Ú NGU ER Kon u Lagani Auna Kpa?

Mbapasenkwagh mbagenev uhar lu hiden kwaghpasen ken angar ugen ikyua a gar u Port Moresby ken tar u Papua New Guinea. Er ve lu hiden angahar la ve nenge a kon ugen u doonashe. Nahan orpasenkwagh u ganden la kaa ér, “nenge lagani auna!” Tsô a gema a gba ôron kwagh a gumor u lu a na la, wener: “Inja i iti la ér, ‘kon u sha inyom.’ Ngu er ikyon igen sha ajiir a iceenyolough nahan ga. Ú yô, inyom ka ia aven yô u ndoor ikya cica cii, u lu er u kpe nahan. Kpa fam a gbaan yô, u hide u hôm, u kpar, u dooashe kpishi.”

Se fatyô u zuan a ityesen hen kon u lagani auna ne. Ior mbagenev kpishi mba yer u ér royal poinciana. Mbafankwagh tsor tsor mbagenev kaa ér kon ne ngu môm ken ikyon itian i i hembe doon ashe sha tar cii yô. Shin er ka a lu inyom, kon ne u ndoor uikparen man ikya i u cica cii nahan kpa, ka u koso mngerem. Kon ne taver amise kpishi shi amise ne nga a wa a yem shin inya ca a za kôr sha avande. Nahan ijeverahumbe ka ia kar baveraa je kpa u môugh ga. Kohol cii yô, kwagh ze kon ne iyol ga sha ci u ú fa u tagher hanma mzeyol cii.

Se fatyô u tagher a mbamzeyol mba vea kar jighjigh u nan wase, aluer una taver yô. Kanyi ia wase se se wa ishima? Er kon u lagani auna la u eren kwagh nahan, se kpa se fatyô u man mngerem ma umam ma Mkaanem ma Aôndo la shi koson ma ken iyol yase kpaa. Shi se var a Yehova, un u a lu ‘vande wase’ la gbang gbang kua nongoior na kpaa. (2 Samuel 22:3) Sha mimi yô, kon u lagani auna u doonashe la umbur se ér, sea lu hen ijiir i mbamzeyol ve ngee je kpa, se fatyô u taver ken jijingi her shi se doo ashe ken jijingi kpaa aluer se lumun iwasen i Yehova a ne se la yô. Aluer se er nahan yô, se “ya dyako u uityendezwa” nav, kua ityendezwa i uma u tsôron la kpaa.—Mbaheberu 6:12; Mpase 21:4.