ER MKAANEM ma John man Carol man ma tese nahan, gbenda u yange i yese u la ua fatyô u benden a gbenda u ú tsahan ônov ou la kpishi je. Nom man kwase ka vea vese hen icombor kposo kposo yô, ashighe kpishi ve hen u tsahan mbayev sha igbenda kposo kposo. Ashighe agen mkposo ne ngu a va a mzeyol ken ivese.

Mbamaren ka vea vôr a mzeyol yô, mzeyol shon a hemba vihin a vihi cii. Nom man kwase ka vea maren wan ve u hiihii yô, ve mase kaven er tom u tsahan mbayev la u lu tom u ican, u yan ve shighe kpishi yô. Kwaseya ugen mba yer un ér Joan, un vea nom na Darren, ve yese ônov mbakasev uhar. A kaa wener: “Ônov av doom ishima kpishi, nahan kpa yange ve soon u yaven hen shighe u m soo mer ve yav la ga. Yange vea lagh a  yav kpa ve nder sha shighe u hagher kpishi. Mea lamen kpa ve tôndom iliam sha zwa. Ashighe agen ve tsua akôv shi ve ee akondo ve haa côu côu shi ve haa ikyav vev mbi iniumbev dang dang, shi vea ya kwagh kpa ve kura ikyav mbi ve ye kwagh a mi la ga.”

Orgen mba yer un ér Jack; angev mbu ken ityou mbu i yer ér postpartum depression la yange mbu kôr kwase na shighe u mar wan ve u sha uhar la yô. Jack kaa wener: “Ashighe kpishi yange m za kur tom i tumen iyol kpa m kar a kar m gba nengen sha wan wase u he ne, m nenge sha a na tugh zan zan m fatyô u yaven fele ga. Kwagh ne na yô, hingir se ican kpishi u veren ishima sha wan wase u iunda la tsahan un tsembelee. Nahan ishima vihi un kpishi, sha ci u se hemba veren ishima sha anmgbian na u kiriki la.”

Shighe u i tum mbamaren iyol man ve kera lu zwa môm sha gbenda u tsahan wanye ga yô, ka i hingir u an-usu u cuku una nande zege ikyô. Ayôôso nga a gba hen atô u nom man kwase man vea sôr a ga yô, a va a mpav hen atô ve, nahan wanye nan gba ken ikyum i ormaren u nana hemba nan nan ian u eren ishima i nan la. Ka akaawan a ken Bibilo a nyi aa wase nom man kwase vea doo ayol a ve zum u ve lu yesen ônov vev laa?

Awashima u Aôndo yô, ka u nomsoor man kwase ve vôso ayol a ve ve lu imôngo cii ve vea hii u maren ônov ye, man shighe u ônov vev ve vese ve undu ya la kpa, ve za hemen u lun imôngo her gbem. Bibilo ôr kwagh u mzough u ivesegh ér: “Kwagh u Aôndo je zua yô, or a̱ de kera paven un ga.” (Mateu 19:6) Bibilo shi tese ér Aôndo wa ishima ér shighe u wanye nan gande or yô, “nana undu ter u nan man ngô u nan.” (Mateu 19:5) Jim yô, u yesen mbayev la ka a ka gbar u ivesegh di tsô, ka kwagh u ivese i har sha mi la ga. Sha kpôô yô, gba u mbamaren vea tôô shighe vea tese ônov vev, nahan kpa doo u vea umbur ér saa ivaa ve ia doo ve, vea kôr cio u eren kwagh ne ye.

Ka sha nyi gbenda nahan nom man kwase vea seer doon ayol a ve ken anyom a ve lu yesen ônov vev laa? Nôngo kpoghuloo ver shighe u lun vea ikyar u ne uhar tseegh a mbayev enev shio. Aluer ne mba eren nahan yô, ne zua a ian i lamen sha akaa a hange hange a hen tsombor, shi a doo ne u lun imôngo kpaa. Sha kpôô yô, ka i taver nom man kwase kpishi u zuan a ian i lun imôngo. Alison, kwase u se vande ôron kwagh na ken ngeren ne la kaa ér, “Mo man orya wam yange sea fan ser se zua a an-ian kpuaa u se tema imôngo yô, i lu shighe la je wan wase u kiriki la a soo ér se lu a na shin u vesen u lu anyom ataratar la a za tagher a mzeyol a gba vaan ye, ashighe agen a keren ikyav nav mbi kperan kwagh a mi la.”

Joan man Darren, mba se vande teren ve ken ngeren ne la, yange ve ver shighe u vea kighir mbayev vev ér ve yav yô, sha nahan yô, ve zua a ian i lun imôngo. Joan kaa ér, “Yange a kuma shighe u ônov asev vea yav yô, i gba u vea lu sha gambe vea keghen a kegh shighe u se pir usu sha er vea yav sha shighe u se ver la vough yô. Nahan mo man Darren se zua a ian i memen shi lamen kpaa.”

Aluer nom man kwase ver shighe u ônov vev vea yaven yô, vea zua a ian i lun imôngo, heela tseegh ga shi vea wase ônov vev mbara, nahan ‘vea kera nenge sha mlu ve a hemba er ma ve nenge la ga.’ (Mbaromanu 12:3) Shighe ka una karen yô, mbayev mba i tese ve u yaven sha shighe vough la ve mase kaven ér ve gba kwagh hen tsombor ve, kpa ka ve tseegh ve gbe kwagh hen tsombor ve ga. Nahan gba u vea dondo gbenda u tsombor ve u eren kwagh la, vea kera ver ishima ér tsombor ve u de akaa cii u eren ishima ve ga.

Ivur Bibilo igen kaa ér: “Wan wam, ungwan ityesen i teru, tindi u ngôu kpaa, de te un kera ga.” (Anzaakaa 1:8) Ivur Bibilo ne wase se u fan ér ter man ngô cii mba a tahav sha ônov vev. Nahan cii kpa, aluer yange a yese nom man kwase sha gbenda môm je kpa, ashighe agen vea fatyô u gban anyiman sha gbenda u tsahan wan kua gbenda u eren kwagh sha tindi hen tsombor. Mbamaren vea sôr mzeyol ne nena?

John u se vande ôron mkaanem nam ken ngeren ne la kaa ér, “M nenge mer, doo u gban anyiman sha ashe a ônov asev ga.” Nahan kpa a kaa ér, ka i taver kpishi u yeren mbayev a mzeyol. John shi kaa ér, “Mbayev mba ngôôr nengen a kwagh ga. Ka sea gba anyiman sha ashe a ônov asev ga je kpa, wan wase u kwase la a nenge mlu wase je maa a fa ér kwagh za iyol.”

John man Alison ka vea tagher a mzeyol ne nahan ve er nena? Alison kaa ér: “Ka mea nenge mer gbenda u orya wam a lu tsahan wan wase u kwase la doom ga yô, m de zan zan una kera lun ikyua, u una ungwa iliam yase ga yô, m mase ôron orya wam mnenge wam. M soo mer wan wase u kwase la a hen ér una fatyô u kôron ave sha mkposo u a lu hen atô wase la eren ishima na ga. Ka una va faan ér se gba anyiman yô, m kaa a na mer, gba u hanma or hen tsombor nana dondo atindi a Yehova a we sha kwagh u hemen la, mo kpa m dondon hemen u ter na, vough er un kpa i gbe u una ungwan imo i se mbamaren nav nahan.” (1 Mbakorinte 11:3; Mbaefese 6:​1-3) John kaa ér: “Ka sea lu imôngo hen ya yô, i lu mo m lu ityough sha u tsahan mbayev asev ye. Kpa wan wase ka nana er kwaghbo man mea nenge mer Alison hemba fan kwagh u nan er la yô, m de a tsaha nan, nahan m ta ikyar a na. Ka una er kwagh a shim yô, m ôron a na her ave ave ga.”

Ú er nan ve anyiman a ne gbe sha gbenda u tsahan ônov enev la aa va a imorshima hen atô wou man ikyar u, nahan aa pande icivir i ônov enev ve ne ne la ga?

Sha kpôô yô, tom u yesen ônov la ka u kiriki ga. Alaghga ashighe agen ua na u ú vor kpishi. Nahan kpa, shighe a karen yô, ônov ou vea vese vea undu ya, nahan u mase shin vea ikyar u tseegh. Ivese yen ia seer taver a taver shin tom u yesen ônov enev la ua vihi i? Mlumun u sha mpin ne una har sha gbenda u ne dondon kwaghwan u a lu ken Orpasenkwagh 4:​9, 10 la, ijiir la kaa ér: “Guda uhar a u môm, sha ci u mba a injar i dedoo sha tom ve u sha ican. Gadia aluer vea gba kpaa, u môm nana kôr ugen nan mough a nan sha.”

Mbamaren ka vea er tom ken ijoughave yô, ve hemba zuan a injar i dedoo. Carol u se vande teren mkaanem nam ken ngeren ne la pase mnenge na sha kwagh ne, ér: “M fa nomom ngu a aeren a dedoo kpishi, nahan kpa, tom u se er u yesen mbayev imôngo ne wasem m seer fan aeren na a dedoo agen. Gbenda u a nengen sha ônov asev sha dooshima la na yô, icivir i m ne un la seer a seer shi a seer doon mo ishima kpaa.” John ôr kwagh u Alison ér, “Er m nenge mer kwase wam ka ngô u wan ônov nav ikyo tsung yô, a seer doon mo ishima shi m hembe nan un icivir kpaa.”

Aluer u ver shighe u lun imôngo vea ikyar u shi ne zua ave sha u yesen ônov enev yô, er ônov enev ve lu vesen la, ivaa yen kpa ia seer taver a taver. Shi ieren yen la ia lu ikyav i dedoo i onov enev vea dondo yô.