Er i pase ken Bibilo nahan, “jighjigh u nan” wa u lumun a kwagh u se fe un tsembelee la a akperan shio. Or u nan ne Aôndo jighjigh yô, na ngu a vangertiôr ér Aôndo una va kure uityendezwa nav cii.

Mose yange tsua akaa ken uma na a tese ér un na uityendezwa mba Aôndo jighjigh yô. (Genese 22:15-18) Yange lu sha ian i teman ken mkpeyol, sha ci u uyôughyôugh mba ken Igipiti, kpa gema ian la ta kera, “Lu un guda u i̱ er a na dang a nongoior u Aôndo imôngo a u una lu ken mdoom ma isholibo ma ma lu sha anyangem kpeghee la.” (Mbaheberu 11:25) Yange Mose tsua kwagh ne gagher, lu kwagh u una va vaa afanyô ken hemen shinii? Ei, sha ci u Bibilo kaa ér Mose “taver ishima er ngu nengen a u i nengen a Na ga la nahan.” (Mbaheberu 11:27) Mayange Mose vaa afanyô sha akaa a yange tsua u eren sha ci u jighjigh u na uityendezwa mba Aôndo la ga.

Mose yange ker u taver jighjigh u nan u mbagenev. U tesen ikyav yô, nenge ase kwagh u yange er shighe u lu inja er ikyumutya i Farao man Zegemnger u Nyian himbir Mbaiserael hen atô la. Er cier Mbaiserael iyol ér ve mba sôôn timin yô, ve vaa ve yila Yehova kua Mose. Tsô Mose er nena?

Adooga Mose yange fa ér Aôndo una pav Zegemnger u Nyian, nahan gbenda ua due u Mbaiserael vea war ga. Nahan kpa, Mose lu a vangertiôr ér Aôndo una er kwagh sha u yiman ior nav. Shi Mose yange soo ér Mbaiserael mbagenev mbara ve lu a vangertiôr u un kpa lu a mi la. Bibilo kaa ér: “Mose kaa a ior er: De cie nen ga, tile nen her, nenge nen myem u TER Una yima ne nyian yô.” (Ekesodu 14:13) Mose yange kôrcio u taver jighjigh u nan u Mbaiserael mbagenev mbara kpa? Een, yange kôrcio, sha ci u Bibilo ôr kwagh u Mose man Mbaiserael mbagenev cii ér: ‘Ka sha jighjigh u nan man ve per Zegemnger u Nyian er ka sha tareghnyaagh nahan ye.’ (Mbaheberu 11:29) Jighjigh u nan u Mose la wase un tseegh ga, a wase hanma or u nan zough a ityesen sha jighjigh u nan na la cii.

Se fatyô u dondon ikyav i Mose la, sha u nan jighjigh a uityendezwa mba Aôndo a er a vese la. U tesen ikyav yô, Aôndo tôndo zwa a vese ér, aluer se ver mcivir na hiihii ken uma wase yô, una kure mbamgbe asev mba sha iyol. (Mateu 6:33) Alaghga ishima ia hemba lun se ker u vanden keren uyôughyôughmbaakaav, gadia ka kwagh u ior kpishi ve eren nyian je la. Nahan kpa, se fatyô u lun a vangertiôr ser, aluer se nôngo sha afatyô wase cii, se kera ker u lun a akaa kpishi ga yô, se hemba veren ishima sha u civir Aôndo, nahan Yehova una na se hanma kwagh u kwagh a gbe se a mi cii. A na se ibumun ér: “Mayange Me undu u ga, Me kende u kpaa ga.”—Mbaheberu 13:5.

Shi ka se nôngo ser se wase mbagenev, ve taver jighjigh ve u nan. U tesen ikyav yô, mbamaren mba lun a mkav fa er ve lu a tom u vesen u wasen mbayev vev u nan Aôndo jighjigh taveraa yô. Gba u mbamaren vea tese mbayev vev, hii shighe u ve lu iyev la je ve fa ér Aôndo ngu, shi ka un kpa i gbe u una tese se kwagh u se er man u se er ga ye. Shi gba u mbamaren vea wase mbayev vev vea fa shi vea na jighjigh ér, aluer ve dondo akaawan a Aôndo yô, a hemba kpen ve iyol cii. (Yesaia 48:17, 18) Mbamaren ka vea wase mbayev vev vea na jighjigh taveraa ér Aôndo “ngu, man shi Un ne mba ve lu keren Un la injar” yô, ka iyua i injaa je ve ne mbayev vev ye.—Mbaheberu 11:6.