Yange i hii u gberen magazin u ú lu ôron ne ken uwer u Julai 1879. Hii shighe la je akaa gema, man kape magazin ne kpa i ze hemen u geman un je la. (Nenge ufoto mba ve lu sha ityou la.) Hii sha mgber ne je, shi se seer geman gbenda u se ngeren Iyoukura la. Se gema nyi sha mini?

Ken ityar kpishi, ior mba hemban keren shin ôron akaa a kwagh a gbe ve a mi la sha Intanet. Mba hembe zan sha Intanet, sha ci u ka taver ve u keren nyityôkwagh i ve soo cii, i vea zua a mi ma ijiir igen ga, saa sha Intanet tseegh la ga. Ior ka ve ôr ityakerada man umagazin kua upipambaabaver kpa sha Intanet.

Er ior kpishi ve hembe soon u za ôron akaa sha Intanet yô, se hide se sôr ijiir yase i sha Intanet i www.dan124.com la sha gbenda u ia hemba doon ior shi ia hemba lun ve ican ga u keren akaa her yô. Mba zan hen ijiir ne vea fatyô u ôron ityakerada i ve soo la ken ijô i hemban 430. Nahan kpa, ken mhii u uwer u Janawari ne je, mba ve ze hen ijiir yase i sha Intanet ne vea fatyô u ôron ngeren mbagenev mba i vanden gberen ken umagazin asev hanma shighe la sha Intanet. Ka hen ijiir yase i sha Intanet la tseegh a gema gberen ngeren mbara ye. *

Er se lu seer u gberen ngeren mbagen sha Intanet yô, se gema gberen Iyoukura i nan ior ken won ne upeeji 16 tseegh, a kera lu upeeji 32 er tsuaa la nahan ga. Mba gberen Iyoukura ken ijô 204. Nahan er i lu u a gema gberen Iyoukura ne upeeji 16 tseegh yô, alaghga a fatyô u seer geman i ken ijô igen kpa kpishi.

Se mba veren ishima ser, mgem ne una wase se se seer pasen ior loho u waren uma, u u dugh ken Bibilo ne. Se wa ishima ser se za hemen u gberen ngeren mba doon, mba vea wase ior u zuan a iwanger la ken ityakerada man sha Intanet cii, sha er vea wase ior mba ve soo u fan kwagh u Bibilo i tese jim jim la, u kaven i̱ yô.

Mbangeren