Ku hemba Aôndo tahavaa? Ei! A er nan ve ku shin ma “orihyom” ugen nana lu a tahav a hemba “Aôndo Uhembanagee”? (1 Mbakorinte 15:26; Ekesodu 6:3) Aôndo ngu a tahav mbu been aa ku kera sha u nderen mbara mba ku u woo ve la; shi a tôndo zwa u va eren kwagh ne ken tar u he la kpaa. * Kpa ityendezwa la ka i mimi nan je? Yesu, wan u Aôndo iyol na ôr se mkaanem ma maa wase se, se lu a ishimaverenkeghen yô.—Ôr Mateu 22:31, 32.

Yesu yange kaa a Mbasadushi, mba ve na jighjigh a mnder u shin ku ga la ér: “Kwagh u mnder u mbakpenev yô, ne mba a ôr kwagh u Aôndo lu kaa a ven la er: Mo M ngu Aôndo u Aberaham man Aôndo u Isaka man Aôndo u Yakob kpaa, gaa? Aôndo ka Aôndo u mbakpenev ga, kpa ka u mbaumav.” Heen ne, Yesu lu ôron kwagh u Aôndo ôr a Mose ken ageva u yeghen usu, anyom a kar hegen i kom er 3,500 nahan la. (Ekesodu 3:1-6) Sha kwaghôron u Yesu yô, mkaanem ma Yehova kaa a Mose ér, “Mo M ngu Aôndo u Aberaham man Aôndo u Isaka man Aôndo u Yakob” la, tese ér ityendezwa i sha kwagh u mnder u shin ku la, ka kwagh u una bunde mayange ga yô. Sha ci u nyi?

Hiihii yô, shighe u Yehova lam a Mose la nahan, tertamen Aberaham man Isaka kua Yakob cii kpe ica i gba. Aberaham yange kpe anyom kar 329 hen shighe ne; Isaka kpa kpe kuma anyom 224 hen shighe ne, shi Yakob kpa kpe kera kuma anyom 197 nahan. Kpa Yehova kaa ér “Mo m ngu,” Aôndo ve, a kaa ér “Yange M lu” Aôndo ve ga. Yehova ôr kwagh u uter mbatsev mba utar mban er ve lu uma hen shighe la nahan. Sha ci u nyi?

Yesu kaa ér “Wen [Yehova] yô, ka Aôndo u mbakpenev ga, ka u mbaumav je.” Mkaanem man wase se u fan ser, aluer mnder u shin mbakpenev ngu ga yô, Aberaham man Isaka kua Yakob vea saa shin ku gbem sha won. Aluer kwagh ngu nahan yô, Yehova una lu Aôndo u mbakpenev, a lu u mbaumav ga. Nahan a tese ér ku hemba Yehova agee, inja er Aôndo ngu a tahav mbu saghen mbacivir un mba jighjigh mban ken ikyangenev mbi kuugh ga nahan.

Tsô se kure ikyaa sha kwagh u Aberaham man Isaka kua Yakob, man mbacivir Yehova mbajighjigh mba ve kpe mbara cii ser nyi? Yesu yange ôr mkaanem ma taver ishima nahan ér: “Ka sha a Na man ve cii ve lu uma ye.” (Luka 20:38) Sha mimi yô, awashima u Yehova u va nderen mbacivir un mbajighjigh mba ve kpe la ka bunden ga, je yô henen kwagh ve inja er mba uma her nahan. (Mbaromanu 4:16, 17) Yehova una za hemen u umbur mbacivir un mbajighjigh mba ve kpe mbara zan zan una va kar nderen ve sha shighe u a ver la, vea hide a lu uma.

Ishimaverenkeghen i va hiden lun imôngo vea ior asev mba ve kpe la, i doo u kpa? Yô, umbur wer Yehova hemba ku agee yem zende zende, kighir ngi ga. Kwagh môm una yange un u kuren ityendezwa na i va nderen mbakpenev la ga. Er nan u seer henen kwagh u ityendezwa i mnder u shin ku la, man kwagh u Aôndo u a er ityendezwa shon la ga? U er nahan yô, u seer kporom hen Yehova, “Aôndo . . . u mbaumav” la.