Mkaanem ma Yehova Ma Uma Je

U Ôron Takerada u Yesaia Asav-asav—Vegher u Hiihii

YEHOVA Aôndo yange pine ér: “Ka an Me tindi nan, man ka an nana za sha ci Wasa?” Nahan Yesaia wan u Amoshi kaa ér: “Mo ne, tindim.” (Yesaia 1:1; 6:8) Yehova maa na un tom u profeti. I nger ityom i profeti i Yesaia er la ken takerada u i yer sha iti na ne.

Ka profeti ne iyolna a nger takerada u Yesaia ye, u ôr akaa a yange er ken atô u anyom 46, hii ken inyom i 778 C.S.Y. (Cii man Shighe u Yesu) la zan zan pelegh inyom i 732 C.S.Y. la kpuaa. I nger kwagh u ajir a Yehova ôr Yuda man Iserael kua akuraior a a kase ve la ken takerada ne, nahan kpa ú hemba ôron kwagh u ‘myom u Yehova, Aôndo’ aa ajiraôron a na la. (Yesaia 25:9) Inja i iti i Yesaia ér “Myom u Yehova.” Se sav Yesaia 1:1–35:10 ken kwaghngeren ne.

“ASANDE A A SHI HER LA AA HIDE”

(Yesaia 1:1–12:6)

Yange a ôr akaaôron a profeti a i nger ken mtom ma mtaan ma hiihii ma takerada u Yesaia la cii ve a ver Yesaia profeti shin a ver un profeti cii ve a ôr á kpa, Bibilo pase se ga. (Yesaia 6:6–9) Kpa se fa wang ser, Yuda man Yerusalem lu uange ken jijingi, “hii shin akevangahar zan zan ar sha ityou je.” (Yesaia 1:6) Akombo a civir dumbur ken tar la. Mbahemenev vev kpa lu eren afer. Kasev kpaa lu kenden a ayol a ve sha. Ior kera lu civir Aôndo u mimi a ishima i môm ga. Nahan Yehova tindi Yesaia “acin imôngo” ér a za lam a ior mba ve lu ungwan kpa kaven ga, shi ve soo u zuan a mfe kpaa ga la.

Akumautya a Iserael man a Shiria va ta ityav sha Yuda. Yehova tôô Yesaia man ônov nav tese “uivande kua akav” ér akumautya a Shiria man Iserael aa fatyô u hemban Yuda ga. (Yesaia 8:18) Nahan kpa ka shighe u “Wantor u Bem” una tema tor la bem una lu gbem shawon ye. (Yesaia 9:6, 7) Shi Yehova una ôr Ashiria, ikyurior i yange yar tom a i i lu “gbough ku iyugh [Na]” la ijir. Ken masejime yô, a yem a Yuda uikyangen, kpa “asande aa hide.” (Yesaia 10:5, 21, 22) Shighe u un u a lu “iceren” i sha ikyav, i “sha ikpughur u Yese” la una hemen la, una ôr ijir sha mimi.—Yesaia 11:1.

Mbamlumun sha Mbampin mba sha Akaa a ken Ruamabera:

1:8, 9—‘I undu wankwase u Shion er ka ityumbe i ken sule u wain, man er daarkura u ken sule nahan’ nena? Kwaghôron ne tese ér shighe u Ashiria una va ta num sha Yerusalem la, mba ve lu ker cii vea lu a gbenda u kuran ayol a ve ga, vough er ityumbe i ken sule u wain, shin daarkura u ken sule, u a fatyô u yôhôr haan inya nahan. Kpa Yehva una yima ve, una de ér ve hingir er Sodom man Gomora nahan ga.

1:18—Kwagh u Yehova a kaa ér: “Va nen ase, sé hen nen kwagh imôngo” la, inja na ér nyi? Yehova yange lu lôhôn ior heen ér ve va vea za idyu sha er vea gba zwa môm sha kwagh ga. Kpa ivur ne tese ér Yehova, Orjir u perapera la una na Iserael ian ér a gema ishima shi a wanger iyol na kpaa.

6:8a—Hii nan ve i er ken ivur ne ér ka an “Me” tindi, shi i kaa ér ka an nana za sha ci “Wasa”? Ishember i “Me” i i er ken ivur ne la tile sha ityough ki Yehova Aôndo. Ishember i “Wasa” la di tese ér orgen kpa yange nan lu vea Yehova. Ikyav tese wang ér ka “Wan [u Aôndo] u môm môm” la yange lu vea na ye.—Yohane 1:14; 3:16.

6:11—Er nan ve Yesaia pine Yehova ér: “Zan zan hanma yange je, Tere?” Yesaia lu pinen ér una fa ayange a una za hemen u pasen ior mba cighir asema loho u Yehova ga. Kpa lu pinen ér mlu u Yuda man Yerusalem lu uange ken jijingi la una va a ilyahan sha iti i Aôndo a kuma shighe nan je?

7:3, 4—Hii nan ve Yehova yima Tor u ifer Ahashi? Tor u Shiria man Tor u Iserael yange ve zua zwa ér vea hungwa Ahashi, Tor u Yuda sha ikyôn kera, vea gema vea ver wan u Tabeel tor sha ityough nagh, man or ne lu or u ken tsombor u Davidi ga. Awashima u Satan ne yange ma nzughul  a ikyuryan i Tartor i Yehova ya a Davidi la. Nahan Yehova yima Ahashi sha er una kura tsombor u “Wantor u Bem” una due ker la yô.—Yesaia 9:6.

7:8—I ôr ken ivur ne ér, er anyom 65 aa lu a kuma ga je tsô, á “sombo Eferaim avur avur.” Kwagh ne yange er nena? Yesaia yange ôr kwaghôron u profeti ne ica lu a gba ga tsô maa i hii u kuran ior mba ken tartor u ikwe pue la yemen a ve uikyangen, geman va veren atôatyev ken tar la. Kwagh ne er sha “ayange a Peka tor u Iserael la.” (2 Utor 15:29) Kwagh ne za hemen nahan zan zan sha ayange a Esar-hadon, wan u Senakeribi tema tor sha Ashiria sha ityough ki ter na la. (2 Utor 17:6; Esera 4:1, 2; Yesaia 37:37, 38) Mkor u Mbaashiria lu kuran ior duen a mi ken Samaria hiden va haan mbagenev ker la yange za hemen anyom 65 er i ter ken Yesaia 7:8 nahan.

11:1, 10—Er nan ve i yer Yesu Kristu ér ‘iceren i sha ikpughur u Yese,’ shi i hidi i yer un ér “mise u Yese”? (Mbaromanu 15:12) Yesu yange due ken “ikpughur u Yese” zum u lu orumace shin tar la, sha ci u yange i mar un ken tsombor u Davidi, u lu wan u Yese la. (Mateu 1:1–6; Luka 3:23–32) Kpa yange mba veren Yesu tor yô, mlu na vea uter nav mbatsev mbara gema. Er i na Yesu tahav man agee ér a na uumace mba ungwan tindi uma u tsôron shin tar yô, a hingir ‘Ter ve u tsôron.’ (Yesaia 9:6) Sha nahan yô, ngu “mise” u uter nav mbatsev kua Yese kpa sha mi.

Ityesen hen Avese:

1:3. Aluer se venda u eren kwagh u Orgban se a soo hen a vese yô, afatyô u kaan ér bua man jaki je kpa fa kwagh hemba se. Kpa aluer se gema se mba a iwuese sha akaa a dedoo a Yehova a er sha ci wase la yô, se er kwagh sha ibume ga, inja na yô, se undu Yehova ga.

1:11-13. Yehova yange vôr a aeren a atseregh a ukwaghaôndo eren la kua mbamsen vev mba sha ikpamberashe mbara kpaa. Nahan doo u se lu a ieren i dedoo shi se eren msen a ishima i môm.

1:25-27; 2:2; 4:2, 3. Yange i va tim Yuda i kura ior i yem a ve uikyangen, kpa lu u asande a a gem asema yô aa hide ken Yerusalem aa va hii mcivir u mimi. Kwagh ne tese ér Yehova zungu mbaasorabo mba ve gem asema la mhôônom.

2:2-4. Tom wase u pasen kwagh u Tartor sha gbashima shi geman ior hingir mbahenen ne wase ior kpishi ken ityar kposo kposo ve hen u lun bem bem a mbagenev.

4:4. Yehova una kar a aeren a dang man iwoo-or kera.

5:11-13. Aluer se mba tsuan a tsua iemberyolough i se eren ga yô, se mba eren kwagh sha kwaghfan ga.—Mbaromanu 13:13.

5:21-23. Doo u mbatamen shin mbakuran vea “nengen ayol a ve ér mba mbafankwagh” ga. Shi doo u vea ‘maan wain’ sha kwaghfan, shi vea hemba soon mbagenev a mbagenev ga.

11:3a. Aeren a Yesu man atesen a na wase se u fan ser mcie u cian Yehova la ne msaanyol.

“TER UNA ZUNGWE YAKOB MHÔÔNOM”

(Yesaia 13:1–35:10)

Akaaôron a ken Yesaia ityough 13 zan zan ityough 23 cii ka ajiraôron a Aôndo ôr akuraior kposo kposo yô. Nahan kpa, “Ter Una zungwe Yakob mhôônom,” una de ikwe i Iserael cii ia hide ken tar ve. (Yesaia 14:1) Yehova ôr ken Yesaia 24 zan zan 27 ér Yuda una hingir ice, kpa a tôndo zwa a ve ér vea hide ken tar ve. Ishima vihi Yehova a “mbahundenmsôrom mba ken Eferaim [Iserael],” sha ci u ve za ya ikyar a Shiria. Shi ishima vihi un a “Pristi man profeti” u ken Yuda sha ikyar i ve ya a Ashiria la. (Yesaia 28:1, 7) Yehova kaa ér kwagh a tser “Ariel [Yerusalem]” sha ci u a lu “yemen senen shin Igipiti” ér a yima un yô. (Yesaia 29:1; 30:1, 2) Nahan kpa, i tsengaôron ér mba ve ne Yehova jighjigh yô, una yima ve.

Yehova una kura “uwo u Shion” vough er “gumbegha ka a ta kume sha inyam na i a woo nahan.” (Yesaia 31:4) Shi a tôndo zwa ér: “Nenge, tor ugen una tema tor sha perapera.” (Yesaia 32:1) Er Mbaashiria va kase ityav sha Yuda yô, kwagh ne na ‘mbatyomov mba i tindi ve u keren bem’ la kpa ger mliam tsung. Nahan kpa Yehova tôndo zwa ér una wanger ior nav, una “de ve asorabo a ve.” (Yesaia 33:7, 22–24) “TER ngu yuwen akuraior cii, ishima ngi vihin Un a akum a ve cii.” (Yesaia 34:2) Yuda una saa ice ga. Gadia i kaa ér, “taaikôngo man ikpoghonya vea lu sar sar, deserti una ember, una mondo er ishohough nahan.”—Yesaia 35:1.

 Mbamlumun sha Mbampin mba sha Akaa a ken Ruamabera:

13:17—Ka sha nyi gbenda Mbamede wa azurfa ikyo ga, zenaria kpa doo ve ishima ga? Icivir i Mbamede man Mbapershia yange ve zua a mi zum u vea hemba ityav la yange i hemba doon ve a ishar i yan. U tesen ikyav yô, zum u Shirushi hemba Babilon ityav la, a tôô ikyav mbi azurfa man mbi zenaria mbi Nebukadinesar kura ken tempel u Yehova la cii a na mba ve lu hiden ken Yuda la.

14:1, 2—Ior mba Yehova yange ve hide ve “kôr mba ngise ve kôr ve la,” shi ve “tema tor sha mba ngise ve kighir ve la” nena? Kwagh ne yange kure sha ior er Daniel nahan, gadia yange lu sha ian i vesen ken Babilon sha ikyev i Mbamede man Mbapershia; man Eseter, un yange hingir torkwase u Mbapershia; kua Mordekai, u lu mue tor ken Tartor u Mbapershia la.

20:2-5—Yesaia yange zende idyelegh kpôô kpôô anyom ataraa? A shi nan kpa Yesaia yange ‘er riga’ na u ken won la mase shin a ikyondo i ken atô tseegh.—1 Samuel 19:24.

21:1—Ka hanma ijiir i yer ér ‘deserti u zegemngere’? Shin er Babilon lu ikyua a zegemnger la kpôô kpôô ga nahan kpa, i yila un ér deserti u zegemnger. I yila un nahan sha ci u Ifi u Uferati man ifi ugen u i yer ér Tigris la yange ve kuan hen haregh la hanma inyom, nahan ijiir la lu er “zegemnger” nahan.

24:13-16—Mbayuda vea ‘lu hen akuraior, er mndoor u kon u olev nahan man er twaryaren u atam a ikyon i wain zum u i bee sunda kera yô’ nena? Er ka a sunda ikyon i wain a bee ve atam agen a shi sha mi nahan, kape a lu iorov kpuaa tseegh vea war mtim u Yerusalem man Yuda je la. Nahan hanma ijiir i í yem a asande a a war la cii aa wuese Yehova, a̱ lu sha “vegher u sha iwanger [Ityoughkitaregh ki tar u Babilon]” shin “sha ityar i hen kpe u zegemnger [u Mediterenia]” la kpaa.

24:21—Ka unô ve lu “akum a Sha a a lu Sha la, kua utor mba tarev mba shin tar,” mba i er kwagh ve ken ivur ne laa? “Akum a Sha a a lu Sha la” a fatyô u lun ujijingi mbaaferev. Sha nahan yô, “utor mba tarev mba shin tar” la di a lu mbahemenev mba shin tar mba azôv a hemen ve la.—1 Yohane 5:19.

25:7—‘Ikyondo i cirin, i i cir sha ior cii la, kua ikyondo i yisan i i samber i sha akuraior cii la’ kanyi? Kwagh ne umbur se kwagh u mbaihyomov mba uumace mba hemban cii uhar—ka isholibo man ku je la.

Ityesen hen Avese:

13:20-22; 14:22, 23; 21:1-9. Mkaanem ma profeti ma Yehova ma gbe inya ga, vough er yange ma kure sha Babilon nahan.

17:7, 8. Ior kpishi ken Iserael yange ve ungwa imo i Yehova ga, kpa mbagenev yô, suur sha a na. Kape mbagenev mba ve lu ken Kwaghaôndo u Aiegh kpa ve ongo loho u Tartor je la.

28:1-6. Ashiria una hemba Iserael, kpa Aôndo una yima mbajighjigh. Hanma kwa u Yehova ka una ôr mbaaferev ijir yô, a na mbaperapera ishimaverenkeghen.

28:23-29. Yehova kôôm mbaasemaamimi sha gbenda u a nenge ér a wase ve yô.

30:15. Aluer se soo ser Yehova a yima se yô, gba u se hide se ‘mem’ shin se za ker myom hen uumace ga. Shi se tese ser se suur sha tahav mbu Yehova a lu a mi mbu yiman se la sha u ‘teman bem bem’ shin cian ma kwagh ga.

30:20, 21. Ka se “nenge” a Yehova shi se “ungwa” imo na i myom la sha u dondon akaawan a na a a lu ken mkaanem nam ma a ne i nger ken Bibilo la, man sha u dondon akaawan a a ne se sha ikyev i “wanakiriki u jighjigh man u fan kwagh” la.—Mateu 24:45.

Kwaghôron u Profeti u Yesaia Seer Taver Se Ishima Ér Se Suur sha Mkaanem ma Aôndo

Se sugh Aôndo kpishi sha mkaanem nam ma i nger ken takerada u Yesaia la. Akaaôron a profeti a a vande kuren la seer taver se ishima ér, ‘kwaghôron u Yehova, u a dugh ken zwa Na, una hide her a Na gbilin ga.’—Yesaia 55:11.

Man akaaôron a profeti a i er sha kwagh u Mesiya, a a lu ken Yesaia 9:7 man 11:1–5, 10 la di seer taver jighjigh u se ne akaa a Yehova a er sha u yiman se la. Takerada ne ngu a akaaôron a profeti kpishi a a lu kuren sha ayange ne man a aa va kure ken hemen la kpaa. (Yesaia 2:2–4; 11:6–9; 25:6–8; 32:1, 2) Sha kpôô yô takerada u Yesaia kpa tese ér “mkaanem ma Aôndo ma uma je”!—Mbaheberu 4:12.