwom sha ci u Mbaiserael mba yange ve keren ér Yehova a de ve asorabo la.
10. Er nan ve awambe a zendenya aa fatyô u wanger asorabo cii ga, kpa kanyi yange iniaav mbi i naan sha ikyev i Tindi la mbi umbur Mbaiseraele?
10 Mlu u awambe lun iwom la lu Mbakristu kwagh u he ga. Paulu, apostoli u Kristu nger kwagh sha vegher u injaa u Tindi u Aôndo sôr ver ne ér: “Sha tindi yô, shi kpuaa tsô akaa cii ma i wanger a sha awambe, man aluer á haa awambe ga yô mde u akaabo kpaa una lu ga.” (Mbaheberu 9:22) Paulu pase wang ér naagh ku yange gba u Mbaiserael vea naan la gema ve ve hingir uumace mba vough, mba lun a isholibo iyol shio ga. A nger ér: “Kpa ken iniav mbira yô i lu umbur asorabo sha anyom anyom. Gadia awambe a anomabua man ivo aa fatyô u tôôn asorabo kera je ga.” (Mbaheberu 10:1–4) Nahan kpa, iniaav mbira lu sha ityôkyaa je. Yange mbi umbur Mbaiserael ér mba mbaasorabo mba i gbe u a er kwagh sha u wanger asorabo a ve cii yô. Kpa aluer awambe a a til sha uma u uzendenya la fatyô u wanger asorabo a uumace cii ga yô, awambe a uma ugen aa fatyô u eren kwagh nee?
Kwagh u Or u Nan Uma Er sha u Yiman Se La
11. Er nan se fe ser iniaav mbi yange i naan sha uzendenya la lu tesen kwagh u ken hemenee?
11 Tindi la lu tesen kwagh u vesen u una hemba lun a inja sha u kuren awashima u Aôndo yô. Paulu pine ér: “Nahan atindi nga a inja sha nyi?” Á na mlumun ér: “Ka sha ci u mbamper mba i per tindi la man i seer a ye, zan zan vor u i tende zwa sha mi la ua kar van. I na a sha mkaa u mbatyomov mba Shaav sha ikev i orhimen [Mose].” (Mbagalatia 3:19) Paulu shi nger kwagh za kwagh môm a ngula, a kaa ér: “Tindi hira ngu di a mure u akaa a doon a a lu van la tsô, kera ka eev mbu akaa la jim ga.”—Mbaheberu 10:1.
12. Se nenge a m-iv u awashima u Aôndo sha kwagh u awambe nena?
12 U saven kwagh u se hira hen ne yô, umbur wer sha ayange a Noa la Aôndo pase ér uumace vea fatyô u yan inyam i zendenya sha er vea war uma yô, kpa yange lu u vea ya a kua awambe a i̱ ga. Ken hemen yô, Aôndo shi kaa ér “uma u inyam yô, ka ken awambe a lu ye.” Sha kpôô yô, Aôndo nenge ér awambe tile sha uma nahan á kaa ér: “Mo M na ne [awambe] sha atse a nanden nagh sha mi, sha u nan iwom a mi sha ci u uuma enev.” Nahan kpa, awashima u vesen u Aôndo yô lu u una va kure ken hemen. Tindi hira lu mure u akaa a doon a a va er la. Akaa a dedoo shon yô lu nyi?
13. Hii nan ve yange lu hange hange u Yesu una kpe?
13 Mimi u kwagh ne har sha ku u Yesu Kristu. Ú fa er yange i na Yesu ican shi i mande un kpaa yô. Á kpe ku er ka iferor nahan. Paulu nger ér: “Gadia er se lu aseeraior her la je Kristu kpe er shighe va kuma vough yô, sha ci u mba ve fe Aôndo ga la. . . . Aôndo tese se dooshima Na sha ku u Kristu A kpe sha ci wase er se lu mbaasorabo her la.” (Mbaromanu 5:6, 8) Kristu kpe sha ci wase nahan á gema á na ipaa sha ci u asorabo ase. Ka ipaa la i lu itine i loho u Mbakristu ye. (Mateu 20:28; Yohane 3:16; 1 Mbakorinte 15:3; 1 Timoteu 2:6) Kwagh ne kua awambe man uma ker nena, man ka sha nyi gbenda kwagh ne a bende a uma wouwe?
14, 15. (a) Mbamgem mba Bibilo mbagenev ôr kwagh u ku u Yesu var var nena? (b) Ka mimi u nyi a lu ken Mbaefese 1:7 u alaghga ma se undu?
14 Ukwaghaôndo mbagenev ka ve ôr kwagh u ku u Yesu var var, mbadondon vev kpaa ve ôron ambaakaa er, “Yesu kpe sha ci wam” nahan. Time ase sha er mbamgem mba Bibilo mbagen ve gem Mbaefese 1:7 yô: “Ka ken ana man ken ku na se zou a myom ye, ka mde u asorabo je la.” (The American Bible, by Frank Scheil Ballentine, 1902) “I pase se i tuhwa ken ku u Kristu, shi i de se asorabo ase kpaa.” (Today’s English Version, 1960) “Ka ken ku u Kristu man naagh ku á ne sha uma na la man i pase se i toho ye, ka mpasetuhwa u a kou mde u asorabo kpaa yô.” (The New Testament, by William Barclay, 1969) “Ka ken ku u Kristu man i de se akaabo ase shi i pase se i toho ye.” (The Translator’s New Testament, 1973) Ú nenge yô, ken mbamgem mban cii, í hemba ôron kwagh u ku u Yesu. ‘Kpa,’ mbagenev vea kaa ér, mimi je ku u ‘Yesu’ ngu hange hange. Nahan, kanyi i yen ken mbamgem mba Bibilo mbana?
15 Jighilii yô, aluer ú har sha mbamgem mban yô, ú lu undun tamenkwagh, man kwagh ne una pande mkav u ú lu a mi sha loho u Bibilo la. Mbamgem mban yer mimi u a tese ér ngeren u hiihii u Mbaefese 1:7 la ngu a ishemberti i ken zwa Grika i̱ inja i i̱ í lu “awambe” la. Nahan yô, Ubibilo kpishi nger kwagh za ikyua a ngeren u hiihii la, di er Icighan Bibilo nahan, ér: ‘Ken a Na yô, se mba a mpaa u sha awambe Na man shi mde u gbev mbu nôngon sha mrumun Na u sha mhôôn u ngeen yum la.’
16. Doo u mgem u i gem ér “awambe Na” la una wase se u henen nyi ken ishima?
16 Mgem u i gem ér “awambe Na” la ngu a inja kpishi man doo u kwagh la una mgbegha se u henen akaa kpishi sha kwagh u awambe. Kwagh u yange kwagh gba sha mi la hemba ku u or tseegh tsô, shin ku u Yesu or u vough la je kpaa. Á kure kwagh u yange Tindi tile sha mi la, hemban je yô Iyange i nan Iwom la. Yange i na naagh sha zendenya u i ser i ver la sha icighan iyange ne. Pristi u tamen a tôô awambe a inyam la á yem a mi ken Icighankpar u Hemban cii la ken tabernakel shin ken tempel á za na hen Aôndo inja er á tile sha ishigh ki Aôndo jighilii nahan.—Ekesodu 25:22; Levitiku 16:2–19.
17. Yesu kure kwagh u Iyange i nan Iwom tile sha mi la nena?
17 Yesu kure kwagh u Iyange i nan Iwom tile sha mi la, di er Paulu a pase nahan. Hiihii yô, á kaa ér, zegepristi u ken Iserael yange a nyôr a awambe ken Icighankpar u Hemban cii la kwa môm ken inyom a za na naagh a mi “sha ci na iyol na man sha ci u asorabo a nongoior la, a ve er abu la.” (Mbaheberu 9:6, 7) Yesu kpa yange dondo kwagh u i vanden eren la, nahan mba nderen un hingir or u ken jijingi yô, á kôndo á yem sha. Er hingir or u ken jijingi, kera lu a iyol i inyam man awambe ga yô, á kôndo á yem sha á za ande “sha ishigh ki Aôndo sha ci wase.” Kanyi yange za na Aôndo? Lu kwagh u iyolough ga, kpa lu kwagh u lu a inja kpishi yô. Paulu shi za hemen kaa ér: “Kpa Kristu yô, va due ken igbar, lu zegepristi . . . lu sha awambe a ivo man anibuav kpaa ga, kpa lu sha awambe Na iyol Na. A nyôr ken icighanjiir kwa môm vough, A zua a mpaa u tsôron. Gadia aluer awambe a ivo man anomabua . . . tsegha ve sha u ayol a̱ hingir wang yô, man hira awambe a Kristu, Un u A na Aôndo nagh ku lun a ihogholough mape ga, sha iyol Na sha Jijingi u tsôron, aa kera wanger imo i ken asema a en sha aeren a a lu kpenegh la, sha u eren Aôndo u uma tom ga yee?” Een, Yesu na injar i awambe a uma na la hen Aôndo.—Mbaheberu 9:11–14, 24, 28; 10:11–14; 1 Peteru 3:18.
18. Hii nan ve i doo u kwagh u Bibilo i er sha kwagh u awambe la una lu a inja hen Mbakristu nyiana?
18 Mimi u a dugh hen Aôndo ne wase se u kaven akaa a kpilighyol a Bibilo i er sha kwagh u awambe la—er i hii ve Aôndo a nengen á ken gbenda u a nenge á la, man er i doo u se nengen á la, man er i hii ve i gbe kpee u se kura atindi a Aôndo a we sha kwagh u awambe la. Shighe u ú lu ôron Ruamabera u Mbakristu u ken Zwa Grika la yô, ú nenge a ajiir kpishi a i er kwagh i ter awambe a Kristu yô. (Nenge akwati u a lu sha peeji 7 la.) Kwagh ne pase wang ér doo u hanma Orkristu nana na ‘awambe a Yesu’ la jighjigh. (Mbaromanu 3:25) Ka ‘sha awambe a Yesu’ a hee inya la tseegh a fatyô u den se asorabo shi se lu ken bem vea Aôndo kpaa ye. (Mbakolose 1:20) Kape mba Yesu er ikyuryan a ve ér vea tema tor a na sha la kpa i gbe u vea na jighjigh ken awambe a Yesu keng ve a de ve asorabo ve shi vea lu ken bem vea Aôndo je la. (Luka 22:20, 28–30; 1 Mbakorinte 11:25; Mbaheberu 13:20) “Zegeikpelaior” i ia va war “zegecan” i i̱ lu van la ia zua a uma u tsôron ken paradiso shin tar la kpa kape ia er je la. Ve “ôô uriga vev ken awambe a Waniyôngo” sha injakwagh.—Mpase 7:9, 14.
19, 20. (a) Er nan ve Aôndo a tsough u wan tindi sha kwagh u awambe, man doo u se nenge kwagh ne nena? (b) Kanyi kwagh i doo u kwagh a gba se u fana?
19 Mimi je, Aôndo nenge ér awambe nga a inja kpishi je. Kape se kpa i doo u se nenge á je la. Orgbanakaa u a we ikyo sha kwagh u uma ne, ngu a ian i tesen uumace kwagh u vea er a awambe yô. Ka ikyo i a we sha uma wase ne i̱ ne ve a ver awambe sha u eren tom a mi ken gbenda môm u lun a inja kpishi ye, ka gbenda u se fatyô u zuan a uma u tsôron cii je la. Gbenda la kua awambe a injaa a Yesu la. Se mba a iwuese kpishi er Yehova Aôndo a er kwagh sha ci u mkpeyol wase sha u eren tom a awambe—awambe a Yesu—ken gbenda u waren uma ne nahan! Shi doo u se lu a iwuese hen Yesu sha er a va hee awambe na inya sha u nan naagh sha ci wase nahan! Sha mimi yô, se fatyô u kaven er yange lu apostoli Yohane ken ishima ve nger kwagh kaa nahan ér: “Un u se doo Un ishima man A sagh se A due a vese ken asorabo ase kera sha awambe a Na man A gema se er se̱ hingir tartor, se̱ hingir upristi sha ci u Aôndo Na man Ter Na her kpaa. Un yô, iengem i̱ lu i Na kua tahav kpaa gbem sha won. Amen.”—Mpase 1:5, 6.
20 Aôndo wase u a hembe mfe cii shi a lu Or u nan Uma ne vande wan ishima u eren tom u yiman uma ne ica i gba hegen. Nahan se fatyô u pinen ser, ‘Doo u kwagh ne una bende a akaa a se tsough u eren la man aeren ase nena? Kwaghhenen u a dondo ne una time sha mpin ne.
Ú Na Mlumun Wer Nyi?
• Se hen nyi sha mnenge u Aôndo lu a mi sha kwagh u awambe ken kwagh u i nger sha kwagh u Abel man Noa laa?
• Ken Atindi a Aôndo na la, á kaa ér i er a awambe nena, man lu sha ci u nyi?
• Yesu yange kure kwagh u Iyange i nan Iwom i til sha mi la nena?
• Awambe a Yesu a a yima uma wase nena?
[Study Questions]
[Box on page 7]
KA AWAMBE A ANA A YEM UUMA?
“Kuran nen ayol a en man ikumuile i Icighan Jijingi A ver ne mbakuran sha mi cii kpaa, sha u né koso nongo u Kristu u Aôndo, u A yem sha awambe a sha iyol i Wan Na la.”—Aerenakaa 20:28.
“Nahan hegen yô er i ne se ishô sha awambe Na yô, Una hemba yiman se sha iyugh cii.”—Mbaromanu 5:9.
“Ne lu a ishimaverenkeghen ga, ne lu a Aôndo shin tar kpaa ga. Kpa hegen ken Kristu Yesu yô, ne mba ngise ne lu ica, ne hingir ikua ikua sha awambe a Kristu.”—Mbaefese 2:12, 13.
‘Gadia doo m-iv u Aôndo cii u teman ken a Na je. Er A va a bem sha awambe a sha kon u mtsaha Na la yô, lu sha a Na je man Aôndo hime akaa cii a iyol Na ye.’—Mbakolose 1:19, 20.
“Nahan yô, anmgbianev, se mba vangertiôr u nyôron ken icighanjiir, ka sha awambe a Yesu.”—Mbaheberu 10:19.
“Ne fa i paa ne sha mlu wen u gbilinigh u ne ngohol hen uter la; lu sha akaa a saan ishe ga, . . . kpa lu sha awambe a injaa a Kristu er ka a waniyôngo u lun a acôghor iyol ga, a ihogholough kpaa ga nahan.”—1 Peteru 1:18, 19.
“Aluer se zenden ken iwanger er Un A lu ken iwanger nahan yô, sé zua ayol a ase, man awambe a Yesu Wan Na nga wanger se sha asorabo cii.”—1 Yohane 1:7.
“We, U kuma u ngohol ruamabera la, bughun akav a na, gadia i sôngo U man U yam Aôndo ior sha awambe a Ou ken hanma nongo man hanma zwa man hanma nongoior man hanma ikurior.”—Mpase 5:9.
“Or u senden anmgbianev asev la yô, i gbihi un kera . . . Ve yô, ve hemba un sha awambe a Waniyôngo man shi sha kwaghôron u shiada ve.”—Mpase 12:10, 11.
[Picture on page 5]
Aôndo yange wa Tindi wang ér, awambe aa er tom sha ci u mde u asorabo
[Picture on page 6]
Awambe a Yesu aa fatyô u yiman uumace kpishi