Ashighe agen, se ôr kwagh za nahan. Kwagh u se ôr la, nôngo u lumun a mkaanem ma ma lu ken Mbaheberu 12:16 la. Ivur la kaa ér Isou yange lu ‘dangor’ shi ‘tee Yakob tamen na sha wankwaghyan ityô i môm tseegh.’ Nahan lu inja er mkaanem mara ma kaan ér, Yakob ngohol Isou “tamen” yô, maa hingir u a lu ken tsombor u Yakob la, Mesiya una va ker nahan.​—⁠Mat. 1:​2, 16; Luka 3:​23, 34.

Nahan kpa, avur a Bibilo a se tim sha mi la tese ér, yange gba u or a lu waniunda keng ve, Mesiya una va ken tsombor u nan ga.Nenge ase akav agen ne:

Ken ônov mba nomso mba Yakob (shin Iserael) la, lu Ruben u Yakob mar vea Lea la, lu wan na u iunda ye. Shighe kar yô, Yakob va mar wan na u nomso u hiihii vea kwase na Rahel, u hemba doon un ishima la. I yilan wan ne ér Yosev. Ruben va eren isholibo yô, i gema waniunda na la i na Yosev. (Gen. 29:​31-35; 30:​22-25; 35:​22-26; 49:​22-26; 1 Kron. 5:​1, 2) Nahan cii kpa, Mesiya va ken tsombor u Ruben shin Yosev ga. Kpa lu ken tsombor u Yuda, u lu wan u Yakob u nomso u sha unyiin u Yakob mar vea Lea la, Mesiya va ken tsombor na ye.​—⁠Gen. 49:⁠10.

 Luka 3:32 ter iorov utaan mba Mesiya yange va ken icombor ve yô. Hanma ve yô, ka inja er nan lu waniunda nahan. Sha nahan yô, Boashi mar Obedi, u gema mar Yese la.​—⁠Rutu 4:​17, 20-22; 1 Kron. 2:​10-12.

Nahan kpa, wan u Yese, Davidi lu waniunda ga. Lu anmasetyô ken ônov mba Yese mba anigheni la. Nahan cii kpa, gema lu ken tsombor u Davidi la Mesiya va ye. (1 Sam. 16:​10, 11; 17:12; Mat. 1:​5, 6) Heela tseegh ga, orgen u Mesiya va ken tsombor u nan yô, lu Solomon, kpa Solomon lu waniunda u Davidi ga.​—⁠2 Sam. 3:​2-5.

Kpa kwagh ne ngu tesen ér kwagh u lun waniunda la yange lu a inja ga ze. Waniunda yange nan lu sha ian i civirigh shi ashighe kpishi nan hingir orya shighe u ter u nan a kpe kera yô. Heela tseegh ga, shi yange nan lu wan u i na nan kwar u dyako kwa har yô.​—⁠Gen. 43:33; Dut. 21:17; Yos. 17:⁠1.

Kpa yange i fatyô u ngohol or ian i waniunda la geman nan orgen u nan lu waniunda ga yô. Ikyav i tesen yô, Aberaham yange zenda Ishemael kera, maa gema ian i waniunda la na Isaka. (Gen. 21:​14-21; 22:⁠2) Shi er se vande ôron nahan, yange i gema ian i Ruben i waniunda la i na Yosev.

Kpa hegen de se hide se time nen sha Mbaheberu 12:16 la. Ijiir la kaa ér: “Ma or nana̱ de luun or u idya shin dangor er Isou u a tee tamen na sha wankwaghyan ityô i môm tseegh nahan la ga.” Ka nyi ivur ne lu ôrono?

Apostoli Paulu lu ôron kwagh u tsombor u Mesiya una va ker la ga. Yange sember taver Mbakristu asema ér ve ‘dugh ihyange i nôô sha ci u angahar a ve.’ Aluer ve er nahan yô, ‘mhôônom ma Aôndo ma̱ a bunde ve ga,’ kpa lu u kwaghvihin una fatyô u eren ve, aluer ve er idya yô. (Heb. 12:​12-16) Shi aluer ve er nahan yô, vea lu er Isou nahan. Isou yange lu “dangor,” nahan a nyôr iyol ken “hôngor” u eren, inja na yô, akaa a ken jijingi gba un kwagh ga.

Isou yange lu uma sha ayange a uter asev mba tsuaa la, shi alaghga ashighe agen a lu a ian i nan iniav je kpaa. (Gen. 8:​20, 21; 12:​7, 8; Yobu 1:​4, 5) Kpa er Isou lu a ishima i iyolough yô, gema kwagh u civirigh ngura cii ta kera sha ci u wankwaghyan ityô i môm tseegh. Alaghga soo u palegh ican i i tsengaôron ér ia va sha tsombor u Aberaham la. (Gen. 15:13) Shi Isou hemba nan ishima na cii u eren hôngor, inja na yô, tese ér un ngu a iwuese sha akaa a a lu icighankwagh la ga, sha u vôson kasev uhar mbafan Aôndo ga, nahan kwagh ne va mbamaren nav a ishimavihin. (Gen. 26:​34, 35) Kpa kwagh na yange kaha a u Yakob, u nenge ér un vôso kwase u civir Aôndo u mimi la.​—⁠Gen. 28:​6, 7; 29:​10-12, 18.

Sha nahan yô, ka nyi se fatyô u kuren sha kwagh u tsombor u Yesu, u lu Mesiya la, va ker laa? Ashighe agen yô, tsombor u Yesu va ker la, lu u or nan lu waniunda shin u or u i na nan waniunda yô, kpa lu hanma shighe cii ga. Mbayuda yange ve fa kwagh ne nahan, shi ve lumun a mi kpaa, sha ci u shighe ugen la ve lumun ér lu u Kristu una va ken tsombor u Davidi, u lu wan u Yese u masetyô la.​—⁠Mat. 22:⁠42.