Mpin ne ka mpin u hange hange, hemban je yô, ior mba kwase ve shin nom ve a kpe yô. Alaghga a sar amba a ior la tsung u va hiden lun imôngo vea kwase shin nom ve u a va nder nan shin ku la ken tar u he. Anmgbian ugen u kwase na a kpe yô, kaa ér : “Ka mo vea kwase wam se tsough u kuren ivaa yase ga. Awashima wase yange lu u mo vea kwase wam se civir Yehova gbem sha won. Zan zan hegen kpa m ngu a awashima ne her.” Ityôkyaa ngi i nan jighjigh ér mba a va nder ve shin ku mbara vea er ivaa? De se gba kaan tsô ser, se fa mlumun sha mpin ne jighilii ga.

Ken anyom a karen la, i pase ken ityakerada yase ér mkaanem ma Yesu ôr sha kwagh u mnder u shin ku man ivaa i eren la, lu ôron kwagh u mnder u shin ku u shin tar. Shi mkaanem mara tese ér Yesu lu kaan ér ikyav tese ér mba a va nder ve shin ku vea lu uma shin tar la vea kera er ivaa ga. * (Mat. 22:29, 30; Mar. 12:24, 25; Luka 20:34-36) Se gba nan jighjigh ashe ikyusu tsô ser ka kwagh u Yesu lu ôron ne ga. Kpa doo u se pine ser, ka kwagh u mnder u shin ku u mba vea yem sha la Yesu lu ôron ga zee? De se time sha mkaanem ma Yesu mara tsô se fa.

Ka unô Yesu lu lamen a ve ve ôr kwagh u mnder u shin mbakpeneve? (Ôr Luka 20:27-33.) Ka Mbasadushi mba ve na jighjigh a mnder u shin ku ga, shi ve lu meen un ve, ve pine un mpin sha kwagh u ivese i veren anmgbian tse la, Yesu lu lamen a ve ye. * Yesu kaa a ve ér: “Ônov mba ken tar ne mba eren kasev, shi mba ne kwase ken nom kpaa; kpa mbara mba i nenge ve kom er vea ar sha tar ugen la, man sha mnder u shin mbakpenev kpaa yô, mba eren kasev ga, man shi mba ne kwase hen nom kpaa ga. Gadia vea kera fatyô u shi kpen mayange ga, gadia ka ve lu er mbatyomov mba Shaav nahan, er ônov mba Aôndo je nahan sha ci u ve lu ônov mba mnder u shin ku yô.”—Luka 20:34-36.

Hii nan ve i kaa ken ityakerada yase ér a̱ shi nan kpa Yesu lu ôron kwagh u mnder u shin ku u shin tara? Atôakyaa nga ahar. Hiihii yô, adooga lu kwagh u mnder u shin ku u shin tar la Mbasadushi mbara lu pinen Yesu mpin sha mi ye. Kwagh u sha uhar yô, Shighe u Yesu lu kuusu kwaghôron na a Mbasadushi mbara yô, a ter Aberaham man Isaka kua Yakob, uter mbatsev mba jighjigh, mba ve lu keghen mnder u shin ku shin tar la.—Luka 20:37, 38.

Nahan cii kpa, shi se fatyô u kaan ser Yesu yange lu ôron kwagh u mba a va nder ve vea yem sha la. Hii nan ve se kur ikyaa nahana? De se tôv sha akaa ahar a Yesu ôr a Mbasadushi shighe u lu nan ve mlumun la.

“Mbara mba i nenge ve kom . . . mnder u shin mbakpenev” la. I nenge mbajighjigh mba i shigh ve mkurem la ér ve “kuma tartor u Aôndo” (2 Tes. 1:5, 11) I na ve ishô gbem sha won sha ci u nagh ku ipaan kula; nahan vea kera kpe er mbaasorabo nahan ga. (Rom. 5:1, 18; 8:1) I ôr kwagh u mba i shigh ve mkurem mbara ér ‘saan ve iyol’ shi mba ‘uicighanmbaiorov kpaa.’ (Mpa. 20:5, 6) Se fatyô u ôron kwagh u mba a va nder ve shin tar la sha imba gbenda ne ga, sha ci u “mba ve lu perapera ga” kpa a va nder ve shin tar. (Aer. 24:15) Nahan a fatyô u kaan ér “i  nenge” ér “mba ve lu perapera ga” mbara kpa “kuma” mnder u shin mbakpenevee?.

“Vea kera fatyô u shi kpen mayange ga.” I gema ishemberkwaghôron ne ken mbamgem mba Bibilo mbagenev ér, “vea kera kpe mayange ga” man “ku kera ngu a tahav sha ve mayange ga.” Mba i shigh ve mkurem shi ve civir Aôndo sha mimi zan zan ve kar kpen yô, a nder ve vea yem sha, a za na ve uma u kpen mayange ga la. Inja na yô, vea kera kpe mayange ga shi a fatyô u timin ve kpaa ga. (1 Kor. 15:53, 54) Ku ua kera fatyô u wuan mba a nder ve vea yem sha la mayange ga. *

Kwagh u se tim sha mi ne na yô, se kure ikyaa hegen ser nyi? Se kav ser, adooga Yesu lu ôron kwagh u mnder u shin ku u a lu sha ci u mba vea yem sha la. Aluer ka nahan yô, mkaanem ma Yesu mara ôr se akaa kpishi sha kwagh u mba a za na ve uma sha la: Mba eren kasev ga, vea kera fatyô u shi kpen mayange ga, shi sha igbenda igen yô, mba er mbatyomov mba Shaav nahan. Kpa aluer Yesu yange lu ôron kwagh u mnder u shin ku u a lu sha ci u mba vea yem sha la yô, a gba u a na mbamlumun sha mbampin mba ve dondo ne.

Mpin u hiihii yô, aluer Mbasadushi mbara yange ve lu ôron kwagh u mnder u shin ku u shin tar yô, er nan ve Yesu gema lu ôron ve kwagh u mnder u shin ku u a lu sha ci u mba vea yem sha laa? Lu hanma shighe cii Yesu naan mbaahendanev mlumun zuan sha mhen ve ga. U tesen ikyav yô, Mbayuda mbagenev yange ve kaa ér Yesu a er ivanda i tesen ér un ngu Mesiya, kpa Yesu kaa a ve ér: “Yôhôr nen tempel ne kera, Mo Me maa un sha ayange atar.” A̱ shi nan kpa, Yesu yange una fa er ve lu henen kwagh u tempel kpôô kpôô yô, “kpa Un yô, lu ôron kwagh u tempel u iyol Na la.” (Yoh. 2:18-21) Adooga Yesu nenge a ityôkyaa i nan Mbasadushi mba ve na jighjigh a mnder u shin ku man mbatyomov ga la mlumun sha mpin ve la ga. (Anz. 23:9; Mat. 7:6; Aer. 23:8) Nahan kpa, alaghga Yesu soo u seer pasen mbahenen nav mbaasemaamimi, mba iyange igen ve kpa a nder ve shin ku vea yem sha la, akaa agen a sha kwagh u mnder u shin ku u a lu sha ci u mba vea yem sha la.

Mpin u sha uhar yô, er nan ve Yesu kure kwaghôron na la sha u ôron ve kwagh u Aberaham man Isaka kua Yakob, ior mba a va nder ve shin ku, vea lu uma shin tar laa? (Ôr Mateu 22:31, 32.) Umbur wer, Yesu yange hii kwaghôron na sha mkaanem man, ér “sha kwagh u mnder u mbakpenev yô.” Ishemberkwaghôron ne tese ér, shi a fatyô u kaven mkaanem ma Yesu mara ér, yange lu ôron kwagh u mnder u shin ku u shin tar la. Yesu yange fa er Mbasadushi lumun a ngeren mba Mose, nahan ôr ve kwagh u Yehova ôr a Mose ken ageva u lu yeghen kpa hian ga la. Yesu soo u tesen Mbasadushi ér, Aôndo washima u va nderen ior shin ku shin tar.—Eks. 3:1-6.

Mpin u sha utar yô, aluer kwagh u Yesu ôr sha kwagh u mnder u shin ku, man sha kwagh u ivaa i eren la ngu sha ci u mba vea yem sha la tseegh yô, tese ér mba a va nder ve shin tar la yô, vea fatyô u vôson kwase shin nom zee? Mkaanem ma Aôndo na mlumun sha mpin la jighilii ga. Aluer Yesu yange una lu ôron kwagh u mnder u shin ku u a lu sha ci u mba vea yem sha la yô, tese ér mkaanem nam mara kera ta iwanger sha kwagh u mba a va nder ve shin tar mbara vea fatyô u vôson kwase shin nom ken tar u he la ga.

Kpa hegen yô, se fa er Mkaanem ma Aôndo ma kaa jighilii ér ku ka mkur u ivesegh yô. Sha nahan yô, aluer nomou shin kwase wou kpe, maa u soo u hiden vôson nom shin kwase ugen kpa, ishima i de ne u ibo ga. Ka we iyol you u tsua u vôson nom shin kwase ugen ye. Shi or môm nana de puun kwase shin or u nan tsough u hiden eren ivaa la ga.—Rom. 7:2, 3; 1 Kor. 7:39.

Alaghga se lu a mbampin kpishi sha gbenda u uma una va lu ken tar u he yô. A u keren a ker mbaahaba yô, hemba doon u se kegh shighe la, tsô se nenge. Kpa kwagh u se fe yô, ka un ne: A va saan uumace mbaungwan Aôndo cii iyol, sha ci u Yehova una kure mbamgbe man asaren a ve cii sha gbenda u hemban doon cii.—Ps. 145:16.