Mbampin Mba Mbaôron Takerada Ne Ve Pin La

Doo u Mbashiada mba Yehova vea za ivese i or u hen tsombor ve shin ma huror ve u nan lu Orshiada ga yôô?

Iniongo i ivesegh ka shighe u saanyol, nahan ka kwaghbo u Orkristu soon ér nana za i̱ ga. Nahan kpa, aluer i lôhô wanye ivese yô doo u nana dondo kwagh u mbamaren mba nan shin mba nan lu sha ikyev ve ve ôr la. (Mbaefese 6:1-3) Kpa aluer or u nan lu Orshiada u Yehova ga kaa a kwase u nan, u nan lu kwase Kristu la ér vea za ivese ken côôci di ye? Alaghga imoshima i nan ia lumun nan u zan kpa eren akaa a kwaghaôndo a a lu eren hen iniongo la ga.

Nahan yô, ka ishima i or u zan ivese shin vendan. Kpa, doo u hanma Orkristu nana fa ér Yehova una pine nan kwagh u nan tsough u eren la, nahan gba u nana time sha akaawan a ken Ruamabera shighe u nan soo u zan ivese i or u nan lu Orshiada u Yehova ga la.

Kwagh u a̱ hemba gban Orkristu ishima yô i lu u eren ishima i Aôndo. Yesu kaa ér: “Aôndo ka jijingi je; mba ve civir Un yô, ka u ve̱ civir ken jijingi kua ken mimi kpaa keng.” (Yohane 4:24) Nahan Mbashiada mba Yehova mba nyer iyol ken mbamsen man uiniongo mba ukwaghaôndo mbagenev ga, shi mba eren akaa agen a Bibilo i vende la kpaa ga.—2 Mbakorinte 6:14-17.

Orkristu ka nan fa er kwagh u nan tsough u eren la una bende a mbagenev yô. Aluer u lumun wer u za ivese kpa ú er akaa a hen ivese la ga nahan a doo ior ou kpa? Shi doo u ú gbidye kwar sha er mze wou la una bende a mba u civir Aôndo a ve imôngo la yô. (Mbaromanu 14:13) Aluer we shin mba hen tsombor wou nenge ér aluer u za ivese i or u nan lu Orshiada u Yehova ga la kpa u er kwaghbo ga je kpa, u hen wer kwagh la una bende a anmgbianev ou mba nomso man mbakasev mba ken Kristu gaa? Mze wou la una vihi imoshima i mbagenev ga he?

Hanma iniongo i ivesegh i or wase u nan lu Orshiada u Yehova ga nan lu eren cii mzeyol ngu her. Kpa aluer or u nan lu eren ivese la lôhô u ér u lu ikyar i nan u suen nan ken ivese di ye? Shin aluer ikyar u u a lu Orshiada u Yehova ga la soo u eren hanma kwagh u hen ivese la di ye? Aluer u za ivese i sha tindi i i lu orjir shin ma or u gomoti a ne nan ian i zuan ivese nan lu hemen yô, alaghga a gba u ú tema u nenge a nenge tseegh.

Nahan kpa, aluer orhemen kwaghaôndo zua ior ivese ken iyou adua yô, ishima a hemba nyian cii ér mzeyol una lu. Nahan aluer u soo wer u dondo imoshima you i Bibilo i tsaase i la shi u er sha akaa a u ne jighjigh a mi la shin u er akaa a aa vihi mba ve lu eren ivese la ishima ga yô, hemba doon u zan ivese shon ga. (Anzaakaa 22:3) Shi aluer u vande pasen ve akaa a u ne jighjigh a mi la shin u ôr ve iwasen i u soo wer u na ve shin ma kwagh ugen u ú er yô, kwagh ne una kura u sha mbamzeyol shi una kura tsombor wou kpaa.

Mbakristu mbagenev ka vea gbidye kwar sha atôakaa ne cii yô, ve nenge ér aluer ve za ivese i or u nan lu Orshiada ga, man ve er akaa a kwaghaôndo hen ivese la ga yô ve er kwaghbo ga. Kpa aluer Orkristu nenge ér aluer nan za yô, alaghga nana per atindi a Aôndo yô, a hemba doon u nana za a za ga kuaa. Aluer nan za ivese shon ga kpa nan gema nan za iniongo i ivesegh yô, doo u nana ver ishima nana ‘er akaa cii sha ci u icivir i Aôndo.’ (1 Mbakorinte 10:31) Aluer or lumun u zan ivese shin nan venda kpa, hanma or nana̱ fa ér “nana . . . tôô ikyav mbi nan iyol i nan.” (Mbagalatia 6:5) Wea lumun u zan ivese shin zan ga kpa, fa wer kwagh u vesen yô ka u we lun a imoshima i wang sha ishigh ki Yehova Aôndo.