Kwagh U Se Hen Hen Yesu

Sha Kwagh u Uma u hen Tsombor La

Ka mnenge u ivaagh u nyi ka a na icombor i lu saan saanaa?

Ivaa ka icighan mzough. Zum u i pine Yesu aluer ivaa paven ia lu shami yô, a kaa ér: “Ne mba a ôr kwagh u i nger la gaa, er Un u A er ve sha hiihii la je, A er ve nomsoor kua kwase; man A kaa er: Ka sha ci u nahan man nomsoor nana undu ter u nan man ngô u nan, nana var ken kwase u nan, ve uhar vea hingir iyôgh i môm ye gaa? Nahan yô, mayange ve kera mba uhar ga, kpa ka iyôgh i môm je. Kwagh u Aôndo je zua yô, or a̱ de kera paven un ga. . . . Hanma or u nana pav a kwase u nan, kpa a lu sha ci u idya ga man nana gema á er kwase ugen yô, ka idya je nan er ye.” (Mateu 19:4-6, 9) Nom man kwase ka vea dondo kwaghwan u Yesu, nahan vea lu jighjigh hen ayol a ve yô, mkpeyol man msaanyol a lu ken tsombor ve la.

Er nan ve Aôndo ka una doo icombor ishima ve i saan i iyoloo?

Yesu kaa ér: “Ter Aôndo wou A̱ doo u ishima a ishima you cii man a uma wou cii man a mfe wou cii. Ngun ka tindi u tamen man ka u hiihii kpaa.” Kanyi i lu tindi u hemban cii u sha uhara? Yesu kaa ér: “Or u nan we ndor a we yô, [kua mba ve hembe lun ikyua a we la, ka mba hen tsombor wou je la] nana̱ doo u ishima er we iyol you nahan.” (Mateu 22:37-39) Nahan yô, kwagh u vesen u a ne tsombor msaanyol yô, ka u yan ikyar vea Aôndo, gadia ka sea ya ikyar vea na sha ci u a doo se ishima yô, dooshima la a mgbegha se u soon ayol a ase kpaa.

 Noov man kasev vea na ayol a ve msaanyol nena?

Noov ka vea dondo ikyav i Yesu yô, ve na kasev vev msaanyol. Yesu lu a dooshima u tangen iyol ga sha nongo u Kristu, u ú lu inja er ngu kwase na la. (Mbaefese 5:25) Yesu kaa ér: ‘Wan u or kpaa A va sha u i̱ er Un tom ga, kpa sha u Un Una er mbagenev tom.’ (Mateu 20:28) Mayange Yesu lu nyang nyang shin eren kwagh a mba ve lu sha ikyev na la sha nomor ga, kpa naan ve mkunduyol. (Mateu 11:28) Noov kpaa, ve hemen tsombor ve sha gbenda u hanma or hen tsombor nana zua a iwasen yô.

Kasev kpa, vea fatyô u zuan a iwasen sha ikyav i Yesu la. Bibilo kaa ér, “ityough ki Kristu yô, ka Aôndo.” Shi i̱ kaa ér “ityough ki kwase yô, gema ka nom.” (1 Mbakorinte 11:3) Yesu yange nenge ér un gande u wan iyol na sha ikyev i Aôndo ga. Yange naan Ter na icivir kpishi. Yesu kaa ér, “M eren akaa a doon Un gbem.” (Yohane 8:29) Kwase u nan we iyol i nan sha ikyev i hemen u nom u nan sha ci u Aôndo doo nan ishima shi nan ne un icivir yô, nana na tsombor u nan ua lu saan saan.

Kanyi mbamaren vea hen sha mnenge u Yesu lu a mi sha kwagh u mbayev laa?

Yesu luun vea mbayev shi mbamhen vev man asaren a ve gba un ishima. Bibilo kaa ér: “Yesu yila ve ér ve va her a Na, gba kaan ér: De nen mbayev mba kiriki ve̱ va her a Mo.” (Luka 18:15, 16) Sha shighe ugen la, ior zôhô a mbayevnomso mbagenev mba ve ôr kwagh sha u tesen ér ve na Yesu jighjigh yô. Kpa Yesu wuese mbayev mbara, gema kaa a mbapuun ve la ér: “Mayange ne mba a ôr kwagh u i nger la er: Ka ken zwa u anikundanev man mbamanatumba U sôr iwuese ye, gaa?”—Mateu 21:15, 16.

Kanyi mbayev vea hen hen Yesu?

Yesu ver ikyav i dedoo i tesen er akaa a ken jijingi aa gba mbayev ishima yô. Zum u lu anyom 12 la, mbamaren nav “va kohol Un ken tempel, A tema her atô u mbatesen, lu ungwan ve, man shi lu pinen ve akaa.” Kanyi yange i eree? “Mba ve lu ungwan Un cii, kpiligh ve iyol sha mkav Na man sha mbamlumun Nav kpaa.” (Luka 2:42, 46, 47) Nahan cii kpa, Yesu tim akende sha ci u mfe na ne ga. Kpa, mfe la wase un u nan mbamaren nav icivir. Bibilo kaa ér: “A lu ungwan imo ve.”—Luka 2:51.

Wea soo u fan seer yô, ôr ityough 14 ki takerada u Bibilo Tese Ér Nyi Jimi? la. *

[Ngeren u shin kpe]