U na jighjigh wer Aôndo nguu? Aluer u na jighjigh wer ngu yô, u fatyô u hônon uwegh sha ma kwagh u tesen ér ngu kpa? Jighilii yô, akav nga kpishi a tesen ér Orgban se, u nan lu a kwaghfan man tahav kua dooshima nan ngu yô. Ka nyi i lu ikyav nee, man i kom sha nyi gbenda? U soo u zuan a mlumun yô, time sha kwagh u apostoli Paulu yange nger hen Mbakristu mba ken Roma la.

Paulu kaa ér: “Hii sha igbetar je mba nengen a mlu Na u i nengen a mi sha ashe ga la, inja na yô, ka agee a Na a tsôron man mlu Na u sha inja i Aôndo la, mba nengen a mi sha ashe a ishima ken aeren a Na. Nahan mba a ityôkwagh i ishôôgh ga.” (Mbaromanu 1:20) Paulu tese wang ér Orgbanakaa pase se mlu na sha akaa a a gbe la. De se time sha mkaanem ma Paulu man vighe vighe.

Paulu kaa ér mba nengen a aeren a Aôndo la, “hii sha igbetar je.” Ishember i ken zwa Grika i i gem i heen ér ‘tar’ la ngi ôron kwagh u Tar u se lu shami ne ga. Kpa ngi ôron kwagh u uumace. * Nahan Paulu yange lu ôron ér hii shighe u i gba uumace la je, ve hii u nengen a aeren a Orgbanakaa ken akaa a i gbe la.

Se mba nengen a ikyav ne hanma shighe cii. Ikyav ne ngi myer ga, kpa mba “nengen a mi” je. Akaa a Aôndo a gbe a cii, a vesen man a kiriki cii, tese wang ér Orgbanakaa ngu tseegh ga, kpa a tese aeren a na a dedoo la kpaa. Akaa a Aôndo a gbe a, a lu a kwaghfan kpishi la wase se u nengen a kwaghfan na gaa? Asan a sha kwavaôndo man zegemnger pase se agee a na ga he? Akaayan a doon atô kposo kposo man mdugh kua m-mir u iyange cii tese er uumace ve doo un ishima ga he?—Pasalmi 104:24; Yesaia 40:26.

Ikyav la ngi kpeher kpeher nan je? Ngi kpeher kpeher je yô, mba ve vende u nengen a i shin ve nyiman Aôndo cii “mba a ityôkwagh i ishôôgh ga.” Orfantakerada ugen tese ikyav i kwagh ne sha gbenda ne: Tôô wer deraba ugen venda u dondon ikyav i í tim sha gbenda, i nger shami ér “Goom ken Imese—Tôô Gbenda Ugen” la. Ordasenda ugen maa kôr orderaba la, gba ngeren kwagh u orderaba shon shin inya. Orderaba shon maa gba kaan ér un nenge a ikyav i í tim sha gbenda la ga. Kpa ordasenda la ungwa un her ga, sha ci u ikyav la ngi kpeher kpeher je gande u or kaan ér nan nenge a i ga, shi orderaba la pir ashe kpaa ga. Bee kera yô, er a lu orderaba yô, ka tom na u nengen a imba ikyav la shi eren sha kwagh u i nger sha i la. Kape ikyav i tesen ér Aôndo ngu la kpa i lu vough je la. “Ikyav” la ngi kpeher kpeher je. Er se lu ior mba henen sha kwagh yô, se mba nengen a ikyav ne. Or môm nan ngu a ishô sha u nyiman ikyav ne ga.

Jighilii yô, takerada u igbetar la pase se kwagh u Orgbanakaa kpishi je. Kpa talerada ugen ngu u u hembe pasen se kwagh u Orgbanakaa yô, ka Bibilo. Se ôr Bibilo yô, se zua a mlumun sha mpin u injaa ne: Ka nyi i lu awashima u Aôndo sha tar wase ne kua uumace mba ve lu shin u nee? Aluer se zua a mlumun sha mpin ne yô, una wase se u seer kporom hen Aôndo, un u i ‘nengen a aeren a Na’ ken tar u se lu ker ne.