Hen Kwagh Ken Mkaanem Ma Aôndo

Ka Nyi ia Va Er Ukwaghaôndo?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Ka ukwaghaôndo cii ve doo yee?

Iniongo i ukwaghaôndo kpishi ngi a ior mba mimi mba ve soo u eren ishima i Aôndo yô. Aôndo nengen a ambaaior la shi we ve ikyo kpaa. Nahan kpa, kwagh er vihi yô, ior mbagenev gema kwaghaôndo hingir gbenda u kuren mbaawashima mba bov. Ngise la mbahemenev mba kwaghaôndo er mba ve hendan a ve la ican coholoo je kpaa. (2 Mbakorinte 4:3, 4; 11:13-15) Er abaver a tese yô, nyian kpa mbahemenev mba kwaghaôndo mbagenev taver ior ishima sha u ve er tswam shin ve nôngo ityav gayô ve nzughur a mbayev.—Ôr Mateu 24:3-5, 11, 12.

Bibilo tese ér ukwaghaôndo mba atô ahar, ka kwaghaôndo u mimi man kwaghaôndo u aiegh. Kwaghaôndo u aiegh tesen mimi sha kwagh u Aôndo ga. Nahan cii kpa, Yehova Aôndo soo ér ior ve fa mimi sha kwagh na.—Ôr 1 Timoteu 2:3-5.

2. Ka nyi ia va er ukwaghaôndo?

Aôndo soo ér ukwaghaôndo mba ve senge ér un doo ve ishima, kpa ve gem ve tesen kwagh na sha mimi ga la ve tsugh ior ga. Sha mimi yô, ior mba ve lu ken ukwaghaôndo mbara ka ve soo u yan ikyar a tar u Satan, Diabolo a lu hemen u ne. (Yakobu 4:4; 1 Yohane 5:19) Mkaanem ma Aôndo ôr kwagh u ukwaghaôndo mba ve ye ikyar a tar, i lu Aôndo ga la ér mba inja er idyakwase nahan. Bibilo yila idyakwase ne ér “Zegebabilon,” sha iti i gar u Babilon u ngise mcivir u aiegh hii ker, shighe u Mngerem ma Deemee ma sha ayange a Noa kar kera la. Ica a kera gba ga tsô, Aôndo una tim kwaghaôndo u a tsughun uumace shi a nzughul a ve la.—Ôr Mpase 17:1, 2, 5, 17; 18:8, 23, 24.

  3. Aôndo una er nyi i van uumace mba sha tar cii a msaanyolo?

Ijirôron i i lu van sha kwaghaôndo u aiegh la, ka kwagh u dedoo u una va er yô. Kwagh ne una bee a ieren i nzughul a ior la sha tar cii. Mayange kwaghaôndo u aiegh una kera tsume a uumace shi una va a mpav hen atô ve ga. Ior mba vea lu sha tar hen shighe la cii vea civir Aôndo u a lu u mimi tswen la ken mzough.—Ôr Yesaia 11:9; Mpase 18:20, 21; 21:3, 4.

4. Ka nyi i gbe u mbaasemaamimi vea ere?

Yehova hungur a mbaasemaamimi mba ve lu sha tar wuee ken ukwaghaôndo mba aiegh la ga. Ngu kohol ambaaior la hegen ken mzough sha u tesen ve mimi.—Ôr Mika 4:2, 5.

Yehova ka a lumun ér ior mba ve soo u civir un la ve hingir mba ken tsombor na. Azende ase man anmgbianev asev ka vea vihi ishima a vese shighe u se hii u civir Yehova la je kpa, se zua a mtsera kpishi. Ka se hingir azende a Aôndo, shi se lu ken tsombor u he, u lun a dooshima shi se lu a ishimaverenkeghen i va lun uma gbem sha won.—Ôr Marku 10:29, 30; 2 Mbakorinte 6:17, 18.

Wea soo u seer zuan a iwanger yô, ôr takerada u Bibilo Tese Ér Nyi Jimi?, ityough 15 man 16, ka Mbashiada mba Yehova ve gber u ye.

[Ape i zough a foto ne yô u shaa peeji 24]

Takerada u i yer ér Complete Encyclopedia of Illustration la/Ka or u i yer ér J. G. Heck a gber u ye