Wea Lu Orkristu Hen Tsombor Wou Tswen Kpa A Saan We Iyol
Wea Lu Orkristu Hen Tsombor Wou Tswen Kpa A Saan We Iyol
‘U fa nana, alaghga ú va yima nomu shin kwase wou shinii?’ —1 KOR. 7:16.
U FATYÔ U ZUAN A MBAMLUMUN SHA MBAMPIN MBAN KPA?
Orkristu nana va a bem hen ya u nan u or u nan jighjigh ga na lu her la nena?
Orkristu nana wase mba hen tsombor u nan mba ve ne jighjigh ga la nena ve, vea fa mimi?
Mbakristu mbagenev vea wase mbananjighjigh mba ve lu hen icombor i or u nan jighjigh ga nan lu her la nena?
1. Or ka nana ngohol mimi nahan, kwagh la a bende a tsombor u nan nena?
YESU yange tindi mbaapostoli nav sha shighe ugen la, kaa a ve ér: “Za, za ôr nen kwaghaôndo, kaan nen ner: Tartor u Sha mgbôghom ve.” (Mat. 10:1, 7) Lu u mba vea ngohol loho u dedoo ne sha mimi yô, vea zua a bem man msaanyol. Nahan kpa, Yesu kaa a mbaapostoli nav ér ior kpishi vea hendan a tom ve u pasen kwagh u Tartor la. (Mat. 10:16-23) Man shighe u or u hen tsombor wase ka nana venda loho u dedoo u Tartor ne shi nana hendan a vese yô, i hemba nyoon se cii.—Ôr Mateu 10:34-36.
2. Aluer nom shin kwase u or ka or u nan jighjigh ga kpa, nana fatyô u lun saan saan sha ci u nyi?
2 Kwagh ne tese ér Orkristu u nom u nan shin kwase u nan, nan lu or u nan jighjigh ga yô, nana lu a msaanyol sha won ga shinii? Mayange ga! Shin er ashighe agen tsombor u or ka u tôv nan a ican kpoghuloo nahan kpa, kwagh lu nahan hanma shighe ga. Shi tsombor u or ngu tev nan a ican gbem sha won keng ga. Mlu u hen tsombor wase una lu nan kpa, se fatyô u lun saan saan, aluer se er kwagh sha gbenda u vough shighe u mba hen tsombor wase ve hendan a vese shin ve tese ér sar ve u fan mimi yô. Heela tseegh ga, Yehova veren mba ve civir un sha mimi la doo doo, shi ne ve msaanyol shighe u ve tagher a mbamtaver je kpaa yô. Mbananjighjigh vea fatyô u seer iember ve sha u (1) nôngon kpoghuloo ér bem a lu hen ya shi (2) wasen mba hen tsombor ve mba ve ne jighjigh ga la sha afatyô ve cii ér ve fa mimi.
NÔNGO SHA ER BEM A LU HEN YA WOU YÔ
3. Orkristu u mbagenev hen tsombor u nan ve ne jighjigh ga la kpa, gba u nana̱ nôngo sha er bem a lu hen ya u nan sha ci u nyi?
3 Aluer bem ngu hen ya yô, a hemba lun tsombor la ican ga u fan mimi. (Ôr Yakobu 3:18.) Aluer mba hen tsombor u Orkristu cii mba a va ken mcivir u mimi ga kpa, a gba u nana nôngo sha er bem a lu hen ya u nan yô. Nana er kwagh ne nena?
4. Mbakristu vea er nan ve vea za hemen u lun a bem ken ishima?
4 Gba u se za hemen u lun a bem ken asema a ase. A gba u se eren msen se sônon “bem u Aôndo” la ve se za hemen u lun a bem ne ye. (Fil. 4:6, 7) Ka sea hen kwagh u Yehova shi sea dondon akaawan a ken Ruamabera yô, se lu a msaanyol man bem. (Yes. 54:13) Shi aluer se mba wan zwa ken mbamkombo mba tiônnongo shi se mba pasen kwagh sha gbashima yô, se zua a bem man msaanyol. Mbakristu mba ve lu hen icombor i í ne jighjigh ga kpa, vea fatyô u keren igbenda i eren akaa a hange hange ne. U tesen ikyav yô, nenge ase kwagh u Enza, * kwase ugen u nom na a hendan a na kpoghuloo yô. Ka una eren ityom i hen ya na una been yô, shi a za er tom u geman ior hingir mbahenen la kpaa. Enza kaa ér: “Hanma shighe u ka mea nôngo mea pase mbagenev kwagh cii, Yehova a ver iniôngon yam la dedoo.” Iveren ne ka i nam bem man mkom man msaanyol.
5. Ka mtaver u nyi ashighe kpishi Mbakristu mba ve lu hen tsombor u mbananjighjighga ka ve tagher a mi, man vea zua a iwasen hana?
5 Gba u se nôngo kpoghuloo sha er se lu ken bem vea mba hen tsombor wase mba ve ne jighjigh ga la yô. Alaghga a taver se u eren kwagh ne, sha ci u ashighe agen kwagh u ve soo ér se er la una kaha a akaawan a Bibilo. Aluer se za hemen u dondon kwagh u Bibilo i er la yô, alaghga ishima ia vihi mbagenev hen tsombor wase mba ve ne jighjigh ga yô, kpa ken hemen yô, ieren yase la ia va a bem. Nahan kpa, aluer kwagh u ve soo ér se er la per tindi u Bibilo ga, kpa se nômbo ikyôr yô, zayol una due hen atô wase a ityôkyaa shio. (Ôr Anzaakaa 16:7.) Shighe u se lu tagher a mtaver yô, doo u se ker kwaghwan ken ityakerada i “wanakiriki u jighjigh man u fan kwagh” man hen mbatamen mba ken tiônnongo.—Anz. 11:14.
6, 7. (a) Er nan ve mbagenev ka ve hendan a mba hen tsombor ve mba ve hii u henen Bibilo vea Mbashiada mba Yehova laa? (b) Shighe u tsombor u or u henen Bibilo u lu hendan a nan yô, doo u nana er nena?
6 Saa se suur sha Yehova shi se fa er ka i lu mbananjighjighga mba hen tsombor wase ken ishima la ve bem a lu hen ya ye. (Anz. 16:20) Mbahenen Bibilo mba hev kpa vea fatyô u eren kwagh sha kwaghfan. Alaghga noov mba ve ne jighjigh ga mbagenev vea yange kasev vev Bibilo i henen ga, kasev kpa nahan. Adooga je yô, vea kaa ér kwagh la ka sha ci u iwasen i tsombor ve. Mbagenev di yô, alaghga vea er tswam. Kwase ugen u i yer un ér Esther, a lu Kwaseshiada hegen la kaa ér, shighe u nom na hii u henen Bibilo vea Mbashiada mba Yehova la, yange un er kwagh sha “ishimavihin tsung.” A kaa ér “Hanma shighe yô, yange m nande ityakerada na, shin m kura i m za tsenda shin toho.” Orgen u i yer un ér Howard yô, yange hendan a kwase na shighe u kwase shon hii u henen Bibilo yô. Or ne kaa ér: “Noov kpishi ka ve cian ér mba tsughun kasev vev nyôron a ve ken annongo u kwaghaôndo. Alaghga nom nana fa kwagh u nana er sha kwagh u nan nenge ér ka zayol ne ga, nahan adooga nana hingir tswang.”
7 Gba u a wase mba i lu hendan a ve sha ci u mba henen Bibilo la vea kav ér saa vea de Bibilo i henen keng ga. Aluer nan ngu ishima legh legh shi nan ngu eren kwagh sha icivir yô, nana fatyô u panden zayol hen ya. (1 Pet. 3:15) Howard kaa ér, “Doom kpishi er kwase wam yange a lu ving, a vihi ishima ga nahan!” Kwase na kaa ér: “Nomom yange hanger ér mo m de u henen Bibilo. A kaa ér mba tsughun mo a tsugh. Yange m hendan a na ga, kpa m kaa mer kwagh u a kaa la a fatyô u lun mimi, kpa shi m kaa a na mer taver mo u nengen mer mba tsughun mo a tsugh. Nahan m na un takerada u m lu henen la mer a ôr. Er u yô, a fatyô u nyiman kwagh u takerada ne ôr la ga. Kwagh u ôr la kôr un ken ishima tsung.” Doo u se umbur ser, shighe u Orkristu nan yem u za eren ityom i ken tiônnongo yô, alaghga kwase shin nom u nan ne jighjigh ga la nana hen ér i ta nan kera. Kpa aluer i taver nan ishima yô, mciem mara ma a kera lu ga.
WASE VE VE FA MIMI
8. Apostoli Paulu yange wa Mbakristu mba ve lu a kasev shin noov mbananjighjighga la kwagh ér nyi?
8 Apostoli Paulu yange wa Mbakristu kwagh ér ve de paven ivaa sha ci u nom shin kwase u ve vese la nan na jighjigh ga yum ga. * (Ôr 1 Mbakorinte 7:12-16.) Aluer ornanjighjigh umbur er iyange igen kwase shin nom u nan una fa mimi yô, kwagh la una na a saan nan iyol. Nahan kpa, doo u se wa ikyo shighe u se lu nôngon ser se pase nom shin kwase u nan ne jighjigh ga la kwaghaôndo yô, er akaa a i ter shin heen ne a tese nahan.
9. Ka nyi i doo u Orkristu nana palegh u eren shighe u nan lu pasen or u hen tsombor u nan kwaghaôndo laa?
9 Orgen u i yer un ér Jason yô ôr kwagh u yange er shighe u un fa mimi la ér: “Yange m soo u pasen hanma or mimi!” Mimi u i tese or ken Ruamabera la ka una va hii u doon nan ishima yô, i saan nan iyol je nan nôngon u ôron ior kwagh sha mi hanma shighe cii. Alaghga nana ver ishima ér mba hen tsombor u nan mba ve ne jighjigh ga la ve lumun loho u dedoo u Tartor fese je, kpa adooga vea lumun a nan ga. Kwase u Jason yange nenge gbashima u nom na lu a mi la nahan er nena? A kaa ér: “Yange lum er gbe uwer u ôron kwagh u mimi ga nahan.” Kwase ugen u nom na fa mimi anyom kar 18 cii ve va mase fan mimi yô kaa ér, “yange gba u me hen mimi kure kure.” Aluer u ngu henen Bibilo a or u nom shin kwase u nan nan lu a isharen i civir Aôndo sha mimi ga yô, er nan u karen iyol vea nan hanma shighe, sha er nana fa er nana wase nom shin kwase u nan sha kwaghfan ga? Mose kaa ér: “Ityesen yam i̱ haa er ura nahan; kwaghôron wam a̱ gba er avure nahan, er ura u hamber sha agumatoho nahan.” (Dut. 32:2) Aluer se mba pasen or mimi sha shighe vough ken mkaanem kpuaa tseegh, kpa se pase nan sha gbenda u vough yô, a hemba wasen nan a u lamen kpishi la.
10-12. (a) Apostoli Peteru yange wa Mbakristu mba noov shin kasev vev ve lu mbananjighjighga la kwagh ér nyi? (b) Kwase ugen u henen Bibilo yange hen u dondon kwaghwan u i nger ken 1 Peteru 3:1, 2 la nena?
10 Aôndo yange mgbegha apostoli Peteru wa kasev mba ken Kristu mba noov vev lu Mbakristu ga la kwagh ér: “Ungwan nen amo a noov enev sha er aluer mbagenev ken ve, vea lu mbawan kwaghôron u Aôndo ikyo ga je kpa, á urugh ve sha mlu u kasev vev la, á kera lu sha kwaghôron kpee ga, er ve nengen mlu wen u wang u cian Aôndo la yô.” (1 Pet. 3:1, 2) Aluer nom u Kwasekristu ngu nzughul a nan, kpa nan ngu ungwan imo i nom u nan shi nan nan icivir yô, nana fatyô u urugh nom u nan van a nan ken mcivir u mimi. Kape kwase u Orkristu nana hendan a nan je kpa, i doo u Orkristu la nana za hemen u eren kwagh sha ishima i Aôndo, shi hemen tsombor u nan sha dooshima je la.—1 Pet. 3:7-9.
11 Mbakristu nyian kpishi zua a iwasen sha u dondon kwaghwan u Peteru la. Nenge ase kwagh u kwase ugen u i yer un ér Selma yô. Shighe u hii u henen Bibilo vea Mbashiada mba Yehova la, kwagh shon doo nom na, Steve ga. Steve kaa ér: “Yange ishima vihim shi m soo mer a de Bibilo i henen shi ishima lu nyian mo kpaa.” Selma kaa ér: “Cii man m fa mimi je kpa, Steve lu or u taver inja kpishi. Yange i lu u me ôr kwagh shin me er kwagh sha ikyo i wan ga yô, una dem ga. Steve yange lu or u nyoon ishima kpishi. Shighe u m hii u henen Bibilo la, ishimanyoon na la hemba gban kera cii.” Lu nyi i wase un ve de inja laa?
12 Selma umbur kwagh u yange hen hen Kwaseshiada u lu henen Bibilo a na la. A kaa ér: “Sha iyange igen tugh, m lu nôngon mer Steve a zua a iwanger sha kwagh ugen, nahan ishima vihi un a mo, maa tam sambe. Kpernan yô, ishima doom ker ga shi kunya kôrom a iyol yam, nahan m soo u henen Bibilo sha iyange la ga. M er anmgbian u kwase la kwagh u erem, man er ishima lum ker la yô, a kaa ér mo m ôr 1 Mbakorinte 13:4-7. M er yô, m gba kaan ken ishima yam mer, ‘Steve eren a mo sha dooshima nahan sha won ga.’ Kpa anmgbian u kwase la pinem mbampin mba yange ve wasem u geman mhen wam yô, a pinem ér: ‘We u tesen nomou dooshima er i tese heen nahan kpa?’ M kaa mer, ‘Ei, sha ci u a taver inja yum.’ Anmgbian u kwase la maa kende teghelee pinem ér, ‘Selma, ka an nan soo u hingir Orkristu heene? Ka we shin ka Steve?’ Yange m kaven er i gbe u me nyôôso mhen wam yô, m er msen hen Yehova mer a wasem me seer tesen Steve dooshima. Tegh tegh tsô, akaa gba geman.” Anyom 17 nga kar yô, Steve hingir u fan mimi.
GBENDA U MBAGENEV VEA WASE LA
13, 14. Mbagenev ken tiônnongo vea wase mba ve lu hen tsombor u mbananjighjighga ve lu her la nena?
13 Mbakristu mba ken tiônnongo kpishi ka ve wase u van a msaanyol hen tsombor u nom shin kwase nan lu or u nan jighjigh ga la, di er ura u hamber sha agumatoho nahan. Anmgbian u kwase ugen ken tar u Brazil, u i yer un ér Elvina yô, kaa ér: “Lu dooshima u anmgbianev mba nomso man mba kasev tesem la yange wasem u tilen ken mimi dông ye.”
14 Kwagh u or u hen tsombor u̱ nan ne jighjigh ga la ka una gba anmgbianev mba ken tiônnongo ishima shi vea eren a nan doo doo yô, nan va hingir u geman ishima. Orgen ken Najeria u kwase na yange fa mimi anyom kar 13 cii va mase fan mimi yô kaa ér: “Sha shighe ugen la, m lu zan zende vea Orshiada ugen, maa mato na za vihi a na. Nahan a ker Mbashiada mbagenev hen angar u lu ikyua her yô, ve na se ijiir i tsan hen tugh mbula. Yange ve wa se ikyo vough er se fa ayol a ase, hii iyev je nahan. Her ave ave la je, m nenge a dooshima u Mbakristu u kwase wam vanden ôron kwagh a mi la.” Kwase ugen ken tar u Ingila, u nom na fa mimi anyom kar 18 cii ve va mase fan mimi yô, kaa ér: “Mbashiada yange ve lôhô se cii iwer hen uya vev. Yange ve ngohol se saan saan.” Orgen ken tar shon u un kpa va hingir Orshiada yô, kaa ér: “Anmgbianev yange ve va se inya shin ve lôhô se ér se za ve inya, nahan m nenge mer mba a ieren i wan mbagenev ikyo. Yange m hemba nengen a kwagh ne shighe u i kôrom gambe ken iyouci ve anmgbianev kpishi va sôrom la.” U fatyô u keren igbenda i eren imba kwagh ne a mba hen ma tsombor u mba ve ne jighjigh ga ve lu her la kpa?
15, 16. Ka nyi ia wase or u nan jighjigh nana za hemen u lun a msaanyol shighe u mbagenev hen tsombor u nan ve vende u fan mimi laa?
15 Aluer se mba eren a mba hen tsombor wase doo doo shi se mba pasen ve kwagh sha kwaghfan anyom imôngo je kpa, ka hanma or u hen tsombor wase, u nan ne jighjigh ga nana soo u fan mimi ga. Mbagenev vea lu a isharen i fan mimi ga shi vea za hemen u hendan a vese kpoghuloo. (Mat. 10:35-37) Nahan kpa, Mbakristu ka vea eren akaa sha ishima i Aôndo yô, kwagh u dedoo a due ker. Nom ugen u yange lu or u nan jighjigh ga yô, kaa ér: “Alaghga u fa er aeren a dedoo a Orkristu la a ker or u hen tsombor u nan ne jighjigh ga la ken ishima, shin a gem mhen u nan la ga. Nahan yô, mayange de gbe uwer sha kwagh u nomou shin kwase wou ga.”
16 Aluer or u hen tsombor nan venda u fan mimi je kpa, or u nan ne jighjigh la nana fatyô u lun saan saan. Anmgbian u kwase ugen u nôngo ér nom na a fa mimi kuma anyom 21 kpa gba sha mi ga yô, kaa ér: “M za hemen u lun saan saan sha u nôngon mer me er ishima i Yehova, man sha u civir un sha mimi her man sha u nôngon mer ikyar i m ye vea na la i seer taver. Shi m ngu henen kwagh sha tseeneke wam kpoghuloo shi m ze mbamkombo hanma shighe shi m dugh kwaghpasen shi m wasen mbagenev ken tiônnongo. Kwagh ne wasem u seer kporom hen Yehova shi civir un sha mimi her.”—Anz. 4:23.
DE GBE UWER GA
17, 18. Orkristu u nan lu hen tsombor u mbagenev ve ne jighjigh ga je kpa nana lu ken msaanyol nena?
17 Wea lu Orkristu u mimi u mba hen tsombor wou mbagenev ve fe mimi ga yô, de gbe uwer ga. Umbur wer “TER Una gbihi ior Nav kera ga, sha ci u iti Na i vesen la.” (1 Sam. 12:22) Er u lu ikyua a na yô, un kpa ngu a we. (Ôr 2 Kroniku 15:2.) Nahan yô, “I̱ saan we iyol ken TER.” Jighilii yô, “wa TER gbenda wou sha ikyev, suur sha a Na.” (Ps. 37:4, 5) “Taver . . . ishima sha msen u eren,” shi lu a jighjigh u nan wer Ter wase u sha u lun a dooshima la una wase u u̱ wan ishima a nyityô mtaver cii.—Rom. 12:12.
18 Zamber a Yehova ken msen a na u icighan jijingi na sha er una wase u, u va a bem hen ya wou yô. (Heb. 12:14) Aluer u er nahan yô, u fatyô u wasen mba hen tsombor wou mba ve fe mimi ga mbara vea hingir u fan mimi. Shi u nguren eren “akaa cii sha ci u icivir i Aôndo” yô, u zua a msaanyol kua bem u ken ishima kpaa. (1 Kor. 10:31) Shi u fatyô u lun a vangertiôr wer, anmgbianev ou mba nomso man mba kasev vea sue u shi vea tese u dooshima kpaa!
[Ngeren mba shin kpe]
^ I gema ati a ve.
^ Kwaghwan u Paulu la tese ér shighe u mbamzeyol mba vihin tsung ve dugh ken ivese je kpa or nana de undun kwase shin nom u nan ga ze. Ka kwagh u vesen u or nana tsua iyol i nan yô. Ôr takerada u ‘Lu Nen ken Dooshima U Aôndo’ la, peeji 220-221.
[Mbampin Mba Ngeren u Henen]
[Foto u sha peeji 28 la]
Tsua shighe u vough u ú pase kwagh u ú ne jighjigh a mi yô
[Foto u sha peeji 29 la]
Tese nomou shin kwase wou wer, kwagh na gba u ishima
