SHA iyange i Setemba 6, 1926 la, i hide i tindi ortamen ugen u lu marnya u tar u Japan, kpa lu eren tom u sôron atôônanongo ken tar u Amerika la ér, a za er tom mishen ker. Orgen u lu un tseegh pinen magazin u Iyoukura, u yange hii annongo u henen Bibilo hen gar u Kobe yô, lu keghen u ngohol un. Mbahenen Bibilo mban yange ve za mkohol ve u hiihii sha iyange i Janawari 2, 1927, hen gar ne. Iorov 36 za mkohol ne, i gema i er iorov 8 batisema. Kwagh ne hii doo kpen kpen, kpa annongo u cuku ne una er nan ve una ar a iorov miliôn 60 mba ken tar u Japan, mba gba u vea nenge a iwanger i mimi u ken Bibilo laa?

Ken uwer u Mei 1927 la, Mbahenen Bibilo mba tseen asema mban hii u lôhôn ior ér ve za ungwa akaaôron a ken Bibilo kposo kposo. Anmgbianev mban za nger akaa a yôôn kwaghôron u a hii nan ken gar u Osaka la, za ver sha akômagbinda shi ve var sha ikpande i vesen ken gar la cii, shi ve tindi uityaghermbaiorov a ikyatakerada 3,000 i lôhôn ve kwaghôron ne. Ve kar ior ityatakerada i lôhôn ve kwaghôron ne kuma 150,000, shi ve yôô un ken upipambaabaver mba vesen mba ken gar u Osaka kua sha utikeeti mba girgidogo kuma 400,000. Sha iyange i i lu nan kwaghôron shon la, agirgi ahar purugh sha kwavaôndo, tsenda ityatakerada 100,000 sha gar la. Iorov mba kuman er 2,300 nahan za iv ken Iyou i Mkohol i Asahi ken gar u Osaka la poo, sha u ungwan kwaghôron, u lu a itinekwagh ér, “Tartor u Aôndo Mgbôghom Ve” la. Er ior ngee yum yô, i kaa a mbagenev mba kuman er dubu môm nahan ér ve hide ve yem. Kwaghôron ne been yô, iorov mba hemban er 600 nahan hide lu her, ve lu pinen mbampin, i lu nan ve mbamlumun. Ken iwer i dondon la, i na akaaôron a ken Bibilo ken igbar hen gar u Kyoto man hen ugar mbagenev mba ve lu vegher u shin ityôtar i tar u Japan la.

Ken uwer u Oktoba 1927 la, Mbahenen Bibilo sôr ian ver sha er vea za na akaaôron hen gar u Tokyo yô. Kwa ne kpa i na uityaghermbaiorov ikyatakerada i lôhôn ve kwaghôron u ken igbar la. Ve lôhô muetor man mba shin iyouidyu man mbahemenev mba kwaghaôndo kua mbahemen ushoja. Yange ve var uposta, shi ve yôô ken upipambaabaver, shi ve na ior ikyatakerada 710,000, nahan iorov 4,800 va ungwa akaaôron kposo kposo atar a i na hen gartamen u Japan la.

Upania yange ve er tom u injaa sha u zan a loho u Tartor hen ior sha uya vev. Anmgbian u kwase Matsue Ishii, vea nom na, Jizo, ve lu upania mba hiihii ken tar u Japan. Ken atô u ugar unyiin mba ken tar u Japan cii yô, ve pase kwagh hen ugar utar, ve hii kwaghpasen ica ken imbusutarimese hen gar u Sapporo, ve yem hen gar u Sendai man Tokyo man Yokohama man Nagoya man Osaka man Kyoto man Okayama kua Tokushima. Anmgbian u kwase Ishii vea anmgbian u kwase u been iyol, u i yilan un ér  Sakiko Tanaka la, yange ve wuha iyol sha akondo a ior mba ken tar u Japan, ve mough ve za mbatomov mba gomoti mba tagher tagher inya. Orgen ken mbatomov mba gomoti mban kaa ér i na un takerada u The harp of God la 300 man u Deliverance la kpa 300, sha u una ver ken ayou a koson ityakerada ken upurusu yô.

Katsuo Miura vea kwase na Hagino yange ve ngohol ityakerada hen anmgbian u kwase Ishii, nahan taver ve u fan mimi ga. Yange i er ve batisema ken inyom i 1931 la, maa ve hii u eren tom pania. Haruichi Yamada vea kwase na Tane man anmgbianev vev kpishi ngohol loho u Tartor la cii man inyom i 1930 la ye. Haruichi Yamada vea kwase na Tane hii u eren tom pania, wan ve u kwase, Yukiko, di yem lu za eren tom shin Betel u ken gar u Tokyo la.

Ngise la, akaahendan taver ishe kpishi shi igbenda kpa doo ga. Sha nahan yô, Kazumi Minoura vea upania mba nomso mbagenev, er umato mba lun a injin ga, mba ve tsaan ker yô. Ve yilan umato mban ér “Uyehu” sha iti i or u nahan ikyekyeutya sha ihyundu ugen u va hingir môm ken ator a Mbaiserael la. (2 Utor 10:15, 16) Ve lu a Uyehu Mbavesen utar, hanma ve lihe kuma angahar 7 man aseva 2, igbanger di lu angahar 6 man aseva 2, ityaven kpa lu angahar 6 man aseva 2, shi upania ataratar ve fatyô u tsan ker hanmô ve. Heela tseegh ga, yange i er Uyehu Mbakiriki 11, mba iorov uhar ve tsa ker, mba i nahan sha akeke yô, hen afishi a branci a ken tar u Japan la. Anmgbian Kiichi Iwasaki u yange wase u eren Uyehu mban la umbur wener: “Hanma Yehu yô, lu a tenti kua batere u matoo sha ci u tsaren usu u latriki.” Upania mban yange ve lu tan iwanger i mimi ken tar u Japan cii, ve lu tuur shi ulugh Uyehu vev, ve lu kôndon sha iwo shi senen shin upev, hii hen icile i Hokkaido, vegher u ken imbusutarimese la, za kighir hen icile i Kyushu, vegher u ken imbusutariyan la.

Pania ugen, iti na ér Ikumatsu Ota, a kaa ér: “Yange sea za nyôr hen ma gar yô, se ver Yehu wase hen kpeifi shin sha tar, ape i lu gburumaa yô. Se vande zan mba ve lu tagher tagher hen gar la inya, er tor nahan, sea been yô, se gba zan sha uya uya, za nan ior ityakerada. Sea been haregh la yô, se mough se yem hen gar ugen.”

Lu sha “iyange i akaa a kiriki,” nongo u Mbahenen Bibilo mba hen gar u Kobe, mba ve lu iorov 36 la, er mkohol ve u hiihii la ye. (Sek. 4:10) Nahan kpa, anyom ataan tseegh nga kar yô, ken inyom i 1932 la, upania 103 man mbapasenkwagh mba ken tar u Japan na ibaver i kwaghpasen ve, shi ve na ior ityakerada hemba 14,000. Nyian ne, mba eren tom u pasen kwagh ken igbar sha ugeri mba vesen mba ken tar u Japan vough vough, shi mbapasenkwagh mba kuman er 220,000 nahan mba tan iwanger i ken jijingi ken Tar u Iyange i Dugh La.—Ngeren u Pasen Yiase Yase ken Tar u Japan.