Ú Fatyô u Peren Yande Masedonia Keen Kpa?

SHIGHE u apostoli Paulu lu ken Teroa, gar u hen kpemnger, ken veghertar u Ashia u Kiriki la, a nenge mpase u sha mnenge. Or u Masedonia ugen lu zamber a na ér: “Shi per yande Masedonia keen, va wase se.” Paulu yange nengen a mpase u sha mnenge la yô, un vea mba ve lu zan zende a na imôngo la cii ‘kure ikyaa ér, ka Aôndo A yer ve sha u ve̱ za ôr’ ior i Masedonia “Loho u Dedoo ye.” Lu nyi i due kere? Ken gar u Filipi, u lu gar u vesen ken ipaven i Masedonia la, Lidia vea ya na cii hingir mbananjighjigh. Mbagenev ken ipaventar i Masedonia, ken tiôntar u Mbaroma la kpa hingir mbananjighjigh.—Aer. 16:9-15.

Kape nyian kpa Mbashiada mba Yehova ve tsee ishima je la. Anmgbianev kpishi yem sha ajiir a kwagh a hembe gban sha mbapasen kwagh u Tartor la sha inyaregh vev. U tesen ikyav yô, anmgbian u kwase ugen, mba yer un ér Lisa, yange soo u hemban veren ishima sha tom u pasen kwagh la ken uma na. Nahan a mough ken tar u Kanada a yem ken tar u Kenya. Anmgbian ugen, iti na ér Trevor, un man kwase na Emily, mba ve kpa ve lu marnya mba tar u Kanada la di yem ken tar u Malawi sha u za seer eren tom u pasen kwagh. Anmgbian ugen di iti na ér Paul, un vea kwase na Maggie, ve mba marnya mba tar u Ingila, ve di ve nenge shighe u ve de u eren tom u uke la ér ka shighe u doon tsung u seer eren Yehova tom, nahan ve mough ve yem sha Ityoughkitaregh ki veghertar u Afrika. U ngu a jijingi u tangen iyol ga la kpa? U fatyô u yemen hen ijiir i kwagh a hembe gban sha mbapasenkwagh la kpa? Aluer ka u ú fatyô u eren nahan yô, ka akaawan a ken Bibilo man mbamhen mba injaav mba nyi vea wase ú u zan ikyura?

Hide Hen sha Mlu Wou

Kwagh môm u i doo u ú hen shami yô ka mbaawashima ou. Ka kwagh u Yesu yange kaa ér ka tindi  u vesen je ne: “Ter Aôndo wou A̱ doo u ishima a ishima you cii man a uma wou cii man a mfe wou cii.” Nahan ityôkyaa i u soo u za eren tom u pasen kwagh ken tar ugen yô, i lu u nan iti i Yehova icivir shi kuren tom wou u geman ior hingir mbahenen la. Yesu za hemen ér: “U sha uhar u a lu er un yô, or u nan we ndor a we yô, nana̱ doo u ishima er we iyol you nahan.” Mdoo u mba ve we ndor a vese ve doo se ishima la ngu a na yô i sar se kpishi u wasen ve. (Mat. 22:​36-39; 28:​19, 20) U eren tom u pasen kwagh ken tar ugen la ka tom kpishi shi ka i gba u or a lu a jijingi u tangen iyol ga la kpaa. Ka di zende u doon zan tsô ga. Gba u dooshima una mgbegha ú u eren kwagh ne. Anmgbian ugen, Remco vea kwase na, Suzanne mba ve dugh ken tar u Netherlands, ve lu eren tom u pasen kwagh ken tar u Namibia la ve kaa nahan ér: “Ka dooshima a ne ve se lu eren tom u pasen kwagh heen her ye.”

Ortamen u sôron atôônanongo ugen ken Namibia mba yer un ér Willie, a kaa ér: “Mba ve mough ve undu ityar ve ve yem ken ityar igen la mba veren ishima ér anmgbianev mba ken tar u ve yem ker la ve nengen sha a ve ga. Kpa mba a awashima u za wasen anmgbianev mba ken tar u ve yem ker la ken tom u pasen kwagh.”

Ú hiden ú henen sha mlu wou cii yô, pine iyol you wer: ‘Ka mfe u nyi m lu a mi u una wasem u pasen kwagh ken tar u gene? M fa kwaghpasen tsema tsema kpa? Ka hanma ijô m fe u lamene? Me fatyô u henen zwa ugen kpa?’ Tema lam vea tsombor wou sha kwagh ne sha gbashima. Lam a mbatamen mba hen tiônnongo wou kpaa. Shi er msen hen Yehova sha kwagh shon. Aluer u time sha mlu wou sha mimi nahan yô, kwagh ne una wase ú, wea lu a tahav shi wea kange ishima u eren tom u pasen kwagh ken tar ugen kpa u fa.​​—⁠Ôr ngeren u a lu a itinekwagh ér, “Fa Iyol You” la.

 Ijiir i Ú Za Pase Kwagh Her Yô

Yange i yila Paulu ken mpase u sha mnenge ér a za pase kwagh ken Masedonia. Yehova kera tesen se kwagh u se er ainge sha ivande ga. Nahan kpa, ior mba Aôndo ka ve fa ajiir kpishi a i gbe u a seer pasen kwagh her la sha ikyev i magazin ne man ityakerada igen. Nahan nger ajiir a kwagh a hembe gban sha mba pasen kwagh her la. Aluer ka u ú fatyô u henen zwa ugen ga, shin i na u ian i lun hen tar ugen gbem ga yô, er tom u pasen kwagh hen ijiir you, ape i hembe lamen zwa u ú lamen ken tar wou la. Kpa gema tôv fa akaa a igbe u ú er ve a na u laasen u zan tar u ken won la, man kwagh u injar mato man er mkor u tar shon a taver a kom la man ishe i akaa kua mlu u iceenyolough man mndôhôr u hen tar shon kpaa. Aluer u lam a mba ve vande yemen ken tar ugen sha u za eren tom u pasen kwagh yô, a lu u a inja kpishi. Er msen cii u mase tsuan kwagh u ú er ye. Umbur wer, ngise “Icighan Jijingi yange [Paulu man mba ve lu a na imôngo la] u ôron kwagh u Aôndo ken Ashia.” Er yange ve nôngo ér vea za ken Bitinia nahan kpa, “Jijingi u Yesu rumun a ve ga.” Kape alaghga a tôô u shighe u tsuan ijiir i u hemba nan iwasen ken tom u pasen kwagh je la.​​—⁠Aer. 16:​6-10.

Alaghga hegen u fa akaa a injaa a i doo u ú er yô. Aluer u soo u za eren tom u pasen kwagh ken tar ugen yô, nger hen afishi a branci a Mbashiada mba Yehova a ken ityar i u we ishima u za eren tom ne ker la. Pase tom shin ityom i yange u er shin u lu eren zan a mi a ve ken tiônnongo u Kristu yô, shi wea lu a mbampin kpa u fatyô u pinen, er u pinen fan ishe akaa man ya u ú kôr cio u zuan a mi la man iyouci, man a lu pe u fatyô u zuan a tom u uke u ú eren kpaa. Nahan na kômatii u nengen sha tomshiren u tiônnongo wou la washika u ú nger la. Ve di vea nger washika u tesen ér or la nan kuma, vea magh sha u wou la vea tindi a mi hen afishi a ubranci mba u tsough la jighilii. Mlumun u afishi a ubranci mbara vea na u la una wase ú u tsuan ijiir i ú hemba eren tom u pasen kwagh her tsembelee la.

Willie u se vande ôron kwagh na la kaa ér: “Mba ve er tom u pasen kwagh ken ityar igen tsembelee yô ka ve vande za sôron tar shon nengen shi tsuan ajiir a vea fatyô u pasen kwagh shi a saan ve iyol yô. Anmgbian ugen vea kwase na yange ve nenge ér, aluer ve yem hen agar a a lu ica ken toho yô vea ya ican. Nahan ve lu hen angeri u kiriki u kwagh gba sha mbapasenkwagh, ape vea fatyô u lun a akaa a ve soo la shi a saan ve iyol yô.”

U Tagher a Mbamtaver mba Hev

U moughon undun ya wou yemen za lun hen ijiir igen la una va u a mbamtaver je ka u tunan ga. Lisa u se vande ôron kwagh na la kaa ér: “Ka i taver kpishi u nôngon a mtswenem.” Lu nyi i wase unu? Yange lu kôôsôô a tiônnongo u hen ijiir na i he la. Shi yange nôngo tsung fa iti i hanma or. Yange a za mkombo faa, shi a bee mkombo kpa a tamber a lam a anmgbianev mba nomso man mba kasev. Lisa duen kwaghpasen vea mbagenev, shi lôhôn anmgbianev kpishi imôngo hen ya na, shi kôr azende a he kpaa. A kaa ér: “M vaa afanyô sha akaa a  yange m de mer a saam la ga cii. Sha mimi yô, Yehova verem doo doo.”

Anmgbian ugen, Paul vea kwase na Maggie, yange mba maren ônov kera yô, ve undu ya ve u ve tsa her je kuma anyom 30 la. A kaa ér: “Kwagh ka a er yô, yange lu se ican u panden akaa a se lu a mi la ga. Kpa kwagh u lu se ican yô, lu tsombor u se undu la; kwagh ne taver se je hemba er se ver ishima la. Shighe u se lu yemen sha igirgir i purugh la, se vaa kpishi. Ka i taver se ga cii u henen ser, ‘Se fatyô u eren kwagh ne ga.’ Kpa yange se suur sha Yehova. U kôron azende a he la kpa ngu a wase ú u zan hemen a tom wou.”

Anmgbian ugen, mba yer un ér Greg, vea kwase na Crystal, yange ve mough ken tar u Kanada ve yem ken tar u Namibia sha ci u ve fa u lamen zwa Buter, man ka zwa u i lamen ken tar u Namibia je la. Kpa shighe kar yô, ve nenge ér doo u vea hen zwa ugen u ior mba ken tar la. A kaa ér: “Yange ishima i yina se ashighe agen. Nahan kpa, se mba henen zwa u ior mba ken tar la se mba fe yô, se hingir u fan aeren a ior mba ken tar shon. Shi er se luun ikyooso ikyooso vea anmgbianev mba hen ijiir la yô, kwagh ne wase se u sôron mbamlu asev sha er vea zua sha mba hen ijiir la yô.”

Ieren ve i hiden a iyol ijime shi keghen a kegh iyol u geman mbamlu vev la kpa yange ia fatyô u benden a anmgbianev mba hen ijiir la. Anmgbian u kwase ugen, u vese ken tar u Ireland yô, mba yer un ér Jenny, a umbur icombor i yange i za u za eren tom u pasen kwagh ken tar u Ireland la. A kaa ér: “Yange ve ngohol mbavannya. Sha kpôô yô, yange ve va sha u va eren tom, lu sha u i er ve tom ga. Yange ve tsee ishima sha tom shi saan ve iyol, nahan mo kpa m hingir u eren tom u pasen kwagh hen ijiir i kwagh hemba gban sha mbapasenkwagh yô.” Jenny ngu eren tom mishen vea nom na hegen ken tar u Gambia.

Iveren i Yehova “Ngi Ve a Inyaregh”

Kwagh u yange er Paulu ken gar u Masedonia la ngu a inja kpen kpen! Anyom yange nga kar er pue nahan yô, Paulu nger anmgbianev mba ve lu ken gar u Filipi la kaa ér: “M sughun Aôndo wam hanma shighe u ka mea umbur ne yô.”​​—⁠Fil. 1:⁠3.

Kape Trevor vea Emily, mba ve er tom u pasen kwagh ken tar u Malawi cii ve i mase lôhôn ve ér ve za Makeranta u Bibilo u Watchtower u Gileadi la kpa ve kaa je la. Ve kaa ér, “Ashighe agen yange se hen ser, alaghga tsô se mba eren kwagh u vough ga, nahan kpa gema saan se iyol. Yange se hemba sôsom a ayol a ase shi se kav er Yehova lu veren se doo doo yô.” Greg man Crystal, mba se vande ôron kwagh ve la di kaa ér, “Ma kwagh ugen u hemban doon u se er je kpa ngu ga.”

Nahan kpa, ka hanma or nana fatyô u za eren tom u pasen kwagh ken tar ugen ga. Mbagenev yô vea fatyô u yemen hen ijiir igen ken tar ve, ape kwagh a hembe gban sha mbapasenkwagh la za eren tom u pasen kwagh ne. Kwagh u vesen yô, ka u civir Yehova er u fetyô la cii. (Kol. 3:23) Aluer u er nahan yô, u mase kaven wer, mkaanem ma i ne i nger man ma kuren sha a we, ma kaa ér: “Iveren i TER ngi ve a inyaregh, tom u nyoonyol seer ma kwagh sha i ga.”​​—⁠Anz. 10:⁠22.

[Ngeren u kiriki/Foto peeji 5 la]

Fa Iyol You

Aluer u soo u tôvon iyol you fan a lu pe u fatyô u za eren tom u pasen kwagh ken tar ugen yô, time sha mbampin mba ve lu shin heen ne, nahan er msen shi gbidye kwar sha mimi nenge, aluer kape u fatyô u yemen ken tar ugen za pasen kwagh ker yô. Ngeren mba ken Iyoukura mba ve kar ken ijime ne vea wase ú u eren kwagh ne.

• Am I a spiritual person?—“Steps Toward Happiness” (zwa Buter Oktoba 15, 1997, peeji 6)

• Am I an effective minister?​​—⁠“How to Succeed in the Pioneer Ministry” (zwa Buter Mei 15, 1989, peeji 21)

• Can I live away from family and friends?​​—⁠“Coping With Homesickness in God’s Service” (zwa Buter Mei 15, 1994, peeji 28)

• Can I learn a new language?​​—⁠“Serving With a Foreign-Language Congregation” (zwa Buter Maaci 15, 2006, peeji 17)

• Can I afford the move financially?​​—⁠“Can You Serve in a Foreign Field?” (zwa Buter Oktoba 15, 1999, peeji 23)

[Foto u sha peeji 6]

Ieren ve i hiden a iyol ijime shi keghen a kegh iyol u geman mbamlu vev la kpa ia fatyô u benden a anmgbianev mba hen ijiir la

[Foto u sha peeji 7]

Mba ve ve sha u va eren tom, kpa i lu sha u i er ve tom ga yô ka ve za ikyura