Mbampin Mba Mbaôron Takerada Ne Ve Pin La

I nger ken Genese 6:3 ér: “Jijingi Wam Una kera tema ken or gbem ga, gadia nan kpaa nan ngu inyam tsô, nahan kpaa ayange a uma u nan yô, aa lu anyom deri man ikyundu.” Yehova lu panden ayange a mtse u uumace sha won hingir anyom 120 shinii, man Noa yange pase kwagh u mve u Mngerem ma Deemee la kuma anyom 120?

Se na Mlumun sha avegher a ahar a mpin ne ser, ei.

Cii man Mngerem ma Deemee va yô, uumace kpishi vande tsan anyom uderi uderi. Noa lu anyom 600 shighe u Mngerem ma Deemee va la, shi a tsa sha won anyom 950. (Gen. 7:6; 9:29) Shighe u Mngerem ma Deemee va kar la, mbagenev tsa hemba anyom 120. Arpakeshadi yange tsa anyom 438, Shela tsa sha won anyom 433. (Gen. 11:10-15) Nahan kpa, sha shighe u Mose la, anyom a mtse u or sha won cii hile ijime, lu anyom 70 shin 80 or tsaan ye. (Ps. 90:10) Sha nahan yô, anyom 120 a Genese 6:3 a er kwagh u a la, lu anyom a i ver ér orumace nana de tse a karen á ken inya ga ze.

Nahan ivur la tese ér Aôndo yange kaa a Noa ér a ta mbagenev icin sha mtim u lu van ken atô u 120 yôô? Ei. Aôndo ôr kwagh a Noa acin imôngo. Ivur i sha pue kar utar la kaa ér: ‘Aôndo kaa a Noa ér: Mkur u uumace cii va sha ishigh Yagh ve; gadia ve iv a apera sha tar.’ Anyom nga kar yô, Noa er zege tom u gban tso la bee, nahan hen zum la, ‘Ter kaa a Noa er: We a ya wou cii, nyôr nen ken tso.’ (Gen. 6:13; 7:1) Shi ashighe  agen kpa nga a Yehova yange a pase Noa akaa agen a una er yô.—Gen. 8:15; 9:1, 8, 17.

Nahan kpa, kwagh u se er ken Genese 6:3 ngu kposo; ivur la ter iti i Noa ga, shi i kaa ér Aôndo yange lu lamen a Noa kpaa ga. Mkaanem mara ma a fatyô u lun kwaghôron u tesen awashima u Aôndo shin kwagh u a we ishima u eren di tsô. (Nenge Genese 8:21.) Doo u se fa ser, akaa a i nger ér yange er tsuaa, ica gba cii ve shighe u Adam la, nga a asember agen ker amba er: “Aôndo shi kaa er.” nahan. (Gen. 1:6, 9, 14, 20, 24) Kwagh ne tese wang je ér, Yehova yange lu lamen a ma orumace shin tar ga, gadia i lu a gba orumace hen shighe la ga.

Sha nahan yô, ka sha mi u kaan ér Genese 6:3 ngu pasen awashima u Aôndo, u karen a iferkwagh sha tar kera. Yehova pase ér un va a mtim ne ken atô u anyom 120, shin er Noa lu a fa kwagh sha mi ga nahan kpaa. Kpa er nan ve Yehova ver shighee? Man er nan ve yange tambera?

Apostoli Peteru na atôakyaa ér: “Aôndo lu wan ishima sha ayange a Noa zum u i lu gban tso la, ka ker man ior kpeghee, ka uuma mba iorov anigheni tsô ve war sha mnger ye.” (1 Pet. 3:20) Mimi je, shighe u Aôndo pase kwagh u una er ken atô u anyom 120 la, akaa agen kpa lu her, aa gba u a er yô. Yange anyom 20 nga kar yô, Noa vea kwase na ve hii u maren ônov. (Gen. 5:32; 7:6) Ônov vev mba nomso mba utar mbara vese wa akondo vôso kasev, nahan tsombor u Noa seer iyenge hingir “uuma mba iorov anigheni.” Maa gba u vea gba tsô, u yange lu tom u a bee fele ga, sha ci u a kehe man tsombor u Noa gema lu kpuaa la. Mimi je, ka er Aôndo yange wa ishima anyom 120 la ve, i fatyô u eren akaa la shi waren uuma mba iorov, nahan uumace anigheni mba ve tile sha mimi la ve “war sha mnger ye.”

Bibilo ôr inyom i Yehova yange pase Noa ér Mngerem ma Deemee ma a va sha tar la jighilii ga. Kpa er Noa mar ônov kera, ve vese shi ve vôso kasev yô, alaghga hen shighe la mase shin di anyom 40 shin 50 nahan u Mngerem ma Deemee ma a va. Nahan Yehova kaa a Noa ér: “Mkur u uumace cii va sha ishigh Yagh ve.” Shi a kaa a Noa ér a gba zege tso a nyôr ker vea tsombor na. (Gen. 6:13-18) Ken upuembaanyomov mba ve mase shin mbara, Noa er kwagh hemba di u veren ikyav i dedoo, i lun orperapera la. ‘Yange lu oryôôn kwagh u perapera,’ u lu a loho u tan icin u wang, pasen ve awashima u Aôndo u timin mba ve venda u dondon akaawan a na sha shighe la cii la. Noa yange tsenga fan inyom i kwagh la una er jighilii ga, kpa fa ér kwagh la una er keng. Shi u fa er kwagh la yange er nahan vough yô.—2 Pet. 2:5.