Ve Taver Ishima Ken Aseer A Ve

 MBAMZEYOL mba u lu tagher a mi la vea fatyô u nan we iuren kpishi. Ka ve nyôr or iyol er hiin nahan. Alaghga u hen wer mayange je u fatyô u nôngon a ve ga, shin u hen wer u ngu a tahav mbu nôngon a ve ga, gayô u kar iyol you sha mbagenev nahan u nenge wer u gba kwagh ga. Adooga ú gba icôronuange, man angev mbun uma u mshiam ken iyol shi mbu na yô, uma due ú ishima kpaa. Mbamzeyol mban na yô, u ngu a ishimaverenkeghen ga. Alaghga we kpa u kaa a Aôndo ikyaa i Yobu nahan, wer: “Kpe ahii, ma U yerem shin Sheol, ma U yerem zan zan iyugh You ma i kar kera, ma U verem shighe, ma U shi U umbur mo!”—Yobu 14:13.

 Ú sôr mbamzeyol mban nena? Alaghga a taver we u sôron mbamzeyol mban, kpa ú hemba zuan a iwasen aluer u tôô ishima you sha ve kera yô. U tesen ikyav yô, hen sha mbampin mba Yehova pine orjighjigh Yobu ne, ér: “Shighe u M tim imagh ki taregh la, u lu hana? Kaa ase, aluer wea lu a mkav sha mi yô. Ka an nan ver mkighir u ki—gadia u fa. Shin ka an nan naregh kor u karen kwagh a mi sha ki?” (Yobu 38:4, 5) Aluer u hen er mbampin mban ve lu a inja yô, vea wase u u fa er Yehova a hembe kwaghfan man agee yô. Ngu a ityôkyaa i dedoo i a de ér botar ne a lu her yô.

“Saa ken Iyol”

 Orjighjigh ugen sôn Yehova ér a dugh un “saa ken iyol” kera, saa ne lu kwagh u za un iyol kpoghuloo yô. Apostoli Paulu yange sôn Aôndo acin atar ér a dugh un saa ken iyol kera. A̱ lu nyi je ia lu saa ne kpa, yange i̱ na Paulu kera zua a iember kpishi ken mcivir u Yehova ga. Paulu kaa ér u wan ishima a saa ne lu un vough er un ngu wan ishima a gbidiv nahan.  Kpa Yehova gema kaa a na ér: “Mrumun u sha mhôôn Wam kuma u, gadia agee Am ka a tema hoghom hoghom ken isheer.” Yehova yange dugh saa u lu Paulu ken iyol la kera ga. Nahan gba u Paulu una wa ishima a saa la, sha nahan yô, a mase kaan ér: “Ka shighe u m lu isheer la je m gem m taver ye.” (2 Kor. 12:7-10) Paulu lu ôron ér nyi jimi?

 Mzeyol u Paulu lu a mi la bee sha ivande ga. Nahan kpa kwagh la yange un u eren Yehova tom sha gbashima ga. Paulu yange suur sha Yehova, sônon iwasen na hanma shighe. (Fil. 4:6, 7) Shighe u zulum u Paulu una kpe la, a kaa ér: “M nôngo ityav mbi dedoo ve. M kure ayem am vough, m saa a jighjigh u nan.”—2 Tim. 4:7.

 Yehova yaren tom a ior mba ve yen ne sha u kuren ishima na, shin er ve lu a mbamzeyol vev man mbamtaver vev nahan kpaa, kpa icivir yô ka i na. Shi ka a na ve kwaghfan man akaawan a aa wase ve u wan ishima a mbamtaver shi vea zua a iember ken tom u ve lu shiren un ne yô. Sha kpôô yô, Yehova una fatyô u yaren tom a uumace mba yinan mban u eren ishima na.

 Paulu yange ôr er i hii ve Aôndo dugh un saa ken iyol ga yô, á kaa ér: “Sha u m̱ de kenden iyol sha yum ga” yô. (2 Kor. 12:7) “Saa” u lu Paulu ken iyol la umbur un ér un yina shi kwagh la wase un u hiden a iyol na jime. Kwagh ne zua vea kwagh u Yesu yange ôr la, ér: “Man shi hanmô u nan kenden a iyol i nan sha yô, á hire a nan ijime; man hanmô u nan hir a iyol i nan ijime yô, á kende a nan sha.” (Mat. 23:12) Atsan ka a wase mbacivir Aôndo u hiden a iyol ijime shi nga a na yô ve fa ér saa vea suur sha Yehova ve vea fatyô u wan ishima sha jighjigh ye. Sha ityôkyaa ne yô, vea fatyô u ‘tan ihyagh ken Ter’ er apostoli kpa er nahan.—1 Kor. 1:31.

Mbagenev Fa Mbamshi Vev Ga

 Alaghga mbagenev vea lu a mbamshi mba ve fetyô u fan ga yô. U tesen ikyav yô, adooga or nana ta ave vanger shin nana suur sha iyol i nan a kar ikyaa inya. (1 Kor. 10:12) Mshi ugen u ior kpishi ve lu a mi yô, ka isharen i duen iti.

 Yoabi, u lu kurutya u Tor Davidi la lu or u taver ishima shi eren kwagh sha nomsoor shi lu a mfe u sôron mbamzeyol kpaa. Nahan kpa, Yoabi lu a ibo kpishi sha ci u ieren na tese ér kenden a iyol na sha shi tahav doo un ishima kpaa. Yange wua ukurmbautyaav uhar. Hiihii yô, yange or iyev sha u wuan Abner. Sha uhar yô, Yoabi yange er inja er ngu sughun anngô na Amasa nahan, maa za kôr un indyer ken uwegh ku yanegh er a soo u susen un zwa nahan kpa gema kuma un a kuma sanker u kôr ken imese la. (2 Sam. 17:25; 20:8-10) Yange i ver Amasa kurutya sha ityough ki Yoabi, nahan Yoabi wua un, alaghga lu veren ishima ér á hide á na un kurutya u Mbaiserael. Yoabi yange de ieren na i kenden a iyol na sha shi soon tahav la ga. Yange er kwagh vihi kpishi man vaa afanyô tsô kpaa ga. Nahan shighe u Tor Davidi zulum ken ku la, á kaa a wan na Solomon ér a̱ wua Yoabi sha akaabo na la kpee je.—1 Utor 2:5, 6, 29-35.

 Mayange se dondo asaren a ase a bo la ga, kpa se nôngo se hemba mbamshi asev. Gba u se hii fan mbamshi asev. Nahan se nôngo kpoghuloo sha u hemban ve. Se eren msen hen Yehova hanma shighe ser a wase se se hemba mbamyen asev, shi se henen Mkaanem nam kpoghuloo, se keren igbenda i se nôngo a mbamyen asev yô. (Heb. 4:12) Alaghga a gba u se za hemen u nôngon a mbamyen asev, kpa mayange se yina nen ishima ga. Er se yen yô, alaghga a gba u se za hemen u nôngon a mbamyen asev shighe gôgônan. Paulu kpa yange lu a zayol ne, nahan á nger ér: “Kwagh u a sarem yô, m eren un ga, ka kwagh u a sarem ga la je m eren ye.” Er u vande fan nahan, Paulu yange yina ishima sha mbamshi nav inja er ve gande un agee ga. Kpa suur sha iwasen i Aôndo sha ikyev i Yesu Kristu, nahan a za hemen u nôngon a ve. (Rom. 7:15-25) Paulu ôr ijiir igen kpaa ér: “M ngu gbidyen iyol yam m ngu veren i ken kpan je, sha u i̱ de lu u m ôr mbagenev  kwaghaôndo kera man mo iyol yam yô, m̱ gema m̱ yina sha ikyaren ga.”—1 Kor. 9:27.

 Uumace ka ve soo u keren ishô sha kwagh. Se fatyô u hemban ieren ne sha u lun a mnenge u Yehova sha akaa shi eren sha kwaghwan u Paulu a we Mbakristu la, ér: “Nyagh nen kwagh u a lu u ifer, var nen sha kwagh u dedoo.” (Rom. 12:9) Gba u se eren kwagh sha mimi shi se taver ishima shi se kôron ayol a ase tsaha ve se fatyô u nôngon a mbamyen asev ye. Davidi yange sôn Yehova ér: “Kar ahi am kua ishima yam kpaa.” (Ps. 26:2) Yange fa er Aôndo a lu a tahav mbu karen fan kwagh u a lu ken atô u ishima yase shi wasen se yô. Aluer se dondo kwaghwan u Yehova u a lu ken Mkaanem nam la shi se lumun icighan jijingi na yô, se fatyô u hemban mbamyen asev.

 Alaghga ishima ia za mbagenev iyol sha ci u mbamzeyol mba ve nenge ér vea fatyô u hemban ve sha tahav vev ga yô. Mbatamen mba ken tiônnongo vea fatyô u wan se kwagh sha dooshima shi taver se ishima kpaa. (Yes. 32:1, 2) Kpa doo u se lu a mnenge u vough. A fatyô u been a mbamzeyol mbagenev ken tar u bo ne ga. Nahan kpa, ior kpishi hen u wan ishima a mbamzeyol vev, nahan kwagh la wase ve u lun saan saan.

Yehova Tôndo Zwa u Wasen Se

 Nyityô mzeyol u se lu a mi ken ashighe a ican ne cii kpa, se fatyô u lun a vangertiôr ser Yehova una kura se shi una yima se kpaa. Bibilo wa se kwagh ér: “Hide nen a ayol a en ijime er uwegh ku Aôndo ku ageegh ku lu sha a ven nahan, sha er shighe á va kuma vough yô Una kende ne sha. Gema nen ishima i nyian yen la cii, haa nen sha a Na, gadia ka Un A lu koson ne ye.”—1 Pet. 5:6, 7.

 Shighe u anmgbian u kwase ugen u i yer un ér Kathy, u er tom shin Betel anyom imôngo la va fa ér nom na ngu a angev mbu ken ityou mbu i yer ér Alzheimer la yô, hen ér una fatyô u wan ishima nengen sha nom na ga. Nahan hingir hange hange u una sônon kwaghfan man tahav hen Yehova hanma shighe cii. Er angev mbu nom na lu seer taver a taver yô, anmgbianev mba nomso mba ken tiônnongo ker gbenda u wasen anmgbian u lu uange ne. Anmgbianev mba kasev mba kwagh u Kathy vea nom na gba ve ishima la kpa taver un ishima. Yehova yange yar tom a anmgbianev mba ken tiônnongo mban sha u taver tsombor ne ishima, nahan kwagh ne wase Kathy nenge sha nom na kuma er anyom 11 nahan cii va mase saan ku ye. Kathy kaa ér: “Yange m sugh Yehova sha iwasen na a ishima i môm a mliam ashe, kwagh ne seer taver mo ishima. Yange m hen mer er m vôr kpishi yô, me kera fatyô u eren kwagh môm ga.”

Er Se Hemba Mbamshi Asev mba Se Fe Ve Ga La Yô

  Shighe u or nan hii u henen ér nan gba kwagh ga yô, alaghga nana gba henen ér Yehova una ungwa mbamsen mba nan shighe u kwagh a tser nan la ga. Hen shighe la doo u nana hen sha mkaanem ma Davidi ôr shighe u vaa afanyô sha isholibo i er vea Batesheba la, a kaa ér: “Ishima i zamber, i uren tsung yô, Ú laha ga, Aôndo.” (Ps. 51:17) Davidi yange gema ishima sha mimi nahan fa ér una sôn Aôndo kpa una zungwe un mhôônom. Yesu kpa yange lu a ieren i Yehova i den kwaghbo la. Ivangeli i Mateu pase er mkaanem ma Yesaia man ma kur sha Yesu yô. Ma kaa ér: “Ijinga i hemben Una sombo i ga; mou u imenger u yughur mnyim kpaa, Una pir ga.” (Mat. 12:20; Yes. 42:3) Shighe u Yesu lu shin tar la mhôônom kôron un a mbaatsanev. Shighe môm kpa seer nan mbaatsanev ican ga. Kpa za hemen u wan ishima a atsanaior. Kape eren a ior shighe u lu shin tar je la. Ú na jighjigh wer Yesu ngu a gema kposo ga, shi una fatyô u zungwen a we ken isheer you er ngise eren nahan ga he? I ôr ken Mbaheberu 4:15 ér una fatyô u “zungwen a vese imôngo ken aseer a ase.”

 Shighe u Paulu lu ngeren kwagh u ‘saa na u ken iyol’ la, a kaa ér agee a Kristu yisa un “er tenti” nahan. (2 Kor. 12:7-9; NW ) Paulu yange nenge ér Aôndo ngu kuran un sha hemen u Kristu vough er or ka nana̱ lu ken tenti ve kwagh a er nan ga nahan. Mayange se yina nen ishima sha ci u mbamshi asev shin mbamzeyol asev ga, vough er Paulu kpa er nahan. Saa se eren tom a hanma kwagh u Yehova a lu nan se sha ikyev i nongo na u shin tar la ve se za hemen u taver ken jijingi ye. Se er hanma kwagh u se fetyô cii nahan se mase suur sha Yehova vangertiôr ser a̱ kura se. Aluer se nenge er agee a Aôndo a wase se ken aseer a ase yô, se kaa ikyaa i Paulu nahan, ser: “Ka shighe u m lu isheer la je m gem m taver ye.”—2 Kor. 12:10.

[Picture on page 3]

Paulu yange eren msen hen Yehova hanma shighe ér a wase un sha er una er tom u pasen kwagh doo doo yô

[Picture on page 5]

Tor Davidi yange wa Yoabi akumautya sha ikyev

[Picture on page 5]

Yoabi yange wua Amasa u hingir kurutya sha ityough nagh la

[Picture on page 6]

Mbatamen ka ve wa se kwagh ken Ruamabera sha dooshima sha er se nôngo a mbamzeyol asev yô