1, 2. (a) Ka ivese i ana ia lu kwagh u van a iember sha? (b) Ka mbampin mba nyi ve dugh sha kwagh nee?

KA I tôô shighe gôgônan u wan agoyol sha ivese. Kpa se lu ôron kwagh u zege ivese ugen. Ivese ne ka i wan u Tor ugen. Nenge ase yô, i wa agoyol sha ivese ne nôngo u kuman anyom 2,000 hegen. Shighe ngu zurum u orkwasehe man kwasehe vea zua ivaa. Ica a gba ga tsô ityogholough mbi saan iyol mbia iv ken dwer u Tor, shi zegeikpelaior i sha ia zua akenge a wa icam a kaa ér: “Haleluya! Ter wase Aôndo, Uhembanagee, tema tor ve. Se lu nen saan saan, se ember nen, se civir nen Un, gadia ivaa i zuan i Waniyôngo kuma ve, kwase Na kpaa kohol iyol ve.”—Mpa. 19:6, 7.

² “Waniyôngo” u ivaa na ia lu kwagh u van a msaanyol sha la ka orgen ga, kpa ka Yesu Kristu. (Yoh. 1:29) A wuha iyol i ivesegh nena? Ka an nan lu kwasehe na la? Kwasehe la kohol iyol sha ivaa ne nena? Ka hanma shighe a lu eren ivese shono? Ivese ne ia va a msaanyol sha, kpa mba ve lu a ishimaverenkeghen i va lun uma shin tar gbem sha won la kpa vea ember a mba ve lu sha la imôngoo? Sase se iyol u zuan a mbamlumun sha mbampin mban. Nahan yô, se za nen hemen u timen sha Pasalmi 45 la.

3, 4. (a) I ôr kwagh u akondo a ivesegh a Orkwasehe la nena, man ka nyi i seer nan un iembere? (b) “Torkwase” man “ônkasev mba torov” mba ve kpa ve lu ember a Orkwasehe imôngo la tile sha ityough ki nyi?

³ Ôr Pasalmi 45:8, 9. Yesu Kristu, u a lu Orkwasehe la wuha iyol sha akondo a ivesegh a engem, a Tor. A kpur senti sha akondo na, huma er “ilyôghonov mbi hemban doon,” amba er mire man kashia, mba yange i eren icighanmkure u i tseghan or a mi ken Iserael la nahan.—Eks. 30:23-25.

⁴ Ityogholough mbi sha, mbi mbi iv ken dwer u Tor la seer nan Orkwasehe la iember, er ivaa na i zurum la. “Torkwase” la kpa saan un iyol. Torkwase la tile sha ityough ki vegher u nongo u Yehova u sha, u a kou “ônkasev mba torov” ker la. Ônkasev mba torov mbara tile sha ityough ki uicighanmbatyomov. Zegeikpelaior ger amo doo ungwan kpishi, ve kaa ér: “Se lu nen saan saan, se ember nen, . . . gadia ivaa i zuan i Waniyôngo kuma ve”!

5. Ka unô ve lu “kwase u Waniyôngo” la?

⁵ Ôr Pasalmi 45:10, 11. Se fa or u nan lu Orkwasehe la, kpa kwasehe la di gema ka ana? Kwasehe la tile sha ityough ki nongo u Mbakristu mba i shigh ve mkurem, ve lu iorov 144,000, mba Yesu Kristu a lu ityough sha a ve la. (Ôr Mbaefese 5:23, 24.) Ve mba i shigh ve mkurem mban vea hemen vea Kristu sha Tartor na u Mesiya la. (Luka 12:32) Shi “ka ve ve lu dondon Waniyôngo hen ape A ze cii ye.” (Mpa. 14:1-4) Vea hingir “kwase u Waniyôngo” la, nahan vea yem vea na sha Tartor na u sha la.—Mpa. 21:9; Yoh. 14:2, 3.

6. Er nan ve i yer mba i shigh ve mkurem mbara ér “wan u tor u kwase,” man i kaa a ve ér ve ‘hungur a ior vev’ sha ci u nyi?

⁶ I yila kwasehe ne ér “wankwase” tseegh tsô ga, i yila un ér “wan u tor u kwase” kpaa. (Ps. 45:13) Ka an nan lu “tor” ne? Ka Yehova. A ngohol Mbakristu mba i shigh ve mkurem la ve hingir “ônov” nav. (Rom. 8:15-17) Er i lu u vea za zua ivaa sha tartor u sha yô, i wa ve kwagh ér: “Ior ou ve̱ hungur we, kua ya u teru kpaa.” Gba u vea ver ishima ‘sha akaa a Sha, a lu akaa a shin tar ga.’—Kol. 3:1-4.

7. (a) Kristu ndera wan kwasehe na u a soo u vôson la agoyol nena? (b) Kwasehe la nenge Orkwasehe la nena?

⁷ Ken anyom uderi imôngo a a kar ne, Kristu za hemen u wan kwasehe na la agoyol sha u va zuan ivaa sha tartor. Apostoli Paulu pase ér: “Kristu kpaa, nongo Na u doo Un ishima man A [na] iyol Na sha ci u u . . . sha u Una tsegha u er A wanger u sha m-ee u A ôô u sha mnger sha kwaghôron Na, sha u Una ver nongo Na sha ishigh Nagh, u̱ engem u̱ de kera lu a ahuar shin adivir shin mô u ken ambaakaa la kpaa ga, kpa u̱ lu ken mtsegh, u̱ de lu a acôghor iyol ga.” (Ef. 5:25-27) Paulu yange kaa a Mbakristu mba i shigh ve mkurem mba ken Korinte mbara ér: “M ngu a ishima i tseen sha kwagh wen je, ka imbashima i tseen i Aôndo la, m ver ne sha ci u nom môm sha u me na ne hen Kristu er ka iniunkwase i lun wang nahan.” (2 Kor. 11:2) Tor Yesu Kristu u a lu Orkwasehe la wuese ‘mdooashe’ u ken jijingi u kwasehe na u a soo u vôson la. Shi kwasehe la kpa lumun nom na u a soo u vôson ne ér ngu ‘ter’ na, shi a ‘gure a civir un kpaa.’

8. Er nan ve i pase kwagh u kwasehe la ér a “doo kpekpe”?

⁸ Ôr Pasalmi 45:13, 14a. I er kwasehe la hwe “doo kpekpe,” sha ci u ivaazuan i wan u tor la. Ken Mpase 21:2 la, i tôô kwasehe la i kar sha gar ugen, Yerusalem u He, u “i er un hwe iyol sha ci u nom na yô.”  Gar u sha ne ngu a “iengem i Aôndo,” shi a mondo “er ka iwen i injaa kpishi nahan, lu er iwen i yasepi i wanger er krusetalu nahan.” (Mpa. 21:10, 11) I pase m-engem u gar u Yerusalem u He ne ken takerada u Mpase sha gbenda u doon tsung. (Mpa. 21:18-21) Ka nahan ve orpasalmi ne kpa a pase kwagh u kwasehe la ér a “doo kpekpe” ye! Kera kpa ka sha, i lu zuan ivaa i wan u tor ne ye.

9. Ka an nan lu “tor” u i ze a kwasehe hen a na laa, man i wuha kwasehe shon iyol nena?

⁹ Un u i ze a kwasehe la hen a na la ka Orkwasehe, Tor Mesiya. A ndera wan kwasehe na ne agoyol, ‘a wanger un sha m-ee u A ôô un sha mnger sha kwaghôron Na la.’ Kwasehe ne ngu ‘ken mtsegh, ngu a acôghor iyol ga.’ (Ef. 5:26, 27) Gba u kwasehe na la kpa una wuha iyol i i kom sha iniongo ne yô. Man kape a er kpaa je la! Sha kpôô yô, “akondo na, i tume a, i wa zenaria sha mi je,” shi “á za a na hen tor a ikyondo i i tum i sha hwe” yô. Sha ci u ivaazuan i Waniyôngo la yô, “i lumun un er a̱ wuha iyol sha akondo a pupuu a dedoo a engem ashe man a wang kpaa—gadia akondo a pupuu a dedoo la yô, ka aeren a perapera a uicighanmbaiorov.”—Mpa. 19:8.

10. Ka hanma shighe nahan a kuma u Waniyôngo una zua ivese?

¹⁰ Ôr Mpase 19:7. Ka hanma shighe Waniyôngo una zua ivese? Shin er Mpase 19:7 a kaa ér “kwase Na kpaa kohol iyol” sha ci u ivese la nahan kpa, avur a a dondo la kera pase kwagh u ivese la ga. Kpa a gema a pase kwagh u vegher u masetyô u zegecan la vighe vighe. (Mpa. 19:11-21) Kwagh ne tese ér a er ivese la cii ve Orkwasehe u a lu Tor la una mase hemban mbaihyomov nav ityav gburu gburu ye shinii? Ei. I nger mbampase mba sha mnenge mba ken takerada u Mpase la sha adondo adondo ga. Ken Pasalmi 45 la, i pase ér Tor Yesu Kristu har sanker za hemba mbaihyomov nav ityav cii ve, i mase ôron kwagh u ivaazuan i wan u tor la ye.—Ps. 45:3, 4.

11. Kristu una hembe gburu gburu sha adondo adondo nena?

¹¹ Sha nahan yô, se fatyô u kuren ikyaa ser, kape akaa ne aa er sha adondo adondo je ne: Hiihii yô, a tim “zegeidyakwase” la, ka Zegebabilon, u a lu tartor u kwaghaôndo u aiegh u sha tar cii la je la. (Mpa. 17:1, 5, 16, 17; 19:1, 2) A been yô, Kristu una tim botar u Satan ne cii sha Armagedon, u a lu “ityav mbi iyange i vesen i Aôndo, Uhembanagee la.” (Mpa. 16:14-16; 19:19-21) U masen yô, Torutya ne una hemba gburu gburu sha u daan Satan man azôv a na, haan ve shin ihyungwa i i ze kweng la, sha er ve de kera lu a kwagh môm u eren ga, er mbakpenev nahan yô.—Mpa. 20:1-3.

12, 13. (a) Waniyôngo una zua ivaa hanma shighe? (b) Ka unô vea ember ivese i Waniyôngo sha tartor u sha?

¹² Mbakristu mba i shigh ve mkurem la vea kuren tom ve shin tar ne, sha shighe u m-ande u Kristu la yô, a nder ve vea yem sha tartor u sha. A timin Zegebabilon shighe a karen kpuaa yô, Yesu una mase kohol asande a nongo u kwasehe, a a shi her la. (1 Tes. 4:16, 17) Sha nahan yô, cii man ityav mbi Armagedon mbi pev yô, a vande kohol nongo u “kwasehe” la cii a yem a mi sha. Ityav mbira mbia been yô, Waniyôngo la una mase zuan ivaa. Nenge imba er shighe u ivaazuan ne la a lu shighe u saanyol sha won yô! Mpase 19:9 kaa ér: “Mba i lehe ve iniongo i kwasehe i Waniyôngo yô, saan ve iyol.” Sha kpôô yô, a saan mba 144,000 mba ve lu nongo u kwasehe ne la iyol kpen kpen. Shi Orkwasehe u a lu Tor la kpa a saan un iyol tsung u nengen er akar a na a mimi ne cica cii a lu a na imôngo sha Tartor na yô. (Luka 22: 18, 28-30) Nahan kpa, ka Orkwasehe man kwasehe na la tseegh vea zua a msaanyol sha ivese i Waniyôngo la ga.

¹³ Er se vande ôron sha ijime nahan, zegeikpelaior ia zua akende sha, ia wa icam a kaa ér: “Se lu nen saan saan, se ember nen, se civir nen Un, gadia ivaa i zuan i Waniyôngo kuma ve, kwase Na kpaa kohol iyol ve.” (Mpa. 19:6, 7) Hide mbacivir Yehova mba ve lu shin tar la di ye? Vea fatyô u ember a ve imôngo kpa?

14. Er i pase ken Pasalmi 45 nahan, ka unô ve lu ‘anuunaukase a a lu akar’ a kwasehe laa?

¹⁴ Ôr Pasalmi 45:12, 14b, 15. Profeti Sekaria yange tsengaôron ér sha shighe u mkur ne, a doo ior mba ken ityar wuee u za civir Yehova vea mba i shigh ve mkurem, mba ve shi her la imôngo. A nger ér: “Sha ayange la, iorov pue ken akuraior a hanma zwa cii vea kôr mkaikondo u Oryuda, vea kaa er: Sé za a ven imôngo, gadia se ungwa ser, Aôndo ngu a ven.” (Sek. 8:23) Ken Pasalmi 45:12 la, i ôr kwagh u “iorov pue” mban ér ka “wankwase u Tiru” kua “ashagbaior.” Ve va a uiyua mba va nan asande a mba i shigh ve mkurem la; mba ‘keren sha u i doo ve a ve’ shi ve̱ wase ve ken jijingi kpaa. Hii ken inyom i 1935 la je, ior umiliôn imôngo lumun asande a mba i shigh ve mkurem la “gema” ve, ve “hingir mbaperapera.” (Dan. 12:3) “Iorov pue” mban ka akar a mimi a Mbakristu mba i shigh ve mkurem la. A wanger ayol a ve sha atesen a kwaghaôndo u aiegh. Ka nahan ve i yer ve ér ‘anuunaukase a a lu akar a kwasehe la’ ye. Ve tsegha ayol a ve hen Yehova shi ve tese ér ve mba mbatomov mba Tor Yesu Kristu mba mimi.

15. ‘Anuunaukase a a lu akar a kwasehe’ la er tom imôngo vea nongo u u lu kwasehe la shin tar nena?

 ¹⁵ Asande a nongo u kwasehe a a shi shin tar la nga a iwuese kpishi er ‘anuunaukase a a lu akar a ve’ la a lu wasen ve u pasen “Loho u Dedoo u tartor” sha tar cii sha gbashima yô. (Mat. 24:14) Ka ‘jijingi man kwasehe tseegh ve lu kaan er, Va!’ ga, mba ve lu ungwan la kpa mba kaan ér, “Va!” (Mpa. 22:17) Sha kpôô yô, “iyôngo igen” la ungwa nongo u mba i shigh ve mkurem, mba ve lu kwasehe la ve kaa ér “Va!” nahan ve kpa ve dondo ve u kaan a mba ve tem sha tar la ér “Va!” (Yoh. 10:16)

16. Yehova na iyôngo igen la ian i civirigh i nyi?

¹⁶ Asande a mba i shigh ve mkurem la soo kwagh u akar a ve ne, shi saan ve iyol u fan ér Yehova, u a lu Ter u Orkwasehe la na mba ve lu iyôngo igen la ian i ve kpa ember sha ivaazuan i Waniyôngo i sha tartor u sha la. Yange i tsengapasen ér ‘anuunaukase a a lu akar a kwasehe’ ne aa za nyôr “a msaanyol man iember i tsung.” Sha kpôô yô, iyôngo igen i i lu a ishimaverenkeghen u va lun uma shin tar gbem sha won la kpa ia nyôr ken iember i zegetsombor u Yehova u sha won cii la, ia ember shighe u Waniyôngo una zua ivaa sha la. Takerada u Mpase kpa tese je ér mba ve lu ken “zegeikpelaior” la “tile sha ishigh ki ikyônough ki torough kira man sha ishigh ki Waniyôngo,” mba eren Yehova tom ken tembe u tempel u ken jijingi u shin tar la.—Mpa. 7:9, 15.

17, 18. Ivese i Waniyôngo la ia va a averen a nyi, man ka unô Kristu una hingir ter ve sha shighe u Hemen na u Anyom laa?

¹⁷ Ôr Pasalmi 45:16. ‘Anuunaukase a a lu akar’ a kwasehe u Kristu, u sha tartor u sha la, aa seer zuan a ityôkyaa i ember igen shighe u vea nenge er ivaazuan i Waniyôngo ne ia va a averen ken tar u he la. Orkwasehe u a lu Tor la una na ishima na sha akaa a shin tar, una nder “uter” nav mba shin tar. Er Kristu una nder “uter” mban yô, vea gema a hingir “ônov” nav. (Yoh. 5:25-29; Heb. 11:35) Una ver mbagenev ken a ve vea lu “mbatarev sha won cii.” Shi se ver ishima ser una tsua mbatamen mbagenev mba ve til sha mimi nyian la vea hingir “mbatarev” shin “atiator” ken tar u he la.—Yes. 32:1.

¹⁸ Sha shighe u Hemen u Anyom Dubu la, Kristu una hingir ter u mbagenev kpaa. Jighilii yô, mba a na ve uma u tsôron shin tar la cii a lu mba ve ne nagh ku ipaan ku Yesu kura jighjigh yô. (Yoh. 3:16) Sha nahan yô, Kristu una hingir ‘Ter ve u tsôron.’—Yes. 9:6, 7.

19, 20. Akaa a doon tsung a i er ken Pasalmi 45 la bende a Mbakristu mba mimi cii nyian nena?

¹⁹ Ôr Pasalmi 45:1, 17. Sha kpôô yô, kwagh u i nger ken Pasalmi 45 la ngu Mbakristu cii a inja. Doo asande a mba i shigh ve mkurem, a a shi shin tar la kpishi u fan ér ica a gba ga tsô vea za kohol anmgbianev vev mbagenev mbara sha, kua Yesu Kristu u a vese ve la kpaa. Ishima mgbegha iyôngo igen la ker u seer ungwan imo i Tor ve u iengem la, shi ve wuese ian i civirigh i ve lu a mi i lun imôngo vea asande a nongo u kwasehe, a a shi shin tar la kpaa. Ivaazuan la ia karen kera yô, Kristu man mba vea hemen a na imôngo ken Tartor na la, vea haa uumace mba ve lu shin tar la averen kpishi.—Mpa. 7:17; 21:1-4.

²⁰ Er se lu veren ashe u va nengen er “kwaghôron u dedoo,” u sha kwagh u Tor Mesiya la una kure ne, ishima mgbegha se u wasen mbagenev u ‘umbur iti na’ ga he? Yô, se nôngo nen tsung sha er se va lu môm ken ior mba vea ‘wuese Tor gbem sha won’ la yô.