Gbenda U Myer U Sha 3

Za Hemen u Lun a Ishima I̱ Wuese Kwagh

BIBILO TESE SE NYI SHA KWAGH NE? “Ken hanma kwagh cii, naan nen ishughun.”—1 Mbatesalonika 5:18.

ER NAN VE KA I TAVER SE U DONDON KWAGHWAN NEE? Se mba ken tar u mbagengese iyol man mbalun a ishughun ga ve kase se ve we atô yô, man aeren ne aa fatyô u benden a vese kpaa. (2 Timoteu 3:1, 2) Shi kwagh ugen yô, alaghga ishima ia mgbegha se u wan ityom ave seer a seer sha ityom i se vande lun a mi kpishi u eren la. Adooga mbamzeyol vea shile sha a vese kpishi gayô se tume ityough keren akaa sha ci wase ayol a ase, nahan se kera lu a shighe u wuese akaa a se vande lun a mi shin aa ior ve eren a vese la ga.

Ú ER NENA? Tôô shighe gbidye kwar sha akaa a dedoo a u lu a mi hegen la. Sha kpôô yô, alaghga a tume u iyol sha ci u mbamzeyol ou. Kpa nenge ikyav i Tor Davidi yange ver ne. Ashighe agen yange i lu un er mba kighir uma na ka ganden nahan, shi ishima na i kondo ker sha ci u mbamzeyol. Nahan kpa, a er msen hen Aôndo, a kaa ér: “M hen kwagh sha aeren a Ou cii, m hen kwagh ken ishima sha tom u ave Ou je.” (Pasalmi 143:3-5) Shin er Davidi tagher a ameen nahan kpa, a za hemen u lun a ishima i wuese kwagh shi a zua a mkom kpaa.

Hen sha akaa a mbagenev ve eren a we la, nahan tese iwuese sha akaa a ve er la. Yesu ver se ikyav i dedoo sha gbaa ne. U tesen ikyav yô, zum u ijende na Maria, haa un mkurem ma taver ishe kpishi sha ityou man shin angahar yô, mbagenev pine ér: “Inja na nan man i vihi mkurem man nahana?” * Mbagban ahon mbara nenge ér ma̱ i tee ma ma̱ i ne mbaatsanev inyaregh ki shon. Kpa Yesu gema kaa a ve ér: “De nen un; ka nyi ne ze un iyolo?” Shi a za hemen a kaa ér: “A er kwagh u a fetyô yô.” (Marku 14:3-8; Yohane 12:3) Er Yesu yange ma yem ôron kwagh u Maria kanshio u eren la yô, gema wuese a wuese kwagh u yange fatyô u eren la.

Mbagenev yô, ka ve hingir u nengen a iwasen i tsombor ve man akar a ve shin averen agen a ve zough a mi la zum u ior mbara, shin akaa a ve lu a mi la, a kera lu ga la tseegh. U fatyô u palegh u gban ken imba mlu ne sha u gbidyen kwar sha akaa a dedoo a u lu a mi hegen ne! Er nan u hen ken ishima you, u fe akaa a i doo u ú tese iwuese sha mi la shin u nger a shin takerada ga?

Er “hanma nagh ku dedoo” ku hii duen hen Aôndo yô, doo u se er msen hen a na se sugh un. (Yakobu 1:17) Aluer se mba eren nahan hanma shighe yô, se za hemen u lun a ishima i wuese kwagh shi se zua a mkom kpaa.—Mbafilipi 4:6, 7.

[Ngeren u shin kpe]

[Foto u sha peeji 6]

U wuese kwagh u mbagenev ve eren a we la kpa?