1, 2. Gba u se na Yehova ibo sha mbamzeyol mba uumace ve lu tagher a mi ne ga sha ci u nyi? Tese ikyav.

TÔÔ ase wer u er ivese anyom kpishi je kpa zayol ngu a lu ga. Nahan kpa, iyange igen u hidi hen ya yô, i vihi hanma kwagh ken iyou you cii. I hembe agbande shi i vihi mkônom man kapet cica cii. Ya wou hingir caveraa. Ú pine gaegh wer, “Er nan ve kwase wam a er imba kwagh ne nahana?” shin u pine wer, “Ka an nan er imba kwagh ne nahana?” A shi nan kpa a lu mpin u sha uhar la una hii van we ken ishima ye. Sha ci u nyi? Sha ci u u fa wer kwase wou u doon we ishima la una er imba kwagh la ga.

² Nyian ne, se nenge er i vihi tar ne kpishi yô. I vihi inya man mngerem kua ahumbe, shi aeren a ior kpa vihi. Er se lu mbahenen Bibilo yô, se fa ser ka Yehova a ne ve akaa a vihin ne cii a lu eren ga. Yange gba tar ér u lu paradiso u doonashe. (Gen. 2:8, 15) Yehova ka Aôndo u dooshima. (1 Yoh. 4:8) Bibilo yase i henen la wase se u fan or u nan ne ve akaa a vihin ne kpishi a lu eren shin tar yô. Ka orgen môm ga, ka Satan Diabolo, u a lu “tor u tar ne” la, a lu eren akaa ne ye.—Yoh. 14:30; 2 Kor. 4:4.

3. Mhen wase una fatyô u nzughul nena?

³ Nahan cii kpa, se fatyô u nan Satan ibo sha hanma zayol wase ga. Sha ci u nyi? Sha ci u ka sea er akaa agen shami ga kpa se nyôr ken mbamzeyol mbagenev. (Ôr Duteronomi 32:4-6.) Alaghga se lumun a kwagh ne, nahan kpa ashighe agen myen wase una fatyô u nzughul a mhen wase, nahan se er kwagh u una nyôr a vese ken zayol yô. (Anzaakaa 14:12) Myen ne una nzughul a mhen wase nena? Se hii u nan Yehova ibo, a kera lu Satan shin se ayol a ase ga. Alaghga je yô, se hingir “iyongo a TER.”—Anz. 19:3.

4, 5. Orkristu nana fatyô u hingir ‘iyongo a Yehova’ nena?

⁴ Or a fatyô u hingir “iyongo a TER” mimii? Een,  nana fatyô. Kpa aluer se er nahan yô kwagh a za a vese a doo ga. (Yes. 41:11) Se fatyô u nôngon kwagh a Aôndo ga. Ordughunatsam ugen kaa ér: “Uwegh ou ku yina u tan iju a Aôndo.” Alaghga se kende jighilii se kaa ser ishima vihi se a Aôndo ga. Nahan kpa, Anzaakaa 19:3 kaa ér ibumegh ki orough ka ki “vihi nan gbenda, ishima i nan kpaa i hingir iyongo a TER.” Sha mimi yô, or a fatyô u hingir iyongo a Aôndo ken ishima i nan. Ieren ne ka i due ken igbar sha igbenda i kiriki. Or a fatyô u wan kwagh ishima a Yehova. Nahan alaghga nana hingir ica a tiônnongo shin nana kera lu eren akaa a se eren ken mcivir u Yehova la tsembelee ga.

⁵ Ka nyi ia fatyô u nan se hingir ‘iyongo a Yehova’? Se palegh ieren la nena? Ka hange hange u se zua a mbalumun sha mbampin mban, sha ci u kwagh ne bende a ikyar i se ye a Yehova Aôndo la.

6, 7. Mbaiserael mba sha ayange a Mose la yange ve hii u gban ahon a Yehova sha ci u nyi?

⁶ Ka nyi ia na or u civir Yehova sha mimi nana hii u gban ahon a Aôndo ken ishima i nana? De se time sha akaa ataan a a fatyô u nan or hingir u vihin ishima a Yehova yô, shi se tôv sha kwagh u ior mbagenev mba i er kwagh ve ken Bibilo, mba yange ve hingir ‘iyongo a Yehova’ la kpaa.—1 Kor. 10:11, 12.

⁷ Iliam i dang i mbagenev ia na se hingir iyongo a Yehova. (Ôr Duteronomi 1:26-28.) Yehova yange due a Mbaiserael ken kpan ken tar u Igipiti ica lu a gba ga. Yange va a atsan pue sha Mbaigipiti mba ve lu nan ve ican la, shi va tim Farao man ikyumutya na cii shin Zegemnger u Nyian. (Eks. 12:29-32, 51; 14:29-31; Ps. 136:15) Maa ior mba Aôndo ver ishigh u nyôron Tar u Ityendezwa la. Nahan kpa lu hen shighe ne je Mbaiserael hii u gban ahon a Yehova ye. Lu nyi i na ve ve ban a jighjigh nahana? Mciem yange gba ve iyol sha ci u ibaver i bo i mbagenev mba i tindi ve ér ve za gba tar la mker la hide a mi la. (Num. 14:1-4) Lu nyi i due ken kwagh nee? Kov la cii kera nyôr ken “tar u dedoo” la ga. (Dut. 1:34, 35) Se kpa ashighe agen iliam i dang i mbagenev ia fatyô u turen jighjigh wase u nan, nahan se hingir u gban ahon sha gbenda u Yehova a lu eren kwagh a vese la.

8. Lu nyi i na ve ior mba Aôndo mba sha ayange a Yesaia la hii u nan Yehova ibo sha zayol u ve nyôr ker laa?

⁸ Mbamtaver man mbamzeyol vea fatyô u nan se iyolkpen. (Ôr Yesaia 8:21, 22.) Sha ayange a Yesaia la, ikyurior i Yuda nyôr ken zayol u vesen ugen. Mbaihyomov kase ve ningir tser. Kwaghyan za iban. Ior kpishi lu ijen. Kpa u hemban cii je yô, ve lu ijen ken jijingi. (Amo. 8:11) U̱ yange ma ve suur sha Yehova ér a wase ve u nôngon a mbamtaver yô, ve gema ve hii u ‘tuhwan’ tor ve kua Aôndo ve. Yange ve na Yehova ibo sha mbamzeyol vev. Nahan se kpa aluer aahe er se shin se tagher a mbamzeyol yô, alaghga se hii u nan Yehova ibo shi henen ser kwagh tser se kpa a wase se ga.

9. Mbaiserael mba sha ayange a Esekiel la lu a mnenge u kpee sha ci u nyi?

⁹ Se fa yina se. Er Mbaiserael mba sha ayange a Esekiel la fa akaa a a lu za hemen la yina ve yô, ve hii u henen ér igbenda i Yehova “ngi vough ga.” (Esek. 18:29) Lu inja er mba a ian i ôron Aôndo ijir, pasen un gbenda u una er akaa ve a hemba doon la nahan, shin er ve fa atôakyaa a Aôndo lu a mi la yina ve nahan kpaa. Aluer ashighe agen se fa ma kwagh u Bibilo i er shin gbenda u akaa a lu eren ken uma wase la kuma se ga yô, alaghga se hii u henen ken ishima yase  ser gbenda u Yehova doo ga, shin “ngu vough ga.”—Yobu 35:2.

10. A er nan ve or a hingir u dondon ikyav i bo Adam la?

¹⁰ Ka se naan mbagenev ibo sha asorabo a ase kua akaa agen a se er sha lan. Adam, or u hiihii la yange na Aôndo ibo sha isholibo na la. (Gen. 3:12) Shin er yange fa wang ér una per tindi u Aôndo una ya mtsaha nahan kpa, a na Yehova ibo sha isholibo na la. Jighilii yô, lu kaan ér ka er Yehova a ne un ibumekwase ve un gbe ken isholibo ye. Hii shighe la je, mbagenev dondo ikyav i Adam la sha u nan Aôndo ibo sha asorabo a ve la. Nahan doo u se pine ser, ‘Ishima ka ia vihim ker kpishi sha asorabo a am, nahan m hii u henen mer atindi a Yehova taver yumuu?’

11. Ka nyi se hen sha kwagh u Yona?

¹¹ Ka se hingir u henen sha kwagh wase tseegh. Shighe u Yehova zungwe ior i Ninive mhôônom la, ishima vihi profeti Yona a na. (Yona 4:1-3) Sha ci u nyi? Lu cian ér ior vea gema henen ér un ngu profeti u aiegh sha ci u i kera tim gar la er yange kaa la ga yum. Ka inja er Yona yange hemba veren ishima sha kwagh u ior vea va hen sha a na la, lu mgemshima u Mbanineve la ga nahan. Aluer se kpa se ver ishima ga yô, alaghga se hemba veren ishima sha kwagh wase tseegh, je yô se ‘hingir iyongo a Yehova’ ser a timbir u van a mtim yum. Nahan aluer se ndera pasen kwagh hegen anyom ngee ser iyange i Yehova zurum yô, doo u se hii u yinan ishima a Yehova shighe u mbagenev ve lam sha a vese dang sha ci u se mba pasen kwagh u Bibilo i kaa yôô?—2 Pet. 3:3, 4, 9.

12, 13. Aluer se hii u hunan akaa agen a Yehova a er la ken ishima yase yô, ka nyi i gbe u se nenge beelee ga?

¹² Aluer ishima yase i i yen la hii u hunan akaa agen a Yehova a er yô, se er nena? Umbur wer doo u se huna ma kwagh u Yehova a er ga. Nahan yô, de se time nen hegen sha akaa ataan a aa wase se ve mayange se lumun ser mbamzeyol  asev ve na se hingir u nan Yehova ibo ga yô.

¹³ De nengen ikyar i u ye a Yehova la beelee ga. Aluer se za hemen u lun kôôsôô a Yehova yô, se fatyô u palegh ieren i vough ga i ia na se hingir iyongo a na la. (Ôr Anzaakaa 3:5, 6.) Gba u se na Yehova jighjigh. Shi gba u se palegh u nengen ayol ase ser se mba mbafankwagh shin hingir u veren ishima sha kwagh wase tseegh la. (Anz. 3:7; Orpa. 7:16) Se er nahan yô, a taver u se nan Yehova ibo shighe u akaabo a er se la.

14, 15. Ka nyi ia wase se ve iliam i dang i mbagenev ia bende a vese ga?

¹⁴ De lumun wer iliam i dang i mbagenev i bende a we ga. Mbaiserael mba sha ayange a Mose la yange ve lu a ityôkyaa i vesen i nan jighjigh ér Yehova una nyôr a ve ken Tar u Ityendezwa la. (Ps. 78:43-53) Kpa zum u mbamkerev mbapuev mba banen a jighjigh mbara va ôr ve ibaver i bo yô, ve kera “umbur agee Na ga.” (Ps. 78:42) Aluer se mba gbidyen kwar sha ityom i Yehova, umbur akaa a dedoo a a er sha ci wase la cii yô, ikyar i se ye vea na la ia taver. Nahan se kera de ser mbamhen mba kpeegh mba ior mbagenev ve na se pav a Yehova ga.—Ps. 77:11, 12.

¹⁵ Aluer se mba a mnenge u vough ga sha mba se civir Aôndo a ve imôngo la yô, ngun kpa una fatyô u vihin ikyar i se ye a Yehova la. (1 Yoh. 4:20) Shighe u Yehova tsegha Aron ér a lu pristi u tamen ve Mbaiserael gba ahon la, Yehova nenge ér ka Un iyol na je ve lu hunan ye. (Num. 17:10) Se kpa aluer se mba unun shi gban ahon sha kwagh u ior mba Yehova a ver ve ve lu hemen vegher u nongo na u̱ shin tar la yô, ka Yehova je se lu hunan ye.—Heb. 13:7, 17.

16, 17. Shighe u se lu tagher a mbamzeyol yô, ka nyi i gbe u se umburu?

¹⁶ Umbur wer ka Yehova a ve se a mbamzeyol ga. Shin er Mbaiserael mba sha ayange a Yesaia la gema ijime a Yehova nahan kpa, Yehova kegh iyol her u wasen ve. (Yes. 1:16-19) Nyityô zayol u se tagher a mi cii kpa aluer se fa ser Yehova we se ikyo shi a soo u wasen se yô, se fatyô u zuan a msurshima. (1 Pet. 5:7) Je yô, a tôndo zwa ér una na se agee a se wa ishima a imeen yô.—1 Kor. 10:13.

¹⁷ Aluer mbagenev er kwagh a vese sha mimi ga, er yange i er a orjighjigh Yobu nahan je kpa, gba u se umbur ser ka Yehova a ne kwagh a lu nahan ga. Yehova kôr iferkwagh ihyom, kpa perapera gema doo un ishima. (Ps. 33:5) Se kpa se lumun nen a kwagh u ikyar u Yobu, Elihu, yange ôr la. A kaa ér: “Aôndo Una er iferkwagh mayange ga, Uhembanagee kpaa Una er kpe ga.” (Yobu 34:10) Ka Yehova a ve se a ican ga, kpa ka un a ne se “hanma nagh ku dedoo man hanma iyua i vough kpaa” ye.—Yak. 1:13, 17.

18, 19. Doo u mayange se huna kwagh u Yehova a er ga sha ci u nyi? Tese ikyav.

¹⁸ De hon kwagh u Yehova a er ga. Aôndo ngu vough, mbamhen nav hemba mba asev ica je. (Yes. 55:8, 9) Nahan aluer se mba mbahiden a iyol ijime sha mimi shi kaven er se yen yô, se lumun ser mfe wase yina. (Rom. 9:20) Ashighe kpishi ka se fa er i hii ve ma kwagh a er la i kuma se ga. Alaghga tsô we kpa u nenge a mimi u i er ken injakwagh ne la: “Or u nan vande van a ityôkyaa i nan yô, ka i nenge nan a mimi, kpa or u wan ndor a nan a gema a va time kwagh u nan dedoo.”—Anz. 18:17.

¹⁹ Aluer ijende yase i se ne i jighjigh er kwagh taver se u kaven sha hiihii la, shin nan er kwagh u kpiligh se iyol yô, doo u se kure ikyaa fese ser a̱ shi nan kpa nan er ma kwaghboo? Aluer ka or u se fe nan anyom imôngo yô, doo u se na nan jighjigh gaa? Aluer azende a ase a a yen ne je kpa se er kwagh a ve sha dooshima  nahan yô, hire Ter wase u sha, u mbamhen nav man igbenda na i hembe i yase i yem ica la ve se kera er kwagh a na nahan ga yee?

20, 21. Gba kpee u se war a or u i lu ibo i nan la sha ci u nyi?

²⁰ War a or u i lu ibo i nan la. Doo u se er nahan sha ci u nyi? Sha ci u ashighe agen ka ieren yase ka i va se a mbamzeyol mbagenev ye. Zum u kwagh a er nahan yô, doo u se lumun ibo. (Gal. 6:7) De keren u nan Yehova ibo sha mbamzeyol mbara ga. U eren nahan la ka sha inja ga sha ci u nyi? Nenge ase ikyav ne: Alaghga deraba ngu nahan mato ugen u a lu a ayem kpishi yô. Nan za nyôr hen igyoom gbenda kpa nan er zooloo ga, nan ngu yemen her hang maa nan za er aikyôr. Nahan ka ibo i or u nan var mato laa? Ei, mayange ga! Se kpa Yehova yange gba se na se ian i tsuan kwagh u se soo u eren yô. Kpa shi a na se akaawan a se dondo ve se tsua akaa a se soo u eren la sha kwaghfan yô. Nahan doo u se na Orgban se ibo sha akaa a se er shami ga laa?

²¹ Sha kpôô yô, mbamzeyol mba se tagher a mi mbara cii ka sha ci u lanegh asegh shin akaa a se tsough u eren sha lan la ga. Akaa agen nga a er se sha ci u “shighe man aikyôr.” (Orpa. 9:11) Nahan kpa, mayange i de hungur se er i lu Satan Diabolo jighilii a ve a iferkwagh ga. (1 Yoh. 5:19; Mpa. 12:9) Ka un a lu orihyom wase ye, ka Yehova ga.—1 Pet. 5:8.

22, 23. Aluer mbamzeyol asev na se iyolkpen yô, ka nyi i doo u se umburu?

²² Shighe u ú lu tagher a ican man mbamtaver yô, umbur ikyav i Yosua man Kalebu la. Mbajighjigh mbauhar mban yange ve va a ibaver i dedoo, ve lu er mbamkerev mbapuev mbara nahan ga. (Num. 14:6-9) Yange ve tese ér ve na Yehova jighjigh. Nahan cii kpa, lu u vea zende hurugh hurugh ken taaikyôngo anyom 40 vea Mbaiserael mbagenev. Yosua man Kalebu gba ahon shin ishima vihi ve ker, ve hen ér i er a ve doo ga shinii? Ei. Ve suur sha Yehova. Nahan ve zua a iveren kpa? Keng je! Shin er kov la jimin cii kpe ken taaikyôngo nahan kpa, ve yô ve va nyôr ken Tar u Ityendezwa la. (Num. 14:30) Se kpa aluer se “yina ishima” u eren akaa a dedoo ga yô, se va zua a iveren i Yehova.—Gal. 6:9; Heb. 6:10.

²³ Aluer mbamzeyol ou shin mbamyen mba mbagenev, shin mbamyen ou iyol you na u iyolkpen yô, doo u ú er nyi? Hemba henen sha aeren a Yehova a doon tsung la. Nenge a akaa a dedoo a Yehova a tende zwa u nan we la ken ishima you. Pine iyol you wer, ‘A Yehova shio nahan, uma wam ma a lu nan sha wono?’ Yô, lu a na kôôsôô hanma shighe, shi mayange de lumun wer ishima you i hingir iyôngo a na ga!