U Ngu a Ityôkyaa i Nan We Iember

YEHOVA ver akaa a a gbe la cii sha inja vough vough, hii sha iveghemkwagh i̱ nderan uma, i i lu kwagh u hemban ndahar cii, i yer ér cell la zan zan yem sha azuku-asan a a lu ken azuku a vesen man ken azuku a tamen a tamen la cii. Taver u fan er i hii ve i lu nahan ga, sha ci u un u a gbe akaa cii la ka ‘Aôndo u nzughul nzughul ga.’ (1 Kor. 14:33) Shi gbenda u Yehova a kohol ior nav ve lu civir un la kpa doo u nengen. Time ase kwagh u Yehova a er yô. A kohol uumace mba shin tar ne kua mbatyomov mba shaav, mba ve cii ve lu a ian i tsuan kwagh u ve soo u eren la hingir nongo na môm, mba civir un ken mcivir u wang. Doo nengen kpe kpe!

Ken tar u Iserael u tsuaa la, Yerusalem, u tempel u Yehova lu her shi tor u Yehova, u i shigh nan mkurem kpa nan luun her la, yange tile sha ityough ki vegher u nongo u Yehova, u a lu shin tar la. Oriserael ugen, u i yem a na uikyangen ken Babilon yô, yange pase ishima na sha kwagh u icighangar la nahan, ér: “Nombor wam kpaa u̱ varem sha ikughô, aluer mea umbur we ga yô, man aluer Yerusalem una hemba doon mo a kwagh u a hembe doon mo la ga yô.”—Ps. 137:6.

We kpa kape kwagh u nongo u Aôndo u doo u nyian laa? Ú hemba doon we a nyityôkwagh igen cii kpa? Mbayev ou fa yiase i vegher u nongo u Aôndo u̱ shin tar man kwagh u vegher la a eren la kpa? Ve fa er ve kpa ve lu ken mzough u anmgbianev u tar sha won cii, u Mbashiada mba Yehova la, shi mzough shon gba ve kwagh kpa? (1 Pet. 2:17) Er nan u dondo mbamhen mba i dugh a mi shin heen ne shighe u ú lu eren Mcivir hen Tsombor u aikighe la, sha er tsombor wou ua seer fan kwagh u nongo u Yehova shi ua seer lun a iwuese sha u ga?

Ôr Kwagh u “Ayange a Ngise La”

Hanma inyom yô, icombor i Mbaiserael yange i kohol sha u ember iniongo i Paseka. Shighe u i hii u eren iniongo i Paseka la, Mose wa Mbaiserael kwagh ér: “Zum u wan wou una pine u iyange igen er: Inja i kwagh ne ka nyi? Kaa un wer: Ka sha uwegh ku ageegh je TER due a vese ken tar u Igipiti ken ya u ikpan ye.” (Eks. 13:14) Akaa a Yehova eren a Mbaiserael la lu kwagh u vea umbur sha ikyov ikyov gbem yô. Sha mimi yô, uter kpishi ken Mbaiserael yange ve dondo kwagh u Mose kaa la. Ikyov ngi kar imôngo yô, Oriserael ugen er msen ér: “Se ungwa sha ato ase je, Aôndo, uter asev ôr se, tom u U er sha ayange a ve, sha ayange a ngise la.”—Ps. 44:1.

Nyian ne, alaghga yiase i Mbashiada mba Yehova i ken anyom a a kar hegen i kom 100, shin i hembe nahan la, ia lu gumor er ka “ayange a ngise” nahan. Ú er nan ve mbayev ou vea hemba nengen ér akaa ne yange er mimi? Mbamaren mbagenev ka ve er kwagh ne sha u ôron mbayev vev akaa ken takerada u Jehovah’s Witnesses—Proclaimers of God’s Kingdom la man Yearbook u Mbashiada mba Yehova man ngeren mba ka i gber ken ityakerada yase sha kwagh u uma u ior mbagenev la, man abaver a sha kwagh u ityom i ior mba Yehova ve er yô, kua tser wase u DVD u he, u u er kwagh u ior mba Aôndo mba sha ayange a ase ne la. Icer i vidio i i er kwagh u mtev u sha ican u anmgbianev mba ken tar u Russia yange ve tagher a mi la, man kwagh u gomoti u Mbanazi ken tar u Jamani la ka i tese icombor u suur sha Yehova shighe u i tagher a atsan yô. Nyôr a akaa ne ken Mcivir wou u hen Tsombor u aikighe la. Kwagh la una seer taver jighjigh u nan u mbayev ou sha er zum u ve tagher a mbamtaver mba karen mtil sha mimi ve je kpa, vea tile her dông yô.

Nahan kpa, aluer u ôr mbayev akaa a ngise hen shighe môm naleghaa, a u ve wan zwa shio yô, alaghga a ngôôr duen ve ishima ga. Nahan na ve ian i wan zwa. U tesen ikyav yô, u fatyô u pinen wan wou u nomso wer nana tsua tar u u hembe doon nan yô, nana tôv sha kwagh u ityom i  ior mba Yehova ve er ken tar shon la, nahan nana va pase tsombor wen akaa agen a nan fe la. Alaghga Mbakristu mba ve civir Aôndo sha mimi ica i gbe hegen yô vea lu hen tiônnongo wou, mba u fatyô u lôhôn ve wer ve va nyôr mcivir u hen tsombor aikighe a we imôngo aikighe ugen yô. Alaghga ma wan wou u kwase nana tôv ve, sha u pinen ve mbampin mba vea ôr uvande-eren vev yô. Gayô, u fatyô u kaan a wanye wou wer nana kpela ufoto mba tesen akaa a vesen a mbacivir Yehova ve er yô, er foto u ma afishi a branci shin ma mkohol u ityar ityar, shin kwaghpasen u sha uya uya, u yange i pasen sha icer i i kor kwaghôron ker la nahan.

Fa “Tom u Hanma Ilyeghegh Ki Lu Eren sha Inja i Ki La”

Apostoli Paulu yange tôô tiônnongo u Kristu kar sha “iyol cii er i magh i, i zua i sha iwasen i hanma ijuan i i lu ker yô, sha tom u hanma ilyeghegh ki lu eren sha inja i ki la, i lu vesen i lu maan iyol i i ken dooshima” yô. (Ef. 4:16) Aluer se fa er iyol u orumace i eren tom yô, se hemba lun a iwuese sha Orgban se, shi se seer nan un icivir kpaa. Shi kape aluer se nenge gbenda u tiônnongo u Yehova u tar sha won cii la a eren tom la kpa, “kwaghfan u Aôndo u a dumbur la” una doo se je la.—Ef. 3:10.

Yehova pase er nongo na u eren tom yô, kua vegher u nongo shon u sha la kpaa. U tesen ikyav yô, a kaa a vese ér yange un hii nan Yesu Kristu mpase u sha mnenge, un di gema ‘pase sha mtindi u A tindi ortyom Na hen Yohane wanakiriki Na, u a er shiada’ la. (Mpa. 1:1, 2) Aluer Aôndo pase se er vegher u nongo na u̱ sha la a eren tom yô, ka “tom u hanma ilyeghegh ki lu eren sha inja i ki” shin tar la ve una kera soo ér se fa ga yee?

U tesen ikyav yô, aluer ka zurum u ortamen u sôron atôônanongo una va sôr tiônnongo wen yô, er nan u tim vea tsombor wou sha kwagh u ityom i mbakuran mba ningir sha ve eren kua averen a ve zough a mi sha ityom shon la ga? Mba wasen se asange asange nena? Mbampin mbagenev mba ne fatyô u timen sha mi yô ka ve ne: Er nan ve i gbe hange hange u a naan ibaver i kwaghpasene? Nongo u Aôndo ngu zough a inyaregh han ve u eren akaa? Mbahemenev Mba Shin Tine mbara mba eren tom nena, man mba ne kwaghyan u ken jijingi nena?

Aluer se fa er ior mba Yehova ve eren tom sha inja vough vough yô, se zua a mtsera sha igbenda i itiar ne: Se hemba lun a iwuese sha mbara mba ve eren tom sha ci wase sha gbashima la. (1 Tes. 5:12, 13) Ishima ia mgbegha se u suen ityom i nongo u Yehova u eren la. (Aer. 16:4, 5) U masen yô, jighjigh u se ne mbahemenev asev la una seer taver zum u se nenge ser, akaa a nongo u Yehova u eren cii har sha Ruamabera yô.—Heb. 13:7.

“Zende Ken Ayou a Na a Tor”

“Ningir Shion, zende, ningir nen un, ôr nen ugôgômbaayoughouv nav. Kenger nen ukpekpe nav doo doo, zende ken ayou a na a tor, sha er né va ôr kov u ua va mough la yô.” (Ps. 48:12, 13) Orpasalmi yange ôr mkaanem man sha u taver Mbaiserael ishima ér ve̱ nenge Yerusalem u lu ikyua a ve la. U nenge er icombor i Mbaiserael i yange ia za uiniongo mba í ember hanma inyom ken icighan gar, shi vea nenge a tempel u doon ashe tsung u ken gar la ve, ve umbur akaa a doon a ve za nenge a mi la kpa? A shi nan kpa yange ishima i mgbegha ve u ‘ôron kov u ua va mough la’ akaa shon.

Hen sha kwagh u torkwase u Sheba u a hii ungwan gwa u Solomon ér hemen na doo kpishi shi kwaghfan na hemba cii ve, a na jighjigh ga la. Lu nyi i na ve va mase nan jighjigh ér kwagh u yange un ungwa la lu mimi? A kaa ér: “M na jighjigh sha kwaghôron ve ga, zan zan m va nenge sha ashe am ne.” (2 Kron. 9:6) Sha mimi yô, kwagh u se nenge sha ‘ashe a ase’ la una fatyô u geman mhen wase tsembelee je.

U er nan ve u wase mbayev ou vea nenge a akaa a doon tsung, a nongo u Yehova sha ‘ashe a ve’? Aluer afishi a branci a Mbashiada mba Yehova nga ikyua a ya wou yô, nôngo za a ve her. U tesen ikyav yô, Mandy man Bethany yange ve vese hen ijiir, i mough her yem hen iyaagh ki Betel ki hen tar ve la kuma er ukilomita 1,500 nahan yô. Nahan kpa, shighe u mbayev kasev mban lu vesen a vese la, mbamaren vev keren ian sha u zan zende a ve shin Betel fele fele, za ningir nengen iyaagh ki Betel kua ityom i i eren her la cii. Mandy man Bethany ve kaa ér: “Cii man se ningir iyaagh ki  Betel yô, se lu henen ser Betel ka ijiir i u lam shin u se her a taver kpa a lu kwaghbo, shi ka ijiir i i lu sha ci u mbaganden tseegh yô. Kpa se nenge a agumaior, a yange lu eren Yehova tom sha gbashima, shi tom la na ve msaanyol yô! Se nenge er nongo u Yehova u hembe an-ijiir u cuku u ya wase a lu her la yô, shi hanma kwa u yange sea za shin Betel yô, se seer kporom hen Yehova, shi kwagh la mgbegha se u seer eren un tom kpaa.” Er Mandy man Betany ve nenge nongo u Yehova ér ngu ikyua a ve yô, ishima mgbegha ve ve hii u eren tom u pania, shi i yila ve shin Betel je kpaa, sha u ve za er Yehova tom shimi anshighe kpuaa.

Gbenda ugen ngu u se “nenge” nongo u Yehova yô, ka gbenda u yange u lu shighe u Mbaiserael mba ngise mbara ga yô. Ken anyom a karen ne, ior mba Aôndo zua a icer i vidio kua DVD i i tese akaa kposo kposo sha kwagh u nongo u Yehova yô, er tser u: Jehovah’s Witnesses—Organized to Share the Good News man Our Whole Association of Brothers, To the Ends of the Earth kua tser u United by Divine Teaching la nahan. Aluer we man tsombor wou ne nenge gbashima u anmgbianev mba shin Betel ve lu a mi sha tom, kua mba ka ve na ayol a ve u wasen mbagenev shighe u aahe a er la, man mbamishen kua anmgbianev mba ka ve wa ago shi ve sôr akaa ve ver vough sha ci u mbamkohol mba vesen la yô, ne seer lun a iwuese sha kwagh u mzough u anmgbianev u tar sha won cii la.

Hanma tiônnongo u ior mba Aôndo yô ngu a tom u hange hange ken loho u dedoo u pasen shi wasen Mbakristu mba hen ningir ve. Nahan kpa, tôô shighe vea tsombor wou sha u umbur “anmgbianev enev sha won cii.” Kwagh la una wase u kua mbayev ou, ne za hemen u ‘tilen dông sha jighjigh u nan,’ er ne fe ner ne mba a ityôkyaa i nan ne iember yô.—1 Pet. 5:9.

 [Ngeren u kiriki/Foto u sha peeji 18 la]

Nongo u Aôndo Ka Itinekwagh I I Doo u Timen sha mi Yô

Se mba a akaa kpishi a aa wase se u seer fan yiase i nongo u Yehova kua gbenda u ú eren tom la. Mbampin mba ve dondo shin heen ne vea wase u henen kwagh u nongo u Yehova:

☞ Tom u Mbakuran mba Ningir Sha ve eren ainge ne yange u hii nena?—Iyoukura (zwa Buter) i Novemba 15, 1996, peeji 10-15.

☞ Kanyi yange i er sha mkohol u i yer itinekwagh na ér “Iyange i Mbayev,” u i er ken inyom i 1941 laa?—Iyoukura i Agusutu 1, 2001, peeji 30.

☞ Mbahemenev Mba Shin Tine ka ve tsua akaa a nongo ne ua eren la nena?—“Bearing Thorough Witness” About God’s Kingdom, pages 108-114.