Kporom Hen Aôndo

Kwagh a Fatyô u Doon Yehova Shin Vihin Unu?

ALUER mlumun u sha mpin la ka een yô, mpin ugen kpa shi due ér: Ieren yase ia fatyô u benden a Aôndo? Inja na yô, akaa a se eren la aa fatyô u nan Aôndo msaanyol shin ishimavihini? Mba fan kwagh tsura mba sha ayange a tsuaa mbagenev kaa ér kwagh doon Aôndo shin vihin un ga. Ve nyiman ér or môm kpa ieren i nan ia fatyô u benden a Aôndo ga, nahan kwagh doon un shin vihin un cuku kpaa ga. Kpa Bibilo tese se kwagh ugen kposo ér kwagh a fatyô u doon Yehova shin vihin un, shi kwagh gbe un tsung sha akaa a se eren la kpaa. Time ase sha mkaanem ma i nger ken Pasalmi 78: 40, 41 la.

Pasalmi 78 pase igbenda i Yehova eren kwagh a Iserael u tsuaa la yô. Yehova yange duen a ikyurior la ken kpan ken tar u Igipiti kera yô, a tsua u yan ikyar i kangenaa a ve. A tôndo zwa a ve ér aluer ve za hemen u wan atindi na ikyo yô, vea hingir ‘kwagh na iyol na’ shi una er tom a ve sha gbenda u kpilighyol sha u kuren awashima na. Ior mbara kpa lumun, nahan ve ya ikyur i Tindi a Aôndo. Yange ve er kwagh u ve lumun u eren la kpa?—Ekesodu 19:3-8.

Orpasalmi kaa ér: “Kpash! Ve hendan a Na ken deserti, acin imôngo je.” (Ivur 40) Ivur i dondon la shi kaa ér: “Ve shi ve mee Aôndo.” (Ivur 41) Nenge er orngeren Pasalmi la a tese er ihyembeato yange ya tor ken a ve yô. Ieren ve i hemban Aôndo ato shi eren kwagh a na sha icivir ga ne yange hii tsuaa je, shighe u i sember duen a ve ken Igipiti, ve lu ken deserti la. Ior mban hii u gban ahôn a Aôndo, shi ve nyiman ér a kuma u nengen sha a ve ga, shi a kegh iyol u eren nahan kpaa ga. (Numeri 14:1-4) Takerada ugen u i gber sha ci u mbageman Bibilo yô, kaa ér a fatyô u ôron ishember i “Ve hendan a Na” la ken gbenda ugen ér ‘asema a ve cighir sha u hendan a Aôndo’ shin ‘ve kaa a Aôndo ér “Éi.”’” Nahan cii kpa, er Yehova a zungu mhôônom yô, yange a de ior nav kwaghbo shighe u ve gem ishima yô. Kpa ve shi ve hide sha igbenda ve i tse la shi ve hemba un ato, nahan ve za hemen a ieren ve ne.—Pasalmi 78:10-19, 38.

Hanma kwa u ior mba Yehova mba ve eren kwagh a na jighilii ga mban yange vea hemba un ato nahan, i lu un nena? Ivur i sha 40 la kaa ér: “Ve vihi Un ishima.” Mgem u Bibilo ugen kaa ér “Yange ve na un a zungwe tsung.” Takerada ugen u pasen asember a ken Bibilo kaa ér: “Inja i kwagh ne yô, ieren i Mbaheberu la yange i lu kwagh u nan ishimavihin, er ieren i wan u hemban ato nahan.” Mbaiserael mba hemban ato mbara yange ve “bam Icighan u Iserael,” er wan u hemban ato ka nana bam mbamaren mba nan ve ishima i vihi ve ker kpishi nahan.—Ivur 41.

Se fatyô u henen nyi ken pasalmi ne? Ka kwagh u doon se kpishi er se fe ser Yehova lu ica a mba civir un ga shi kwagh ve duen un ishima fele ga nahan. Nahan kpa doo u shi se fa wang ser kwagh doon Yehova shin vihin un, shi ieren yase ia fatyô u benden a na kpaa. Er u kav kwagh ne nahan yô, gba u u er nena? Kwagh ne mgbegha u u eren kwagh u dedoo kpa?

Se fatyô u tsuan ser se dondo gbenda u perapera shi se na i saan Yehova iyol, a u se dondon gbenda u bo, nahan nan un ishimavihin la. Man ka kwagh u a soo ér mba civir un ve er jighilii je la. A kaa ér: “Wan wam, lu orfankwagh, na i saan mo iyol.” (Anzaakaa 27:11) Kwagh môm u injaa u se na Yehova ve una hemba u se eren uma sha gbenda u van un a msaanyol la je kpa ngu ga.

[Ngeren u pasen foto u sha peeji 10]

Kwagh môm u injaa u se na Yehova ve una hemba u se eren uma sha gbenda u van un a msaanyol la je kpa ngu ga