Mbampin mba Mbaôron Takerada Ne Ve Pin La

Se er nan ve se kav ibaver i tomshiren i sha inyom laa?

Hanma inyom yô, ka i gber ibaver i tom u pasen kwagh la ken takerada u Yearbook man ken Tom Wase ú Tartor u Febewari. Ka sea ôr kwagh u ior mba Yehova sha tar cii ve lu eren sha u pasen kwagh u Tartor u Aôndo shi tesen mbagenev kwagh u u nahan, i saan se iyol kpishi. Kpa cii man se kav kwagh u ibaver la i lu ôron jim jim yô, a gba u a pase se kwagh u atineakaa man unamba mbagenev ve til sha mi yô. Nenge ase akav agen shin heen.

Inyom i Tom. Inyom i tom ka i hii ken uwer u Setemba i za kure ken uwer u Agusutu. Hanma shighe cii yô, ibaver i inyom i tom ka i lu sha kwagh u tom u inyom i i sember karen yô. Sha nahan yô, Tom Wase ú Tartor u Febewari 2011 ne ngu a ibaver i inyom i tom, i i hii ken Setemba 1, 2009, zan zan i kure ken Agusutu 31, 2010 la.

Ingyegh ki mbapasenkwagh ki hemban cii man kwarkaren sha mbapasenkwagh. Mbapasenkwagh ka Mbashiada mba i er ve batisema man mbagenev mba i lumun ve ér ve pasen loho u dedoo u Tartor yô. Ka i zua a “ingyegh ki mbapasenkwagh ki hemban cii” la ken uwer u mbapasenkwagh mba ve ne ibaver ve ve hembe ngeen ken inyom i tom la. Alaghga ingyegh kin kia kua ibaver i ma uwer u karen, i yange i nyôr fele ga, nahan i wa i sha ibaver i uwer shon ga yô. Sha nahan yô, alaghga a wa mbapasenkwagh mbagenev sha ingyegh ki mbapasenkwagh a kuma kwa har. Nahan kpa, ingyegh ki mbapasenkwagh ki hemban cii kira wa ingyegh ki mbapasenkwagh mba yange ve pase kwagh kpa ve hungur u nan ibaver ve la ker ga. Kwagh ne tese ér gba hange hange u hanma orpasenkwagh nana naan ibaver i nan hanma uwer sha shighe. “Kwarkaren sha mbapasenkwagh” di ka ingyegh ki mbapasenkwagh mba ve ne ibaver ve ken inyom i tom, ki í kohol cii í kar sha iwer 12 yô.

Ahwa jimin cii. Ibaver i inyom i tom i i gber ken inyom i 2011 ne tese ér Mbashiada mba Yehova yange ve er tom u pasen kwagh, hemba ahwa miliôn 1 man dubu-deri 6. Nahan kpa, ingyegh kin ka ingyegh ki ahwa a yange se er tom a mi cii ken mcivir wase la ga, sha ci u se wa shighe u ka se tôô se er akaa, er u sôron anmgbianev shi zan mbamkombo shi henen Bibilo sha tseeneke shi gbidyen kwar sha mi la ker ga.

Inyaregh ki i vihi la. Ken inyom i tom i 2010 la, Mbashiada mba Yehova vihi inyaregh hemba udola miliôn 155 sha u nengen sha ikpur mba pania man mba mishen kua mbakuran mba ningir sha, ken tom ve u pasen kwagh la. Nahan kpa, inyaregh ki ka se vihi sha u gberen ityakerada i pasen Bibilo shi nengen sha mba ve ne ayol a ve u eren tom shin Betel tar sha won cii, mba ve hembe 20,000 la, se wa sha ki se ter sha heen ne ga.

Mba yan bredi shi maan wain. Kin ka ingyegh ki mba eren batisema, mba ve ye bredi shi ve me wain sha shighe u M-umbur sha tar cii la. Ingyegh kin ka ki mba i shigh ve mkurem, mba ve lu shin tar laa? Ka nahan keng ga. Atôakyaa nga kpishi a a fatyô u nan mbagenev henen ér i yila ve sha, kpa a lu nahan ga yô. Atôakyaa ne kua atesen a kwaghaôndo a yange ve vande nan jighjigh a mi la, shi mlu u ityough ki lu mbagenev ker vough ga la je kpa una na vea hen nahan. Sha nahan yô, se mba a gbenda u fan ingyegh ki mba i shigh ve mkurem, mba ve lu shin tar la jighilii ga; shi saa se fa ki ga. Mbahemenev mba Shin Tine mba ngeren ati a mba ve ye bredi shi ve me wain hen mkombo u M-umbur la ga. *

Kwagh u se fe yô, mbagenev ken mba i shigh ve mkurem ve lu “mbatomov mba Aôndo wase” shin tar la, vea lu her shighe u a pase ahumbe a mtim, a zegecan la. (Mpa. 7:1-3) Er mba i shigh ve mkurem mbara ve lu shin tar her yô, mba eren tom u pasen ior kwagh shi tesen ve la kpoghuloo. Ibaver i tomshiren i sha inyom la ka i pase se kwagh u ior mba Yehova sha tar cii ve lu eren ken tom u hemban cii, u i gbe je i lu a vande eren u nahan ga ne.

[Ngeren u shin kpe]