“Ikyuryan I Tse” Shi Ngi A Inja Je Kpa?

KEN inyom i 1786 la, ortwer ugen u lu marnya u tar u France yô nger takerada, mba yer u ér Traité d’anatomie et de physiologie (Ngeren u sha Kwagh u Mlu u Iyolough man M-ertom u I). Ior kaa ér takerada môm u sha shighe na la, u u pase m-ertom u igbila er u ngun nahan ngu ga. Ú za ibian nyian kpishi. Semberee ne i tee takerada ne môm hemba Naira miliôn utar man dubu deri unyiin! Nahan kpa, ka mbauangev mba sha ayange ase ne kpuaa tseegh vea na ortwer u nan har sha takerada ne sha u eren ior twer jighjigh ye. Er ú tse shi i nger ú sha inja nahan kpa, ngu a inja hen oruange nyian ga.

Kape ior kpishi ve nengen ityakerada i Bibilo i ve senge ér ka Ikyuryan i Tse je la. Akaa a Mbaiserael a i nger ker la doo ve shi gbenda u i nger a la kpa doo ve. Kpa, ve nenge ér doo u or nana dondo kwaghwan u i nger ker, u a tse hegen i hembe anyom 2,400 la ga. Kwaghfan u sangen yeke man kasua u ior ve eren ainge kua akaa a ve eren hen icombor ve la kpa kaha a kwagh u ior eren sha ayange a i nger Bibilo la. Philip Yancey, or u yange kengese abaver a magazin u i yer ér Christianity Today la nger ken takerada na u i yer ér The Bible Jesus Read la wener: “Ikyuryan i Tse ngi a akaa a injaa yum ga, aa a lu ker la kpa doo ior mba ainge ishima ga. Sha ci u atôakyaa ne man agen yô, ior mba fe ôron Ikyuryan i Tse i i̱ hembe ngee ken Bibilo la ga.” Mnenge na ne hii nyian ga.

Apostoli Yohane yange kpe ken inyom i 100 shin ikyua a inyom la, ken derianyom u hiihii la. Ka zulum anyom 50 yô, gum-ornyar ugen, iti na ér Marcion, za mough gba tesen ken igbar ér Mbakristu ve̱ venda Ikyuryan i Tse. Orbuter ugen u timen sha akaa a mbayiase, iti na ér Robin Lane Fox kaa wener, Marcion lu nyiman kaan ér “‘Aôndo’ u ken Ikyuryan i Tse la lu ‘or u wan tswam kpishi,’ u kwagh u aferaior man upilambaiorov er Tor Davidi u Iserael nahan doo un ishima yô. Kpa Kristu yô, pase se kwagh u Aôndo u hemban cii u a lu kposo a Aôndo u ken Ikyuryan i Tse la yô.” Fox nger wener ior hii u yilan ityesen ne ér, “‘ityesen i Marcion’ shi ior mba dondon i kpa lu seer a seer, hemban je yô mba lamen zwa u Shiria. Ityesen ne za hemen zan zan derianyom u sha unyiin la.” Nyian kpa mbagenev lumun a ityesen ne. Anyom kar hegen hemba 1,600, nahan kpa Philip Yancey nger wener, “Mbakristu kera fa akaa a ken Ikyuryan i Tse ga, ior mba ainge fa kwagh u Ikyuryan i Tse ga kuaa je.”

Ikyuryan i He kar tile sha ityough ki i Tse la shinii? Akaa a se fe sha kwagh u “TER u akum a Sha” u i er kwagh na ken Ikyuryan i Tse la zua sha kwagh u “Aôndo u dooshima” u i er kwagh na ken Ikyuryan i He la nena? (Yesaia 13:13; 2 Mbakorinte 13:11) Ikyuryan i Tse la ia wase u nyian kpa?