Yange i marem ken inyom i 1956, m lu a angev mbu sha gwangerjime. Kwagh ne na yô, igbila yam kpe, nahan lum ican kpishi u zenden, shi kwagh ne vam a iangev mbi bov mbigenev kpaa.

Er i lu a marem ga la, ormishen ugen vea kwase na, mba ve lu Mbashiada mba Yehova yô, hii u henen Bibilo vea mbamaren av. Shighe u m lu anye la, lu mbapasenkwagh kpuaa tseegh lu hen angar u Usakos, ken tar u Namibia, ape i marem la ye. Nahan se timen sha ngeren u i henen ken mbamkombo la hen tsombor wase. Shighe u m va lu anyom ataankarahar la, i pavem, i wam roba u wasen mo u nyanden. Shighe u m lu anyom 14 la, m hii u gban ikyungugh. Er makeranta u vesen ú u lu hen vegher wase la gba ica, shi lu u mbamaren av vea nengen sha a mo hanma shighe yô, m fatyô u been u ga.

Nahan cii kpa, m tsua u taver ikyaryan yam vea Yehova. Ityakerada yase kpishi lu a lu ken zwa u Afrikaans, u u lu zwa wam la ga. Nahan m hen u ôron zwa Buter sha er me ôr ityakerada yase kpishi yô. M hingir orpasenkwagh u Tartor shi i erem batisema shighe u m lu anyom 19 la. Ken anyom anyiin a a dondo la cii, m nyôr ken mbamnyoon atô kposo kposo kua ishimavihin kpaa. Heela tseegh ga, er se wa kôôsôô a mba hen angar wase la yô, mcie u cian or la yangem u eren tom u pasen kwagh kpoghuloo.

Shighe u m poso anyom ikyundu la, m mough ken Namibia m yem ken tar u South Africa, m za hii u zan mbamkombo vea tiônnongo ugen sha kwa u hiihii. Kwagh ne doom je zua ga! Nahan kpa, gba u shi a hide a pavem, kwa ne di lu u a wam roba u wasen mo u zan akôngo.

Shighe kar yô, m ungwa ortamen u sôron atôônanongo na kwaghôron sha kwagh u tom u pania. Kwaghôron na la kôrom ken ishima. Yange i fa er m lu gbong gbong kuma u eren tom ne ga yô, nahan kpa shi m nenge er Yehova lu wasen mo ken mbamtaver kpishi mba m lu tagher a mi la yô. Nahan m fiir foom u pania u keke la. Kpa er mbatamen nenge ér mo m ngu gbang gbang ga yô, taver ve u wan uwegh shin foom ne, lumun ér m er pania.

Kpa m za hemen u eren tom u pasen kwagh la sha afatyô wam cii. Er ngôm kua mbagenev wasem yô, m kôrcio u nan ahwa a upania naan la je kuma iwer ataratar. Kwagh la tese ér m kange ishima u eren tom ne, shi tese ér m pande m zua a guda. Tsô shi m hide m fiir foom ne, kpa kwa ne yô, i nam ian i eren pania ne. Nahan ken uwer u Setemba 1, 1988 la, m hingir pania u keke.

Er m lu pania yô, m nenge er Yehova lu wasen mo hanma shighe yô. Er m lu tesen ior mba hev mimi, m kera ver ishima sha mlu wam la ga yô, kwagh ne wasem kpishi, m zua a msurshima shi ikyar i m ye vea Yehova la seer taver. M wase ior kpishi u tseghan ayol a ve shi eren batisema, nahan kwagh ne vam a iember kpishi.

Zan zan hegen kpa ikyav ngi a tese ér mnyoon una memem ga. Kpa Yehova ‘tee ikyav yav ayange ayange.’ (Ps. 68:19) A er kwagh hemba u nan mo ishimawan tseegh la; a na m zua a msaanyol ken uma!