Tôô ase wer ter ugen ngu lamen vea wan na u lun anyom ataankarahar. A kaa a na ér, “Tsuaa tsuaa la, Aôndo gba sha man tar kua hanma kwagh u a lu sha u cii, shi gba iyange man uwer kua asan.” Wan la hen sha kwagh ne gbaang, maa pine ér, “Baba, ka an nan gbe Aôndo?”

Ter na kaa ér, “Or môm gba Aôndo ga. “Aôndo gba je tsô ngu.” Mlumun u tiônnôôn la maa kuma wan ti. Nahan kpa, ngur wan ikyondo yô, mpin ne zer van un ken ishima gbem. Taver un u kaven er or a gba lun a mhii shio nahan yô. Gadia sha man tar je kpa mba a mhii. A pine ér, ‘Ka han Aôndo a dughu?’

Bibilo na mlumun sha mpin ne ér nyi? I̱ na mlumun vough er ter u se tese ikyav sha a na ne nahan. Mose nger ér: “TERE, . . . Er i lu a due a iwo ken igbar ga, man er U lu a gba inya man tar ga, hii sha uicôronmbaashighev je zan zan gbem sha won, U ngu Aôndo.” (Pasalmi 90:1, 2) Kape profeti Yesaia kpa yange ôr je la, ér: “U vande fan gaa? M-ongo kpaa, u ungwa gaa?” TER ka Aôndo u tsôron je, Orgban u akighir a tar.” (Yesaia 40:28) Kape takerada u Yuda kpa u er kwagh u Aôndo je la, ér ngu “zan zan gbem sha won.”—Yuda 25.

Avur a Bibilo ne tese ér Aôndo ka “Tor u tsôron,” er apostoli Paulu kaa nahan. (1 Timoteu 1:17) Inja na yô, Aôndo gba je tsô ngu, sea hile a ôr anyom a yem ken ijime nan nan kpa, se fa ape yange hii ga. Shi ken hemen kpa una za hemen lun gbem sha won. (Mpase 1:8) Sha nahan yô, mlu na u tsôron la ka ieren na i hange hange i tesen ér ngu Aôndo u Uhembanagee.

Er nan ve ka i taver se u kaven kwagh ne yumu? Ka sha ci u ayange a mtse wase ken tar ne vese ga kpishi, nahan gbenda u se nengen shighe la ngu kposo a mnenge u Yehova sha kwagh u shighe. Er Aôndo a lu u tsôron yô, anyom dubu di gema nga un er iyange i môm nahan. (2 Peteru 3:8) U tesen ikyav yô, ahungwa u pulugh u ngu a tsa ayange 50 tseegh la una fatyô u kaven kwagh u se uumace mba ka se tsa anyom 70 shin 80 laa? Mayange ga! Bibilo kaa ér se mba er ahungwa nahan, hen Aôndo u a gbe se la. Mhen wase je kpa yina sha u na ica je. (Yesaia 40:22; 55:8, 9) Sha nahan yô, kera taver se er i hii ve akaa a Yehova agen a hembe u uumace u kaven vindi vindi la ga.

Shin er alaghga a taver se u fan er Aôndo a lu u tsôron nahan kpa, se fatyô u nengen er kwagh a lu nahan mimi yô. Luun er ka orgen nan gbe Aôndo yô, ma i lu or la ma nan gbe akaa cii ye. Nahan kpa, ka Yehova a ‘gbe akaa cii’ ye. (Mpase 4:11) Heela tseegh ga, se fa er sha man tar yange ve vande lun ga yô. (Genese 1:1, 2) Ka han akaa ne a dughu? Or u nan gbe a la yange nan hii lun. Shi yange lu cii man i gba akaauma agen ye, er Wan na u môm môm man shi mbatyômov nahan. (Yobu 38:4, 7; Mbakolose 1:15) Sha nahan yô, kwagh ne tese wang ér yange hii lun tswen. I gba un a gba ga; kwagh môm vande lun a na, u gema gba un ga.

Mlu wase kua u sha man tar cii tese ér Aôndo u tsôron ngu. Aôndo u a er sha man tar shi a ver atindi a kuran ve la, gba je tsô ngu. Ka un tseegh lu u una fatyô u fehen iôôn i uma ken akaa a uma ye.—Yobu 33:4.