Natan​—Lu Or u Tilen sha Kwagh u Mcivir u Mimi Dông

Ka kwagh u ican kpishi u zan hen orutaha za kaan a nan wer igbenda i nan ka i ifer nahan gba u nana kôôm i. Aluer u fa wer imba or la vande wuan or sha er nana cir kunya u nan nahan, u zaa?

Davidi u lu Tor ken Iserael sha ayange a tsuaa la, yange er idya vea Betesheba, nahan Betesheba wa iyav. Davidi na zwa i wua nom na, shi a tôô kwase la hingir u na sha er una yer isholibo ve la yô. Iwer kar kpishi kpa Davidi pase or môm isholibo na la ga, lu eren ityom na her vough vough. Kpa Yehova de isholibo i Davidi la ér i saa ga. A tindi profeti na Natan hen Davidi.

Ityom ne lu i̱ taver kpe kpe. Tôô wer ka we u lu Natan ye. Lu mtil u Natan tile sha mimi la kua mkor u yange kuran atindi a Yehova la mgbegha un u za pasen Davidi isholibo na ye. Profeti ne una er nena ve Tor Davidi una lumun isholibo na shi una gema ishima?

OR U TESEN SHA KWAGHFAN

Er nan u tee miniti kpuaa u er 2 Samuel 12:1-25 ga? Tôô wer u ngu Natan, nahan u ngu ôron Davidi kwagh ne, kaan wer: “Yange ior ihiar lu ken gar ugen, or môm lu ornyar, or môm lu icanor. Ornyar la lu a akum a iyôngo kua ibua kpishi; kpa icanor la lu a kwagh ga, lu di a antuleiyôngo u a yam a koso, a vese hen na a mbayev nav; yaan kwaghyan a na imôngo, maan kwagh shin iyongo na, a yav un sha ikyum, hingir un vough er wan na u kwase nahan. Tsô iyange igen or va ornyar la inya, a tange iyôngo na kua ibua na la, a sôngo  orvannya u a ve her a na la kwagh ga, kpa a gema a kôr antuleiyôngo u icanor la, a za sôngo orvannya na la.”—2 Sam. 12:1-4.

Er Davidi vande lun orkuranilev yô, ikyav tese ér yange hen ér kwagh er nahan kpôô kpôô. Or u tôvon sha akaa a Bibilo ugen kaa ér: “Alaghga Natan yange vanden zan hen Davidi za lamen sha ci u mba i nzughul a ve, ve lu a or u wasen ve ga la.” Yange kwagh a lu nahan je kpa, a gba u Natan una tile sha mimi hen Aôndo shi una taver ishima ve una lam a tor sha gbenda u yange lam a na la ye. Kwagh u Natan ôr la na ishima vihi Davidi ker. Nahan Davidi kaa ér: “M bum er TER A lu u uma ne, or u nan er nahan la, nan kuma ku.” Maa Natan kende kaa ér: “Ka we je, u lu or shon ye!”—2 Sam. 12:5-7.

Hen ase er hii ve Natan lam a Davidi sha zayol ne sha gbenda u yange lam la yô. Or ka nana doo se ishima sea lu a nan kôôsôô yô, i taver se u nengen a kwaghbo sha mlu wase u kôôsôô a nan la. Se cii ka se na atôakyaa kpishi shighe u se er kwagh kpe yô. Kpa injakwagh i Natan la na yô, Davidi hide puu ieren na iyol na. Tor nenge wang ér kwagh u Natan kaa ér yange ornyar ugen er la lu kwagh u vihin tsung. Lu zum u Davidi puu ieren la vindi vindi la, Natan kaa a na ér injakwagh la ôr kwagh na ye. Hen shighe ne tor Davidi nenge er isholibo na i kehe kpishi yô. Kwagh ne na yô, ishima hemba teman un shimi u lumun mkôôm. Nahan a lumun ér un ‘laha’ Yehova sha kwagh u un er a Betesheba la, shi a lumun mkôôm u gba u a na un la.—2 Sam. 12:9-14; Ps. 51, ngeren u sha ityou.

Ka nyi se hen sha kwagh ne? Awashima u or u tesen ior Bibilo yô, ka u nana wase or u nan lu tesen nan la nana gbidye kwar sha kwagh u nan lu henen la, nahan nana kav kwagh u a lu u shami la iyol i nan. Natan yange na Davidi icivir, nahan lam a na sha kwaghfan. Natan fa je ér, Davidi soo perapera man ijirôron i vough. Nahan a ôr un kwagh u una mgbegha or u lun a aeren a injaa ne u eren kwagh u vough yô. Se kpa se fatyô u wasen mbaasemaamimi u kaven awashima u Yehova. Se er kwagh ne nena? Er ior kpishi ve nôngo u fan kwagh u a lu u sha mi yô, se fatyô u wasen ve vea er tom a mfe u ve fe kwagh u vough la, kpa se er kwagh ne sha gbenda u a lu inja er se nenge ser se hemba ve shin se mba a ian i kaan ve kwagh u vea er ga. Ka Bibilo i lu tahav asev mbu pasen se kwagh u a lu u vough shin a lu u vough ga ye, ka mbamhen asev ga.

Kpa hemban cii yô, Natan yange tile sha mimi hen Aôndo ve fatyô u kôôm tor u lun a tahav ye. (2 Sam. 12:1) Aluer se kpa se mba civir Yehova sha mimi yô, se lu a ishimataver i tilen dông sha kwagh u atindi a perapera.

OR U SUEN MCIVIR U MIMI

Ikyav tese ér Natan man Davidi yange ve doo ayol a ve, sha ci u Davidi na wan na ugen iti ér Natan. (1 Kron. 3:1, 5) Ape i hii ôron kwagh u Natan ken Bibilo la, i ôr kwagh na vea Davidi imôngo. Ve uhar cii yange Yehova doo ve ishima. Se fa ser Davidi yange na mhen u Natan jighjigh sha ci u yange pase Natan er i sar un u maan tempel sha ci u Yehova yô. Davidi kaa ér: “Nenge, mo m tema ken iyou i ikyon i sedar, kpa areki u Aôndo yô, gema ngu tsan ken tenti tsô. Tsô Natan gema kaa a tor er: Yô, gba eren akaa a a lu u ken ishima cii, gadia TER ngu a we.”—2 Sam. 7:2, 3.

Er Natan civir Yehova sha jighjigh yô, a lumun a awashima u Davidi la a ishima i môm, ér i maa tempel u hiihii sha tar, sha ci u mcivir u mimi. Kpa sha ihyongo ne yô, Natan lu lamen ken iti i Yehova ga, kpa lu pasen er ishima lu un ker la. Hen tugh mbura, Aôndo kaa a profeti ne ér a za kaa Tor Davidi loho ugen kposo, ér: Davidi una maa tempel sha ci u Yehova ga. Or u nana maa tempel yô, a lu wan u Davidi. Kpa Natan yôô ér Aôndo ngu yan ikyur a Davidi, ikyônough nagh ki torough “kia lu her gbem sha won.”—2 Sam. 7:4-16.

Awashima u Yehova yange zua vea u Natan sha kwagh u maan tempel la ga. Profeti u hiden a iyol ijime ne, yange gba ijir ga, lumun a awashima u Yehova la shi dondo un kpaa. Kwagh u er ne ka ikyav i doon tsung i í gbe u se dondo, shighe u Yehova a kôôm se sha ma gbenda yô. Akaa agen a Natan va er ken hemen la tese ér Aôndo yange venda un ga. Ikyav tese ér Yehova yange  mgbegha Natan man Gadi, ornengenakaa la, sha u ve tese Davidi er una er tom u kohol mba kuhwan ityogholough 4,000 sha ci u mcivir u ken tempel yô.—1 Kron. 23:1-5; 2 Kron. 29:25.

OR U KURAN TSOMBOR-TOR

Natan yange fa er lu u Solomon una kar a tema tor sha ityough ki Davidi u bee iyol la yô. Sha nahan yô, shighe u Davidi hingir tamenor ve Adoniya soo u ngohol tahav sha apera la, Natan ker gbenda sha mi fele fele. Kwa ne kpa Natan er kwagh sha kwaghfan shi tese mtil sha mimi kpaa. Hiihii yô, yange kaa a Betesheba ér a umbur Davidi er yange bum ér una ver Solomon tor yô. Maa Natan iyol na kpa za sha ishigh ki tor sha u za pinen aluer ka Davidi a kaa ér i ver Adoniya tor yô. Tor u been iyol ne kaven er kwagh lu nôngon u ganden ave yô, a kaa a Natan kua mbatomov mba jighjigh mbagenev ér ve za shighe Solomon mkurem, ve ver un tor. Ayom a Adoniya er sha u ngohol mtemtor la maa gba mnger.—1 Utor 1:5-53.

OR U TIMEN SHA AKAA A MBAYIASE U HIDEN A IYOL IJIME

I lumun wuee ér ka Natan man Gadi ve nger takerada u 1 Samuel ityough 25 zan zan ityough 31 kua 2 Samuel ye. I ôr kwagh u yiase i Aôndo na i nger ken ityakerada ne la ér: “Aerenakaa a tor Davidi a hiihii man a masetyô cii, nenge i nger a ken abaver a Samuel, ornengenakaa, man ken abaver a profeti Natan, man ken abaver a Gadi ornengenakaa.” (1 Kron. 29:29) Shi i kaa ér ka Natan a nger kwagh u “aerenakaa a Solomon” ye. Kwagh ne tese ér, a shi nan kpa, Natan yange za hemen u eren ityom i ken ya u tor her kpoghuloo, shighe u Davidi kpe kera la kpaa.

Alaghga akaa a se fe sha kwagh u Natan la kpishi, yange nger a iyol na. Nahan kpa, akaa a yange nger kwagh sha mi ga la wase se kpishi u fan or u yange lu yô. Ikyav tese ér, Natan lu or u ngeren akaa a mbayiase, u hiden a iyol ijime, u keren gwa ga. Takerada ugen u pasen kwagh u Bibilo kaa ér, i ter kwagh na ken Bibilo “a u vanden pasen se kwagh na shin kwagh u tsombor na shio.” Sha nahan yô, se fa ma kwagh sha kwagh u uma na shin u tsombor na ga.

MTIL U A TILE A YEHOVA SHA MIMI LA MGBEGHA UN

Akaa a se er sha kwagh u Natan ken Ruamabera kpuaa la tese se ér yange hide a iyol na ijime, shi sue gbenda u Aôndo a eren akaa la. Yehova Aôndo yange na un ityom i vesen. Gbidye kwar sha aeren a injaa a Natan lu a mi la, er mtil u tile a Aôndo sha mimi la man u lun a iwuese sha gbenda na u eren akaa la nahan. We kpa nôngo u lun a aeren shon.

Adooga we a yila u ér u za kôôm ma tor u eren idya shin we u za yange awashima u or lu a mi u ngohol ma mtemtor ga. Nahan kpa, sha iwasen i Aôndo yô, u fatyô u tilen sha mimi shi suen atindi a na a perapera la. Shi u fatyô u lun ortesen u taver ishima, eren kwagh sha kwaghfan shi tilen sha kwagh u mcivir u mimi dông.

[Foto u sha peeji 25 la]

Er Natan lu or u suen tsombor-tor yô, a lam a Betesheba sha kwaghfan