Mbashiada Mba Yehova Mba Vihin Ivaa Shinii?

IOR kpishi senge ér, “kwase shin nom ka nana gema kwaghaôndo u nan yô, ayôôso a due, ve kera lu imôngo ga.” Ashighe agen yô, ka kwagh u mbagenev ka ve kaa a kwase shin nom u nan soo u hingir Orshiada u Yehova je ne. Kpa ka hanma shighe cii kwagh a lu nahan yee?

Sha kpôô yô, zum u nom shin kwase ka nana hii u soon ma kwaghaôndo shin nana soo u geman kwaghaôndo u nan yô, ka i kunda ikyar u nan la iyol kpen kpen. Ashighe agen ishima ka i nyian nan gayô i lan nan ishima kpishi shin ishima i vihi nan tsung.

Ashighe kpishi ka i lu kwase nan soo u geman kwaghaôndo u nan ye. Aluer kwase wou ngu henen Bibilo a Mbashiada mba Yehova yô, kwagh ne una bende a ivaa you nena? Aluer we kwase u ngu henen Bibilo a Mbashiada mba Yehova yô, kanyi u er ve u pande ishimanyian i orya wouwe?

Mnenge u Nom Ugen

Mark, or u ken tar u Australia yange er kwase, anyom nga kar 12 yô, kwase na ne hii u henen Bibilo vea Mbashiada mba Yehova. Mark kaa ér, “Ivaa yam yange i doo kpen kpen, m lu a tom u dedoo. Tsô kwase wam va hii u henen Bibilo a Mbashiada mba Yehova. Kwagh ne na yô, m hii u henen mer kwagh u kwase wam a hii ne una bende a mo. Er hii Bibilo i henen la je, doom ga, kpa zum u á va kaa a mo wener un soo u eren batisema hingir Orshiada u Yehova yô, ishima zam iyol je gande.”

Ishima hii u nyian Mark, lu henen wener alaghga tsô una pav ivaa a kwase na sha ci u kwaghaôndo na u he ne. Shi lu un ape tsweren kwase na Bibilo i henen shi kaan a na ér a de kera lamen a Mbashiada ga. Kpa er Mark ma er nahan yô, gema de wener shighe a kar kpuaa man una ôr kwagh sha mi ye. Nahan ivaa i Mark hingir nena?

Mark kaa wener, “Kwagh er doo yô, ivaa yase hemba taver a taver hegen cii. I za hemen u doon, hii shighe u kwase wam er batisema anyom 15 ken ijime, hingir môm ken Mbashiada mba Yehova la je.” Kanyi i ne ve ivaa ve ne i hembe doon a doon ciilii? Mark kaa ér, “M hide m hen sha kwagh ne yô, m nenge mer ka akaa a kwase wam lu henen ken Bibilo shi yaren tom sha mi la, a ne ve kwagh a lu nahan ye. Hanma  shighe yô, ka a nôngo wener una er kwagh a mo sha civir.”

Kwaghwan u Kasev Mba Ve Wase u Panden Ishimanyian i Noov Vev Yô

Aluer we kwase, u hii u kohol imôngo a Mbashiada mba Yehova yô, kanyi u er sha u panden ishimanyian i orya wouwe? Nenge ase kwagh u kasev mbagenev mba sha ajiir kposo kposo sha tar ve er ne:

Sakiko, kwase u ken tar u Japan kaa ér: “M er nom hegen ka anyom 31 je ne; m mar ônov utar. M hingir kwase Shiada u Yehova kuma anyom 22 hegen. Er nomom a lu kwaghaôndo môm a mo ga yô, ashighe agen ka m tagher a mbamtaver. Kpa m nôngo kpoghuloo m ngu dondon kwaghwan u Bibilo u a kaa ér, ‘hanma or nana̱ lu tsev tsev sha u ungwan kwagh kpa nana̱ gema a̱ ngôôr a kwaghôron, nana̱ ngôôr a iyugh kpaa’ la. (Yakobu 1:19) M nenge u eren kwagh a orya wam kundu kundu shi m ongo imo na sha akaa a Bibilo i vende ga la. Kwagh ne na yô ivaa yase doo kpen kpen.”

Nadezhda, kwase u ken tar u Russia kaa ér: “M er nom anyom 28 hegen shi yange m er batisema m hingir Orshiada ka anyom 16 je ne. Shighe u m lu a hii u henen Bibilo ga la, m fa mer gba u ka orya wam una lu ityough ki tsombor wase ga. Yange m soon u eren kwagh er m nenge i doom la. Nahan kpa, m hii u nengen mer er m lu dondon akaawan a Bibilo yô, kwagh ne va a bem man msaanyol hen tsombor wase. (1 Mbakorinte 11:3) Shighe kar yô, hemba lun mo ican ga cii u ungwan imo i orya wam, man un kpa a kav er m lu kwase u ungwan kwagh hegen yô.”

Marli, kwase u ken tar u Brazil kaa ér: “M ngu a ônov uhar; m vôso nom hegen ka anyom 21 je ne. Yange m er batisema, m hingir kwase Shiada kuma anyom 16 hegen. I tesem ér Yehova soo wener noov man kasev vev ve lu imôngo, ve de paven ga. Nahan yô, m nôngon hanma shighe mer me lu kwase u dedoo; m lamen shi m eren kwagh sha gbenda u me na a saan Yehova iyol a mo kua orya wam kpaa yô.”

Larisa, kwase u ken tar u Russia kaa ér: “Zum u m hingir kwase Shiada u Yehova anyom 19 ken ijime la, m mase kaven mer kwagh u hange hange u i doo u me er yô, ka u geman aeren a am. Nomom kpa nenge er Bibilo i wasem m lu kwase u dedoo man er i wasem u wuese un hanma shighe mer ngu nom u fan kwagh yô. Sha hiihii la, se zôhôn zwa kpoghuloo sha kwagh u gbenda u se yese ônov asev yô, kpa se mba kera gbe anyiman nahan ga. Orya wam ngu a na ônov asev ian ér ve za mbamkombo mba kwaghaôndo wam vea mo, sha ci u doo un er i lu akaa a dedoo tseegh i tesen ve ker nahan.”

Valquíria, kwase u ken tar u Brazil kaa ér: “M ngu a wan môm; m er nom hegen ka anyom 19 je ne. Yange m hingir kwase Shiada u Yehova anyom 13 ken ijime. Sha hiihii la, nomom soo ér m zenden sha m pasen ior kwaghaôndo ga. Nahan kpa, m hen u ôron kwagh a na sha kwagh ne sha ishima i legh legh shi m wase un u nengen er Bibilo i lu wasen mo u lun a inja i dedoo yô. Shighe kar yô, nomom hingir u nengen er i gbe hange hange u me er tom u zenden pasen ior kwaghaôndo ne yô. Ngu wasen mo u eren akaa a ken kwaghaôndo wam ayange ne kpishi je. Ka a gba u me za hen Bibilo a ior ken agar yô, a tôôm shin mato a za verem, a keghem zan zan m kar been.”

Bibilo Ngi Tahav Mbu Sôron Ivaa

Aluer kwase wou shin orya wou ngu henen Bibilo a Mbashiada mba Yehova yô, de cie wer kwaghaôndo u a za we ave ne una vihi ivaa you ga. Noov man kasev kpishi sha tar mase kaven er Bibilo i lu a tahav mbu sôron ivaa sha u i doo yô.

Nom ugen u a lu Orshiada u Yehova ga yô ôr kwagh sha mimi wener: “Zum u kwase wam hingir kwase Shiada u Yehova yô, ishima zam iyol kpishi, kpa hegen ne m nenge a mtsera u kwaghaôndo na u he ne.” Nom ugen di ôr kwagh u kwase na ér: “Jighjigh u kwase wam man ishimataver na man mimi na la na yô, kwagh u Mbashiada mba Yehova doom hegen kpishi. Ivaa yase doo kpishi sha ci u atesen a kwaghaôndo na la. Se fa u den ayol a ase kwaghbo shi se mba eren akaa a tesen ér ivaa yase ka kwagh u una lu gbekeke yô.”

 [Ngeren u kiriki/Foto peeji 13 la]

Mbashiada mba Yehova mba Nengen Ivaa Nena?

Mbashiada mba Yehova na jighjigh ér Bibilo ka Mkaanem ma Aôndo. Nahan yô, mba eren hanma kwagh u Bibilo i ôr sha kwagh u ivaa cii. Nenge ase mbalumun mba Bibilo i ne sha mbampin mba ve lu shin heen ne:

▪ Mbashiada mba Yehova mba taver ior mba ken nongo ve asema ér ve pav a kasev vev shin ve due hen noov vev mba ve lu Mbashiada ga laa? Ei. Apostoli Paulu yange nger ér: “Aluer ma anmgbian nan ngu a kwase u nan ne jighjigh ga, man kwase la rumun u lun vea nan yô, nana̱ de paven a nan ga. Man aluer kwase ngu a nom u nan ne jighjigh ga, man nom la rumun u lun vea nan yô, nana̱ de duen hen nom la ga.” (1 Mbakorinte 7:12, 13) Mbashiada mba Yehova mba dondon tindi u Bibilo ne.

▪ Mbashiada mba Yehova mba taver kwase u nan lu ken nongo ve ishima ér nana taver nom u nan u nan eren kwaghaôndo môm a nan ga la ityougho? Ei. Apostoli Peteru yange nger ér: “Ne kasev di kpaa ungwan nen amo a noov enev sha er aluer mbagenev ken ve, vea lu mbawan kwaghôron u Aôndo ikyo ga je kpa, á urugh ve sha mlu u kasev vev la, á kera lu sha kwaghôron kpee ga, er ve nengen mlu wen u wang u cian Aôndo la yô.”—1 Peteru 3:1, 2.

▪ Mbashiada mba Yehova mba tesen ior ér tahav mbu nom nan lu a mi sha kwase u nan la mbu a kighir gaa? Ei. Apostoli Paulu kaa ér: “Sarem ka fa nen, ityough ki hanma nomsoor yô, ka Kristu, man ityough ki kwase yô, gema ka nom, man ityough ki Kristu yô, ka Aôndo je.” (1 Mbakorinte 11:3) Gba u kwase Kristu nana ungwan imo i nom u nan, gadia ka nom a lu ityough ki tsombor ye. Nahan kpa, tahav mbu nom nan lu a mi sha kwase u nan lu mbu a kighir. Aluer nan er tahav mbu nan la sha inja ga yô, Aôndo man Kristu vea pine nan kwagh sha mi. Nahan yô, aluer nom kaa a kwase u nan ér nana er kwagh u tindi u Aôndo a vende yô, kwase Kristu la nana “hemba ungwan imo i Aôndo . . . a imo i ior.”—Aerenakaa 5:29.

▪ Mbashiada mba Yehova mba tesen ior ér Aôndo tswer ivaapavene? Ei. Yesu Kristu kaa ér: ‘M ngu kaan ne Mer: Hanma or u nana pav a kwase u nan, kpa a lu sha ci u idya ga man nana gema á er kwase ugen yô, ka idya je nan er ye.’ (Mateu 19:9) Mbashiada mba Yehova lumun a mkaanem ma Yesu man ér nom shin kwase nana fatyô u paven ivaa a ikyar u nan u nan er idya la. Kpa shi ve na jighjigh tsung ér doo u a pav ivaa sha ci u atôakaa a kiriki ga. Nahan ka ve shi taver mba ken nongo ve asema ér ve dondo mkaanem ma Yesu man, ma kaa ér: “Nomsoor nana undu ter u nan man ngô u nan, nana var ken kwase u nan, ve uhar vea hingir iyôgh i môm. . . . Kwagh u Aôndo je zua yô, or a̱ de kera paven un ga.”—Mateu 19:5, 6.