Suur Sha Yehova Shi Lu A Ishimaverenkeghen, Nahan Taver Ishima

“Kegh TER, lu dông, ishima you i̱ taver; een, kegh TER.”—PASALMI 27:14.

1. Ishimaverenkeghen ngi a inja nena, man ikyav i ishemberti ne ken Bibilo ér nyi?

 ISHIMAVERENKEGHEN i mimi ngi er iwanger i sha use nahan. Ka í wase se se wa ishima a atsan a hegen ne, nahan se lu a ishimaveren ser mlu u ken hemen una doo, shi i̱ na i saan se iyol kpaa. Ka Yehova tswen una fatyô u nan se ishimaverenkeghen i mimi ye, man ka kwagh u a er ken Mkaanem nam kpaa je la. (2 Timoteu 3:16) I nger ishemberti i “ishimaverenkeghen” man “kegh” kua “veren ashe” la kwa imôngo ken Bibilo, man inja i asember ne yô ka u veren ashe a kwagh u dedoo a akpelan a tan shio; shi asember ne tile sha kwagh u i ver ashe a mi la kpaa. * Ishimaverenkeghen ne ka di kwagh u tômon a tôm u mayange una kure sha mi ga la ga.

2. Ishimaverenkeghen yange i wase Yesu nena?

² Zum u Yesu tagher a ican man mbamtaver yô, a suur sha Yehova. “A kera wa kunya ikyo ga sha ci u iember i i ver Un sha ishi la, A za tema sha uwegh ku yanegh ku ikyônough ki Aôndo ki torough.” (Mbaheberu 12:2) Yesu yange ver ishima na jighilii sha ian i lu a mi i paan hemen u Yehova iyol shi tseghan iti Na kpaa la, nahan er fa ér una ya ican nahan kpa, mayange de u eren ishima i Aôndo ga.

3. Ishimaverenkeghen wasen mbatomov mba Aôndo nena?

³ Tor Davidi pase er ishimaverenkeghen man ishimataver ve zough yô, a kaa ér: “Ver ishima sha Yehova; lu dông, ishima you i̱ taver; een, ver ishima sha Yehova.” (Pasalmi 27:14; NW ) Aluer se soo ser ishima yase i lu dông yô, mayange se lu nen a akperan sha kwagh u ishimaverenkeghen yase ga, kpa hanma shighe yô i luun se sha ishima shi i lu se kwagh u injaa kpaa. Aluer se mba eren nahan yô, se er tom u pasen kwagh  u Yesu wa mbahenen nav la sha ishima i taver man sha gbashima er un kpa er nahan. (Mateu 24:14; 28:19, 20) I ter ishimaverenkeghen man jighjigh u nan man dooshima ér ka aeren a hange hange a mbatomov mba Aôndo ve̱ lu a mi yô.—1 Mbakorinte 13:13.

U “Ngee a Ishimaverenkeghen” Kpa?

4. Mbakristu mba i shigh ve mkurem la kua iyôngo igen i i lu akar a ve la mba keghen nyi?

⁴ Ior mba Aôndo mba veren ishima u va ember uma ken hemen. Mbakristu mba i shigh ve mkurem mbara mba keghen shighe u vea va tema tor vea Kristu sha la; mba ve lu “iyôngo igen” la di mba keghen shighe u a va ‘pase ve sha ikyev i mlu u hôôn la á tuhwa, á za a ve ken mlu u engem u lun a ikyangenev ga u ônov mba Aôndo la.’ (Yohane 10:16; Mbaromanu 8:19–21; Mbafilipi 3:20) “Mlu u iengem u lun a ikyangenev ga” la wa myom u a yima se sha ikyev i isholibo man akaa a vihin a i̱ ve a mi la kpa ker. Yehova u a ne “hanma nagh ku dedoo man hanma iyua i vough” la ne ior nav mbajighjigh akaa a dedoo tseegh.—Yakobu 1:17; Yesaia 25:8.

5. Se er nan ve se ‘ngee a ishimaverenkeghene’?

⁵ Gba u ishimaverenkeghen i Mbakristu la ia wase se nan je? I ôr ken Mbaromanu 15:13 ér: ‘Aôndo u ishimaverenkeghen A̱ iv ne a iember gbing kua bem kpaa sha jighjigh u ne ne la, sha u né ngee a ishimaverenkeghen sha agee a Icighan Jijingi yô.’ Sha kpôô yô, a fatyô u toon ishimaverenkeghen karen sha iwanger i sha use i ka i wanger wang ken uma wase, i na se bem man msaanyol kua awashima man ishimataver la, ka sha aniwanger u mondon ken ime ga. Umbur wer ka sea na Mkaanem ma Aôndo jighjigh shi sea zua a icighan jijingi na yô, se “ngee a ishimaverenkeghen.” Mbaromanu 15:4 kaa ér: “Akaa a i vande ngeren la cii ka sha ci u ityesen yase lu i nger a ye, lu sha u se̱ lu a ishimaverenkeghen sha ishimawan man ishimasurun i ken icighanruamabera la.” Nahan pine iyol you wer: ‘M er Bibilo ayange ayange sha er ishimaverenkeghen yam ia za hemen u yeghen kpa? M eren msen hanma shighe mer Aôndo a nam jijingi na kpa?’—Luka 11:13.

6. Doo u se wa ikyo sha nyi ve ishimaverenkeghen yase ia za hemen u yeghene?

⁶ Yesu u a ver se ikyav la kpa lu Mkaanem ma Aôndo wase un ye. Nahan aluer se ver ishima sha a na zulee yô, se ‘kera vôr ga, ishima kpaa, ia yina se ga.’ (Mbaheberu 12:3) Kpa aluer ishimaverenkeghen i Aôndo a ne se ne kera ngi yeghen ken asema ase ga, shin se de akaa agen er uyôughyôughmbaakaav shin makeranta u henen dan se yô, se vôr ken jijingi shi se kera lu a tahav mbu tilen dông hendan a aeren a bo ga. Man aluer ishima ngi se ker nahan man se kôr ityough ga yô, ‘tso a ur se sha kwagh u jighjigh u nan’ wase. (1 Timoteu 1:19) Kpa ishimaverenkeghen i mimi gem taver jighjigh u nan wase.

Ishimaverenkeghen Taver Jighjigh

7. Ishimaverenkeghen ka vegher u jighjigh u nan nena?

⁷ Bibilo kaa ér: “Jighjigh u nan yô, ka u fan kwagh u ishimaverenkeghen yase i lu sha mi la dedoo a akpelan a tan ga, ka ikyav i akaa a i nengen a mi ga la.” (Mbaheberu 11:1) Nahan ishimaverenkeghen ka kwagh u i magh a magh sha jighjigh u nan ga, ka vegher u jighjigh u nan kpôô kpôô. Nenge ase ikyav sha Aberaham. Sha mnenge u orumace yô, un man kwase na Sara yange ve kar mar shighe u Yehova tôndo zwa a ve ér una na ve wan la. (Genese 17:15–17) Nahan Aberaham er nena? Yange ‘na jighjigh sha ishimaverenkeghen ape ishimaverenkeghen ma i lu ga la, er una va hingir ter u akuraior.’ (Mbaromanu 4:18) Ishimaverenkeghen i Aôndo na Aberaham la wa imagh ki jighjigh u na ér una lu a vor la taver gbang. Jighjigh na di gema taver ishimaverenkeghen na la. Aberaham vea kwase na Sara undu ya ve man tsombor ve hingir u tsan ken utenti ken tar ugen sha ayange a uma ve cii!

8. Aluer se tile dông se wa ishima a mbamtaver yô se seer taver ishimaverenkeghen yase nena?

⁸ Aberaham yange na jighjigh a akperan shio, nahan a za hemen u ungwan imo i Yehova sha ashighe a ican je kpaa. (Genese 22:2, 12) Kape se kpa aluer se mba ungwan imo i Yehova shi civir un a ishima i taver ve se lu a vangertiôr ser se zua a injar je la. Paulu nger ér ‘ishima i taver ne  mkom,’ mkom di gem ne ishimaverenkeghen, “man ishimaverenkeghen la yô, i ve ahenge ga.” (Mbaromanu 5:4, 5) Ka nahan ve Paulu nger mkaanem man ye, wener: ‘Sar se u hanmô wen nana̱ tese imbashima i veren tsung shon la u zan ken mfe u mimi u ishimaverenkeghen yase zan zan mkur je.’ (Mbaheberu 6:11) Imba ishimaverenkeghen i or ka nan zua a mi sha u yan ikyar kôôsôô vea Yehova la ia wase se se tile dông se wa ishima a mbamtaver shi se lu saan saan kpaa.

“Ember Nen sha Ishimaverenkeghen”

9. Kanyi se eren hanma shighe ve ia wase se u ‘ember sha ishimaverenkeghen’ yase?

⁹ Ishimaverenkeghen i Aôndo a ne se ne hemba nyityô kwagh i tar ne ua na se cii. Pasalmi 37:34 kaa ér: “Ver ashe hen TER, wa ikyo sha gbenda Na, tsô Una kende u sha, ú ya dyako u tar, ú nenge mtim u á tim mbaaferev kera yô.” Sha kpôô yô se mba a ityôkyaa i ‘ember sha ishimaverenkeghen’ yase ne. (Mbaromanu 12:12) Nahan kpa kwagh u una wase se yô, ka u henen sha ishimaverenkeghen yase ne hanma shighe. Ú henen sha ishimaverenkeghen i Aôndo a ne u ne hanma shighe kpa? U ta ashe u nenge a iyol you ken Paradiso, er u lu ember uma, ma kwagh u nyian we ishima a lu ga kpa? Shi u nenge er ior mba ve kase u cii ve doo u ishima man er u lu eren tom u nan we mkom kpa? Ka wea nenge a ufoto mba Paradiso mba ka i kpela ken ityakerada yase la nahan u hen sha mi kpa? A fatyô u tôôn imba kwaghhenen ne karen sha u esen ajingi a sha windou sha er or a fatyô u nengen kera wang yô. Kpa aluer or ese ajingi a sha windou u nan ga yô, ihyundu ia cir sha mi, nahan nana kera fatyô u nengen a akaa a dedoo a a lu zan hemen ken won la wang ga. Aluer se er nahan ga yô, se yem henen akaa agen. Mayange se de nen ser imba kwagh ne i er se ga!

10. Aluer se mba veren ashe a injar i se va zua a mi la yô, se mba tesen ser se ya ikyar vea Yehova kangenaa nena?

¹⁰ Ityôkyaa jighilii i se civir Yehova yô, ka sha ci u a doo se ishima. (Marku 12:30) Nahan kpa, doo u se veren ashe a injar i se va zua a mi la. Ka kwagh u Yehova kpa a soo ér se er vough je la! I ôr ken Mbaheberu 11:6 ér: “Á fatyô u doon Aôndo ishima ga, saa sha jighjigh u nan. Gadia or u nan kporom hen Aôndo yô, ka u nana na jighjigh keng er ngu, man shi Un ne mba ve lu keren Un la injar.” Er nan ve Yehova a soo ér se fa ér un Ne mba ve civir un la injaraa? Ka sha ci u aluer se er nahan yô, se tese ser se fa Ter wase u sha la tsembelee. Se fa un ser ne nagh shi ônov nav doo un ishima. Aluer se mba a “ishimaverenkeghen” ga yô, a saan se iyol ga, shi se vôr kpaa.—Yeremia 29:11.

11. Ishimaverenkeghen i Aôndo na Mose la wase un u tsuan akaa sha kwaghfan nena?

¹¹ Ikyav i orgen u yange nan kôr ishimaverenkeghen i Aôndo na nan la dông yô, lu Mose. Er  Mose lu “wan u Wanfarao” yô, lu a ian i eren tahav er a soo la cii ken tar u Igipiti, shi zan iti shin hingir orinyar je kpaa. Nahan Mose una zenda akaa ne ityô shin una civir Yehova? Mose yange taver ishima tsua u civir Yehova. Sha ci u nyi? Sha ci u a “ver ashe sha injar” i una zua a mi la. (Mbaheberu 11:24–26) Sha kpôô yô, Mose lu a akperan sha kwagh u ishimaverenkeghen i Aôndo ver un sha ishi la ga.

12. Ishimaverenkeghen i Mbakristu ngi er agunduutya nena?

¹² Apostoli Paulu tôô ishimaverenkeghen kar sha agunduutya. Agunduutya wase u sha inja kwagh la ka a kura mhen wase sha er se tsua akaa sha kwaghfan, se ver akaa a a hembe lun a inja la hiihii shi se tile sha mimi kpaa yô. (1 Mbatesalonika 5:8) Ú cirin agunduutya wou u sha injakwagh la hanma shighe kpa? Aluer u ngu eren nahan yô, ishimaveren you ia lu “sha inyaregh ki i fe kwagh sha min ken hemen ga la ze, kpa [u] ver ishima sha Aôndo u A ne se akaa cii wuee sha u se̱ er kwagh a mi” la, er Mose man Paulu kpa er nahan. Ka sha ishima i taver tsung or a fatyô u vendan ieren i keren mtsera u nan tseegh la ye, kpa aluer se er nahan yô, ka kwagh u dedoo kpen kpen. Mba Yehova a doo ve ishima shi ve veren ashe sha a na cii vea zua a “uma u a lu uma jim la;” nahan ityôkyaa ngi i za kôron ave sha kwagh u a yen sha uma shon ica la ga.—1 Timoteu 6:17, 19.

“Mayange Me Undu U Ga”

13. Ka vangertiôr u nyi Yehova a ne mbatomov nav mba jighjighi?

¹³ Mba ve veren ishima sha tar u hegen ne cii ve̱ hen sha zege kwaghbo u una tser ve ken hemen la, gadia ‘atsan’ nga seer a seer shin tar ne. (Mateu 24:8) Kpa mba ve veren ishima sha Yehova yô, mba a ityôkyaa i cian kwagh ga. Vea ‘tema doo doo, ishima ia yôhôr ve, vea kera lu a mciem ma cian ican ga.’ (Anzaakaa 1:33) Er ve veren ishima sha tar u hegen ne ga yô, ve dondo kwaghwan u Paulu ne, ér: “Inyaregh ki saren ki̱ de luun ken uma wen ga. Kwagh u ne lu a mi yô, a̱ kuma ne, gadia A kaa er: Mayange Me undu u ga, Me kende u kpaa ga.”—Mbaheberu 13:5.

14. Hii nan ve i doo u ishima ia zer nyian Mbakristu sha akaa a iyolough a kwagh a gbe ve a mi la ga?

¹⁴ Ivur Bibilo ne tese wang ér Aôndo una nenge sha a vese. Yesu kpa yange tese er Aôndo a nengen sha a vese sha dooshima yô, a kaa ér: “Kpa vande keren nen tartor Na man perapera Na, man akaa ne [akaa a iyolough a kwagh a gbe se a mi la] cii á seer ne a ye. Nahan yô, asema a̱ de nyian ne sha kwagh u kper ga, gadia kper una gba nôngon sha kwagh na iyol na tsô.” (Mateu 6:33, 34) Yehova kpa fa er i lu kwagh u taver kpishi u tseen ishima sha kwagh u Tartor shi nengen sha ugbayol asev mba sha iyol yô. Nahan se suur nen sha a na vangertiôr ser a̱ na se akaa a kwagh a gbe se a mi la.—Mateu 6:25–32; 11:28–30.

15. Mbakristu vea ver ishe ve jighilii nena?

¹⁵ Ka se tese ser se suur sha Yehova sha u veren ishe yase jighilii. (Mateu 6:22, 23) Or u nan ver ishe i nan jighilii yô, mhen u nan ka a lu wang, nan eren hua ga, shi nan keren kwagh u nan iyol i nan tseegh kpaa ga. Kpa u ngu wer ka u se gba ican kpoghuloo shin se de u nengen sha ugbayol asev mba sha iyol ga. Kpa inja i u veren ishe jighilii yô, ka u veren mcivir u Yehova hiihii ken uma wase shi lun a ‘iyol kôron tsaha’ kpaa.—2 Timoteu 1:7.

16. Hii nan ve i gbe u se taver ishima shi se lu a jighjigh keng ve se fatyô u veren ishe yase jighilii?

¹⁶ Sar or a lu a jighjigh shi nana taver ishima ve nana fatyô u veren ishe i nan jighilii ye. U tesen ikyav yô, aluer hanma shighe or u nan tee u tom nan ngu sendegh ér u yar tom sha shighe u zan mkombo nahan u taver ishima u zaan mkombo her kpa? Aluer or ngu a akperan sha ityendezwa i Yehova a er wener Una nenge sha mbatomov Nav la yô, Satan una za hemen u karen nan sha igbenda kposo kposo zan zan nana de u zan mbamkombo. Nahan aluer se ban a jighjigh yô, se na Satan ian una hemen se, nahan a lu un una tesen se kwagh u se er ye, a kera lu Yehova ga. Nenge er a vihi sha wono!—2 Mbakorinte 13:5.

“Ver Ishima sha Yehova”

17. Er nan ve mba ve suur sha Yehova la ve zough a averen hegen je kpaa?

¹⁷ I tese ken Ruamabera acin imôngo ér  mba ve suur sha Yehova cii mba ve ahenge ga. (Anzaakaa 3:5, 6; Yeremia 17:7) Sha mimi yô, ashighe agen ka ve lu a kwagh ave yum ga, kpa ka vea hen sha averen a vea zua a mi la yô, ve nenge ér ican la cii i gba kwagh ga. Sha nahan yô, ve tese ér ve ver ishima sha Yehova shi mba a vangertiôr ér una na ve akaa a kwagh a gbe ve a mi la cii. (Pasalmi 37:4, 34) Nahan hegen je kpa saan ve iyol. “Ishimaverenkeghen i mbaperapera ia hingir iember, kpa awashima u aferaior yô, una saa ishe.”—Anzaakaa 10:28.

18, 19. (a) Ka vangertiôr u nyi Yehova a ne se? (b) Se ver Yehova ken ‘uwegh asegh ku yanegh’ nena?

¹⁸ Wanye u kpuaa ka nana zenden vea ter u nan yô, nan lu a vangertiôr ér kwagh môm a er nan ga. Se kpaa er se lu zenden vea ter wase u sha la yô, kape se tee ken ishima je la. Yehova kaa ér: “De cie ga, gadia M ngu a we, . . . M wasen we, . . . gadia Mo, TER, Aôndo wou, M kôr uwegh ough ku yanegh; M kaa a we Mer: De cie ga, M wasen we.”—Yesaia 41:10, 13.

¹⁹ Kwagh u i kaa heen ér Yehova kôr or sha uwe la tese dooshima kpen kpen! Davidi nger ér: “M ver TER sha ishigh yagh gbem; er A lum ken uwegh ku yanegh yô, me tenger ga.” (Pasalmi 16:8) Se ver Yehova ken ‘uwegh asegh ku yanegh’ nena? Se er kwagh ne sha igbenda ihiar. Gbenda môm yô, ka u den Mkaanem nam ma hemen se ken akaa a se eren cii; man u sha uhar yô, ka u veren ashe a injar i iengemegh i Yehova a ver se la. Orpasalmi Asav wa icam ér: “M ngu a We gbem, U kôrom sha uwegh agh ku yanegh. Ú hemen mo sha mhen Wou, ken masetyô yô, Ú ngohol mo, Ú za a mo ken icivir.” (Pasalmi 73:23, 24) Aluer se mba a imba vangertiôr la yô, se fatyô u veren ishima sha mlu wase u ken hemen la a ishimataver.

“Mpaa Wen Mgbôghom Ve”

20, 21. Kanyi i lu sha ci u mba ve veren ashe a Yehova laa?

²⁰ Akaa a se tagher a mi ayange ayange la na yô, hemba hingir torough torough u se ver Yehova ken uwegh asegh ku yanegh. Shi côhiin tsô a tim kwaghaôndo u aiegh, man kwagh ne una gema a lu mhii u ican i vesen i ia tser tar u Satan ne, ican i í gbe je i lu a tser u ga yô. (Mateu 24:21) Mciem maa gba mba ve ne Aôndo jighjigh ga la iyol. Er ican ia tser tar ne nahan kpa, mbatomov mba Yehova mba tseen asema yô vea lu ember ken ishimaverenkeghen ve! Yesu kaa ér: “Er akaa angan aa hiin u eren yô, nenge nen sha, kende nen ityouv sha, gadia mpaa wen mgbôghom ve.”—Luka 21:28.

²¹ Nahan yô se ember nen ken ishimaverenkeghen i Aôndo a ne se ne, se de nen ser Satan a tsugh se shin a mee se sha ayom na la ga. Shi se nôngo se lu a jighjigh man dooshima shi se cian Aôndo kpaa. Aluer se er nahan yô, zum u se tagher a mbamlu mba taver je kpa se tile dông, se ungwa imo i Aôndo shi se hendan a Diabolo kpaa. (Yakobu 4:7, 8) “Lu nen dông, asema a en a̱ taver, ne cii mba ne veren ishima, ne keghen TER” la.—Pasalmi 31:24.

[Footnote]

U Fatyô U Nan Mlumun Kpa?

• Ishimaverenkeghen i Yesu lu a mi la wase un u wan ishima nena?

• Jighjigh man ishimaverenkeghen zua nena?

• Ishimaverenkeghen man jighjigh vea wase Orkristu u tsuan akaa a a hembe lun hange hange ken uma la nena?

• Hii nan ve mba ve veren ashe a Yehova la ve lu a vangertiôr ér mlu ve u ken hemen una doo?

[Study Questions]

[Picture on page 28]

Wea lu wanye shin orbeenyol kpa, u ta ashe u nenge a iyol you ken Paradiso kpa?