Kporom hen Aôndo

Mbaasemaleghlegh Doo Yehova Ishima

Numeri 12:​1-15

IOR mba zan ikyura mba ken tar kpishi mba a aeren er iyolgengese man iyuhe man mhange nahan. Kpa anza angan nahan aa kporom a vese hen Yehova Aôndo je kpa? Ei, nahan kpa mbacivir Aôndo mba ve lu asema legh legh yô, ve doo un ishima. Numeri ityough 12 ôr se kwagh ugen u yange er, u a tese ér mbaasemaleghlegh doo Aôndo ishima yô. Ijiir i kwagh ne er yô, lu ken deserti u Sinai, zum u i due a Mbaiserael ken Igipiti kera la.

Miriam man Aron, mba ve lu anngôôv mba Mose mba vesen la “ôr kwagh u vihin sha Mose,” anngô ve u kiriki la. (Ivur 1) U ma ve lam a Mose yô, ve gema ve ôr kwagh u vihin sha a na, man a̱ shi nan kpa, ve za kohol mbagenev ken afo, ve wa un zwa iyol. I vande teren iti i Miriam, nahan a̱ shi nan kpa, lu un hemen gbenda sha imbwase ne ye. Ityôkyaa i hiihii i ve ôr kwagh u vihin sha Mose yô ér a vôso kwase u Kushi yum. Miriam yange gba iyuhe ér ityô na ia va hemba nengen a kwase ugen, u lu kwase ken Mbaiserael tsô kpaa ga ne yumu?

Atôakyaa agen kpa lu aa a na ve ve lu gban ahon yô. Miriam man Aron ve zer kaan ér: “Ka Mose tsô, TER A er kwagh a na yee? Se yô, er kwagh a vese gaa?” (Ivur 2) Jighilii yô, lu tahav man gwa yange hange ve ve, ve lu gban ahon yee?

Er anngôôv nav lam sha a na dang nahan kpa, Mose iyol na yô bugh zwa sha kwagh ne ga. Yange wa ishima a ilyahan la shong je ka ashe tugh ga. Er Mose gba ishima ikyôr, na imo fefa ga yô, kwagh u Bibilo i ôr sha a na ér “lu or u ishima legh legh je zua ga, hemba hanma or sha won cii” la lu icô ga. * (Ivur 3) Mose yange palegh iyol ga. Kpa Yehova ta ikyaa a na.

Yehova yange nenge wener er ve laha Mose yô, ka un je ve laha ye. Kera ga je kpa, ka un yange tsua Mose lu orhemen ye. Aôndo yange mba ve ôr kwaghvihin sha Mose la kaa ér: “M er kwagh a na sha zwa wanger wanger je, ka lun kwaghôron u cimin ga, nengen mlu u TER er A lu yô.” Yehova maa pine Miriam man Aron ér: “Man ka nyi ne cie u ôron kwaghvihin sha wanakiriki wam, Mose ga?” (Ivur 8) Er ve ôr kwagh u vihin sha Mose yô, lu sha Aôndo jighilii ve lu lamen dang ye. Imba ilyahan i sha igbongor ngira nahan, kuma u iyugh i Aôndo ia shile sha a ve.

Yehova yange haa Miriam, u hii u ôron kwaghvihin sha Mose la, imande iyol. Fese je maa Aron zamber a Mose ér a sôn Aôndo sha ci u Miriam. Nenge sha wono, mwar u Miriam hen shighe la lu sha ikyevwe i or u lu wan un asôngo la! Mose er er Aron zamber a na nahan, a bem ishima. Lu kwa u hiihii u Mose lam sha kwagh ne je la, sôn Yehova tsung sha ci u ingyôr na. I wanger Miriam imande na, kpa gema ya kunya sha ci u i wuhe un ayange ataankarahar.

Kwagh ne wase se u fan aeren a Yehova a soo man aa á ker a ihyom yô. Aluer se soo u kporom hen Aôndo yô, saa se dugh hanma ivurugh ki iyolgengese man iyuhe man mhange ken avese kera. Ka mbaasemaleghlegh Yehova a soo ye. A tôndo zwa ér: “Mbaasemaleghlegh yô, vea ya dyako u tar, á saan ve iyol sha mngee u bem.”​—⁠Pasalmi 37:11; Yakobu 4:⁠6.

[Ngeren u shin kpe]