U Nyaghen Mvende U Vendan Atindi Kpa?
U Nyaghen Mvende U Vendan Atindi Kpa?
“[Yesu] nyagh mvende u vendan atindi la.”—HEB. 1:9.
1. Lu nyi Yesu tese sha kwagh u dooshima?
YESU yange ôr kwagh u dooshima a mbahenen nav var var, sha u ve fa er á lu kwagh u vesen yô, a kaa a ve ér: “M ngu nan ne tindi u he sha u doo nen ayol a en yô; er ne doom ishima nahan, kape ne kpaa, doo nen ayol a en vough la. Ka sha kwagh ne man ior cii vea kav er ne lu mbahenen Av ye, aluer ne doo ayol a en yô.” (Yoh. 13:34, 35) Yese wa mbadondon un tindi ér, ve tesen dooshima u tangen iyol ga la hen atô ve ayol a ve. Ka dooshima la lu u a fa ve sha mi ye. Shi Yesu wa ve kwagh ér: “Doo nen a mbaihyomov enev, man shi eren nen msen sha ci u mba ve tev ne a ican yô.”—Mat. 5:44.
2. Kanyi i gbe u mbadondon Kristu vea nyagha?
2 Nahan kpa, Yesu tese mbahenen nav kwagh u dooshima tseegh ga, yange tese ve kwagh u ve nyagh kpaa. Í ôr kwagh sha Yesu ér: “Perapera doo U ishima, U gema U nyagh mvende u vendan atindi [iferkwagh].” (Heb. 1:9; Ps. 45:7) Kwagh ne tese ér gba u se soo kwagh u perapera tseegh ga, kpa se nyagh isholibo, shin mvende u vendan atindi la kpaa. Doo u se umbur ser apostoli Yohane yange ôr kwagh sha ikyaa ne jighilii ér: “Hanma or u nan eren isholibo yô, nan ngu vendan tindi kpaa, gadia isholibo ka atindi a vendan.”—1 Yoh. 3:4.
3. Ka igbenda i tesen ér se nyagh mvende u vendan atindi i nyi se lu timen sha mi ken ngeren nee?
3 Nahan, er se lu Mbakristu yô, doo u se pine ayol a ase ser, ‘Iferkwagh vihim ishima kpa?’ De se nenge er se fatyô u tesen ser se nyagh mvende u vendan atindi la sha igbenda i inyiin i i dondo ne yô: ka (1) mnenge wase sha kwagh u ihyundugh ki msôrough, man (2) gbenda u se nengen kwagh u mbaimev la, man (3) ieren yase sha kwagh u idya kua (4) gbenda u se nengen ior mba ve nyaghen mvende u vendan atindi la.
Msôrom Ma De Ye Tor sha a We Ga
4. Er nan ve Yesu fatyô u ôron kwagh gbar gbar zum u a lu tan icin sha kwagh u ihyundugh ki msôrough laa?
4 Yesu yange maan msôrom ashighe ashighe, sha ci u a fa er i lu iyua i Aôndo a ne yô. (Ps. 104:14, 15) Nahan kpa, mayange Yesu vihi iyua ne sha u man msôrom karen ikyaa inya ga. (Anz. 23:29-33) Sha nahan yô, Yesu lam gbar gbar zum u a lu tan icin sha imba ieren ne yô. (Ôr Luka 21:34.) Ihyundugh ki msôrough kia fatyô u nan or nana er asorabo a vesen agen. Sha ityôkyaa ne yô, apostoli Paulu nger ér: “De hundu nen msôrom ga, dang ngu keregh, kpa iv nen a Jijingi.” (Ef. 5:18) Shi a ta kasev mba ganden mba ken tiônnongo icin ér “ve de lu mba msôrom ma ye tor sha a ve ga.”—Titu 2:3.
5. Ka mbampin mba nyi nahan mba ve me msôrom vea fatyô u pinen ayol a ve?
5 Wea maan msôrom yô, doo u u pine iyol you wer: ‘M ngu a mnenge u Yesu sha kwagh u ihyundugh ki msôrough kpa? Aluer gba u me wa mbagenev kwagh sha ikyaa ne nahan, me lam a ve gbar gbar kpa? Ka m ma msôrom sha u me palegh akaa a nyian mo ishima shin ka i lu sha u me kera fa ma zayol ga? Ka akpe a msôr a me ka m ma ken hanma kasua? Or ka nana ôr kwagh u tesen ér m ngu man msôrom ka ngeen yum nahan, m er nena? Ka m tuna, shin ka m nyoon ishima?’ Aluer se de ser msôrom ma man kpishi ma ya tor sha a vese yô, kwagh la una na se kera lu mba eren mhen sha kwagh tsembelee, eren kwagh u injaa ken uma wase ga. Mbadondon Kristu ka ve nôngon sha afatyô ve cii ér vea kura mlu ve u eren kwagh sha inja la.—Anz. 3:21, 22.
Palegh Kwagh u Mbaimev
6, 7. (a) Yesu yange er kwagh a Satan kua azôv a na nena? (b) Hii nan ve kwagh u mbaimev a samber wuee nyian yumu?
6 Shighe u Yesu lu shin tar la, yange hendan a Satan kua azôv a na taveraa je. Yange hendan a ameen a Satan va a mi noon sha u karen mlu na u jighjigh la. (Luka 4:1-13) Shi yange fa ayom a Satan lu eren sha u una gema mhen na kua ieren na la, shi a venda ayom shon kpaa. (Mat. 16:21-23) Yesu yange wase mba nenge ér gba u una wase ve la, sha u azôv a de ye tor sha a ve ga yô.—Mar. 5:2, 8, 12-15; 9:20, 25-27.
7 Shighe u i na Yesu Tor ken inyom i 1914 la, yange wanger usha, sha u karen a aeren a Satan man azôv a na, a hôngor kwagh u wang la kera. Sha ityôkyaa ne yô, Satan kange ishima u “tsughun tar cii” hegen hemba ave a tse. (Mpa. 12:9, 10) Nahan, i de kera kpiligh se iyol er i hii ve kwagh u mbaimev a doo ior kpishi, shi ieren ne i lu samber seer a seer la ga. Kanyi se er ve se kura ayol a ase?
8. Doo u hanmô wase nana hen sha kwagh u iemberyolough i nan eren la nena?
8 Bibilo ta icin wanger wanger sha akaabo, a a dugh ken ahir a eren yô. (Ôr Duteronomi 18:10-12.) Nyian ne, Satan kua azôv a na mba geman mhen u ior sha u tesen ve kwagh u mbaimev ken fiim man ken ityakerada man anumbe a sha kômputa shin hanseeti. Nahan, shighe u se lu tsuan iemberyolough yô, doo u hanmô wase nana pine iyol i nan ér: ‘Ken iwer i i kar ne, mase zan m er iemberyolough sha u nengen fiim shin televishen, shin m er anumbe a sha kômputa shin hanseeti, shin m ôr ityakerada i sha kwagh u mbaimevee? M fa er i gbe hange hange u me venda aeren a mbaimev yôô, shin m tôô mer kwaghbo ngu ker ga? M shi henen er ishima ia lu Yehova ker sha kwagh u iemberyolough i m eren la je he? Aluer m de aeren a Satan ne nyôrom ken ishima nahan, mdoo u Yehova kua atindiakaa a na a perapera a doom ishima la una mgbegham u eren kwagh sha aeren a bo ne fese, nahan undun a kpa?’—Aer. 19:19, 20.
Ungwa Icintan i Yesu sha Kwagh u Idya La
9. Or a fatyô u den ér mvende u vendan atindi la a doo nan ishima nena?
9 Yesu yange dondo tindi u Yehova wa sha kwagh u idya la. A kaa ér: “Ne mba a ôr kwagh u i nger la gaa, er Un u A er ve sha hiihii la je, A er ve nomsoor kua kwase; man A kaa er: Ka sha ci u nahan man nomsoor nana undu ter u nan man ngô u nan, nana var ken kwase u nan, ve uhar vea hingir iyôgh i môm ye gaa? Nahan yô, mayange ve kera mba uhar ga, kpa ka iyôgh i môm je. Kwagh u Aôndo je zua yô, or a̱ de kera paven un ga.” (Mat. 19:4-6) Yesu yange fa je ér kwagh u ishe yase i nenge a mi la una fatyô u benden a ishima yase. Sha nahan yô, yange kaa ken ityesen na i sha uwo la ér: “Ne ungwa er i kaa er: De eren idya ga. Kpa Mo yô, M kaan ne Mer, hanma or u nana kenger kwase sha u nana tôm un yô, nan er idya a na ken ishima je ve.” (Mat. 5:27, 28) Jighilii yô, mba ve we icintan i Yesu ikyo ga la mba den ér mvende u vendan atindi la a doo ve ishima.
10. Ôr kwagh u a tese ér or a fatyô u duen ken ieren i nengen foto u ijimbagh kera yô.
10 Satan ngu samber a idya i eren sha ufoto mba ijimbagh. Tar u hegen ne mgbough a ufoto mbara. Or ka nana nenge foto u ijimbagh yô, i taver kpishi u nana̱ hungur a kwagh u nan nenge a mi ken foto la. Shi ufoto mba ijimbagh vea fatyô u yan tor sha a nan je kpaa. Nenge kwagh u yange er Orkristu ugen ne. A kaa ér: “Yange m nenge foto u ijimbagh ugen ken myer. Maa isharen i henen sha kwagh u foto la ya tor ken ishima yam. Yange m fa er ieren ne i doo ga yô, kpa m kaa ken ishima yam mer, er i lu nahan kpa, Aôndo yô lumun a mcivir wam.” Lu nyi i gema mhen u anmgbian nee? A kaa ér: “Yange m ôr mbatamen mzeyol wam, shin er kwagh ne yange taver mo kpishi u eren nahan kpaa.” Ken masejime yô, anmgbian ne va due ken ieren i i lu vihin mlu na vea Yehova ne kera. A pase wener: “Yange m dugh ken isholibo ne kera yô, m mase nengen mer imoshima yam hingir wang sha mimi.” Mba ve nyaghen mvende u vendan atindi yô, gba u vea hen u nyaghen ufoto mba ijimbagh.
11, 12. Se tese ser se mba nyaghen mvende u vendan atindi sha gbaa u ityogholov mbi se ongo la nena?
11 Ityogholough mbi kuhwan man amo a ka i wa sha mi la aa fatyô u benden a mbamhen asev, nahan benden a ishima yase i sha injakwagh la kpaa. Ityougholov ka iyua i Aôndo a ne se yô, shi i hii u civir Aôndo a mbi ka kwagh u nyian a mi ga. (Eks. 15:20, 21; Ef. 5:19) Kpa tar u Satan ne ngu samber a kwaghkuhwan ua lu tesen ér ijimba ka kwagh u dedoo yô. (1 Yoh. 5:19) U er nan ve u fa, aluer kwaghkuhwan u ú ongo la ka u hôngor a mlu wou, shin ka u hôngor a mi ga?
12 U fatyô u hiin pinen iyol you wer: ‘Amo a m ongo la nga tesen ér iwoo-or man idya man ijimba kua u mtoho u tuhwan Aôndo la ka kwagh u doonoo? Aluer gba u me ôr asemberakaa a ken amo agen sha u orgen nana ungwa nahan, nana nenge ér m nyagh mvende u vendan atindi je he, shin asember la aa tese ér ishima yam hôngor kere?’ Se fatyô u kaan sha zwa ser se mba nyaghen mvende u vendan atindi la, kpa geman ungwan kwaghkuhwan u a tese ér iferkwagh doo la ga. Yesu yange kaa ér: “Akaa a a dugh ken zwa yô, ka ken ishima a dugh ye, ka a je, a ne or nan kera lu wang ga ye. Gadia ka ken ishima man aferakaa a henen kua iwoo-or man idya man iiv man mbampase mba sha aie man ityuhwanev ve dugh ye.”—Mat. 15:18, 19; Nenge Yakobu 3:10, 11.
Nengen Mba Iferkwagh i Doo Ve Ishima la, Er Yesu Kpa a Nengen Ve Nahan
13. Yesu nengen mba ve cighir asema u eren isholibo la nena?
13 Yesu yange kaa ér un va sha u va yilan mbaasorabo, sha u ve gema asema yô. (Luka 5:30-32) Nahan kpa, yange nenge mba ve cighir asema sha u eren isholibo la nena? Yesu ta icin gbang gbang sha kwagh u geman hingir er ambaaior shon la. (Mat. 23:15, 23-26) Shi a kaa wang nahan ér: “Ka hanma or u nana kaa a Mo er, Tere! Tere! man nana nyôr sha tartor u Sha ga, saa u nan eren ishima i Terem u A lu Sha yô. Sha iyange la ior kpishi vea kaa a Mo er: Tere! Tere! Ka ken iti You man se lu ôron kwaghôron u profeti gaa? Man ka ken iti You se lu dughun ujijingi mba bov gaa? Man shi ka ken iti You se lu eren akaa a ageegh kpishi kpaa gaa?” Kpa una venda mba ve cighir asema u eren aferakaa la, una kaa a ve ér: “Yem nen heen kera.” (Mat. 7:21-23) Una kure kwagh u ambaaior la sha imba gbenda ne nahan sha ci u nyi? Una kure kwagh ve nahan sha ci u ve laha Aôndo, shi aferakaa a ve la bula mbagenev.
14. Ka i dugh or u nan cighir ishima u eren isholibo la ken tiônnongo kera sha ci u nyi?
14 Mkaanem ma Aôndo kaa ér aluer or cighir ishima u eren isholibo yô, i dugh nan ken tiônnongo kera. (Ôr 1 Mbakorinte 5:9-13.) Gba u a er nahan keng keng sha ci u atôakyaa atar: ka sha ci u (1) ieren la i de ve a ilyahan sha iti i Yehova ga, shi (2) tiônnongo a za hemen u lun wang shi (3) wasen orsholibo la sha u nana gema ishima, aluer gba sha mi yô.
15. Aluer se soo u lun jighjigh sha ishigh ki Yehova yô, ka mba mbampin mba nyi i gbe u se pine ayol a ase?
15 Se mba nengen mba ve cighir asema u eren isholibo la er Yesu a nengen ve nahan kpa? Gba u se hen sha mbampin mban: ‘Doo u hanma shighe me luun vea orgen u i dugh nan ken mimi kera, shin u nan undu tiônnongo u Kristu a ishima i nan yôô? Aluer imba or la nahan nan ngu anmgbian wou hen tsombor, u nan kera lu hen ya vea we ga di ye?’ Imba kwagh la nahan ia fatyô u meen se ér perapera a de kera doon se ishima ga, shi se de lu jighjigh sha ishigh ki Aôndo kpaa ga. *
16, 17. Ka mlu u taver u nyi ngô ugen ken Kristu yange tagher a mi, man lu nyi i wase un u suen tindi u a kaa ér or u nan cighir ishima u eren isholibo yô i dugh nan ken tiônnongo kera laa?
16 Nenge ase kwagh u anmgbian u kwase ugen yange tagher a mi ne. Wan na u nomso u kaven ishigh lu or u Yehova doo un ishima yô. Nahan kpa, va hingir or u cighir ishima sha isholibo i eren. Maa i dugh un ken tiônnongo kera. Yehova yange doo anmgbian wase u kwase ne ishima, shi er wan na ne kpa doo un ishima yô, taver un kpishi u kuran tindi u ken Ruamabera la, nahan palegh u lun vea wan na hanma shighe la.
17 Kanyi nahan yange ma u kaa a anmgbian u kwase ne wer doo una er hen shighe la nahana? Ortamen ugen yange wase un u kaven ér Yehova fa er ishima i vihi un yô. Anmgbian la kaa a na ér a hen sha ishimavihin i Yehova yange una nyôr ker, shighe u mbagenev ken mbatyomov mba ve lu ônov nav la hemba un ato la. Ortamen la wase un u kaven ér, shin er Yehova a fe er imba kwagh la ka i vihi ken ishima tsung nahan kpa, a soo ér i dugh mba ve cighir asema u eren isholibo la ken tiônnongo kera. Kwaghwan ne yange bende a anmgbian u kwase ne kpishi, nahan a sue tindi u a kaa ér or u nan cighir ishima u eren isholibo yô i dugh nan ken tiônnongo kera la sha mimi. * Imba mlu u jighjigh ngura nahan ka a na i saan Yehova iyol.—Anz. 27:11.
18, 19. (a) U nyaghen or u nan cighir ishima u eren isholibo la ngu a tese ér kanyi i vihi se ishima? (b) Aluer se mba jighjigh sha ishigh ki Aôndo kua tindi na ne yô, kanyi ia due kere?
18 Wea tagher a imba kwagh ne yô, gema umbur wer Yehova fa er i lu u ken ishima yô. Aluer u nyagh or u i dugh nan ken mimi kera, shin u nan undu tiônnongo a ishima i nan yô, u lu tesen wer mbamhen kua aeren a a ne ve nan er kwagh nahan la vihi u ishima. Kpa, shi u lu tesen wer orsholibo la doo u ishima kpishi, nahan u soo wer nana er kwagh u una hemba wasen nan yô. Mlu u ú lu jighjigh sha ishigh ki Yehova la una seer wasen or u i tsaha nan la u geman ishima hiden hen Yehova.
19 Kwase ugen u yange i dugh un ken mimi kera, shi i va hide a na ken tiônnongo yô nger ér: “Saan mo iyol sha ci u, er ior mba Yehova ve doo un ishima kpishi yô, ngu a nenge ér nongo na ngu wang. Kwagh u alaghga mba ken won vea nenge ér i er a or la dang la gema ka kwagh u hange hange, u i gbe u a er yô, shi ka kwagh u tesen dooshima jim jim.” U hen wer mba hen tiônnongo u kwase ne kua mba hen tsombor na yange vea ze hemen u lun vea na hanma shighe, hen shighe u i dugh un ken mimi sha la nahan, yange ma fatyô u ôron kwagh nahanaa? Msue u se lu suen tindi u ken Ruamabera u a kaa ér or u nan cighir ishima u eren isholibo yô i dugh nan ken tiônnongo kera la ka ikyav i tesen ér kwagh u perapera doo se ishima, shi se nenge ser Yehova ngu a ian i wan se atindi sha kwagh u ieren yase.
‘Kôr Kwaghbo Ihyom’
20, 21. Gba hange hange u ú hen u nyaghen mvende u vendan atindi sha ci u nyi?
20 Apostoli Peteru ta se icin ér se ‘lu geng ge geng shi se kuran kpaa.’ Sha ci u nyi? Sha ci u ‘orihyom wase diabolo ngu zenden er begha u tan kume nahan, keren or u una ya yô.’ (1 Pet. 5:8) Or u Diabolo una ya la a lu we shinii? Saa u hen u nyaghen mvende u vendan atindi la tsembelee ve una ya u ga ye.
21 Ka i lu ican kpishi u kôron kwaghbo ihyom. I mar se ken isholibo, shi se mba ken tar u kwagh a hembe gban ior u eren asaren a iyolough yô. (1 Yoh. 2:15-17) Nahan kpa, aluer se mba dondon ikyav i Yesu Kristu, shi Yehova doo se ishima a ishima yase cii yô, se fatyô u nyaghen mvende u vendan atindi la. Yô, de se kange nen ishima, se “kôr nen kwaghbo ihyom,” se lu nen a vangertiôr ser Yehova “kor . . . mbajighjigh nav. Yem ve sha ikyev i mbaaferev.”—Ps. 97:10, NW.
[Ngeren mba shin kpe]
^ Wea soo u timen sha itinekwagh ne vighe vighe yô, nenge Tom Wase ú Tartor u Disemba 2002, peeji 3-4.
^ Shi ôr Iyoukura (zwa Buter) i Janawari 15, 2007 la, peeji 17-20.
Ú Na Mlumun Wer Nyi?
• Kanyi ia wase se u timen sha ieren yase sha kwagh u msôrô?
• Kanyi akaa nahan se er ve se kura ayol a ase sha kwagh u mbaimeve?
• Ufoto mba ijimbagh ka kwaghbo sha ci u nyi?
• Shighe u i dugh or u doon se ishima ken mimi kera yô, se tese ser se nyagh mvende u vendan atindi nena?
[Mbampin mba ngeren u henen]
[Foto u sha peeji 29]
Wea maan msôrom yô, ka mbampin mba nyi i doo u ú pine iyol youwe?
[Foto u sha peeji 30]
Kura iyol you sha aeren a Satan a a lu ken iemberyolough la
[Foto u sha peeji 31]
Aluer or nenge foto u ijimbagh yô, nan de ér nyi i doo nan ishima?
