Kwagh U Se Hen Sha Ieren I Gengeseiyol man Iyol Hiden A Mi Jime La

KWAGH ugen yange er Tor Davidi, u a tese mkposo u hiden a iyol ijime man iyolgengese yô. Kwagh ne yange er shighe u Davidi hemba Yerusalem ityav ngohol gar la hingir gartamen na la. Davidi nenge ér ka Yehova a lu Tor u Iserael jim jim ye, nahan a kaa ér i va a Areki ken gar la. Areki ne lu ikyav i tesen iengem i Aôndo. Mtee u i tôô Areki la lu Davidi kwagh u vesen kpishi, tsô a dondo upristi mba ve tôô areki la, a gba ember ken igbar je. Ior mba ken Yerusalem nenge tor ve lu “tsuwen” shi “vinen amar” sha tahav nav cii.—1 Kroniku 15:15, 16, 29; 2 Samuel 6:11–16.

Mikal, kwaseya u Davidi yô ember a ve imôngo ga. Kpa gema ta ashe hen ianiyoughough lu nengen er ve lu ember yô. Er ma doo un sha ci u Davidi lu wuese Yehova yô, gema “laha un ken ishima” na. (2 Samuel 6:16) Er nan Mikal er kwagh nahana? Alaghga tsô, yange tôô ér un ngu wan u Saulu, tor u Iserael u hiihii la, shi hegen un ngu kwaseya u tor u Iserael u sha uhar, nahan un ngu shagba kwase. Adooga yange nenge ér nom na u a lu tor la ma a hidi a iyol na jime je u za vinen amar imôngo a ishamior ga. Tsô a tese iyolgengese ken igbar shighe u va u va sughun Davidi zum u za hide la. A gba wan un asôngo kaan ér: “Tor u Iserael ngu a icivir sha ashe a ior nyian tsôô, er a er akondo kera sha ashe a ikpan i ukase i mbayev nav, vough er gbilinor u lun a kunya ga ka nan gba saghen ikyondo nahan!”—2 Samuel 6:20.

Davidi yange er nena? Davidi zôhô a Mikal, kaa a na ér ka sha ci u un Davidi man Yehova a vende ter na Saulu ye. Shi a kaa ér: “Me seer heen iyol yam á hemba heen kpaa, me laha iyol yam; kpa ikpan i ukase i u ter i la, i yô, me lu i a icivir.”—2 Samuel 6:21, 22.

Sha mimi yô, Davidi yange kange ishima ér una za hemen u civir Yehova a iyol i hiden jime. Ieren i Davidi ne wase se se fa er i hii ve Yehova a yer un ér “or u sha ishima na” yô. (Aerenakaa 13:22; 1 Samuel 13:14) Davidi lu dondon di a dondo ikyav i iyol hiden jime i hemban cii, ka iyol hiden jime i Yehova Aôndo je la. Kwagh ka a er yô, ishemberkwaghôron i Davidi ôr a Mikal ér, “me laha iyol yam” la í zua a i̱ ken zwa Heberu, man ishember ne tese gbenda u Aôndo a nengen uumace la. Yehova hemba sha won cii, nahan kpa Pasalmi 113:6, 7 kaa ér: “Un u ka A shir ashe shin [ka a hide a iyol na ijime sha er una wase or u gban ijime] sha u Una nenge Sha man tar la, Ka A dugh icanor shin vuulevu kera, A mough a nan sha, A kende a oribanave shin tihi uihyôgh sha.”

Er Yehova a hir a iyol jime yô, ka nahan ve a ker “ashe a sha imanger” a mbagengeseayol la ihyom ye. (Anzaakaa 6:16, 17) Mikal lu kwase u gengeseiyol shi laha or u Aôndo ver un Tor la kpaa. Sha nahan yô, hingir ikyômkwase, maa Davidi wan ga. Yange kpe a wan shio. Kwagh ne tese se kwaghfan kpen kpen! Nahan yô, hanmaor u nan soo ér Aôndo a lumun nan yô, gba u nana dondon mkaanem ma ma kaa ér: “Haa nen ityough ki taver ga iyol, hen ayol a en, gadia Aôndo hendan kwagh a mbagengeseyol, kpa ne mba ve hir ayol a ve ijime la mrumun u sha mhôôn” la.—1 Peteru 5:5.