Mbampin mba Mbaôron Takerada Ne Ve Pin La

Yange i kaa a Mbayuda ken Nehemia 8:10 ér “ve ya akaa a wan ahôm” NW, kpa ken Levitiku 3:17 di i kaa a ve ér: “De ye nen ahôm ga.” Se pase avur a ahar ne nena?

Ken zwa Heberu yô, kwagh u i er ken Nehemia 8:10 ér “ve ya akaa a wan ahôm” la ngu kposo a “ahôm” a i er ken Levitiku 3:17 la. Ishember i ken zwa Heberu i i yer ér che’lev, i i gem ken Levitiku 3:17 ér “ahôm” la, ka ahôm a inyam shin a or. (Lev. 3:17, 3; Mbaj. 3:22) Avur a a lu ikyua a ivur i sha 17 la tese ér yange i venda a Mbaiserael ér ve de ye ahôm a inyam a a lu ikyua a mnyam man ahi a inyam i i ne nagh a mi la ga, shin ahôm a a lu vegher u shin iwenge la kpaa ga, sha ci u “ahôm cii ka a TER.” (Lev. 3:14-16) Sha nahan yô, ahôm a yange i venda a ve ér ve de ye ga la, ka ahôm a inyam i i gbe u a na Yehova nagh a mi la.

Ka ishember i ken zwa Heberu i i yer ér mash·man·nim’ la i gem ken Nehemia 8:10 ér “akaa a wan ahôm” ye, man ka cii ijiir i i ter ishemberti ne ken Ruamabera u Mbaheberu je ne. I zua a ishember ne ken ishember i pasen ieren, i i yer ér sha·men’ la man inja i ishember ne ér “wa ahôm.” Asemberatii a a gbe a zough sha ishember i pasen ieren ne tese yôughyôugh man mkpeyol. (Nenge Yesaia 25:6.) Ken asember a i zough a mi ken ishember i pasen ieren la cii ka ishember i i yer ér she’men, u a lu ishember i pasen ti la i hembe yaren tom a mi ye, man ashighe kpishi ka i gema ishember ne ér mkurem shin “mkurem ma olev.” (Dut. 8:8; Lev. 24:2) Ishember i mash·man·nim’ i i yar tom a i̱ ken Nehemia 8:10 la ngi ôron kwagh u kwaghyan u i we mkurem sha mi kpishi yô, shin a fatyô u lun inyam i̱ i̱ pande i̱ lu a ahôm sha mi kpa í lu ahôm a inyam jighilii ga yô.

Yange i wa Mbaiserael tindi ér ve de ye ahôm a inyam a ken won ga, kpa kwaghyan u injaa u kundunyol yô, i na ve ian ér ve yaan. Akaa inja er akpekpa u i er sha mwe nahan yange i kar sha ahôm a inyam ga kpa i lu sha mkurem ma sha atam a ikyon, kpa ashighe kpishi i lu sha mkurem ma olev. (Lev. 2:7) Takerada u i yer ér Insight on the Scriptures la pase “akaa a wan ahôm” la ér “ka akaa a injaa a yange a doo yan shin a uma ga, kpa a doo yan yô, kua akaa a i kar sha mkurem ma atam a ikyon la kpaa.”

Mbakristu fa je ér kwagh u yange i kaa ér Mbayuda ve de ye ahôm ga la lu môm ken Tindi u i wa ve yô. Mbakristu kera mba sha ikyev i Tindi ga, kua tindi u nan nagh la kpaa.—Rom. 3:20; 7:4, 6; 10:4; Kol. 2:16, 17.