Er Nan Ve I Gbe Hange Hange u ‘Se Kurana’?

“KA NYI ia lu ikyav i sha mve Wou la man i mkurtara?” (Mat. 24:3) Yesu ngur nan mlumun sha mpin la yô, a pase mbahenen nav kwagh u una lu ikyav la wang, a pase ve vighe vighe sha gbenda u vea nenge a i̱ a tsume ve ga yô, er i nger ken Mateu ityough 24 man Marku ityough 13 man Luka ityough 21 nahan. Maa a kaa ér: “Kuran nen.”—Mat. 24:42.

Aluer ikyav la tseegh kpa ngi tseer tseer yô, er nan ve yange seer icintan ne sha mini? Nenge ase akaa ahar a alaghga yange na ve er nahan yô. Hiihii yô, alaghga akaa a danen or ishima aa na mbagenev vea kera wa ikyo sha ikyav la ga, nahan vea de u kuran shi vea ta ikyar i ve ye a Yehova la kera. Kwagh u sha uhar yô, alaghga Orkristu nana nenge a ikyav la nana kav i vindi vindi, kpa ijiir i nan lu her la ia na yô, nana nenge ér kwagh la bende a nan jighilii ga. Alaghga nana tôô ér “zegecan,” u a lu mkur u kwaghôron u profeti u Yesu la, ngu a mgbôghom ga, nahan ka hange hange u nana “kuran” ga.—Mat. 24:21.

“Ve Fa Ga”

Yesu umbur mba dondon un kwagh u ior mba sha ayange a Noa la. Kwaghpasen u Noa lu pasen la man zege tso u lu gban la man ipila i yange i ngee sha ayange na la, lu ilian ga. Nahan kpa, ior kpishi “fa ga.” (Mat. 24:37-39) Nyian kpa, kape ior kpishi ve we icintan ikyo ga je la. U tesen ikyav yô, usanboodu ka ve tese ayem a i gbe u kwaghhendan una yemen sha mi hen ma ijiir yô, kpa ior kpishi mba we ikyo sha mi ga. Ashighe kpishi ka i gande mbautahav ve kaha mbaagir sha gbenda sha u panden akaahendan ayem. Orkristu kpa, alaghga nana kav ikyav i ayange a masejime, kpa adooga nana nyôr iyol ken kwagh u a tese ér nan ngu a kav inja i ikyav la ga yô. Yange kwagh ne er gumkwase ugen shin Ityôtar i Afrika, u i yer un ér Arielle yô.

Yange i doo Arielle kpishi u nengen bol u ukase u sha ave sha televishen. Makeranta na ngu veren kwe bolough yô, sar un u lun ken kwe la, nahan kera lu per sha u fan akaa a vihin ikyaryan na vea Yehova la ga. Yange nger iti i lun orhunda. Lu nyi i dondo? A kaa wener: “Mbayevkasev mbagenev mba se gbidyen bol imôngo yô, lu a asôôr a yange maan taav kua mcimbim ma bom yô. Yange ve sem sha ci u m lu kposo, kpa m hen mer me fatyô u hendan a ve. Ica i gbe ga yô, bol la kpôô kpôô kpa hii u vihin mlu wam u ken jijingi la. Bol u sha ave ne yam ishima cica. Yange mea za mbamkombo mba Mbakristu kpa, ashighe kpishi ishima yam i lu ken Iyou i Tartor ga, m henen kwagh u bol ne ken ishima. Ieren yam i Orkristu la kpa lu vihin. Kera doom u gbidyen a gbidye bol ne tseegh ga, m hingir u keren mer sea zua bol yô se hemba keng. M lu karen iyol kpoghuloo sha er me iv isharen i m va hingir u lun a mi, i keren mer se hemba keng la yô. Nahan mtumeyol shile sha a mo. Je yô, azende am kpa m de kwagh u a sha ci u bol u sha ave ne.

 “Kwagh u yange hemba vihin je yô, ka shighe u se zua bol vea kwe bolough ugen ve, va gba u vea gbidye se penda la. Yange m wa iyol sha u me kôr bol la i̱ de ye se ikyo ga yô. Cii man a baver mo nahan, m er msen kera kpaa, mer Yehova a wasem me kôr penda la! Kwagh u er ne wasem u fan mer yange m gba ica a Yehova. Yange m hide m ya ikyar a na nena?

“Yange m vande nengen tser u DVD u Young People Ask—What Will I Do With My Life? la. * Tsô m tsua mer me kimbir nengen u, kwa ne yô, me kera tôô kwagh u ú tese la beelee ga. Gadia mo kpa m lu ken mlu môm vea André, gumor u i er kwagh na ken tser shon la. Yange m hemba veren ishima sha kwagh u ortamen ugen kaa ér André a er yô. Yange kaa ér a ôr Mbafilipi 3:8 shi a gbidye kwar sha mi. Lu kwagh u wasem je la. Nahan, m due kwe bolough la.

“Kwagh ne yange wasem kpen kpen! Isharen i keren mer me hemba gesa keng la bee, kua mtumeyol wam la kpaa. Yange hemba saan mo iyol shi m hemba lun ikyua a azende am a ken tiônnongo. Ityom i ken jijingi hemba lun mo a inja. M veren ishima ken mbamkombo, nahan m hemba zuan a iwasen ker. Shi m lu hemban eren tom u pasen kwagh la kpaa. Hegen ne, ka m tee ishuen pania ashighe ashighe.”

Aluer ma kwagh ngu nôngon ér una dan u ishima sha ikyav i Yesu pase kwagh u i̱ la yô, er kwagh sha mi sha afatyô wou cii, er Arielle nahan. U fatyô u eren akaa agen a a dondo ne. Nenge ken takerada u Watch Tower Publications Index, u mbagen ve yer u ér “gbenda u zan hen akaa a injaa a i yer a la.” I tese ityakerada igen i i lu a kwaghwan u injaa kua uvande-eren mba pasen er yange mbagenev tagher a ameen yô, ken takerada ne. Zua a mtsera kpishi ken mbamkombo sha u vanden wan iyol sha a ve tsembelee, shi zum u ú nyer mkombo yô, ngeren akaa shin inya. Mbagenev nenge ér ka vea tema sha hemen yô, i wase ve. Zum u i lu nan kwaghôron u wan mbaungwan ker yô, nôngo wa zwa tsuaa. Shi za hemen u lun per ken jijingi sha u tôôn akaa a a lu eren sha tar hegen, i lu ôron sha abaver la zuan sha avegher a ikyav la man aeren a ior mba ken “ayange a masejime” ne.—2 Tim. 3:1-5; 2 Pet. 3:3, 4; Mpa. 6:1-8.

“Kohol Nen Iyol”

Ikyav i ayange a masejime la ngi sha ityar ityar, i̱ “tser tar” cii. (Mat. 24:7, 14) Ior umiliôn imôngo mba sha ajiir a ubombauangev man ijen man ityartenger kua akaa agen a i tsengaôron a lu tseren ior her yô. Kpa mbagenev kpishi mba sha ajiir a bem a we lun her yô. Aluer akaa agen a a lu ikyav ne nga a tser u ga yô, doo u ú tôô wer zegecan la ngu a mgbôghom gaa? Imba mhen la ia tese kwaghfan ga.

U tesen ikyav yô, hen ase sha kwagh u Yesu tsengaôron sha kwagh u “ijen man ubombauangev” la. (Luka 21:11) Hiihii yô, yange kaa ér akaa ne aa lu eren hanma ijiir cii hen shighe môm, shin sha gbenda môm ga. Kpa a kaa ér akaa ne aa lu eren “sha ajiir kposo kposo.” Nahan se fatyô u veren ishima ser akaa ne a̱ eren hanma ijiir cii hen shighe môm ga. Kwagh u sha uhar yô, Yesu yange er kwagh u ijen been yô, a tese ér gba u mbahenen nav mbagenev vea lu per sha u palegh u yan kwagh karen ikyaa inya, a kaa ér: “Ver nen ishima sha ayol a  en, asema a en a̱ de yoho sha hua u sha kwaghyan” ga. (Luka 21:34) Sha nahan yô, gba u Mbakristu cii vea ver ishima ér hanma kwagh u a lu ikyav la cii una er ve ga. Kpa Yesu kaa ér: “Shighe u né nenge akaa ne aa eren yô, fa nen ner, tartor u Aôndo mgbôghom ve.” (Luka 21:31) Igbenda i i er abaver sha mi hegen la ngi wasen se u nengen a hanma vegher u ikyav la cii, a lu nyi je ia eren hen ijiir yase kpaa.

Shi umbur wer Yehova vande veren ‘iyange man shighe’ u zegecan la una hii yô. (Mat. 24:36) Akaa a a lu zan hemen sha tar la aa fatyô u geman iyange ne ga.

Yesu wa Mbakristu sha tar cii kwagh ér: “Kohol nen iyol.” (Mat. 24:44) Gba u se kohol iyol hanma shighe cii. Nahan kpa, se fatyô u eren ityom i Tartor zengee ken iyange jimin ga. Heela tseegh ga, mô wase kpa nan fa kwagh u nana lu eren zum u zegecan la una hii ga. Alaghga mbagenev vea lu ken ityev shin vea lu eren ityom hen ya. (Mat. 24:40, 41) Nahan kanyi se er ve se kohol iyolo?

Orgen u i yer un ér Emmanuel yô, vea kwase na Victorine man mbayev ataratar, mba ken vegher u Afrika ape ve nengen a akaa a tesen ikyav la tsembelee ga yô. Nahan ve lamen sha akaa a ken jijingi hanma iyange sha er vea kohol iyol yô. Emmanuel kaa ér: “Yange lu ican kpishi u zuan a shighe u una doo sha ci wase cii yô. Ken masejime yô, se va tsua ser se henen kwagh sha ahwa ataratar zan zan ahwa ataratar man tiôn pepe. Ka sea timen sha ivur i sha iyange sea been yô, se wa iyol sha akumahiange kpuaa ken ma takerada u i lu henen ken mkombo ken kasua la yô.” Kwaghhenen ne wase ve u lun per je he? A wase yum! Emmanuel ka ortamen u wasen mzough u mbatamen tom ken tiônnongo. Victorine di ashighe kpishi ka a tôô ishuen pania, nahan a wase ior kpishi u fan mimi. Ônov vev mba zan hemen ken jijingi.

Yesu wa se kwagh ér: “Ver nen ishima, kuran nen.” (Mar. 13:33) De deen wer akaa a danen or a na u kera lu per ken jijingi ga ze. Kpa dondo kwaghwan u se zough a mi ken ityakerada yase man ken mbamkombo la, er Arielle nahan. Hanma iyange yô, nôngo u eren kwagh u una wase u u̱ kohol iyol shi ‘kuran,’ er tsombor u Emmanuel nahan yô.

[Ngeren u shin kpe]

[Foto u sha peeji 4 la]

U lamen sha akaa a ken jijingi hanma iyange la wase Emmanuel man tsombor na u ‘kohol iyol’