Or u A Gem Tar Cii La

Ior mba i mar ve shin tar ne, mba ve lu shin u shi ve kpe la kuma ubiliôn imôngo. Mbakpishiv ken ve er ma kwagh u zan gwa u a umbur ve a mi ga. Mbagenev kpuaa di yô, gema er akaa a í lu umbur zan zan yô, man alaghga je yô, akaa ne bende a kwagh u ú eren ayange ayange la je kpaa.

TÔÔ ase wer u nder pepe u ngu nôngon wer u yar tom. U ngur wan iyol yô, u tsar usu u latriki. Shi u tôô takerada u u za nyôr bôôsu ve u lu ôron yô. U shi u umbur u tôôn icigh you ki u lu menan sha u nôngon a angev yô. Akaa a u hila er di kpuaa pepe la tseegh kpa, u zua a iwasen ken kwagh u ior mba duen ati kpuaa yange ve er yô.

Michael Faraday Un lu Orbuter u tôvon sha mlu u akaa, u i mar un ken inyom i 1791 yô, lu un hii varen injin u samber a usu latriki ye. Akaa a yange hii duen a mi la wase u samber a usu u latriki sha ci u iwasen i uumace.

Ts’ai Lun Lu or u eren tom ken atejir u tartor u China, u i yilan ér Ts’ai Lun ne yange due a gbenda u eren pipa ken inyom i 105 la ye, nahan anyom nga kar yô ior hii u eren pipa wuee.

Johannes Gutenberg Shighe u inyom i 1450 la nahan, or u ken tar u Jamani ne var ikyekye i gberen ityakerada a mi i̱ hiihii bee. Ikyekye ne na yô, ior kera vihin inyaregh kpishi u gberen akaa ga, nahan abaver kpa hemba samber sha ior wuee sha atôakaa kposo kposo.

Alexander Fleming Ken inyom i 1928 la, or u ken tar u Scotland ne zua a icigh ki gen ki wuan ankaam mba umav mba nan angev, a yila ki ér penicillin. Hegen, mba yaren tom a icigh kin wuee sha u sôron iangev a mi.

Akperan nga ga, akaa a ior kpuaa ve tev sha mi ve er la, wase ior ubiliôn u zuan a mbamtsera kpishi, shin u hemban lun ken mkpeyol.

Nahan cii kpa, orgen ngu u a dugh kposo ken ior mbagenev cii yô. I fa un sha ma kwaghfan u sangen yeke shin icigh ki sôron angev ki a zough a mi ga. Kpa or u tsombor na lu sha kwar ikyaa tsô kpaa ga, u yange kpe i zulum anyom 2,000 hegen ne, pase loho u injaa, u nan ishimaverenkeghen man msurshima. Aluer se time sha gbenda u loho na u bende a uuma mba iorov sha tar cii yô, ior kpishi vea lumun ér mimi je, or ne yange gema tar ne jimin cii.

Or la lu Yesu Kristu. Kanyi loho yange pasee? Man loho la ua fatyô u benden a uma wou nena?