Ka Hange Hange u Se Fa Mbamlumun Mba I Ne sha Mbampin mba sha Kwagh u Yesu Laa?

“Né fa mimi, mimi kpaa una pase ne una tuhwa.”—YOHANE 8:32.

BIBILO ngi a akaa a mimi a a fatyô u pasen se tuhwan sha akaa a taver u kaven shin a a tsum se sha kwagh u Yesu la yô. Kpa, jighilii yô, kwagh gba sha jighjigh u se lu a mi sha kwagh u Yesu laa? Een, kwagh gba sha mi. Kwagh gba Yehova sha mi. Shi kwagh gba Yesu sha mi. Nahan yô, ka u se kpa kwagh a gba se sha kwagh ne.

● Er nan ve kwagh a gbe Yehova sha jighjigh u se ne Yesu laa? U ôron kwagh tan a ta aningir ga yô, ka sha ci u “Aôndo ka Dooshima.” (1 Yohane 4:8) Yehova soo ér se lu uma saan saan gbem sha won. Yesu kaa ér: “Tar [u uumace] ne doo Aôndo ishima je, nahan A na Wan Na u môm môm la sha er anti or u nan ne Un jighjigh yô, . . . nana̱ zua a uma u tsôron.” (Yohane 3:16) Aôndo yange tindi Wan na ér a va yima se, shi a bugh se gbenda u se fatyô u va lun uma gbem sha won ken Paradiso shin tar, sha er awashima Na u sha hiihii la una kure yô. (Genese 1:28) Aôndo kegh a kegh iyol u nan mbara mba ve lu henen mimi sha kwagh u Wan na, shi ve lu eren sha kwagh u ve hen la, iyua i uma u tsôron.—Mbaromanu 6:23.

● Er nan ve kwagh a gbe Yesu sha jighjigh u se ne un laa? Yesu kpa uumace doo un ishima. Yange tese dooshima u tangen iyol ga la, sha u nan uma na sha ci wase, a mkighir shio. (Yohane 15:13) Yange kav er u eren nahan la, i lu gbenda u se fatyô u zuan a myom cii je la yô. (Yohane 14:6) Nahan yô, kera kpiligh se iyol er Yesu a soo ér ior kpishi ve zua a mtsera sha nagh ku yange na sha u paan se la ga. Ka nahan ve yange na mbahenen nav tom u tesen ior mba sha tar cii kwagh u Aôndo a soo, man awashima na la ye.—Mateu 24:14; 28:19, 20.

● Er nan ve i lu hange hange u kwagh a gba se sha jighjigh u se ne Yesu laa? Hide hen kpase sha akaa a a gbe u ishima tsung, er kwagh u mkpeyol wou man kwagh u tsombor nahan. Sar u tsung u we man mbadoon we ishima ma ne lu ken mkpeyol man ken uma u hemban doon yôô? Yehova wa ishima ér we man mbadoon we ishima ne va lu ken uma u hemban doon cii kua u una bee mayange ga la ken tar u he, hen ape ijungwen man ican i yan vea kera lu ga la. (Pasalmi 37:11, 29; Mpase 21:3, 4) Ishimaverenkeghen la, i doo u kpa? Aluer i doo u yô, kwagh ngu u i gbe u u er yô.

Hide shi nenge ivur Bibilo i i nger ape itinekwagh i ngeren ne i lu la: “Né fa mimi, mimi kpaa una pase ne una tuhwa.” Mimi u sha kwagh u Yesu kua tom u a er sha u kuren awashima u Aôndo la, una pase se sha ikyev i ikyangenev mbi hemban vihin cii, ka isholibo man ku je la, una tuhwa. Kpa cii man u va zua a mpeveryol la yô, gba u u “fa mimi.” Er nan u seer henen mimi u sha kwagh u Yesu ne, sha er we man mbadoon we ishima mbara cii ne zua a mtsera ga? A doo Mbashiada mba Yehova u wasen we kpishi.