Erdoo Ka a Sough Ishima i Yuan

ZUM u Orshiada ugen ken tar u Netherlands, u i yer un ér George, za vea kwase na Manon, sha u za pasen kwaseganden ugen loho u dedoo u Tartor yô, kwase ne leghem ashe ikyô a ve ga cii. Mba lamen a na yô, ve va kav ér noov vande kpen kwase ne uhar, kua wan sha mi, shi un iyol na kpa akpiti kôr un taveraa. Shin er shighe u ve hii u lamen a na la hide gba ishima shimi nahan kpa, mayange lam a ve kundu kundu ga.

Mba hidi ken ya yô, George kaa a kwase na ér vea hide a za sôr kwase ne vea na un ikyagh i ufaluwa i doon kenger, sha ci u ka inja er mtswenem kôr un shi ishima vihi un tsung nahan. Iti i kwase ne ér Rie. Er ve za a mi yô, kwagh ne kpiligh un iyol je saa her. Nahan kpa, lu sha ian i una fatyô u lamen a ve ga, nahan ve sôr ian ve ver i va lamen a na shighe ugen. George vea kwase na, Manon, mba ze sha shighe shon yô, ve mande uwegh kpa or bugh ve ga. Shin er ve lu zan her sha ashighe kposo kposo nahan kpa, ve kera nenge a na ga. Je yô ve hii u henen ér ngu palegh ve a palegh.

Iyange igen yô, George za zua a Rie hen ya. Rie na un anyi a yan er yange un kera fatyô u lun hen ya sha shighe u ve ver la ga yô, shi kaa ér yange un lu sha iyouci. Shi a kaa ér, “Kpa u fa kwagh u yange ne yem ve m er kpa? M hii u ôron Bibilo!” Ve lam kundu kundu, shi hii u henen Bibilo a na kpaa.

Er Rie lu henen Bibilo la, a gema uma na, kera lu kwase u vihin ishima tsung ga, kpa hingir kwase u lun sar sar shi wan saaka kpaa. Shin er luun ijiir i môm nahan kpa, hanma or u nan ve un inya yô, a pase nan kwagh u jighjigh na u nan u he ne. Mnyoon na la na yô, faantyô u zan mbamkombo hanma shighe ga, kpa anmgbianev vea za sôr un yô, i doo un kpen kpen. Sha iyange i iv anyom 82 la, a za mkohol u ningir, nahan i er batisema sha u tesen ken igbar ér un tsegha iyol na sha ci u Aôndo.

Iwer ngi kar kpuaa yô, Rie saa ku. Kpen kera yô, i zua a kwagh ugen u yange nger yô. Yange pase er mtswenem ma vihi ken iyolbeen yô, shi pase er i lu hange hange u eren a ior doo doo yô. Manon kaa ér: “Kwagh u yange nger la kôrom ken ishima kpen kpen, man saan mo iyol kpishi er Yehova yange wase se u eren a na doo doo nahan.”

Ikyav i Yehova iyol na a ver se la ka i mgbegha se u eren kwagh a mbagenev sha dooshima. (Ef. 5:1, 2) Aluer se mba “pasen ayol a ase” ser se mba “mbatomov mba Aôndo . . . [sha] mlu u sar sar yô,” tom wase ua ume atam kpishi.—2 Kor. 6:4, 6.